1. Nɛreba zo’e zo’e ni nyɛ la bem ba san ni pɔsɛ wa’an to tansugere zamesegɔ na? (Le bisɛ foote la.)

 TI’ISƐ bisɛ ti nɛra la a pɔɣa n pɔsɛ keŋɛ Yehowa Sɛɛradoma na’am pu’usegɔ deo poan, ba puurɛ pee mɛ la ban nyɛ ton tari nɔŋerɛ bɔ’ɔra taaba se’em ge me to’e ba soŋa soŋa la. Ban boi sore zuo yɛa kule la a pɔɣa la yele en yeti, ‘Yehowa Sɛɛradoma boi la ba to’ore mam puurɛ pee mɛ la mam keŋɛ bim la.’

2. Beni n sɔi ti basɛba ni basɛ Yehowa pu’usegɔ?

² Nɔŋerɛ se’ere n boi Yehowa nɛreba tiŋasuka la ka tari makerɛ. Ge yelemɛŋɛrɛ la dela Yehowa Sɛɛradoma ka di mi’a. (1 Yo. 1:8) Bala la to san ni naɛ la to mabiisi bɔna tansugere la poan la, to nyaa ni nyɛta la ba tuurɛ. (Arom 3:23) Susa’aŋɔ yele la dela basɛba ni basɛ ti mabiisi tuure la daam ba mɛ ti ba ka le pu’usa Yehowa.

3. Bem n wan basɛ ti to baŋɛ Yezu yelemɛŋɛrɛ podɔleba? (Yon 13:34, 35)

³ Le malum geele zaseŋɔ wa zuo la bisɛ soŋa. (Kaalɛ Yon 13:34, 35.) Nɛreba wan eŋɛ la wani baŋɛ yelemɛŋɛrɛ kristakɔma? La dela nɔŋerɛ ge daɣɛ ba wan ana kasi la. Le tɛ̃ra ti Yezu yuun ka yeti: ‘Wana ti ho wan baŋɛ ti ya dela mam podɔleba.’ A yuun tuɣum yeti: ‘Wana ti ba wan baŋɛ ti ya dela mam podɔleba.’ Bala la Yezu yuun pa’alɛ ti daɣɛ eŋa podɔleba ma’a n wan baŋɛ ti yelemɛŋɛrɛ kristakɔma tari la nɔŋerɛ bɔ’ɔra taaba ge nɛresɛba n daɣɛ kristakɔma me wan baŋɛ.

4. Bem yɛla ti nɛreba basɛba ta’an ni bɔta ti ba baŋɛ yelemɛŋɛrɛ kristakɔma poan?

 ⁴ Nɛresɛba n daɣɛ Yehowa Sɛɛradoma ta’an ni soke yeti: ‘Nɔŋerɛ wan eŋɛ la wani ta’an basɛ ti nɛra baŋɛ Yezu yelemɛŋɛrɛ podɔleba? Yezu yuun eŋɛ la bem pa’alɛ ti a tari la nɔŋerɛ bɔ’ɔra a podɔleba? Ge zina beere wa, to wan eŋɛ la wani ta’an tɔɣesa Yezu makesonɛ la?’ Sɛɛradaana woo nari ti a ti’isɛ soke ana wa yele taɣesɛ. Bala wan soŋɛ tɔ ti to tara nɔŋerɛ bɔ’ɔra taaba la ka pakɛ la ton ka di mi’a la.​—Ep. 5:2

5. Tɔɣɛ pa’alɛ Yezu n yuun yele sɛla ti la bɔna Yon 15:12,13 la vuurɛ.

⁵ Yezu yuun basɛ ti la niɛ peelumi ti eŋa podɔleba wan tara la nɔŋerɛ n boi de to’ore bɔ’ɔra taaba. (Kaalɛ Yon 15:12, 13.) Tɛ̃ra ti Yezu yuun bo ba nɔɔrɛ ti: ‘Ya nɔŋɛ taaba wuu mam nɔŋɛ ya se’em la.’ Wana wa vuurɛ? Yezu yuun boti a pa’alɛ ti nɛra wan nɔŋɛ a tadaana gana amea hali la yele san puɣum pakɛ a wan ki bo a tadaana. b

