1-2. Nɛra nari ti a eŋɛ la bem ge nyaa ta’an muse ko’om?

 YUUMA anuu n tole wa poan, nɛreba n gaŋɛ tusere n muse ko’om nyaa dɛna Yehowa Sɛɛradoma. Wuu yuun kɔbesɛka n deŋɛ nɛŋa podɔla Timoti la, ba uge ba zo’e zo’e la yelemɛŋɛrɛ la poan ‘ba bunbilimen.’ (2 Tim. 3:14, 15) Basɛba me dela bunkureba ge nyaa baŋɛ yelemɛŋɛrɛ la, hali ba kuregerɛ poan. Yuuma zo’e zo’e n tole la, pɔka ayima yuun dela yuun 97 ge nyaa zamesɛ Baabule la ta muse ko’om!

² Ho san nan zamesa Baabule la bii ho dɔɣereba san dɛna Yehowa Sɛɛradoma, hon wan bɔta ti ho muse ko’om? Putɛsonɛ n bala! La dela ho kã homea bo Yehowa ge nyaa ta’an muse ko’om. Zaseŋɔ wa wan pa’alɛ hɔ hon wan kã homea vuurɛ n de sɛla. La me wan soŋɛ hɔ ti ho baŋɛ sɛla n sɔi ti la ka nara ti ho gu’una ti ho kã homea ge muse ko’om.

HON KÃ HOMEA VUURƐ?

3. Bo makerɛ pa’alɛ Baabule la poan nɛresɛba n yuun kã bamea bo Yehowa.

³ Baabule la poan, nɛra n kã amea pa’alɛ ti a yelege amea ti a tum la zilam tuunɛ. Israeldoma la yuun kã bamea bo la Yehowa. Ge Israeldoma la basɛba yuun kã bamea bo Yehowa la sore n boi de to’ore poan. Makerɛ, Aaron yuun dekɛ la salema bunlamesega vuge a zuo ti la pa’alɛ ti a dela ‘tuulum bunɔ.’ Salema bunlamesega la yuun pa’alɛ ti a tuuma la boi la de to’ore, ti la pa’alɛ ti a dela Israel malema nɛŋadaana. (Mal. 8:9) Nazardoma  la me yuun kã bamea bo la Yehowa sore n boi de to’ore poan. “Nazar” dela Hebru yelebire nazirʹ ti la vuurɛ dɛna “Nɛra N Boi A To’ore,” bii “Nɛra N Kã Amea.” Nazardoma la yuun nari ti ba dɔla Moses Lɔɔ la n pa’alɛ ba ti ba kisa yelese’a la.—Kan. 6:​2-8.

4. (a) Ho san kã homea bo Yehowa, bem n nyaa de ninmɔ’ɔrɛ yele ho vom poan? (b) Ho ‘zaɣesɛ’ homea vuurɛ? (Bisɛ foote la.)

⁴ Ho san kã homea bo Yehowa, ho loe mɛ ti ho wan dɛna Yezu Krista podɔla ge me basɛ ti Naayinɛ puti’irɛ n boti sɛla dɛna yia ho vom poan. Hon wan kã homea dɛna Kristabia vuurɛ? Yezu yeti: ‘Se’em san bɔta ti a dɔla mam, la nari ti a zaɣesɛ amea.’ (Mt. 16:24) Greek yelesum la ti ba lerege dɛ ti ‘la nari ti a zaɣesɛ amea’ la, vuurɛ ta’an le dɛna ti “la nari ti a basɛ yɛla ase’a itigɔ.” Ho san kã homea bo Yehowa pu’usa en, la wan nara ti ho basɛ yelese’a n ka makɛ la eŋa n boti sɛla la. (2 Kor. 5:14, 15) La nari ti ho zaɣesɛ ‘inganɛ la tuuma,’ maɣesɛ wuu yalumtuuma. (Ga. 5:19-21; 1 Ko. 6:18) Ho san zaɣesɛ yele ana wa, ho kan tara pupeelum? Ho wan tara. Hon nɔŋɛ Yehowa la zuo, ho wan sakɛ ho suuren ti eŋa n pa’alɛ ho yelese’a la dela homea som zuo. (Ym. 119:97; Isa. 48:​17, 18) Mabia ayima yu’urɛ n de Nicholas n yele se’em n wana, “Yehowa pa’alegɔ ta’an ana wuu sarega lalega bɔ’ɔra hɔ ti ho kan ta’an ita homea n boti sɛla bii la dɛna te’elego bɔ’ɔra hɔ wuu kurego n ni beŋe gbeɣenɛ ti a kan ta’an daam ho se’em la.”

