1. Bem n ta’an basɛ ti Yehowa yamesi basɛba ti’isa buyi buyi?

 BISƐ lan de yelesonɛ se’em la ton mi ti Yehowa puurɛ pee mɛ la a nɛreba la! Baabule la yeti: ‘Yehowa suure kɛ̃ a nɛreba mɛ.’ (Ym. 149:4) Ge saŋa ase’a, basɛba giila ta’an kɔ’ɔsɛ mɛ ti ba ti’isa ti Yehowa puurɛ ka pee la ba. Yehowa yamesi n boi diimi sa me yuun ti’iseri la bala saŋa ase’a.—1 Sa. 1:6-10; Yob 29:​2, 4; Ym. 51:11.

2. Bani ti Yehowa puurɛ pee la ba?

² Baabule la basɛ ti la niɛ peelumi ti Yehowa puurɛ ta’an pee la asaaleba. Wani wani? La dela to tara sakerɛ bɔ’ɔra Yezu Krista ge muse ko’om. (Yon 3:16) To nyaa ni basɛ ti nɛreba baŋɛ ti to basɛ to be’em mɛ ge yele Naayinɛ ti to wan tum eŋa n boti sɛla. (Tm. 2:38; 3:19) Yehowa puurɛ ni pee mɛ to san eŋɛ yele ana wa ta’an tara bɔnsoŋa la en. To san tiregɛ la to paŋa za’a dɔla to kã’a nɔbiŋere la, Yehowa puurɛ ni pee mɛ la tɔ ge basɛ ti to dɛna a zɔdoma.—Ym. 25:14.

3. To wan sɔsɛ la bem?

³ Ge beni n sɔi ti saŋa ase’a basɛba ni ti’isa ti Naayinɛ puurɛ ka pee la ba? Yehowa ni eŋɛ la wani pa’alɛ ti a puurɛ pee mɛ la tɔ? Kristabia wan eŋɛ la wani ta’an tara suure lua ti Naayinɛ puurɛ pee mɛ la en?

 SƐLA N SƆI TI BASƐBA TA’AN TI’ISA TI YEHOWA PUURƐ KA PEE LA BA

4-5. To san ni ti’isa ti to dela bunbasela, bem n nari ti to tɛ̃ra?

⁴ Kɔ’ɔn pɔsɛ to bunbilemen sa, to zo’e zo’e bisɛ pɔ’ɛ tomea mɛ. (Ym. 88:15) Mabia ayima yu’urɛ n de Adrián yeti: “La kɔ’ɔn ana mam wuu mam dela bunbasela la. Mam n yuun de bia la, mam tɛ̃ri ti mam yuun ni zusa ti mam deodoma wan keŋɛ Paradiisi ge mam yuun mi soŋa soŋa ti mam ka nari ti n keŋɛ bim.” Tony, ti a dɔɣereba daɣena Sɛɛradoma la yeti: “Mam dɔɣereba yuun ka makɛ yele mam ti ba nɔŋɛ mam mɛ. Wana yuun basɛ ti la ana mam wuu ba puurɛ ka pee la sɛla woo ti mam ita la.”

⁵ Saŋa ase’a, to san ti’isa ti to daɣɛ sɛsɛla, to mina ti Yehowa mea n dekɛ to pa’asɛ a nɛreba poan. (Yon 6:44) A nyɛti ton tari halesoma se’a mɛ ge mina ton de nɛresɛba taaba. (1 Sa. 16:7; 2 Yel. 6:30) Bala la, to ta’an tara suure lua la eŋa n yeti to dela tuulum nɛreba la.—1 Yo. 3:19, 20.

