1-2. Nɛra ni nyɛ la bem kã’a a san ta muse ko’om ba’asɛ?

 TO SAN nyaŋɛ muse ko’om dɛna Yehowa Sɛɛradoma, to puurɛ ni pee mɛ paa. La dela na’asegɔ bɔ’ɔra tɔ la ton tari bɔnsoŋa la Yehowa la. To sakɛ David n yuun yele sɛla la ti: ‘Pupeelum boi mɛ la nɛresɛka ti hon loe en ti a wa’ana bɔna ho zinzaka la poan.’—Ym. 65:4.

² Nɛra woo ti Yehowa ni bo en yɔ’ɔ ti a pa’asɛ a yizuo la poan? Aayi. Wuu zaseŋɔ sɛka n tole la n pa’alɛ se’em la, a ni vurege lɛm la sɛba n eŋɛ pa’alɛ ti ba boti ba tara bɔnsoŋa la en la. (Yam. 4:8) Ho san kã homea bo Yehowa ge muse ko’om, hon la eŋa ni tara la bɔnsoŋa n boi de to’ore. Tara suure lua ti ho san ta muse ko’om ba’asɛ, Yehowa wan ‘kã bo ho ti ho nyɛ lɔɣɔrɔ gaŋɛ ti ho kan nyɛ fole n wan biŋe to.’—Ma. 3:10; Yer. 17:7, 8.

3. Kristakɔma n kã bamea ge muse ko’om nari ti ba eŋɛ la bem? (Pa’ala 5:4, 5)

³ Ko’om musega nan dela pɔsega. Ho san muse ko’om ba’asɛ, ho wan bɔta ti ho tiregɛ dɔla ho kã’a nɔbiŋere la hali yeledaaŋɔ bii yaarɛ san paɛ hɔ. (Kaalɛ Pa’ala 5:​4, 5.) Hon de Yezu podɔla la, la dela ho tiregɛ tɔɣesa  Yezu ge dɔla a nɔya la. (Mt. 28:19, 20; 1 Pe. 2:21) Zaseŋɔ wa wan soŋɛ hɔ ti ho ta’an eŋɛ bala.

‘KƆ’ƆN TƆƔESA’ YEZU YELEDAAŊƆ LA YAARƐ POAN

4. Sodeni poan ti Yezu podɔleba wan zɛɛra ‘mɛlesegɔ dɔɔ’? (Matu 16:24)

⁴ Da ti’isa ti ho san muse ko’om ba’asɛ yeledaaŋɔ kan paɛ hɔ. Yezu yuun basɛ ti la niɛ peelumi ti a podɔleba la wan zɛ ‘mɛlesegɔ dɔɔ.’ Ba me wan ‘kɔ’ɔn’ ita la bala. (Kaalɛ Matu 16:24) Yezu yuun boti a yeti a podɔleba la wan kɔ’ɔn namesa mɛ? Daɣɛ bala la fii me. A yuun boti a yeti ba kan nyɛ kã’a ma’a ge yeledaaŋɔ me wan paɛ ba. Yeledaaŋɔ la ase’a ta’an basɛ ti la wuŋɛ ba.—2 Tim. 3:12.

5. Yezu yuun pu’ulum biŋe ti sɛba n dekɛ yɛla basɛ la wan nyɛ la bem kã’a?

⁵ Daanse’ere ho deodoma yaɛ ho mɛ bii ho dekɛ la yɛla ase’a basɛ lan wan eŋɛ se’em ti Naayinɛ Na’am la dɛna yia ho vom poan. (Mt. 6:33) San dɛna bala, tara puti’irɛ ti Yehowa mi hon eŋɛ sɛla bo en la za’a. (Heb. 6:10) Daanse’ere ho baŋɛ ti Yezu n tɔɣɛ sɛla wa dela yelemɛŋɛrɛ: ‘Nɛra ka boi n basɛ yire bii suurɔ bii tãpa bii ma bii sɔ bii kɔma bii vatɔ mam zuo la yelesoma la zuo ge kan nyɛ sugumnɔɔrɛ kɔbega nananawa poan. A wan nyɛ yɛa, suurɔ, tãpa, madoma, kɔma la vatɔ la mɛlesegɔ ge ti beere sa’am a wan nyɛ daarewoo nyɔvore.’ (Mr. 10:29, 30) Kãsebo ti ho nyɛ la zo’e gana yelese’a ti ho dekɛ basɛ la mɛ.—Ym. 37:4.

