1. Yehowa boti a yamesi ita la bem? (Bisɛ foote la.)

 ANI ti to wan paɛ a zɛ’an ti a buɣelɛ to suure ge pa’alɛ to soŋa? To mi sokere wa lebesego mɛ. To wan ta’an zusɛ Yehowa Naayinɛ. Yehowa beem to ti to kɔ’ɔn ita la bala. A boti la to zusa en tabela​—to kɔ’ɔn ‘zusa en saŋa woo.’ (1 Tes. 5:17) Yelese’a woo n paari to la, to wan ta’an zusɛ en ti a soŋɛ tɔ. (Mag. 3:5, 6) Yehowa n tari nɛŋa bɔ’ɔra to la zuo, a basɛ ti to baŋɛ ti to wan ta’an zusa en saŋa woo.

2. To wan sɔsɛ la bem zaseŋɔ wa poan?

² To puurɛ pee mɛ la Yehowa n bo to yɔ’ɔ ti to zusera en la. Ge ton tari tuuma zo’e zo’e la zuo, la ta’an ni kpe’em bo to mɛ ti to ɛ saŋa zusɛ. To me ta’an ti’isɛ bisɛ to wan eŋɛ se’em ti to zusega la tara paŋa. Yelesonɛ la dela, Baabule la tari giilekpeŋere la pa’alegɔ yɛla mɛ n wan ta’an soŋɛ tɔ. Zaseŋɔ wa poan to wan sɔsɛ to wan eŋɛ se’em ta’an ɛ saŋa zusa wuu Yezu n yuun iti se’em la. To me wan le sɔsɛ ninmɔ’ɔrɛ yɛla anuu n wan soŋɛ tɔ ti to zusega la ta’an tara paŋa.

3. Yezu yuun bɔkɛ zusega yele la wani?

³ Yezu yuun bɔkɛ ti to zusega la dela tuulum bɔ’ɔra Yehowa. Eŋa n yuun boi saazuo sa la, a yuun nyɛ a Sɔ n lebese a yamesi zusega se’em tingɔŋɔ wa zuo. Makerɛ, Yezu yuun boi mɛ la a Sɔ ge nyɛ Eŋa n lebese Hana,  David, Elia la nɛreba basɛba zusega se’em. (1 Sa. 1:10, 11, 20; 1 Na. 19:4-6; Ym. 32:5) Bala n sɔi ti Yezu yuun pa’alɛ a podɔleba la ti ba zusa Naayinɛ tabela ge me tara puti’irɛ ti a wan kelese ba!​—Mt. 7:7-11.

4. Yezu zusega la pa’alɛ to la bem?

⁴ Yezu yuun zuseri Yehowa mɛ ti la dɛna makesonɛ bo a podɔleba la ti ba tɔɣesa. Yezu yuun ni kɔ’ɔn zusa la saŋa woo a na’am mɔɔlegɔ tuuma la poan. Nɛreba zo’e zo’e n yuun ni kena a zɛ’an la zuo, a yuun ni ɛ la saŋa zusɛ. (Mr. 6:31, 45, 46) A yuun ni isige la bulika asubaa ta bɔna a ma’a zusa. (Mr. 1:35) Saŋa kasɛka, a yuun zusɛ la yu’uŋɔ la za’a ge nyaa ta’an kɔ’ɛ a puti’irɛ ninmɔ’ɔrɛ yele poan. (Lu. 6:12, 13) Yu’unseko ti Yezu yeti a ki la, a yuun kɔ’ɔn zusa mɛ tabela yuun ta’an tum tuunkãtɛ la ti a tara tingɔŋɔ wa zuo la ba’asɛ.​—Mt. 26:39, 42, 44.