6. La yuun ani tuuntuna Paul la wani la be’em sebo ti a tabelɛ tum la?

⁶ Tosɛba n daa nan ka baŋɛ yelemɛŋɛrɛ la, to daa iti la yelese’a n basɛ ti la kelum daana tɔ. (1 Pe. 4:3) Hali sɛba n pu’usɛ Yehowa ti la yue me tari ba tɔregɔ mɛ. Ge hon me? Saŋa ase’a ho ni ti’isa ti Yehowa kan di sugeri bo ho? San dɛna bala, tara suure lua ti la me yuun ani Yehowa yamesi la bala. Makerɛ, tuuntuna Paul suure yuun sa’am mɛ eŋa n yuun ti’iseri taɣesa a inbuulegɔ yele la. (Arom 7:24) Yelemɛŋɛrɛ, Paul yuun basɛ a be’em mɛ ge muse ko’om. Ge a yuun yeti eŋa n ‘pɔ’ɛ tuuntuneba la za’a poan’ ge me dɛna se’em n tum be’em ‘gaŋɛ.’—1 Ko. 15:9; 1 Tim. 1:15.

7. Bem n nari ti to tɛ̃ra la be’em sebo ti to tabelɛ tum la?

⁷ To saazuo Sɔ la yeti a wan di sugeri bo to, to san basɛ to be’em. (Ym. 86:5) Bala la, to san sirum sakɛ ti to tue ya, to tari puti’irɛ ti Yehowa wan di sugeri bo to.—Kol. 2:13.

8-9. To wan eŋɛ la wani kan ti’isa ti to kan malum eŋɛ sɛla pee Yehowa puurɛ?

⁸ To boti la to pu’usa Yehowa la to paŋa za’a. Ge basɛba ta’an ti’isa ti ba kan malum eŋɛ sɛla n wan basɛ ti a puurɛ pee. Mabipɔka ayima yu’urɛ n de Amanda yeti: “Mam ni ti’isa ti n san tuna zɔ’ɔra daarewoo, bala pa’alɛ ti n tuni mɛ la n paŋa za’a bɔ’ɔra Yehowa. Bala la, mam ni tiregera mɛ ti n tum zɔɛ n paŋa beene. Mam nyaa san ka ta’an eŋɛ bala, mam ni ti’isa ti Yehowa puurɛ ka pee la mam n ta’an ita sɛla la.”

⁹ To wan eŋɛ la wani kan ti’isa ti to kan malum eŋɛ sɛla pee Yehowa puurɛ? Tɛ̃ra ti, Yehowa tari la putɛsonɛ la tɔ. A ka boti to eŋɛ sɛla zɔɛ to paŋa beene. A puurɛ ni pee mɛ la ton ni tiregɛ tuna la to paŋa za’a la. Leyɛ’ɛsa, ti’isɛ taɣesɛ Baabule poan nɛresɛba n yuun pu’usɛ Yehowa la ba suure za’a la yele. Ti’isɛ Paul yele bisɛ. Yuuma zo’e zo’e ti a yuun tuulegera na’am mɔɔlegɔ tuuma la poan. A yuun ni dekɛ la mɛɛla zo’e zo’e keŋɛ sore ge yu’usa tansuga zo’e zo’e. Ge a bɔŋa n yuun tee ti a ka le ta’an mɔɔla zɔ’ɔra la, bala pa’alɛ ti Naayinɛ puurɛ yuun ka pee la en? Aayi. A yuun kelum tuna la eŋa n wan ta’an tum se’em ti Yehowa me kã bo en. (Tm. 28:30, 31) Bala mea nɔɔ, saŋa busebo sɛla ti to ita bɔ’ɔra Yehowa la ta’an tee mɛ. Ge sɛla n pakɛ  en dela sɛla zuo ti to ita bala. Basɛ ya ti to bisɛ ya sarɔtɔ toseto ti Yehowa eŋɛ pa’alɛ ti a puurɛ pee mɛ la tɔ.

YEHOWA EŊƐ LA BEM PA’ALƐ TI A PUURƐ PEE MƐ LA TƆ?