5. (a) Ho wan eŋɛ la bem ti la pa’alɛ ti ho kã homea bo Yehowa? (b) Hon kã homea la ko’om musega boi to’ore to’ore la wani? (Bisɛ foote la.)

⁵ Ho wan eŋɛ la bem ti la pa’alɛ ti ho kã homea bo Yehowa? Ho wan zusɛ Yehowa, yele en yeti ho wan pu’usa la eŋa ma’a ge me basɛ ti a puti’irɛ n de se’em la dɛna yia ho vom poan. La pa’alɛ ti, ho biŋe la  nɔɔrɛ la Yehowa ti ho wan kɔ’ɔn nɔŋɛ en ‘la ho suure za’a la ho sia za’a la ho puti’irɛ za’a la ho paŋa za’a.’ (Mr. 12:30) Ho ni zusɛ la Yehowa ho ma’a ta’an kã homea bo en. Ge ko’om musega boi la de to’ore. Ho ni ze’ele la nɛrekuuŋɔ poan muse ko’om ti la pa’alɛ ti ho puɣum kã homea mɛ. Hon kã homea bo Yehowa la dela ninmɔ’ɔrɛ ti la nara ti ho kɔ’ɔn dɔla hon biŋe nɔɔrɛ ti ho eŋɛ sɛla la. Yehowa me boti la ho eŋɛ bala.—Pa. 5:​4, 5. 

BENI N SƆI TI LA NARA TI HO KÃ HOMEA BO YEHOWA?

6. Bem n wan basɛ ti nɛra bɔta ti a kã amea bo Yehowa?

⁶ Hon nɔŋɛ Yehowa la zuo ti ho kã homea bo en. Nɔŋerɛ se’ere ti ho tara bɔ’ɔra en la daɣɛ lan yeen ana ho se’em. Ge la dela hon ‘zamesɛ mina’ Yehowa yɛla, la ‘a puti’irɛ n de sɛla’ la n basɛ ti ho nɔŋɛ en malum pa’asɛ. (Kol. 1:9) Hon zamesɛ yelese’a Baabule la poan la basɛ ti ho sakɛ ho suuren ti (1) Yehowa sirum boi mɛ, (2) Baabule la dela a Yelesum, la (3) a tari la a tigere la pa’ala tɔ, ti to tuna a puti’irɛ n boti sɛla.

7. La nari ti to ita la bem ge nyaa kã tomea bo Yehowa?

⁷ Sɛba n kã bamea bo Yehowa la nari ti ba mina yelese’a n boi Baabule la poan ge vɔna ba vom ti la makɛ la Naayinɛ pa’alegɔ. Yɔ’ɔ san bɔna, ba ni tiregɛ mɛ tɔɣɛ yelese’a ti ba zamesa la bo nɛreba. (Mt. 28:​19, 20) Nɔŋerɛ se’ere ti ba tara bɔ’ɔra Yehowa la kɔ’ɔn pa’asa mɛ ti ba lu suure ti ba wan pu’usa la eŋa ma’a. La me ani hon la bala? Ho san tara nɔŋerɛ kaŋa taaba  bɔ’ɔra Yehowa, ho kan bɔta ti ho yeen kã homea ge muse ko’om ti ho dɔɣereba, ho Baabule pa’alegɔdaana bii ho zɔdoma puurɛ pee.