5. To wan ta’an tɔɣesa Yezu la wani to zusega poan?

⁵ Yezu makesonɛ la pa’alɛ tɔ ti to san puɣum ka tara nɛŋa la se’em me, la nari ti to ni ɛ saŋa zusɛ. Wuu Yezu la, la nari ti to me tara saŋa zusa. To ta’an ni isige bulika asubaa bii yu’uŋɔ zusɛ. To san ita bala to wan basɛ ti Yehowa baŋɛ ti to puurɛ pee mɛ la yɔ’ɔ wa. Mabipɔka ayima yu’urɛ n de Lynne tɛ̃ri a suure n yuun sukɛ se’em, eŋa n yuun zamesɛ baŋɛ eŋa n tari yɔ’ɔ se’em ti a zusa la. A yeti, “Mam n yuun baŋɛ ti n wan ta’an zusa Yehowa saŋa woo poan la, bala yuun soŋɛ mam mɛ ti mam dekɛ en ti a dɛna n Zɔ ge me bɔta ti n zusega la tara paŋa.” Nɔkpe’ene kai ti la me ani to zo’e zo’e la bala. Basɛ ya ti to sɔsɛ ya yɛla anuu ti to wan ta’an dekɛ pa’asɛ to zusega poan.

6. Wuu Liligere 4:10, 11 n pa’alɛ se’em la, Yehowa nari ti a to’e la bem?

⁶ Pɛɣɛ Yehowa. Tuuntuna Yon yuun nyɛ la keendoma 24 n boi saazuo pu’usa Yehowa liligere poan. Ba yuun pɛɣɛ la Naayinɛ ge nyaa yɛta yeti ‘ho nari mɛ ti ho to’e gilema la na’asegɔ la paŋa.’ (Kaalɛ Liligere 4:10, 11.) Malesi la me  tari yɛla zo’e zo’e ti ba wan ta’an pɛɣɛ ge na’asɛ Yehowa a poan. Bama la Yehowa n boi saazuo ge ti ba mina en soŋa soŋa. Ba nyɛti a hala la mɛ, a tuuma woo poan. Ban nyɛti Yehowa n tuni a tuuma se’em la ni kɛ̃ ba suure mɛ ti ba pɛɣera en.​—Yob 38:4-7.

7. To wan ta’an pɛɣɛ Yehowa la yele ani poan?

⁷ Tomam me dela to pɛɣera Yehowa to zusega poan. Tɔɣera pa’ala ton nɔŋɛ en se’em la to puurɛ n pee la yelese’a ti a eŋɛ la. Ho san kaala ge zamesa Baabule la, tiregɛ bisɛ Yehowa halese’a n kɛ̃ ho suure. (Yob 37:23; Arom 11:33) Nyaa yele Yehowa lan ani ho se’em la a hala ana wa. To me ta’an pɛɣɛ Yehowa la eŋa n soŋɛ tomam la to mabinɔɔrɛ la se’em la. A kɔ’ɔn bisera ge tɛ’ɛla to mɛ saŋa woo.​—1 Sa. 1:27; 2:1, 2.

8. Beni zuo ti to pu’usa Yehowa? (1 Tesalonika 5:18)

⁸ Bo Yehowa fara. To tari la yɛla zo’e zo’e ti to wan ta’an bo Yehowa fara to zusega poan. (Kaalɛ 1 Tesalonika 5:18.) To wan ta’an pu’usɛ en la yelese’a woo ti to tara se’ere n sɔi la, yelesoma woo ze’ele la a zɛ’an na. (Yam. 1:17) Makerɛ, to ta’an yele en to puurɛ n pee se’em la tingɔŋɔ wa la a naaŋɔ lɔɣɔrɔ la n som se’em la. To me ta’an yele en to puurɛ n pee se’em la ton tari nyɔvore, deodoma, zɔdoma la beere sa’am puti’irɛ. To me boti la to pu’usɛ Yehowa la eŋa n bo to yɔ’ɔ ti to tara bɔnsoŋa la en la.

