1-2. To ta’an ni ti’isa la bem to zusega poan?

 HON tabelɛ soke homea bisɛ nyaa Yehowa lebeseri ho zusega? Ho san tabelɛ soke bala, yi mina ti la daɣɛ hon ma’a. Mabiisi zo’e zo’e tabelɛ soke bala mɛ, yele yele wuu wuŋerɛ poan. To san namesa la ta’an kpe’em bo to ti to bɔkɛ Yehowa n lebeseri to zusega se’em.

² Basɛ ya ti to sɔsɛ ya sɛla n sɔi ti to tara puti’irɛ ti Yehowa lebeseri a yamesi zusega mɛ. (1 Yo. 5:15) To me wan sɔsɛ soke ana wa: Beni n sɔi ti saŋa ase’a la ni ta’an ana wuu Yehowa ka lebeseri to zusega? Sarɔtuni poan ti Yehowa lɛbesa to zusega zina beere wa?

3. Beni n sɔi ti Yehowa bɔta ti to zusa en?

³ Baabule la yele to ti Yehowa nɔŋɛ to mɛ paa ge ti to me dɛna tuulum bɔ’ɔra en. (Hag. 2:7; 1 Yo. 4:10) Bala n sɔi ti a yele to ti to zusɛ en ti a soŋɛ tɔ. (1 Pet. 5:6, 7) A boti la a soŋɛ tɔ ti to ana du’a du’a la en ge ta’an ŋmibera yeledaaŋɔ se’a n paari to la poan.

4. To eŋɛ la wani baŋɛ ti Yehowa lebeseri a yamesi zusega mɛ? (Bisɛ foote la.)

⁴ Baabule la poan, zɛ’ɛsi zo’e zo’e pa’alɛ ti Yehowa lebeseri a yamesi zusega mɛ. Ho wan ta’an ti’isɛ baŋɛ ba  poan ayima? Naba David dela ayima. Dɛŋa zo’e zo’e n yuun paɛ en ge ti a yuun zusɛ Yehowa ti a soŋɛ en. Saŋa ase’a, a yuun zusɛ yeti: ‘O Yehowa kelese n zusega wa. Zɔ n nimbɔ̃’ɔ ge kelese n kaasega wa. Ze’ele ho yelemɛŋɛrɛ la, la ho tontɔɔ tuuma la poan lebese mam.’ (Ym. 143:1) David n yuun zusɛ Yehowa ɛɛra faarɛ la, A yuun kelese en mɛ. (1 Sa. 19:10, 18-20; 2 Sa. 5:17-25) David yuun wan ta’an yeti: ‘Yehowa lɛm mɛ la se’em woo n wan kaasɛ bo en.’ Tomam me wan ta’an yele bala.​—Ym. 145:18.

5. Yehowa yuun lebese a diimi yamesi zusega wuu ban yuun ti’iseri se’em la? Bo makerɛ. (Bisɛ foote la.)

⁵ Yehowa ta’an lebese to zusega sore se’ere poan ti to ka ti’isi ni de yele. La yuun ani tuuntuna Paul la bala. A yuun zusɛ ti Naayinɛ yese ‘gɔ̃’a n boi a poan vɛɣesa en.’ Sugumnɔɔrɛ butã ti Paul zusɛ yeledena wa poan. Yehowa yuun lebese a zusega la? Ɛ̃ɛ ge daɣɛ sore se’ere poan ti Paul ti’isa la. Yehowa yuun ka yese yele la ge a yuun tuɣum bo en la paŋa ti a wan ta’an kelum tara yelemɛŋɛrɛ pu’usa En.​—2 Ko. 12:7-10.

6. Beni n sɔi ti saŋa ase’a, la ni ana to wuu Yehowa ka lebeseri to zusega?

⁶ Saŋa ase’a Yehowa ta’an lebese to zusega sore se’ere poan ti to ka ti’isa ni de yele. Ge to tari puti’irɛ ti Yehowa mi sɛla n ani soŋa bɔ’ɔra to mɛ. Hali ‘a wan ta’an eŋɛ zɔɛ sɛla ti to soke ge ti’isa la.’ (Ep. 3:20) Bala zuo la, a ta’an lebese to zusega sansɛka bii sore se’ere poan ti to ka ti’isi ni de yele.