8. Ho puurɛ san pee la Yehowa n eŋɛ yelese’a bo ho la, la soŋeri ho la wani ti ho bɔta ti ho kã homea bo en? (Ym 116:​12-14)

⁸ Ho san ti’isa yelese’a za’a ti Yehowa eŋɛ bo ho la, ho suure wan sukɛ ti ho bɔta ti ho kã homea bo en. (Kaalɛ Yooma 116:​12-14.) Baabule la yeti Yehowa n bo’ori to ‘sɛla woo n ani soŋa ti to nyɛta la.’ (Yam. 1:17) Bo’olum sebo n gani za’a dela a Dayɔa Yezu lua bunɔ la. Yeen ti’isɛ bisɛ bo’olum wa n de tuulum se’em! Lua bunɔ la basɛ ti ho tara la bɔnsoŋa la Yehowa. La me basɛ ti ho tara la puti’irɛ ti ho wan ta vɔna daarewoo. (1 Yo. 4:9, 10, 19) Ho san kã homea bo Yehowa, la pa’alɛ ti ho puurɛ pee mɛ la lua bunɔ la, la kãsebo woo ti Yehowa basɛ ti ho nyɛ la. (Tɛɛ. 16:17; 2 Ko. 5:15) Ba tɔɣɛ hon wan eŋɛ se’em pa’alɛ ti ho puurɛ pee ya yele ti la bɔna Tara Vom Somɔ Daarewoo! gɔŋɔ la poan zaseŋɔ 46, yelezure 4. Ku me tari la mita atã vidiyo zuo n de Tara Ho Bo’olum La Bɔ’ɔra Naayinɛ.

HON MAASUM TI HO KÃ HOMEA GE MUSE KO’OM?

9. Beni n sɔi ti la ka nara ti nɛra bisɛ ti la dela pɛ̃regerɛ ti a kã amea bo Naayinɛ?

⁹ La ta’an ana ho wuu ho nan ka maasum ti ho kã homea ge muse ko’om. Daanse’ere la wan nara ti ho kelum eŋɛ teere ase’a ti la makɛ la Yehowa pa’alegɔ, bii la wan kelum nara ti ho gura fii ta’an tara sakerɛ n kpe’em. (Kol. 2:​6, 7) Baabule zamesegɔdoma za’a daɣɛ buyina, ti ba mi’ilum me bɔna tɔka tɔka. Bunbilipaalesi za’a me kan ta’an kã bamea ge muse ko’om yuunyinɛ. Ti’isɛ bisɛ hon nyaŋɛ nyɛ nɛŋa tɔlega paɛ beense’ere. Da tara homea makera la nɛreba.—Ga. 6:​4, 5.

10. Ho san baŋɛ ti ho nan ka maasum ti ho kã homea ge muse ko’om, ho wan ta’an eŋɛ la bem? (Bisɛ daka la zuo n de “ Sɛba Ti Ba Uge Ba Yelemɛŋɛrɛ La Poan.”)

¹⁰ Hali ho san baŋɛ ti ho nan ka maasum ti ho kã homea ge muse ko’om, kelum tara puti’irɛ ti ho boti la ho muse ko’om. Zusɛ Yehowa ti a soŋɛ hɔ la hon tiregeri ti ho eŋɛ teere se’a la. (Flp. 2:13; 3:16) Tara suure lua ti a wan kelese ho zusega la ge me soŋɛ hɔ.—1 Yo. 5:14.