6. Naayinɛ Yelesum la pa’alɛ to nɔŋerɛ yele n pakɛ se’em la wani?

⁶ Naayinɛ Yelesum la pa’alɛ ti nɔŋerɛ dela ninmɔ’ɔrɛ yele. Makerɛ, nɛreba zo’e zo’e nɔŋɛ la Baabule kaalegɔ zɛ’ɛsi wa n yeti: ‘Naayinɛ dela nɔŋerɛ.’ (1 Yo. 4:8) ‘Nɔŋɛ ho tadaana wuu hon nɔŋɛ homea se’em la.’ (Mt. 22:39) ‘Nɔŋerɛ zuo ti to dita sugeri bɔ’ɔra taaba yɛla zo’e zo’e poan.’ (1 Pe. 4:8) ‘Nɔŋerɛ kɔ’ɔn bɔna la bala wuusa.’ (1 Ko. 13:8) Kaalegɔ zɛ’ɛsi wa la kaalegɔ zɛ’ɛsi sise’esi basɛ ti la niɛ peelumi ti la yele pakɛ mɛ ti to tara halisoma wa.

7. Beni n sɔi ti Sitaana kan ta’an basɛ ti nɛreba tara nɔŋerɛ bɔ’ɔra taaba la nɔyinɛ?

 ⁷ Nɛreba zo’e zo’e ni soke yeti: ‘Mam wan eŋɛ la wani baŋɛ yelemɛŋɛrɛ pu’usegɔ? Pu’usegɔ woo yeti bama pa’ali la yelemɛŋɛrɛ la ge ban pa’alɛ Naayinɛ yele se’em la boi la de to’ore.’ Sitaana basɛ ti pumpɔreŋɔ pu’usegɔ zo’e zo’e n bɔna. Wana wa basɛ ti la kpe’em bo nɛreba mɛ ti ba baŋɛ yelemɛŋɛrɛ pu’usegɔ la. Sitaana me kan ta’an basɛ ti Kristakɔma tara nɔŋerɛ bɔ’ɔra taaba tingɔŋɔ wa za’a poan. Yehowa ma’a n wan ta’an eŋɛ bala. Yɛm boi bini mɛ ti to yele bala se’ere n sɔi la yelemɛŋɛrɛ nɔŋerɛ ze’ele la Yehowa zɛ’an na. Sɛba ma’a ti Yehowa kã bo ba ti ba tara a vo’osum la n wan ta’an tara nɔŋerɛ bɔ’ɔra taaba. (1 Yo. 4:7) Bala n sɔi ti Yezu yuun yeti eŋa podɔleba ma’a n wan tara nɔŋerɛ bɔ’ɔra taaba la.

8-9. La ani nɛreba zo’e zo’e la wani la ban nyɛti Yehowa Sɛɛradoma n tari nɔŋerɛ se’em la?