10. To wan eŋɛ la wani ‘wum’ Yehowa n yeti a puurɛ pee mɛ la tɔ la? (Yon 16:27)

¹⁰ A bo to la Baabule la. Yehowa boti a eŋɛ pa’alɛ sɛba ti a puurɛ pee la ba la ti a nɔŋɛ ba mɛ. Baabule la pa’alɛ ti sugumnɔɔrɛ buyi ti a yele Yezu yeti a dela A Dayɔba’arɛ ti a puurɛ pee la en. (Mt. 3:17; 17:5) Hon boti Yehowa yele ho ti a puurɛ pee mɛ la hɔ? Yehowa ka tɔɣeri ti to wuna ge a doli la Baabule la poan tɔɣera bɔ’ɔra tɔ. To san kaala yelese’a ti Yezu yuun yele a podɔleba la, la wan ana wuu to ‘wuni’ la Yehowa ti a tɔɣera bɔ’ɔra tɔ. (Kaalɛ Yon 16:27.) Yezu yuun kɔ’ɔn tɔɣesa a Sɔ la nima nima. To san kaalɛ baŋɛ Yezu n yuun eŋɛ sɛla pa’alɛ ti a puurɛ pee mɛ la a podɔleba la, to wan baŋɛ ti Yehowa n tɔɣeri bɔ’ɔra tɔ.—Yon 15:​9, 15.

11. Beni n sɔi ti wuŋerɛ san paɛ tɔ, bala ka pa’alɛ ti Yehowa ka boti to yele? (Yam. 1:12)

¹¹ A bo’ori to la sɛla n pakɛ tɔ. Yehowa kɔ’ɔn bɔta ti a soŋɛ to mɛ ti to nyɛ inganɛ poan yelese’a n pakɛ tɔ. Saŋa ase’a, Yehowa ta’an ni bo yɔ’ɔ ti wuŋerɛ paɛ tɔ wuu lan yuun paɛ Yob se’em la. (Yob 1:​8-11) Wuŋerɛ san paɛ tɔ, la ka pa’alɛ ti Naayinɛ ka boti to yele. Ge la bo’ori to la yɔ’ɔ ti to eŋɛ pa’alɛ ti to tari la nɔŋerɛ bɔ’ɔra Naayinɛ ge dekɛ tomea delum en. (Kaalɛ Yames 1:12.) Wuŋerɛ san paɛ tɔ, to wan baŋɛ eŋa n tari nɔŋerɛ se’em bɔ’ɔra tɔ ge me wan soŋɛ tɔ ti to ta’an ŋmibe.

12. To wan ta’an zamesɛ la bem Dmitrii yele la poan?

¹² Geele mabia ayima yu’urɛ n de Dmitrii bɔna Asia yele la bisɛ. A tuuma yuun sa’am mɛ ge ti a ka nyɛ tuuma ŋmaresi zo’e zo’e poan. Bala la, a yuun eŋɛ a puti’irɛ ti a wan mɔ’ɛ nini la na’am mɔɔlegɔ tuuma la ti la pa’alɛ ti a dekɛ amea delum la Yehowa. Ŋmaresi zo’e zo’e yuun tole mɛ ti a yuun kelum ka nyɛ tuuma, ti bã’a me yuun nyɔkɛ en ti a ka ta’an isigera. A yuun pɔsɛ ti’isa ti a daɣɛ siresonkɔ la sɔsonkɔ, ti Yehowa puurɛ ka pee la en. Daarɛ deyima zaanɔɔrɛ ti a poyɔa gulesɛ yelese’a n boi Isaiah 30:15 n yeti, ‘Ho san dekɛ homea delum mam baalam, n wan  basɛ ti ho kpe’em’ la bo en. Bia la yuun tari gulesegɔ la paɛ la a zɛ’an ge yele en yeti, “Dada, ho suure san sa’am tɛ̃ra gulesegɔ wa.” Dmitrii yuun baŋɛ ti la dela Yehowa n soŋɛ ba ti ba kelum tara dia, lɔɣɔyɛɛtɔ la gã’aregɔ zɛ’an. A yeti. “Mam n yuun nari ti n eŋɛ sɛla dela n ana baalam ge kɔ’ɔn dekɛ n mea delum Naayinɛ.” Yeledaaŋɔ ana taaba san paara hɔ, ho wan ta’an tara suure lua ti Yehowa fabeli ho yele mɛ ge wan soŋɛ hɔ ti ho ta’an ŋmibe.