SƐLA N SƆI TI BASƐBA GU’UNA

11. Yehowa wan soŋɛ to la wani ti to kelum tara yelemɛŋɛrɛ bɔ’ɔra en?

¹¹ La boi bim ti nɛreba basɛba maasum mɛ ti ba kã bamea ge muse ko’om ge ba kelum gu’una mɛ. Ba ta’an ti’isa ti, ‘Mam san tum be’em, ba wan yese mam tansugere la poan.’ Ho san ti’isa bala ti dabeem tara hɔ, tara suure lua ti Yehowa wan soŋɛ hɔ ti ho ita sɛla n ‘nari ti A puurɛ pee.’ (Kol. 1:10) A wan basɛ ti ho tara sukpe’ene ta’an ita sɛla n ani soŋa. A puɣum tabelɛ soŋɛ nɛreba zo’e zo’e mɛ ti ba eŋɛ bala. (1 Ko. 10:13) Bala n sɔi ti ba ka ba’ɛ yɛsera mabiisi zo’e zo’e tansugere la poan la. Yehowa kɔ’ɔn soŋera a nɛreba mɛ ti ba kelum tara yelemɛŋɛrɛ.

12. Ho wan eŋɛ la wani ta’an gu homea kan tum be’em?

¹² Ton ka di mi’a la zuo, to puti’irɛ dela to eŋɛ sɛla n ka ani soŋa. (Yam. 1:14) Ge la dela homea loe hon boti ho eŋɛ sɛla yeledaaŋɔ san paɛ hɔ. Yelemɛŋɛrɛ la dela, hon mea n wan ta’an pa’alɛ hon boti ho vɔna ho vom se’em. Nɛreba basɛba  parum ti ho kan ta’an pa’alɛ hon mea n boti sɛla ge bala daɣɛ yelemɛŋɛrɛ. Ho wan ta’an nyɔ̃kɛ homea konkoma’asum yɛla poan. Hali konkoma’asum yɛla san puɣum bɔna ho poan, ho ta’an zaɣesɛ kan tum be’em. Bala la, zusa Naayinɛ daarewoo. Kaala Baabule la ge ita homea zamesegɔ saŋa woo. Kena tansugere zamesegɔ. Tɔɣera ho sakerɛ yɛla bɔ’ɔra nɛreba. Ho san ita bala, la wan soŋɛ hɔ ti ho kelum dɔla ho kã’a nɔbiŋere la. Da malum tamɛ ti Yehowa me wan soŋɛ hɔ ti ho ta’an eŋɛ bala.—Ga. 5:16.

13. Yosef yele la wan soŋɛ to la wani?

¹³ Ho san te’ele ti’isɛ bisɛ hon wan eŋɛ sɛla yeledaaŋɔ saŋa, la wan dɛna naana bɔ’ɔra hɔ ti ho tara yelemɛŋɛrɛ bɔ’ɔra Yehowa. Baabule la tɔɣɛ la nɛreba basɛba yele n yuun ta’an eŋɛ bala, la boi bim ti bamam me yuun ka di mi’a. Makerɛ, Potifa pɔɣa yuun kɔ’ɔn bɔta la eŋa la Yosef gã’arɛ. Ge Yosef yuun puɣum mina eŋa n wan eŋɛ sɛla yele aŋa poan. Baabule la yeti ‘a yuun zaɣesɛ mɛ’ ge yeti: ‘Mam wan eŋɛ la wani tum be’em kãtɛ wa gãlum Naayinɛ?’ (Pin. 39:​8-10) La niɛ peelumi ti, Yosef yuun puɣum mina eŋa n wan eŋɛ sɛla ge ti pɔka la nyaa pɛ̃regɛ en. Bala n yuun basɛ ti la dɛna naana bɔ’ɔra en ti a zaɣesɛ ge ka tum be’em la.

14. Ho wan eŋɛ la wani ta’an zaɣesɛ be’em?

¹⁴ Ho wan eŋɛ la wani ta’an zaɣesɛ be’em wuu Yosef? Ho ta’an kɔ’ɛ ho puti’irɛ nananawa hon wan eŋɛ sɛla yeledaaŋɔ poan. Ni eŋɛ kalam zaɣesɛ yelese’a ti Yehowa yaɛ la. Da puɣum ti’isa de yele la fii me. (Ym. 97:10; 119:165) Ho san eŋɛ bala, ho kan tum be’em. Ho puɣum mina hon wan eŋɛ sɛla. Ho puɣum kɔ’ɛ ho puti’irɛ mɛ.