6. Beni n sɔi ti ho san ta muse ko’om ba’asɛ, la wan nara ti ho kelum zaɣesa ‘inganɛ konkoma’asum’?

⁶ Ho san ta muse ko’om ba’asɛ, la wan nara ti ho kelum zaɣesa ‘inganɛ konkoma’asum.’ (1 Yo. 2:16) Sɛla n sɔi la ho kelum ka di mi’a. Saŋa ase’a, la ta’an ana ho wuu lan yuun ani tuuntuna Paul se’em la. A yuun gulesɛ yeti: ‘N puti’irɛ poan n tari pupeelum la Naayinɛ pa’alegɔ ge yelese’a ti mam mea bɔta la daɣɛ buyina la yelese’a ti Naayinɛ bɔta ti n ita la. Ti wana wa basɛ ti mam dɛna la yameŋa bo be’em la n boi mam poan la.’ (Arom 7:22, 23) Ho tuure yɛla ta’an basɛ ti ho giila kɔ’ɔsɛ. Ge ho san ti’isa ho kã’a nɔbiŋere la yele, la wan bo ho paŋa ti ho zabɛ nyaŋɛ ho yeledaaŋɔ la. Ho kã’a nɔbiŋere la wan soŋɛ hɔ yeledaaŋɔ san paara hɔ. Wani wani?

7. Ho san kã homea bo Yehowa, la wan soŋɛ ho la wani ti ho kelum tara sakerɛ bɔ’ɔra en?

⁷ Ho san kã homea bo Yehowa, ho zaɣesɛ la homea. Bala pa’alɛ ti ho ni zaɣesɛ la yelese’a ti homea bɔta, lan wan eŋɛ se’em ti Yehowa puurɛ pee. (Mt. 16:24) Bala la, yeledaaŋɔ san paara hɔ ho kan ti’isa buyi buyi la hon wan eŋɛ sɛla, se’ere n sɔi la ho puɣum mina hon wan eŋɛ sɛla mɛ n de, ho tara yelemɛŋɛrɛ bɔ’ɔra Yehowa. Ho wan kɔ’ɔn lu ho suure ti ho basɛ ti Yehowa puurɛ pee. Ho wan ana wuu Yob la. Hali la yeledaaŋɔ se’a n yuun paɛ en la, a yuun yeti: ‘Mam kan malum basɛ n birikinte la!’—Yob 27:5.

8. Ho san ti’isa taɣesa ho kã’a nɔbiŋere la, la wan soŋɛ ho la wani ti ho ta’an gu homea yeledaaŋɔ poan?

⁸ Ho san ti’isa taɣesa ho kã’a nɔbiŋere la, ho wan nyɛ paŋa ta’an gu homea yeledaaŋɔ poan. Makerɛ, ho wan sarena la nɛra n daɣɛ ho pɔɣa bii ho sira? Aayi. Ho puɣum yele Yehowa ti ho kan makɛ eŋɛ yelese’a n ani bala. Ho puɣum ka nari ti ho sarena la nɛra ti ho suure ta kɛ̃  en ge ti ho nyaa zeɣera ti ho basɛ. Ho kan ‘kɛ̃’ɛra putɔpa yɛla poan’ ge ho wan ‘lɔɣesa ba.’—Mag. 4:14, 15.