7. Beni n sɔi ti la ni nara ti to tee ton zusɛ ɛɛra sɛla la? Bo makerɛ.

⁷ La ni dɛna la to tee ton zusɛ ɛɛra sɛla la to san bɔkɛ Yehowa puti’irɛ la soŋa. To geele Martin Poetzinger yele la bisɛ. Mabia Poetzinger n yuun ta di a pɔɣa la, ba yuun paɣɛ en la Nazi sarega poan. Pɔsega la, a yuun zusɛ Yehowa ti a soŋɛ en ti a yese sarega la poan ta’an lebe ta bisɛ a pɔɣa ge me mɔɔla na’am yelesoma la. Ge bakwai ayi pooren, sɛla n yuun eŋɛ pa’alɛ ti Yehowa kan basɛ ti a yese sarega la poan. Ti a nyaa zusa yeti: “Yehowa, soso pa’alɛ mam sɛla n nari ti n eŋɛ.” A yuun nyaa pɔsɛ ti’isa la, lan wuni mabiisi la sarega la poan se’em. Ba zo’e zo’e yuun fabeli la ba pɔɣeba la ba  kɔma yele. Mabia Poetzinger nyaa zusɛ yeti: “Yehowa, n pu’usɛ ya la hon dekɛ tuunse’ere bo mam la. Soŋɛ mam ti n ta’an kpemese mabiisi wa giila.” A yuun dekɛ la yuuma awɛi bɔna sarega la poan kpɛmesa mabiisi wa giila!

8. Bem ninmɔ’ɔrɛ yele n nari ti to tɛra to san zusera?

⁸ La nari ti to tɛra ti Yehowa tari la sɛla ti a tum amea saŋa poan. Sɛla ti a bɔta ti a tum dela a yese yeledaaŋɔ seto woo n paari tɔ ti to namesa zina beere wa la. Yele ana wa dela yeledi’ima, bã’asi la kum. Yehowa wan doose la a Na’am la poan tum yele ana wa. (Da. 2:44; Lil. 21:3, 4) Ge sankaŋa n nan ka paɛ la, Yehowa bo Sitaana la yɔ’ɔ ti a bisera tingɔŋɔ wa. b (Yon 12:31; Lil. 12:9) Yehowa san maalɛ ni asaaleba yeledaaŋɔ nananawa la wan basɛ ti la ana wuu Sitaana bisega la n ani soŋa. La boi bim ti to guri la Yehowa tum yelese’a ti a pu’ulum biŋe la ge bala ka pa’alɛ ti a tamɛ to yele mɛ ka soŋera tɔ. Basɛ ya ti to sɔsɛ ya sarɔtɔ se’a ti Yehowa soŋera tɔ.

9. Yehowa wan ta’an soŋɛ to la wani la san dɛna ti to kɔ’ɛ to puti’irɛ tum tuunɛ? Bo makerɛ.

⁹ A bo’ori to la yɛm. Yehowa yeti a wan bo to yɛm ti to ta’an ni kɔ’ɛ to puti’irɛ tum tuunɛ. To ni ɛɛra la Naayinɛ yɛm ti to ta’an kɔ’ɛ to puti’irɛ soŋa tum tuunɛ to vom poan. La ta’an dɛna ti to kɔ’ɛ to puti’irɛ dɛna nɛreyone bii to ele bii di pɔɣa. (Yam. 1:5) Geele mabipɔka Maria n de nɛreyone la yele bisɛ. c A puurɛ yuun pee mɛ la eŋa n de sore ŋmɛ’adaana la ge nyaa ta seke mabia. A yuun yeti: “To yuun de zɔtɔ la, to suure yuun kɛ̃ taaba mɛ. Mam yuun mi ti la dela n kɔ’ɛ n puti’irɛ eŋɛ sɛla. Mam yuun zusɛ mɛ paa yele wa poan. Mam yuun eeri la n dekɛ Yehowa pa’alegɔ tum tuuma ge mam mi ti Yehowa kan kɔ’ɛ puti’irɛ tum tuuma bo mam.” A yuun baŋɛ ti Yehowa lebese eŋa n zusɛ ɛɛra yɛm la mɛ. Wani wani? Eŋa n yuun viisɛ to gɔnɔ la poan la, a yuun nyɛ yɛla wana mɔpi n soŋɛ en ti a ta’an kɔ’ɛ a puti’irɛ soŋa. A me yuun dekɛ la a ma ka’aŋɔ tum tuuma. Ka’aŋɔ la yuun soŋɛ Maria mɛ ti a ti’isɛ bɔkɛ lan ani en se’em. Ba’asegɔ la, a yuun dekɛ yɛm tum tuuma mɛ.