9. Beni n sɔi ti la nara ti to eŋɛ pa’alɛ ti to puurɛ pee ya la yelese’a woo ti Yehowa ita bɔ’ɔra to la?

⁹ La wan nara ti to tiregɛ ti’isɛ baŋɛ yelese’a n basɛ ti to puurɛ pee la Yehowa. To boi la sansɛka poan ti nɛreba ka mina n pu’usɛ ya. Nɛreba kɔ’ɔn ɛɛra la ban wan nyɛ sɛla ge daɣɛ ban wan eŋɛ yelese’a pa’alɛ ti ba puurɛ pee mɛ la sɛla ti ba tara la. To san tara hala ana wa taaba, saŋa woo to zusega la wan kɔ’ɔn dɛna la yelese’a ti to bɔta la ma’a. To san ka bɔta ti to ita bala, la nari ti to ni kɔ’ɔn ita pa’ala ti to puurɛ pee mɛ la yelese’a woo ti Yehowa ita bɔ’ɔra to la.​—Lu. 6:45.

10. Mabipɔka ayima puurɛ n pee la Yehowa n eŋɛ sɛla bo en la soŋɛ en la wani ti a ta’an ŋmibe? (Bisɛ foote la.)

¹⁰ To puurɛ san pee la yelese’a ti Yehowa eŋɛ bo to la, la wan basɛ ti to ta’an ŋmibe daaŋɔ woo poan. Geele Kyung-sook, zi’irego poan yele la n boi January 15, 2015, The Watchtower la poan bisɛ. Dɔgetadoma n yuun viisɛ baŋɛ ti a tari la ɔberega bã’a n boi a sofulunfuo poan. A yeti, “Mam bã’a wa wuŋɛ mam mɛ paa. La yuun ani wuu mam sɛla woo bɔregɛ me la ti dabeem me tara mam.” Bem n yuun soŋɛ en ti a ta’an ŋmibe? A yeti yu’uŋɔ woo a san ni yeti a gã’arɛ, a  ni zom la a yire gɔsegɔ zuo ta zusɛ kpe’eŋo kpe’eŋo yele yɛla anuu n basɛ ti a puurɛ pee dabeserɛ la poan. Bala basɛ ti a ka ba’ɛ tara putɛyiila ti a ta’an ni eŋɛ pa’alɛ eŋa n nɔŋɛ Yehowa se’em. A yuun baŋɛ Yehowa n biseri a yamesi se’em mɛ wuŋerɛ saŋa poan ge nyaa baŋɛ ti to nyɛti la kã’a zo’e zo’e to vom poan gana yelese’a n paari to la. Wuu Kyung-sook la, to tari la yɛla zo’e zo’e ti to wan ta’an pu’usa Yehowa hali wuŋerɛ san puɣum paɛ tɔ. To san doose zusega poan pa’alɛ ti to puurɛ pee ya, bala wan soŋɛ tɔ ti to ta’an ŋmibe ti la ana to mama.

11. Yezu n yuun lebe saazuo la, beni n sɔi ti a podɔleba la yuun nara ti ba tara sukpe’ene?

¹¹ Zusa Yehowa ti a basɛ ti ho tara sukpe’ene na’am mɔɔlegɔ poan. Yezu n yuun yeti a lebe saazuo la, a yuun tiɛ a podɔleba la lan nari ti ba mɔɔla a yɛla se’em ‘Yerusalem la Yudea la Samaria tiŋa woo poan ta paɛ tingɔŋɔ wa zɛse’esi n zaaɛ la poan.’ (Tm. 1:8; Lu. 24:46-48) La yuun ka yue ti Yuda nɛŋadoma la yuun nyɔɣɛ tuuntuna Peter la Yon tari ba keŋɛ Sanhedrin kootin la hali vuusa ba ti ba da le mɔɔla. (Tm. 4:18, 21) Peter la Yon yuun eŋɛ la wani?

12. Wuu Tooma 4:29, 31 n yele se’em la, podɔleba la yuun eŋɛ la wani?

¹² Yuda pu’usegɔ nɛŋadoma la n yuun vuuse Peter la Yon la, ba yuun lebese yeti: ‘Gakɛ ya bo yamesi sɛla n de ma’a Naayinɛ nɛŋan. To kelese yamam gana Naayinɛ? Ge tomam kan sina kan tɔɣera yelese’a ti to nyɛ ge wum la.’ (Tm. 4:19, 20) Ban yuun yu’ɛ Peter la Yon basɛ la, podɔleba la yuun zusɛ la Yehowa kpe’eŋo kpe’eŋo ti ba puti’irɛ bɔna a tuuma la poan. Ba yuun zusɛ yeti: ‘Bo tomam sɛba n tuni bɔ’ɔra ho la sukpe’ene.’ Yehowa me yuun kelese ba zusega wa mɛ.​—Kaalɛ Tooma 4:29, 31.

