Beni n sɔi ti buraa la ti ba yi’ira ti ‘Abunɔ’ la yeti eŋa san di Arut la wan ‘sa’am’ eŋa lɔɣɔrɔ? (Arut 4:1, 6)

Baabule saŋa la, buraa san di pɔɣa ge ka dɔɣɛ bia yɛla ase’a n nari ti ba baŋɛ: Ani n wan sɔna a samanɛ la? A yu’urɛ wan bɔregɛ mɛ yoi? Moses Lɔɔ la basɛ ti to baŋɛ soke ana wa lebesego mɛ.

Ani n wan sɔna buraa n ki ge gee a samanɛ bii buraa n nyaa de nasa ge koose a samanɛ? A suɔ bii a yire nɛra ta’an malum da samanɛ la. Bala ta’an basɛ ti a yidoma la kelum sɔna samanɛ la.​—Mal. 25:23-28; Kan. 27:8-11.

La wan eŋɛ la wani ti buraa la n ki la yu’urɛ da bɔregɛ yire la poan? Ba yuun ni basɛ ti buraa la n ki la suɔ n di a pɔɣa la wuu ba yuun eŋɛ Arut se’em la. Buraa n ni di a suɔ n ki pɔɣa ge dɔɣɛ bo en la wan eŋɛ se’em ti a suɔ la yu’urɛ da saalum. Yelesonɛ wa yuun le soŋera pɔ̃kɔɔrɛ la mɛ.​—Tɛɛ. 25:5-7; Mt. 22:23-28.

Geele Naomi yele la bisɛ. A yuun ele la buraa ayima yu’urɛ n de Elimelek. Buraa la, la a dayɔɔsi siyi la n yuun ki la, Naomi yuun ka tari nɛra n wan bisera en. (Arut 1:1-5) Naomi n yuun lebe Yuda tiŋa la, a yuun yele a poyɔa Arut ti a yele Boaz ti a da ba samanɛ la lebena. Boaz yuun dela Elimelek suɔ. (Arut 2:1, 19, 20; 3:1-4) Ge Boaz yuun baŋɛ ti suɔ ayima me boi lɛm en gana eŋa, ti Baabule la yi’ira en ti ‘Abunɔ.’ Eŋa n tari yɔ’ɔ yia ti a bisɛ nyaa a wan da samanɛ la lebena bii a kan da.​—Arut 3:9, 12, 13.

Pɔsega la, ‘Abunɔ’ yuun boti a da mɛ. (Arut 4:1-4) A yuun baŋɛ ti ligesa’aŋɔ n boi bim ti Naomi me kan ta’an dɔɣɛ bia ti a tee soe Elimelek samanɛ la. Abunɔ yuun wan dekɛ ni samanɛ la pa’asɛ la amea lɔɣɔrɔ poan ti la tara nyuurɔ zo’e zo’e bɔ’ɔra en.

Ge Abunɔ n yuun ta baŋɛ ti la dela a di Arut pa’asɛ la, a yuun zaɣesɛ mɛ. A yeti: ‘Mam san yeti n da samanɛ la, n wan sa’am n mea.’ (Arut 4:5, 6) Beni n sɔi ti a yuun tee a puti’irɛ?

Abunɔ bii se’em san di Arut dɔɣɛ dayɔa, dayɔkaŋa n wan sɔna Elimelek samanɛ la. Bala wan ‘sa’am’ Abunɔ lɔɣɔrɔ la wani? Baabule la ka pa’alɛ ge daanse’ere la ta’an dɛna yele aŋa wa.

• Yia la, ligeri la ti a wan sa’am la wan ta basɛ la yoo sɛla n sɔi la Elimelek samanɛ la kan le ta dɛna a denɛ. La wan dɛna Arut bia la dɛna.

• N yi’i, la wan dɛna la eŋa zugbere yele ti a ugera Naomi la Arut.

• N tã’a, Abunɔ la Arut san dɔɣɛ kɔma, kɔma la wan laɣum pu Abunɔ lɔɣɔrɔ la mɛ

• N naasi, Abunɔ san ka tara bia, Arut n wan dɔɣɛ bisɛka la n wan soe Abunɔ la Elimelek samana la. Bala a san ki, bisɛka ti ba dekɛ Elimelek yu’urɛ siɣɛ en la n wan sɔna samanɛ la ge daɣɛ eŋa bia. Bala la, Abunɔ yuun ka boti a dekɛ a taresum la soŋɛ Naomi. A boti la a suɔ ayima yu’urɛ n de Boaz tuɣum eŋɛ bala. Boaz yuun eŋɛ la bala sɛla n sɔi la a ka boti sira la n ki la ‘yu’urɛ saalum a sɔ’ɔlum’ poan.​—Arut 4:10.

Abunɔ yuun boti la a tara amea yu’urɛ la a lɔɣɔrɔ. A yuun tari la n mea ma’a tara puti’irɛ. La boi bim ti Abunɔ yuun tiregeri mɛ ti a yu’urɛ la bɔna ge a yu’urɛ la yuun bɔregɛ mɛ ta paɛ zina. A me yuun ka dekɛ yɔ’ɔ seko n boi de to’ore ti Boaz nyɛ la tum tuuma soŋa. Boaz yu’urɛ laɣum pa’asɛ Mɛzaaya la tuusum poan mɛ n de Yezu Krista la. Bisɛ la de nimbaalega se’em la Abunɔ n tari n ma’a tara puti’irɛ ge ka bɔta a soŋɛ a tadaana ti yele paɛ en la!​—Mt. 1:5; Lu. 3:23, 32.