15. Nɛra wan eŋɛ la bem pa’alɛ ti a ‘ãregeri la amea ɛɛra’ Yehowa? (Hebru 11:6)

¹⁵ Daanse’ere ho baŋɛ ti yelemɛŋɛrɛ la n wana, nyaa bɔta ti ho pu’usa Yehowa la ho suure za’a. Ge sɛla n kelum gu’ura hɔ ti ho kan ta’an kã homea ge muse ko’om. Ho ta’an eŋɛ Naba David n yuun eŋɛ sɛla la. Ho ta’an zusɛ Yehowa ti: ‘O Naayinɛ, ɛ mam poan la ho baŋɛ n suuren. Viisɛ mam ge baŋɛ n putɛyiila. Bisɛ nyaa daaŋɔ puti’irɛ boi n poan ge nyaa tari mam doose daarewoo nyɔvore sore la poan.’ (Ym. 139:​23, 24) Yehowa ni kã bo la sɛba  n ‘ãregeri bamesi ɛɛra en la.’ Hon tiregeri ge tara puti’irɛ ti ho wan kã homea ge muse ko’om la, pa’alɛ ti ho ãregeri la homea.—Kaalɛ Hebru 11:6.

KƆ’ƆN ANA DU’A DU’A LA YEHOWA

16-17. Yehowa ni eŋɛ la wani ta’an basɛ ti sɛba ti ba uge ba yelemɛŋɛrɛ la poan la vurege du en? (Yon 6:44)

¹⁶ Yezu yuun yeti, Yehowa mea n ni tari a podɔleba la wa’an yelemɛŋɛrɛ la poan na. (Kaalɛ Yon 6:44.) Ti’isɛ bisɛ lan de yelesonɛ ge me wan ta’an soŋɛ ho se’em. Yehowa ni nyɛ la yelesonɛ nɛra poan ge nyaa tari en wa’an yelemɛŋɛrɛ la poan na. A geele nɛrekaŋa ti a dela ‘tuulum lɔkɔ,’ bii ‘tuulum bunɔ.’ (Tɛɛ. 7:6) A geele hon me la bala.

¹⁷ Daanse’ere ho dela bunbilipaalega ti ho dɔɣereba uge ho yelemɛŋɛrɛ la poan. Ho ta’an ti’isa ti ho dɔɣereba n pu’useri Yehowa la zuo ti hon me pu’usa en ge la daɣɛ Yehowa mea n tari ho wa’an yelemɛŋɛrɛ la poan na. Baabule la n tuɣum yele se’em dela: ‘Vurege ya du Naayinɛ ge a me wan vurege du ya.’ (Yam. 4:8; 1 Yel. 28:9) Ho san tiregɛ ti ho vurege du Yehowa, eŋa me wan vurege du ho. Yehowa ka bisɛ ti ho deodoma n pu’useri en la zuo ti a vurege ho du en ge a ti’iseri la nɛra ayima ayima woo yele, tara ba kena yelemɛŋɛrɛ la poan, hali sɛba dɔɣereba n de Yehowa Sɛɛradoma la. Nɛra san tiregera ti a vurege du Yehowa, Eŋa me wan vurege du en wuu Yames 4:8 n yele se’em la.—Dekɛ makɛ 2 Tesalonika 2:13.

18. To wan sɔsɛ la bem zaseŋɔ sɛka n taɣelɛ la poan? (Yooma 40:8)

¹⁸ Ho san kã homea bo Yehowa ge muse ko’om, ho tɔɣeseri la Yezu. A yuun kã amea bo la a Sɔ ge yeti eŋa wan eŋɛ sɛla woo ti a Sɔ la yele en. (Kaalɛ Yooma 40:8; Heb. 10:7) Zaseŋɔ sɛka n taɣelɛ la poan, to wan sɔsɛ baŋɛ sɛla n wan soŋɛ hɔ ti ho kelum pu’usa Yehowa la yelemɛŋɛrɛ ho san ta muse ko’om ba’asɛ.