1. Bem kã’a ti to nyɛta la ton pa’asɛ Yehowa tigere la poan la?

 LA DELA kã’a bɔ’ɔra tɔ la ton laɣum pa’asɛ Yehowa tigere la poan biɣi biɣi ba’asegɔ dabesa wa poan la. Tingɔŋɔ wa yɛla n sa’ani se’em la, Yehowa basɛ ti to tara la mabiisi n soŋeri tɔ ge ti to me tara nɔyinɛ pu’usa en. (Ym. 133:1) A basɛ ti tomam la to deodoma tara la pupeelum. (Ep. 5:33–6:1) A basɛ ti to tara la yɛm bɔkera yɛla ti suma’asum bɔna.

2. Bem n nari ti to eŋɛ ge beni n sɔi?

² La nari ti to mɔ’ɛ nini ta’an kelum tara sakerɛ pu’usa Yehowa. Beni n sɔi? Sɛla n sɔi la saŋa ase’a to mabiisi ta’an tue to. To giila me ta’an kɔ’ɔsɛ mɛ la tomea tuure yɛla, yele yele wuu to san kɔ’ɔn tuura saŋa woo. La nari ti to ŋmibera pu’usa Yehowa (1) mabia san tue to, (2) to luɣerɛ kpɛ’a san eŋɛ sɛla ti la sa’am to suure, la (3) tomea tuure yɛla poan. Zaseŋɔ wa poan, to wan sɔsɛ yele ana wa. To me wan geele ton wan ta’an zamesɛ sɛla Baabule poan nɛreba n yuun tari sakerɛ zɛ’an.

ŊMIBERA MABIA SAN TUE HO

3. Bem yeledaaŋɔ n paari Yehowa yamesi?

³ Yeledaaŋɔ la. Mabiisi basɛba tari la hala ase’a n ka ani soŋa ti la daana tɔ. Ba ta’an eŋɛ to sɛla bii tɔɣɛ to yetɔɣepɔ̃’ɔsa ti la daam to. Keendoma la ta’an tue to. Yele ana ta’an basɛ ti to tara puti’ira ayi ayi la Naayinɛ tigere la ti to bɔna bim la. Yele ana ta’an basɛ ti mabia ka le kena zamesegɔ bii ka le bɔta ti a lɛna la sɛba n sa’am a suure la. Bala ta’an basɛ ti eŋa la mabiisi la ka le tara nɔyinɛ pu’usa  Naayinɛ. (Zep. 3:9) Yɛm boi bim? Basɛ ya ti to geele ya Baabule poan nɛra ayima ti yele ana taaba tabelɛ paɛ en.

4. Bem yeledaaŋɔ n yuun paɛ tuuntuna Paul?

⁴ Baabule poan nɛra. Tuuntuna Paul yuun mi ti a mabiisi la ka di mi’a. Makerɛ, mabiisi basɛba yuun zɛregɛ en ti a daɣɛ Yezu podɔla. (Tm. 9:26) Pooren, mabiisi basɛba yuun tɔɣeri en la yetɔɣepɔ̃’ɔsa sa’ana a yu’urɛ. (2 Ko. 10:10) Paul yuun nyɛ la keema ayima n eŋɛ sɛla ti la ka ana soŋa n wan ta’an basɛ ti mabiisi pire lui. (Ga. 2:11, 12) Paul zɔ Mark, me yuun basɛ en mɛ ti a suure sa’am. (Tm. 15:​37, 38) Paul yuun ta’an yeti mabiisi la n tue en la zuo, a kan naɛ la ba tuna. Ge a yuun kelum tara la putɛsonɛ la mabiisi la ge kɔ’ɔn naɛ la ba tuna Yehowa tuuma. Bem n yuun soŋɛ Paul ti a ta’an ŋmibe?