9. Ho san ti’isa taɣesa ho kã’a nɔbiŋere la, la wan le soŋɛ ho la wani ti ho ta’an basɛ ti Yehowa dɛna yia ho vom poan?

⁹ Ge ho san nyɛ la tuunɛ n wan gu ho ti ho kan nyɛta nɛŋa kena tansugere zamesegɔ saŋa woo? Ho puɣum mina hon wan eŋɛ se’em mɛ. Ge ti ho nyɛ tuunɛ la, ho puɣum kɔ’ɛ ho puti’irɛ ti ho kan sakɛ tum tuunse’a n wan gu ho ti ho kan nyɛta nɛŋa kena tansugere zamesegɔ. Bala la, ho kan bɔta ti ho sakɛ to’e tuunɛ la ge ti’isa hon wan eŋɛ se’em ŋmɛresɛ yɛla ta’an basɛ ti Yehowa dɛna yia ho vom poan. Ho san ti’isa taɣesa Yezu n yuun lu a suure ti a basɛ ti a Sɔ puurɛ pee la, la wan soŋɛ hɔ ti ho eŋɛ kalam zaɣesɛ yelese’a n wan basɛ ti Naayinɛ suure sa’am. —Mt. 4:10; Yon 8:29.

10. Ho san ta muse ko’om ba’asɛ, Yehowa wan soŋɛ ho la wani ti ho ‘kɔ’ɔn tɔɣesa’ Yezu?

¹⁰ Yeledaaŋɔ san paara hɔ bii la san ta ana ho wuu ho tum be’em, hon wan eŋɛ se’em yele la poan la n wan pa’alɛ ti ho boti ho ‘kɔ’ɔn tɔɣesa’ la Yezu. Tara suure lua ti Yehowa wan soŋɛ hɔ ti ho ta’an ita bala. Baabule la yeti: ‘Naayinɛ n de yelemɛŋɛrɛdaana la kan sakɛ ti ba pã’asɛ ya ta paɛ beense’ere ti ya kan ta’an sɛ ze’ele soŋa soŋa de poan ge a wan basɛ ti ya yese yeledaaŋɔ la poan ge bo ya paŋa ti ya ta’an ŋmibe.’—1 Ko. 10:13.

HON WAN EŊƐ SE’EM KƆ’ƆN TƆƔESA YEZU

11. Ho wan ta’an eŋɛ la bem kɔ’ɔn tɔɣesa Yezu? (Bisɛ foote la.)

¹¹ Yezu yuun yese la a suure za’a pu’usa Yehowa ge ana du’a du’a la en zusega poan. (Lu. 6:12) Sɛla n wan soŋɛ hɔ ti ho  kɔ’ɔn tɔɣesa Yezu ho san ta muse ko’om ba’asɛ dela ho ita yelese’a n wan basɛ ti ho ana du’a du’a la en. Baabule la yeti: ‘Wuu ton nyɛ nɛŋa tɔlega paɛ zɛ’an la, basɛ ya ti to kɔ’ɔn kena ma’a ma’a sore dena poan.’ (Flp. 3:16) Saŋa woo, ho ni wum mabiisi n kɔ’ɛ ba puti’irɛ ti ba tum zo’e zo’e bo Yehowa. Daanse’ere ba yuun keŋɛ la Na’am Mɔɔlegɔdoma Sukuu bii zɛ’an n eeri soŋerɛ ta soŋɛ. Ho san tara yɔ’ɔ, ho me ta’an tum tuunɛ wa. Yehowa nɛreba biseri la bamam n wan eŋɛ se’em ta’an yalegɛ ba na’am tuuma la. (Tm. 16:9) Ge ho san ka tara yɔ’ɔ n wan eŋɛ bala nananawa? Da ti’isa ti ho dela bunbasela. Sɛla yele n pakɛ dela ho kɔ’ɔn ŋmibera. (Mt. 10:22) Da tamɛ ti ho basɛ ti Yehowa puurɛ pɛɛra mɛ ho san tuna la ho paŋa za’a. Wana dela sore deyima poan ti ho wan ta’an tɔɣesa Yezu ho san ta muse ko’om ba’asɛ.—Ym. 26:1.