⁸ Wuu Yezu n yele se’em la, nɛreba zo’e zo’e mi yelemɛŋɛrɛ kristakɔma doose la ban tari yelemɛŋɛrɛ nɔŋerɛ bɔ’ɔra taaba la. Makerɛ, Mabia ayima yu’urɛ n de Ian ti’isɛ la a yia laɣesegɔ ti ba yuun eŋɛ dɛ sports stadium poan n lɛm la a yire. A tabelɛ keŋɛ sports stadium la poan ŋmaresi fii n tole ta bisɛ boole. A yeti: “Sɛɛradoma la n yuun boi laɣesegɔ la poan la yuun boi la ba to’ore la nɛresɛba n yuun ni keŋɛ bim ta bisera boole la. Sɛɛradoma la yuun mi la guŋerɛ ge me maalɛ bamea soŋa. Ba kɔma la me yuun mi la bamea tarega.” A le yeti: “Sɛla n gani za’a dela nɛreba wa yuun tari la suma’asum ge me basɛ ti sɛla ti ba tara la seke ba. Mam me n yuun boti sɛla n vom poan n bala. Mam ka tɛ̃ri yetɔɣum la ti ba yuun bo dadendaarɛ la ge mam kɔ’ɔn tɛ̃ra la Sɛɛradoma la n yuun tari halese’a la.” c Sira, ton tari yelemɛŋɛrɛ nɔŋerɛ bɔ’ɔra taaba la n sɔi ti to tara hala ana wa. Ton nɔŋɛ to mabiisi la zuo to tari la gilema bɔ’ɔra ba ge me ita ba soŋa.

⁹ La me yuun ani mabia ayima yu’urɛ n de John la bala la eŋa n yuun pɔsɛ keŋɛ tansugere zamesegɔ la. ‘Nɛra woo . . . daa to’e mam soŋa mɛ. La daa ani wuu ba dela nɛreba n ani kasi la. Ban tari yelemɛŋɛrɛ nɔŋerɛ bɔ’ɔra taaba la basɛ ti mam baŋɛ ti yelemɛŋɛrɛ pu’usegɔ la n wana.’ d Yele ana la yɛla zo’e zo’e pa’alɛ ti Yehowa nɛreba n sirum de yelemɛŋɛrɛ kristakɔma.

10. Bɔnkani poan ti to ni tara yɔ’ɔ ti to eŋɛ pa’alɛ ti to tari nɔŋerɛ? (Le bisɛ tiŋanɔɔrɛ yelesum la.)

¹⁰ Wuu ton puɣum baŋɛ se’em la, to mabiisi la ka di mi’a. Saŋa ase’a ba ta’an ni tɔɣɛ sɛla ti la daam tɔ. e (Yam. 3:2) Bɔnkaŋa poan la to ni tara yɔ’ɔ ti to eŋɛ pa’alɛ ti to nɔŋɛ taaba mɛ. Bala la, to wan ta’an zamesɛ la bem Yezu makesonɛ la poan?​—Yon 13:15.

11. Yames la Yon yuun tari la bem halebe’o? (Le bisɛ foote la.)

¹¹ Yezu yuun mi ti a podɔleba la ka di mi’a. Bala zuo la, a yuun doose la nɔŋerɛ sore poan demese ba puti’irɛ la, la wan eŋɛ se’em ti Yehowa puurɛ pee la  ba. Saŋa kasɛka, a tuuntuneba bayi n de Yames la Yon, yuun yele la ba ma ti a yele Yezu ti a ta bo ba kpe’eŋo a Na’am la poan. (Mt. 20:20, 21) Yames la Yon yuun tari la zɛ̃kɛ n mea la punya’anɛ.​—Mag. 16:18.

12. Yames la Yon ma’a n yuun tari halebe’ero? Tɔɣɛ pa’alɛ.

¹² La yuun daɣɛ Yames la Yon ma’a n yuun tari halebe’ero saŋa ase’a. Dãalɛ basɛ tuuntuneba bana la n yuun eŋɛ sɛla: ‘Tuuntuneba pia la n daa ta wum dena wa la, ba sunsɔa daa nyie mɛ la suurɔ tuyi la.’ (Mt. 20:24) Daanse’ere la yuun ta’an dɛna ti Yames, Yon la tuuntuneba bana la yuun ŋmɛ la nɔkpe’ene paa. Basɛba yuun ta’an yeti: ‘Yamam ti’isɛ ti ya dela bani bɔta kpe’eŋo Na’am la poan? La daɣɛ yamam ma’a n laɣum naɛ la Yezu tum zo’e zo’e. Tomam la yamam me nari ti to laɣum tara kpe’eŋo deyina, nɛra ka gani a tadaana!’ Lan yeen dɛna se’em, tuuntuneba la yuun basɛ ti yele wa sa’am nɔŋerɛ se’ere ti ba tara bɔ’ɔra taaba la mɛ saŋa fii wa poan.