13. Yehowa ni eŋɛ la bem pa’alɛ ti a nɔŋɛ to yele mɛ ge a ni doose la bani poan?

¹³ A doli la mabiisi poan soŋera tɔ. Yehowa doli la mabiisi poan ita pa’ala ti a puurɛ pee mɛ la tɔ. Makerɛ, a ta’an doose mabiisi basɛba poan kpemese to giila sansɛka n nari. Mabipɔka ayima n boi Asia yuun nyɛ soŋerɛ mɛ sansɛka ti a yuun bɔna wuŋerɛ poan la. A tuuma n yuun sa’am ti bã’a me nyɔkɛ en paa. A sira me yuun tum la be’em ti ba to’e a kenɔ. A yeti. “Mam daa ka bɔkɛ sɛla n sɔi ti yele ana wa ita. Mam yuun ti’isɛ ti mam tue mɛ ti Yehowa ka le bɔta n yele.” To mabipɔka la yuun zusɛ la Yehowa ti a ta’an baŋɛ ti Yehowa nɔŋɛ en mɛ. A eŋɛ la wani ta’an eŋɛ bala? A yeti, “Tansugere keendoma la yuun tɔɣɛ bo mam mɛ ge basɛ ti n baŋɛ ti Yehowa nɔŋɛ mam mɛ.” Pooren, a yuun le zusɛ la Yehowa ti a soŋɛ en. A yeti, “Daandendaarɛ mea ti mam tansugere la poan mabiisi gulesɛ gɔŋɔ na bo mam. Mam n yuun kaalɛ ba gɔŋɔ la n buɣeli suure se’em la, mam yuun baŋɛ ti Yehowa kelese mam zusega mɛ.” Sira, Yehowa ni eŋɛ pa’alɛ ti a boti to yele mɛ doose la to mabiisi poan.—Ym. 10:17.

14. Sodeni poan ti Yehowa le eŋɛ pa’alɛ ti a puurɛ pee mɛ la tɔ?

 ¹⁴ Yehowa le eŋɛ pa’alɛ ti a puurɛ pee mɛ la tɔ la eŋa n ni doose mabiisi poan bo to ka’aŋɔ la. Makerɛ, yuun kɔbesɛka n deŋɛ nɛŋa la poan, Yehowa yuun basɛ ti tuuntuna Paul gulesɛ la gɔnɔ 14 bo a mabiisi la. Paul yuun doose la gɔntuna poan bo a mabiisi la ka’aŋɔ nɔŋerɛ sore poan. Beni n sɔi ti Yehowa yuun basɛ ti Paul kã’am ba? Yehowa dela Sɔsonkɔ, bala a ni dɔ̃legɛ la a kɔnsɛba ti ‘a nɔŋɛ’ la tuberɛ. (Mag. 3:11, 12) Bala la, mabia san dekɛ Baabule la ka’am tɔ la ka pa’alɛ ti Yehowa sunsɔa nyie to mɛ ge a tuɣum bɔta la to yele. (Heb. 12:6) Yehowa le eŋɛ la bem pa’alɛ ti a puurɛ pee mɛ la tɔ?

YEHOWA N LE EŊƐ SƐLA PA’ALƐ TI A PUURƐ PEE MƐ LA TƆ

15. Yehowa ni dekɛ a zilam vo’osum la bo la bani ge beni n sɔi ti to tara suure lua la bala?

¹⁵ Yehowa tari a zilam vo’osum la bɔ’ɔra la nɛresɛba ti a puurɛ pee la ba la. (Mt. 12:18) To ta’an soke tomea yeti, ‘Mam iti pa’ala ti n tari Naayinɛ zilam vo’osum la wɔla la n vom poan?’ Hon di’iseri suure la nɛreba gana hon yuun nan ka zamesɛ mina Yehowa la? To san ita pa’ala ti to tari Naayinɛ zilam vo’osum wɔla la, bala wan basɛ ti la niɛ peelumi pa’alɛ ti Yehowa puurɛ pee mɛ la tɔ!—Bisɛ daka la zuo n de “ Vo’osum la Wɔla la Dela . . .. ”