12-13. Ho san ka le tuulegera ho wan ta’an eŋɛ la bem? (1 Korint 9:​16, 17) (Bisɛ daka la zuo n de “ Kelum Zɔta.”)

¹² Ho san bisɛ ti ho ni ka yese ho suure poan zusa Yehowa bii ho puurɛ ka peeri na’am mɔɔlegɔ tuuma poan wuu yia la, ho wan eŋɛ la bem? Ge ho san ka le tara pupeelum ho Baabule kaalegɔ poan me? La san ana ho bala ho ko’om musega pooren, da yeti Yehowa vo’osum ka le bɔna ho zuo. Ton ka di mi’a la zuo, lan ani to se’em yɛla poan la ta’an tee mɛ. Ho san ka le tuulegera, ti’isɛ taɣesɛ tuuntuna Paul makerɛ la. La boi bim ti a yuun tiregeri ti a tɔɣesɛ la Yezu ge a yuun mi ti saŋa ase’a a kan tara inkpeŋere n wan ta’an tum. (Kaalɛ 1 Korint 9:16, 17.) A yuun yeti: ‘Mam tum la tuunse’ere ti Naayinɛ dekɛ eŋɛ n nu’usin ti n  tum.’ Bala pa’alɛ ti Paul yuun lu la a suure ti a wan tum na’am mɔɔlegɔ tuuma la, la ka pakɛ lan yuun ani en se’em sankaŋa.

¹³ Bala mea nɔɔ, da kɔ’ɛ ho puti’irɛ doose la lan ani ho se’em. Kɔ’ɔn lu ho suure ti ho wan tum sɛla n ani soŋa la ka pakɛ lan ani ho se’em. Ho san kɔ’ɔn ita sɛla n ani soŋa, la kan yue lan ani ho se’em la wan tee. Ho san wan ta’an eŋɛ bala, la dela ho ita homea zamesegɔ ge zusera, kena tansugere zamesegɔ la na’am mɔɔlegɔ. Bala wan soŋɛ hɔ ti ho kɔ’ɔn tɔɣesa Yezu ho san ta muse ko’om ba’asɛ. Mabiisi san nyɛ hon tiregeri se’em pu’usa Yehowa la, la wan kpemese ba giila.—1 Tes. 5:11.

‘MAƔESƐ YA . . . GEELE YA’

14. Saŋa woo la nari ti to viisɛ tomea la wani ge bem zuo? (2 Korint 13:5)

¹⁴ La ani soŋa ti ho san muse ko’om ba’asɛ ho ni ta makɛ viisɛ homea bisɛ. (Kaalɛ 2 Korint 13:5.) Saŋa ase’a, ho ta’an ni makɛ viisɛ homea bisɛ nyaa ho zuseri daarewoo, ho kaali ge zamesa Baabule la ge kena tansugere zamesegɔ la na’am mɔɔlegɔ. Tiregɛ bisɛ hon wan eŋɛ se’em ta’an tara pupeelum yele ana wa poan. Makerɛ, soke homea yeti: ‘Mam wan ta’an pa’alɛ nɛreba Baabule yelese’a n de naana la? Sarɔtuni poan ti mam wan ta’an tara pupeelum na’am mɔɔlegɔ tuuma la poan? Mam ni tɔɣɛ lan ani mam se’em wana mɔpi n zusega poan? Mam zusega pa’alɛ ti n kɔ’ɔn dekɛ n mea delum la Yehowa? Mam keni tansugere zamesegɔ saŋa woo? Mam wan eŋɛ la wani ta’an ana kɛli ge bɔ’ɔra lebesego zamesegɔ poan?’

15-16. Hon zamesɛ la bem mabia la yele la poan la eŋa n yuun ta’an zaɣesɛ be’em la?