13. Hali la tuuntuneba la n yuun tuusini se’em la, Yezu yuun eŋɛ la bem? (Matu 20:25-28)

¹³ Yezu yuun eŋɛ la bem bɔnkana wa poan? A sunsɔa yuun ka nyie. A yuun ka yeti a wan tee tuuntuneba n nyani bama, siregera bamea ge tara nɔŋerɛ bɔ’ɔra taaba. Ge Yezu yuun tuɣum ma’ɛ  la amea sɔsɛ la buraasi wa se’ere n sɔi la, ba yuun boti ba eŋɛ la sɛla n ani soŋa. (Kaalɛ Matu 20:25-28.) Hali tuuntuneba la n yuun kɔ’ɔn ŋmɛ’ɛra nɔkpe’ene saŋa woo ti ba baŋɛ se’em n wan dɛna ba nɛŋadaana la, Yezu yuun kelum tara la nɔŋerɛ bɔ’ɔra ba.​—Mr. 9:34; Lu. 22:24.

14. Ba yuun uge Yezu tuuntuneba la bɔnkani poan?

¹⁴ Yezu yuun tɛ̃ri ti, ban uge a tuuntuneba la bɔnsɛka poan la, ta’an tee ba halɛ. (Yon 2:24, 25) Ba yuun uge ba la zɛse’esi ti pu’usegɔ nɛŋadoma pa’ala nɛreba ti ba ɛɛra kpe’eŋo la yu’urɛ. (Mt. 23:6; dekɛ makɛ la vidiyo la zuo n de The Front Seats in the Synagogue n boi Matu 23:6 zaseŋɔ yele la poan.) Yuda nɛŋadoma la me yuun yeti bama nyani nɛreba mɛ. f (Lu. 18:9-12) Yezu yuun bɔkɛ ti bɔnkana wa wan ta’an tee a tuuntuneba la n geele bamesi la nɛreba se’em. (Mag. 19:11) A yuun mi ti ba wan ba’asum tue. Ba me san tue, a ni di’isa la suure la ba. A me yuun mi ti ba tari la putɛsonɛ bala la, a yuun soŋɛ ba mɛ ti ba ta’an basɛ zɛ̃kɛ n mea, punya’anɛ ge tara nɔŋerɛ.

15. To wan ta’an zamesɛ la bem Yames la Yon yele la poan?

¹⁵ To wan ta’an zamesɛ yɛla zo’e zo’e Yames la Yon yele la poan. Ba yuun tue mɛ la ban yuun eeri kpe’eŋo Na’am la poan la. Tuuntuneba la me yuun tue mɛ la ban yuun basɛ ti yele wa sa’am ba nɔyinɛ la. Ge Yezu yuun tari la nɔŋerɛ bɔ’ɔra a tuuntuneba 12 la ge me nyɔkera amea la ba. To zamesɛ la bem yele wa poan? Sɛla n de ninmɔ’ɔrɛ dela, daɣɛ yelese’a ti nɛreba tue de poan ge la dela ton iti se’em tuure la poan. Bem n wan ta’an soŋɛ tɔ? To sunsɔa san nyie la to mabia, to ta’an soke tomea yeti: ‘A eŋɛ la bem wana mɔpi ti la daam mam? A yele la basɛ ti mam halebe’o n niɛ peelumi ti la nara ti n tiregɛ basɛ dɛ? Daanse’ere nɛra la n eŋɛ sɛla ti la daana mam la me ta’an tara yele ziɣera de poan? Hali n san puɣum tara buurɔ ti n sunsɔa nyie, la kan ana soŋa ti n tamɛ sɛla ti a eŋɛ la?’ To san tara nɔŋerɛ bɔ’ɔra to mabiisi, bala mea nɔɔ ti to wan eŋɛ pa’alɛ ti to dela Yezu yelemɛŋɛrɛ podɔleba.