5. Bem n yuun soŋɛ Paul ti a ka gɛ̃ a mabiisi la basɛ? (Kolose 3:​13, 14) (Bisɛ foote la.)

⁵ Paul yuun nɔŋɛ a mabiisi la mɛ. Paul n yuun nɔŋɛ ba la zuo ti a yuun ka bisera ba tuure yɛla ge tuɣum bisa la ba halesoma la. Nɔŋerɛ n yuun basɛ ti Paul di sugeri bo mabiisi la ge me tɔɣɛ sɛla n boi Kolose 3:13, 14. (Kaalɛ.) Bisɛ Paul n yuun di sugeri bo Mark se’em. La boi bim ti Mark yuun ta basɛ Paul mɛ ba yia satiŋa na’am yetɔɣum yalegerɛ tuuma la poan ge Paul yuun ka basɛ ti yele la kɔ’ɔn bɔna a suuren. Pooren, Paul n yuun gulesɛ gɔŋɔ ta bo Kolose tansugere la, a yuun pɛɣɛ Mark ti a dela tuuntuna ‘n buɣelɛ a suure paa.’ (Kol. 4:10, 11) Rome tiŋa ti Paul yuun bɔna sarega poan la, a yuun yeti ba basɛ ti Mark wa’ana soŋɛ en. (2 Tim. 4:11) La niɛ peelumi ti, Paul yuun ka gɛ̃ a mabiisi la basɛ. To wan ta’an zamesɛ la bem Paul yele wa poan?

6-7. Bem n wan soŋɛ tɔ ti to kɔ’ɔn tara nɔŋerɛ bɔ’ɔra to mabiisi hali la ba tuure la? (1 Yon 4:7)

⁶ Ton zamesɛ sɛla. Yehowa boti la to ŋmibera ta’an tara nɔŋerɛ bɔ’ɔra to mabiisi la. (Kaalɛ 1 Yon 4:7.) Mabia san eŋɛ sɛla ti la ka nara ti Kristabia eŋɛ, to ta’an tara puti’irɛ ti a ka mi mɛ ge eŋɛ bala ge me tiregera ti a dekɛ Baabule naresum yɛla tum tuuma. (Mag. 12:18) Naayinɛ nɔŋɛ a yamesi mɛ la ka pakɛ la ba tuure. A ni ka gɛ̃ to basɛ to san tue bii a sunsɔa kɔ’ɔn nyie la tɔ. (Ym. 103:9) La yele pakɛ mɛ ti, to me dita sugeri wuu to  Sɔ la n diti sugeri se’em bɔ’ɔra to la!—Ep. 4:32–5:1.

⁷ Tɛ̃ra ti ba’asegɔ dabesa la n kɔ’ɔn pɔ̃ra la, la nari ti to ana tapilapi la to mabiisi la. To mi ti yaarɛ ta’an paɛ tɔ ti la ka tara makerɛ. Ba ta’an paɣɛ tɔ to sakerɛ zuo. Ba san paɣɛ tɔ to eeri la to mabiisi soŋerɛ. (Mag. 17:17) Bisɛ sɛla n yuun eŋɛ Josep, a n de keema bɔna Spain tiŋa. Eŋa la mabiisi basɛba ti ba yuun paɣɛ ba, la ban ka dekɛ bamea pa’asɛ nalɛɣerɛ yɛla poan la. A yeti: “Sarega la poan to za’a daa laɣum kɛ̃’ɛra mɛ, bala la mabia ta’an eŋɛ sɛla daam a tadaana bii nyie a sunsɔa. To yuun ni di’isa la suure ge dita sugeri bɔ’ɔra taaba. Bala yuun basɛ ti to tara la nɔyinɛ ge me tɛ’ɛla taaba. To yuun naɛ la nɛresɛba n ka pu’useri Yehowa bɔna. Daarɛ deyima ti mam pɔɣelum ti ba pɔ̃bɛ mam nu’o, ti mam ka ta’an ita sɛsɛla. Ge mabia ayima n yuun pee mam lɔɣɔrɔ ge soŋɛ mam yɛla ase’a poan. Sankaŋa ti mam yuun baŋɛ ti ba nɔŋɛ mam mɛ paa.” Bisɛ lan de yelesonɛ se’em ti to dita sugeri bɔ’ɔra taaba nananawa!