13. To wan ta’an zamesɛ la bem Jin-hyuk makesonɛ la poan?

¹³ To wan ta’an tɔɣesa podɔleba la makesonɛ la ge kelum mɔɔla hali kpɛ’ɛndoma san pɛregera tɔ ti to da ita bala. Geele Jin-hyuk makesonɛ la bisɛ. Ba yuun paɣɛ en mɛ a sakerɛ la zuo. Eŋa n yuun boi sarega la, a tuuma yuun dela a bisera sɛba n boi sarega la ti ba paɣɛ ba, ba ma’a la. Ge ba yuun ka bo en yɔ’ɔ ti a tɔɣera Baabule yɛla bɔ’ɔra nɛreba la. A yuun zusɛ mɛ ɛɛra sukpe’ene ge le ɛɛra eŋa n wan eŋɛ se’em ta’an doose yɛm sore poan tɔɣɛ yelemɛŋɛrɛ la bo nɛreba yɔ’ɔ woo poan. (Tm. 5:29) A yeti: “Yehowa yuun kelese mam zusega wa mɛ ge basɛ ti n tara sukpe’ene la yɛm ta’an ni dekɛ mita anuu pa’alɛ nɛreba Baabule la. Yu’uŋɔ poan, mam nyaa ni gulesɛ la yelese’a ti yiimbeere mam wan tɔɣɛ bo nɛreba la.” Tomam me ta’an tara puti’irɛ ti Yehowa wan soŋɛ tɔ to na’am mɔɔlegɔ tuuma la poan. Wuu Jin-hyuk la, to zusɛ Yehowa ti a basɛ ti to tara sukpe’ene la yɛm.

14. Yɛla san paara tɔ, beni n wan soŋɛ tɔ ti to ta’an ŋmibe? (Yooma 37:3, 5)

¹⁴ Zusɛ Yehowa ti a soŋɛ hɔ ti ho ta’an maalɛ ho yɛla la. To zo’e zo’e ŋmiberi mɛ la yelese’a n paari to la n de wuu to nɛra n ki, yire yele, yaarɛ bii yeledaaŋɔ ase’a. Bã’a wa n wi’iri la, la zaberɛ basɛ ti yele ana wa zo’e zo’e ba’ɛ kpe’em bo to mɛ. Tɔɣɛ sɛla n boi ho suuren bo Yehowa. Yele en ho bɔŋa la n ani se’em wuu hon ni tɔɣera se’em bɔ’ɔra ho zɔ la.  Tara puti’irɛ ti Yehowa wan ‘bɔna ho poore.’​—Kaalɛ Yooma 37:3, 5.

15. Zusega wan soŋɛ to la wani ti to ta’an ŋmibera namesegɔ poan? Bo makerɛ.

¹⁵ To san zusa tabela la wan soŋɛ tɔ ti to ta’an ‘ŋmibera namesegɔ poan.’ (Arom 12:12) Yehowa mi yelese’a n paari a yamesi mɛ ge me ‘kɛlesa ba kaasega.’ (Ym. 145:18, 19) Kristie n de yuuma 29 ge me dɛna sore ŋmɛ’adaana baŋɛ ti bala dela yelemɛŋɛrɛ. Bã’a n yuun ŋmɛ en ti a yuun bɛ̃’ɛra paa. Wana wa yuun basɛ ti a suure n sa’am. Pooren a yuun baŋɛ ti a ma me tari la bãyaalega. Kristie yeti: “Mam yuun kɔ’ɔn zusera la Yehowa ti a soŋɛ mam ti n ta’an ŋmibera dabeserɛ woo poan. Mam yuun tiregɛ mɛ maasum n mea soŋa ta’an kena zamesegɔ ge ita n mea zamesegɔ daarewoo.” A le yeti: “Zusega n yuun soŋɛ mam ti mam ta’an ŋmibe bɔnkana wa poan. Mam yuun mi ti Yehowa kɔ’ɔn bɔna la mam mɛ. Putɛdena wa n yuun buɣelɛ mam suure. La boi bim ti mam bã’a la yuun ka basɛ bilam bilam ge Yehowa yuun kelese mam zusega la mɛ basɛ ti mam tara suma’asum ti la ana mam buɣa buɣa.” Basɛ ya ti to kɔ’ɔn tɛra ti ‘Yehowa mi eŋa n wan eŋɛ se’em faaɛ tontɔɔ nɛreba wuŋerɛ poan basɛ mɛ.’​—2 Pe. 2:9.