¹⁵ La me nari ti ho viisɛ homea soŋa ta’an mina ho tɔregɔ beene. Mabia ayima yu’urɛ n de Robert tɔɣɛ pa’alɛ bala n de yelemɛŋɛrɛ se’em. A yeti: “Mam n yuun de yuun 20 la, mam yuun yibesi tuna la tuuma ase’a. Daarɛ deyima ti mam tum ba’asɛ ti mam tuuma tadaana n de pugela beem mam ti to keŋɛ a yire. A yuun yeti to wan ta bɔna to ma’a ge ita ton boti sɛla. Yia la, mam yuun ka ta’an yeti aayi ge pooren mam yuun zaɣesɛ mɛ ge pa’alɛ en sɛla n sɔi.” Robert yuun nyaŋɛ zaɣesɛ sɛla n wan basɛ ti a tum be’em mɛ. A yuun mɔ ya. Pooren ti a yuun malum ti’isɛ yele la bisɛ ti a  yuun ta’an maalɛ ni yele la soŋa gana bala. A yeti: “Mam yuun ka zaɣesɛ en kalam wuu Yosef n yuun zaɣesɛ Potifar pɔɣa se’em la. (Pin. 39:​7-9) Yelemɛŋɛrɛ, la yuun dela pakerɛ bɔ’ɔra mam la lan yuun kpe’em bo mam se’em ti n zaɣesɛ kalam la. Yele wa soŋɛ mam ti n baŋɛ ti la nari ti n basɛ ti mam la Yehowa bɔŋa la kpe’em.”

¹⁶ Ho me san viisɛ homea bisɛ wuu Robert n yuun eŋɛ se’em la, la wan soŋɛ hɔ. Hali ho san nyaŋɛ zaɣesɛ be’em, soke homea yeti; ‘La gu’um ta paɛ la wani ti mam yeti aayi?’ Ho san bisɛ ti teere boi, da basɛ ti ho giila kɔ’ɔsɛ. Basɛ ti ho puurɛ pee la hon baŋɛ ho tɔregɔ la. Zusɛ Yehowa ge bisɛ hon wan eŋɛ se’em ta’an vɔna ho vom ti la makɛ la Yehowa pa’alegɔ.—Ym. 139:23, 24.

17. Robert n daa eŋɛ sɛla la zɛkɛ Yehowa yu’urɛ la wani?

¹⁷ Ho wan ta’an le zamesɛ sɛla Robert yele la poan. A tɔ̃kɛ yeti: “Mam n daa zaɣesɛ pugela la beeŋo la, a daa yeti n mɔ ya! Mam daa soke en ti bala pa’alɛ la bem? Ti a yeti eŋa zɔ n tabelɛ dɛna Yehowa Sɛɛradaana n yeti, bunbilipaalesi n de Yehowa Sɛɛradoma za’a ni suɣɛ mɛ tuna yalumtuuma. Bala a yuun yele a zɔ la ti, a wan eŋɛ mam bisɛ n ani la bala bii. Mam puurɛ daa pee mɛ la mam baŋɛ ti mam zɛkɛ la Yehowa yu’urɛ la.”

18. Hon lu ho suure ti ho eŋɛ la bem ho san ta muse ko’om ba’asɛ? (Bisɛ daka la zuo n de “ Zaseŋɔ Yelese’a N Wan Basɛ Ti Ho Tara Pupeelum..”

¹⁸ Ho san kã homea bo Yehowa ge muse ko’om, ho iti pa’ala ti ho boti la a yu’urɛ la ana zilam bɔŋa woo poan. Mina ti Yehowa mi yaarɛ se’a la yelese’a woo n paari ho la. A wan kã bo ho la hon tiregeri ti ho tara yelemɛŋɛrɛ la. Tara suure lua ti a wan dekɛ a zilam vo’osum la soŋɛ hɔ ti ho tara paŋa kelum ita bala. (Lu. 11:11-13) Yehowa wan soŋɛ hɔ ti ho kelum tɔɣesa Yezu ho san ta muse ko’om ba’asɛ.