ŊMIBERA HO LUƔERƐ KPƐ’A SAN TUE HO

8. Bem yeledaaŋɔ n ta’an paɛ nɛra la a pɔɣa?

⁸ Yeledaaŋɔ la. Pɔɣedire woo tari yeledaaŋɔ mɛ. Baabule la yeti sɛba n tari pɔɣeba bii sireba la, ‘yeledaaŋɔ wan paɛ ba.’ (1 Ko. 7:28) Beni n sɔi? Sɛla n sɔi la nɛra la a pɔɣa ka di mi’a ge ti ba hala, la ban boti sɛla bɔna to’ore to’ore. Ba me ze’ele la buuri tɔka tɔka poan. Ba san eŋɛ pɔɣedire la ba’asɛ, ba nyaa ni nyɛta la taaba halebe’ero ti ba daa ka mina. Hala ana ta’an basɛ ti daaŋɔ bɔna. Ban wan tuɣum bisɛ ba wan eŋɛ se’em maalɛ yele la, ba ta’an zɛregera taaba. Ba ta’an ti’isa ti ba san yelege bii basɛ taaba, bala n wan sɔ̃na. Ge bala n wan maalɛ yele la? b Basɛ ya ti to bisɛ Baabule poan nɛra ayima n yuun ŋmibe a sire ele poan se’em.

9. Bem yeledaaŋɔ n yuun paɛ Abigail?

⁹ Baabule poan nɛra. Baabule la yeti Abigail yuun ele la Nabal n de nɛrewurebere ti a suure kãbɛ. (1 Sa. 25:3) La yuun ta’an kpe’em bo Abigail ti a kɛ̃’ɛra la burakana wa. Abigail yuun ta’an basɛ ni en? Ɛɛ. A sira n yuun to David la a nɛreba, ti David yuun keŋɛ ti a ta ku en la, yuun ta’an dɛna yɔ’ɔ bo en. (1 Sa. 25:​9-13) Abigail yuun ta’an zɔ ni ge basɛ ti David ku Nabal. Ge a yuun kɛ̃ yele la poan mɛ belum David ti a basɛ Nabal. (1 Sa. 25:23-27) Bem zuo ti a yuun eŋɛ bala?

10. Bem n yuun ta’an soŋɛ Abigail ti a ŋmibe a sire ele yeledaaŋɔ la poan?

¹⁰ Abigail yuun nɔŋɛ Yehowa ge me nana eŋa n pa’alɛ pɔɣedire se’em la. Nɔkpe’ene kai ti a yuun mi Naayinɛ n yele sɛla, eŋa n yuun dekɛ Hawa bo Adam ti a dɛna a pɔɣa la. (Pin. 2:24) Abigail yuun mi ti Yehowa geele pɔɣedire ti la dɛna la tuulum bɔnɔ. A yuun boti la a eŋɛ sɛla n wan basɛ ti Naayinɛ puurɛ pee, bala n sɔi ti a yuun tiregɛ faaɛ a yidoma la a sira basɛ la. A yuun eŋɛ la kalam gu David ti a ka ku a sira Nabal.  A me yuun belum David mɛ la be’em sebo ti a ka tum. La niɛ peelumi ti Yehowa yuun nɔŋɛ pɔka wa n tari sukpe’ene ge ka ti’isa a ma’a yele la. Sireba la pɔɣeba wan ta’an zamesɛ la bem Abigail yele la poan?

11. (a) Yehowa boti sireba la pɔɣeba ita la bem? (Epesus 5:33) (b) Hon zamesɛ la bem Carmen n yuun tiregɛ te’ele a sire ele la se’em la? (Bisɛ foote la.)