16. Beni n sɔi ti to ɛɛra ti Yehowa soŋɛ tɔ ti to ta’an zaɣesɛ be’em?

¹⁶ Zusa Yehowa ti a soŋɛ hɔ ti ho zaɣesɛ be’em. Ton ka di mi’a la zuo, to ni kɔ’ɔn tiregera mɛ ti to zaɣesɛ be’em. Sitaana me kɔ’ɔn tiregera mɛ ti a basɛ ti la kpe’em bo to. Sore deyima ti a ni bɔta ti a sa’am to puti’irɛ dela de’eŋo yooro poan. De’eŋo ana wa ta’an basɛ ti to tara putɛyooro yɛla. Putɛyooro wa ni sa’am to suure mɛ ti la ni ta basɛ ti to sige be’em poan.​—Mr. 7:21-23; Yam. 1:14, 15.

17. To san zusa Yehowa ti a soŋɛ tɔ, bem n nari ti to eŋɛ ta’an zaɣesɛ be’em? (Bisɛ foote la.)

 ¹⁷ To kɔ’ɔn ɛɛra la Yehowa soŋɛ tɔ ti to ta’an zaɣesɛ be’em. Yezu yuun tɔɣɛ la yele ana wa pa’asɛ a zusega la poan. A yuun yeti: ‘Da basɛ ti be’em paɛ tɔ ge faaɛ tɔ putɔa la nu’usin.’ (Mt. 6:13) Yehowa boti la a soŋɛ tɔ ge la nari ti to zusɛ en ti a soŋɛ tɔ. La me nari ti to ita to itigɔ ti la makɛ la to zusega la. To ni bɔta la to tiregɛ bisɛ to wan eŋɛ se’em gu tomea ti Sitaana putɛbe’ero la, la tingɔŋɔ wa yɛla da kɛ̃ to suuren. (Ym. 97:10) To san kaala ge zamesa Baabule la, la wan basɛ ti to tara putɛsonɛ. To me san kena zamesegɔ la na’am mɔɔlegɔ la wan soŋɛ tɔ ti to tara putɛsonɛ. Yehowa me yeti a kan basɛ ti be’em paɛ tɔ ti la zɔɛ to paŋa beene.​—1 Ko. 10:12, 13.

18. To za’a waabi nari ti to ita la bem to zusega poan?

¹⁸ Tomam ayima ayima woo nari ti to kɔ’ɔn mɔɔra mɛ zusa Yehowa ba’asegɔ dabesa wa poan. Ni ɛ saŋa dabeserɛ woo poan zusɛ. Yehowa boti la to doose zusega poan ‘tɔɣɛ sɛla n boi to suuren bo en.’ (Ym. 62:8) Pɛɣɛ Yehowa ge pu’usɛ en la yelese’a woo ti a eŋɛ bo ho la. Yele en ti a soŋɛ hɔ ti ho tara sukpe’ene na’am mɔɔlegɔ poan. Zusɛ en ti a soŋɛ hɔ ti ho ta’an ŋmibe yeledaaŋɔ woo poan ge ta’an zaɣesɛ be’em sebo woo n wan paɛ hɔ. Da basɛ ti se’em bii sɛsɛla gu ho ti ho kan ta’an zusa Yehowa daarewoo. Ge Yehowa lebeseri to zusega la wani? To wan sɔsɛ ninmɔ’ɔrɛ sokere wa zaseŋɔ seko n taɣelɛ la poan.