16. Nɛrebani ti Yehowa basɛ ti ba mɔɔla yelesoma la ge bala basɛ ti la ana hon la wani? (1 Tesalonika 2:4)

¹⁶ Yehowa dekɛ yelesoma la eŋɛ la sɛba ti a puurɛ pee la ba la nu’usin. (Kaalɛ 1 Tesalonika 2:4.) Bisɛ mabipɔka ayima yu’urɛ n de Jocelyn n nyɛ nyuurɔ se’em la eŋa n mɔɔli yelesoma la bɔ’ɔra nɛreba la. Daarɛ deyima bulika ti Jocelyn suure sa’am. A yeti, “Mam paŋa n yuun ba’asɛ ti mam ka ta’an eŋɛ sɛsɛla. Ge mam yuun dela sore ŋmɛ’adaana ti dedaarɛ me dɛna mam na’am mɔɔlegɔ dabeserɛ. Bala la, mam yuun zusɛ mɛ ge keŋɛ na’am mɔɔlegɔ la.” Jocelyn yuun ta seke la Mary n boti Baabule zamesegɔ. Ŋmaresi fii pooren Mary yuun yeti a yuun boi bim zusa la Naayinɛ ti a soŋɛ en se’em ma’a ti Jocelyn wa’ana ŋmɛ a kuleŋa la. Jocelyn zamesɛ la bem yele wa poan. A yeti, “La yuun ani mam wuu Yehowa n yeti mam yeti, ‘Mam puurɛ pee mɛ la  hɔ.’” Yelemɛŋɛrɛ, daɣɛ nɛra woo n wan kelese yelesoma la ti to mɔɔla la. Ge to wan ta’an tara suure lua ti Yehowa puurɛ pee mɛ la tɔ to san tiregɛ la to paŋa za’a mɔɔla yelesoma la bɔ’ɔra nɛreba.

17. Hon zamesɛ la bem la Vicky n tɔɣɛ lua bunɔ la yele se’em la? (Yooma 5:12)

¹⁷ Sɛba ti Yehowa puurɛ pee la ba la ti a basɛ ti ba nyɛta lua bunɔ la nyuurɔ. (1 Tim. 2:5, 6) Ge to suure san zɛregera tɔ ti Yehowa puurɛ ka pee la tɔ hali la ton tari sakerɛ lua bunɔ la poan ge muse ko’om la? Tɛ̃ra ti, to kan ta’an delum tomea ge to wan ta’an dekɛ tomea delum Yehowa. A geele sɛba woo n tari sakerɛ lua bunɔ la poan ti ba dela tontɔɔdoma ge me wan kã bo ba. (Kaalɛ Yooma 5:12; Arom 3:26) Mabipɔka Vicky n yuun ti’isɛ taɣesa lua bunɔ la yele la yuun soŋɛ en mɛ. Daarɛ deyima ti a ti’isɛ taɣesɛ lua bunɔ la yele ti a bɔkɛ ti: “Yehowa di’ise suure la mam ti la yue. . . . Ge la yuun ani wuu mam tuɣum yɛta yeti: ‘Ho nɔŋerɛ la ka paɛ mam. Ho Dayɔa la kum la kan ta’an duuse mam be’em.’” Eŋa n daa ti’isɛ taɣesɛ lua bunɔ bo’olum la ti a baŋɛ ti Yehowa nɔŋɛ en mɛ paa. Tomam me san ti’isa taɣesa lua bunɔ la yele, to wan baŋɛ ti Yehowa nɔŋɛ to mɛ ti a puurɛ me pee la tɔ.

18. To wan ta’an tara suure lua la wani to san kɔ’ɔn nɔŋɛ to saazuo Sɔ la?

¹⁸ To ta’an tiregera ti to dekɛ pa’alegɔ ana wa tum tuuma ge saŋa ase’a to giila ta’an kɔ’ɔsɛ mɛ ti to ti’isa ti Yehowa puurɛ ka pee la tɔ. San dɛna bala, tɛ̃ra ti a puurɛ pee mɛ la ‘sɛba woo n kɔ’ɔn nɔŋɛ en la.’ (Yam. 1:12) Bala la, kɔ’ɔn ana du’a du’a la Yehowa ge bisɛ eŋa n eŋɛ se’em pa’alɛ ti a puurɛ pee mɛ la hɔ. Da makɛ tamɛ ti Yehowa ‘ka zaaɛ la to se’em sa’am.’—Tm. 17:27.