16. To wan ta’an le zamesɛ la bem Yezu makesonɛ la poan?

¹⁶ Yezu makesonɛ la basɛ ti to baŋɛ ti la nari ti to tiregɛ bɔkɛ lan ani to mabiisi la se’em. (Mag. 20:5) Yezu nɔɔn mi sɛla n boi asaala suuren mɛ ge tomam ka mi. Tomam me wan ta’an di’isa suure, to mabiisi san tue to. (Ep. 4:1, 2; 1 Pe. 3:8) To san mina ba soŋa soŋa to wan di’isa suure la ba. Bisɛ makerɛ wa.

17. Kaarɛ bisegadaana ayima yuun nyɛ nyuurɔ la wani la eŋa n yuun baŋɛ mabia ayima soŋa la?

¹⁷ Kaarɛ bisegadaana ayima n boi East Africa tiɛ la mabia ayima yele ti a yuun ti’isa ti a ka mi guŋerɛ. Kaarɛ bisegadaana wa yuun eŋɛ la wani? A yeti: “Mam yuun ka boti n lɔkera mabia wa ge mam yuun tuɣum bɔta la n baŋɛ en soŋa.” Kaarɛ bisegadaana la n yuun naɛ la mabia la sɔsɛ la, a yuun baŋɛ a bɔŋa la n ani  se’em mɛ ti a tara halɛ denɛ la. Kaarɛ bisegadaana la le yeti: “Mam bɔkɛ lan yuun kpe’em bo en ge ti a nyaŋɛ eŋɛ teere la se’em la yuun kɛ̃ mam suure mɛ. To yuun nyaa dela zɔtɔ.” Yelemɛŋɛrɛ, to san tiregɛ baŋɛ to mabiisi la soŋa, la wan dɛna naana bɔ’ɔra tɔ ti to tara nɔŋerɛ bɔ’ɔra ba.

18. Soke ani ti la nara ti to soke tomea, mabia san tue to? (Magaha 26:20)

¹⁸ Saŋa ase’a, la ni nara mɛ ti to naɛ la to mabia la n tue to la maalɛ yele la. Ge ti to nyaa sɔsɛ la en la, to ta’an soke tomea yeti: ‘Mam mi yele la za’a?’ (Mag. 18:13) ‘La wan ta’an dɛna ti a ka mi mɛ ge eŋɛ?’ (Pa. 7:20) ‘Mam tabelɛ tue nɛra bala?’ (Pa. 7:21, 22) ‘N san naɛ la nɛra la sɔsɛ, la wan basɛ ti yele la malum gaŋɛ nu’usi?’ (Kaalɛ Magaha 26:20.) To san ti’isa soke ana wa yele, ton tari nɔŋerɛ bɔ’ɔra to mabiisi la wan basɛ ti to tamɛ de yele.

19. Hon lu ho suure ti ho eŋɛ la bem?

¹⁹ Yehowa Sɛɛradoma za’a iti pa’ala ti ba sirum dela Yezu yelemɛŋɛrɛ podɔleba. Tomam ayima ayima woo eŋɛ pa’alɛ ti to dela Yezu podɔleba ge me tara nɔŋerɛ bɔ’ɔra to mabiisi hali ba san tue to. To iti bala soŋera la nɛreba ti ba baŋera yelemɛŋɛrɛ pu’usegɔ la ge pa’asa to poan ti to pu’usa Yehowa, nɔŋerɛ Naayinɛ la. Basɛ ya ti to kɔ’ɔn lu to suure ti to wan eŋɛ pa’alɛ ti to dela yelemɛŋɛrɛ Kristakɔma n tari nɔŋerɛ.