¹¹ Ton zamesɛ sɛla. Yehowa boti la sireba la ba pɔɣeba kelum naɛ taaba bɔna hali la san puɣum kpe’em bo ba. Bisɛ Naayinɛ puurɛ n wan pee se’em a san nyɛ ti sireba la ba pɔɣeba mɔɔri maala ba yɛla ge ita pa’ala ti ba tari la nɔŋerɛ bɔ’ɔra taaba. (Kaalɛ Epesus 5:33.) Geele Carmen yele la bisɛ. Carmen n yuun ele, yuuma ayoobe pooren ti Yehowa Sɛɛradoma yuun pɔsɛ zamesa en Baabule la ti a nyaa ta muse ko’om. Carmen yeti: “Mam sira yuun ka boti mam n iti sɛla la. A yuun ka boti Yehowa yele. A ni tuura ge vuusa mam mɛ ti a wan basɛ mam.” Hali la bala la, Carmen yuun ŋmibe mɛ a sire ele la poan. Yuun 50 n wana ti a tiregɛ tara nɔŋerɛ la gilema bɔ’ɔra a sira. “Yuun aŋa poan, mam yuun mi lan ani mam sira se’em mɛ ge me mina guŋerɛ n yetɔɣum poan. Mam n mi ti pɔɣedire dela tuulum bɔ’ɔra Yehowa la, mam tiregɛ la n paŋa za’a ti n ta’an te’ele dɛ. Mam n nɔŋɛ Yehowa la zuo, mam yuun ka ti’isɛ ti n basɛ n sira.” c Yeledaaŋɔ san bɔna ho pɔɣedire poan, tara sure lua ti Yehowa wan soŋɛ hɔ ti ho ta’an ŋmibe.

ŊMIBERA, HO TUURE YƐLA SAN BASƐ TI HO GIILA KƆ’ƆSƐ

12. Bem yeledaaŋɔ n ta’an paɛ tɔ to san tum be’em?

¹² Yeledaaŋɔ la. To san tum be’em, bala ta’an basɛ ti to giila kɔ’ɔsɛ. Baabule la basɛ ti to baŋɛ ti to be’em la ta’an basɛ ti to ‘suure sa’am ti to kɛla.’ (Ym. 51:17) Mabia ayima yu’urɛ n de Robert daa kɔ’ɔn mɔɔra mɛ yuuma zo’e zo’e poan nyaa ta dɛna keendoma soŋeredaana. Ge a daa tum la be’em ge daa baŋɛ ti a lebese Yehowa la pooren. A yeti: “Mam putɛkeeŋa la daa ani wuu mam zɛɛri la kuga. Mam suure yuun sa’am mɛ ti mam kaasa ge zusa Yehowa. Mam yuun ti’isɛ ti Naayinɛ ka le kɛlesa mam. Beni n sɔi? Mam n sa’am a suure la zuo.” To san tum be’em, to giila  ta’an kɔ’ɔsɛ ti to suure sa’am. Bala ta’an basɛ ti to ti’isa ti Yehowa gɛ̃ to basɛ mɛ. (Ym. 38:4) La san ana ho bala, geele Baabule poan nɛra n yuun ŋmibe pu’usa Yehowa hali eŋa n yuun tum be’em la.

13. Tuuntuna Peter yuun tue la wani ge bem be’em ti a yuun tum?

¹³ Baabule poan nɛra. Yu’unseko ti ba yuun yeti ba ku Yezu la, tuuntuna Peter yuun tue mɛ zo’e zo’e, bala n yuun ta’asɛ ti a tum be’em la. Peter yuun ba’ɛ nam la amea ge ŋmɛ’ɛra a nyũ’ɔ ti podɔleba bana la san zɔ ge basɛ Yezu, eŋa kan zɔ. (Mr. 14:27-29) Leyɛ’ɛsa, Peter n yuun boi Getsemane gaadin la poan la, a yuun ka ta’an pigera. (Mr. 14:32, 37-41) Nɛrekuuŋɔ la n yuun wa’ana ti ba nyɔkɛ Yezu la, Peter yuun zɔ mɛ ge basɛ en. (Mr. 14:50) Ba’asegɔ la, Peter yuun ki’isɛ la sugumnɔɔrɛ butã ti eŋa ka mi Yezu, hali pɔ la eŋa n parum se’em la. (Mr. 14:66-71) Peter yuun eŋɛ la bem eŋa n yuun baŋɛ ti a tum la be’em la? A suure yuun sa’am mɛ ti a kaasɛ a be’em la zuo. (Mr. 14:72) Yeen ti’isɛ bisɛ lan yuun ani Peter se’em ban yuun ta ku Yezu pooren la! Peter yuun ta’an ti’isa ti eŋa dela bunbasela.

14. Bem n yuun soŋɛ Peter ti a kɔ’ɔn pu’usa Yehowa? (Bisɛ foote.)

¹⁴ Yɛla zo’e zo’e n yuun soŋɛ Peter ti a ta’an ŋmibe pu’usa Yehowa. A yuun ka yelegeri amea ge a yuun keŋɛ la mabiisi la zɛ’an ti ba buɣelɛ a suure. (Lu. 24:33) Leyɛ’ɛsa, Yezu n yuun isige kum poan la, a yuun keŋɛ Peter zɛ’an mɛ. Daanse’ere a yuun ta kpemese la a giila. (Lu. 24:34; 1 Ko. 15:5) Yezu yuun ka zɛregɛ Peter la a tuure la ge a yuun yele en yeti a wan bo en tuunkãtɛ. (Yon 21:15-17) Peter yuun mi ti a tum la be’em paa ge a yuun kɔ’ɔn tiregera mɛ ti a eŋɛ sɛla n ani soŋa. Beni n sɔi? Sɛla n sɔi la, a yuun mi soŋa soŋa ti a Daana Yezu ka pisegɛ en basɛ. Mabiisi la me yuun kɔ’ɔn soŋera en mɛ. To wan ta’an zamesɛ la bem Peter yele la poan?

15. Yehowa boti la to tara suure lua la bem poan? (Yooma 86:5; Arom 8:​38, 39) (Bisɛ foote la.)

¹⁵ Ton zamesɛ sɛla. Yehowa boti la to baŋɛ ti eŋa nɔŋɛ to mɛ ge me dita sugeri bɔ’ɔra tɔ. (Kaalɛ Yooma 86:5; Arom 8:​38, 39.) To san tum be’em to suure ni sa’am mɛ. Bala pa’alɛ ti to tari buurɔ ge to da ti’isa ti Yehowa ka nɔŋɛ tɔ. To me da ti’isa ti a kan di sugeri bo to ge la nari ti to ni eŋɛ kalam ɛ soŋerɛ. Robert ti  to puɣum tɔɣɛ a yele la yeti: “Mam n yuun ba’ɛ nam n mea la zuo ti mam tum be’em.” A yuun baŋɛ ti la nari ti a tɔɣɛ bo keendoma la. A yeti: “Mam n yuun eŋɛ bala la, mam yuun baŋɛ ti Yehowa tari la nɔŋerɛ bɔ’ɔra mam. Keendoma la yuun ka gɛ̃ mam basɛ. Ba soŋɛ mam mɛ ti mam baŋɛ ti Yehowa ka zaɣesɛ mam. To san basɛ to be’em la, ɛ soŋerɛ ge me kɔ’ɔn tiregera ti to kan taɣesɛ to be’em la, to wan tara suure lua ti Yehowa nɔŋɛ to mɛ ge me dita sugeri bɔ’ɔra tɔ. (1 Yo. 1:8, 9) To san mina ti Yehowa nɔŋɛ to mɛ ge bɔta ti a di sugeri bo to, to kan pisegɛ Yehowa pu’usegɔ basɛ to san tue.

16. Beni n sɔi ti hon lu ho suure ti ho wan ŋmibera pu’usa Yehowa?

¹⁶ Yehowa suure sukɛ mɛ la ton tiregeri pu’usa en biɣi biɣi dabesa wa poan la. Yehowa wan soŋɛ tɔ ti to ta’an ŋmibera hali to san tue. To ta’an eŋɛ pa’alɛ ti to tari nɔŋerɛ bɔ’ɔra to mabiisi la ge dita sugeri bɔ’ɔra ba, ba san tue to. To ta’an eŋɛ pa’alɛ ti to tari nɔŋerɛ paa bɔ’ɔra Naayinɛ ge tara gilema bɔ’ɔra pɔɣedire, to san tiregɛ maala yeledaaŋɔ woo pɔɣedire poan. To me san tum be’em, to basɛ ti Yehowa soŋɛ tɔ ge mina ti a nɔŋɛ to mɛ ge dita sugeri bɔ’ɔra tɔ ti to kelum pu’usa en. To wan ta’an tara suure lua ti ‘to san ka taregɛ la itisoŋɔ,’ Yehowa wan kã bo to.—Ga. 6:9.