10. Wuu Filipi 4:13, n yele se’em la, Yehowa wan eŋɛ la bem soŋɛ a yamesi? Bo makerɛ. (Bisɛ foote la.)

¹⁰ A basɛ ti to tara la paŋa ta’an ŋmibera. Wuu Yehowa n yuun soŋɛ tuuntuna Paul se’em la, a me wan basɛ ti to tara  paŋa ta’an ŋmibe to yele la poan. (Kaalɛ Filipi 4:13.) Bisɛ Yehowa n yuun soŋɛ mabia ayima yu’urɛ n de Benjamin ti a ta’an ŋmibe wuŋerɛ poan se’em. Benjamin n yuun de bia la, eŋa la a deodoma yuun kɛ̃’ɛri la zaberɛ n sa’ɛ sɛba kɛ̃’a zɛ’an Africa tiŋa poan. Benjamin yeti: “Mam yuun kɔ’ɔn zusa la Yehowa tabela ti a soŋɛ mam ti n ta’an ita yelese’a n nari bɔ’ɔra en. Yehowa yuun lebese Benjamin zusega la mɛ, basɛ ti a tara suma’asum la sukpe’ene mɔɔla na’am yelesoma la ge me nyɛta to gɔnɔ la zamesa ta’an ze’a kankaŋi.” A le yeti: “Mam n yuun kaalɛ Mabiisi vom poan yɛla ge baŋɛ Yehowa n yuun soŋɛ ba se’em ti ba ta’an ŋmibera la kpemese mam giila mɛ ti mam me bɔta ti n kelum tara sakerɛ.”

11-12. Yehowa ta’an doose to mabinɔɔrɛ la poan lebese to zusega la wani? (Bisɛ foote la.)

¹¹ A tari la to mabinɔɔrɛ la soŋera tɔ. Yu’unseko ti Yezu yuun yeti a ki la, a yuun zusɛ mɛ paa. A yuun zusɛ Yehowa ti a da basɛ ti nɛreba ti’isa ti eŋa zɛregeri En. Yehowa yuun ka eŋɛ bala. A yuun tuɣum tum la maleka ti a keŋɛ ta kpemese Yezu giila. (Lu. 22:42, 43) Yehowa ta’an doose mabia poan ti a wa’ana kaɛ to bisɛ ti la dɛna giilekpeŋere bɔ’ɔra tɔ. To za’a waabi wan bɔta ti to dekɛ yɔ’ɔ woo tɔɣera ‘yetɔɣesoma’ bɔ’ɔra to mabiisi la.​—Mag. 12:25.

¹² To geele mabipɔka Miriam yele la bisɛ. Bakwai fii pooren, a sira yuun ki la, Miriam ma’a n yuun boi ti a suure sa’am. A yuun kɔ’ɔn kaasa mɛ ka gɔ’ɔra ge me bɔta ti eŋa la nɛra sɔsɛ. A yeti: “Mam yuun ka ta’an yi nɛra, bala la mam yuun zusɛ la Yehowa. Mam n yuun kaaseri ge zusa la ti mam fon damɛ. La yuun dela keema ayima n yi mam. A me yuun dela mam zɔ paa.” Keema wa la a pɔɣa yuun buɣelɛ Miriam suure mɛ. A yuun baŋɛ ti Yehowa n kalum mabia wa suure ti a yi la.

13. Bo makerɛ pa’alɛ Yehowa n wan ta’an doose nɛresɛba n ka pu’useri en poan lebese to zusega se’em.

¹³ A ta’an basɛ ti nɛreba n ka pu’useri  en soŋɛ tɔ. (Mag. 21:1) Saŋa ase’a, Yehowa ni doose la nɛresɛba n ka pu’useri en poan lebese a yamesi zusega. Makerɛ, a yuun kalum Naba Artasaset suure mɛ ti a bo Nehemia yɔ’ɔ ti a lebe Yerusalem ta soŋɛ ti ba malum mɛ tiŋa la. (Ne. 2:3-6) Zina beere wa me, Yehowa ta’an kalum nɛresɛba n ka pu’useri en suure ti ba soŋɛ tɔ yelese’ere woo poan.

14. Beni n kɛ̃ hon suure la Soo Hing zi’irego poan yele la? (Bisɛ foote la.)

¹⁴ Mabipɔka ayima yu’urɛ n de Soo Hing yeti Yehowa doose la dɔgeta ayima poan soŋɛ eŋa. A bia ti puti’irɛ bã’a daana en. Dɛŋa n yuun paɛ ba bia la ti eŋa la a sira basɛ ba tuuma ti ba ta’an bisera en. Ban yuun basɛ ba tuuma la zuo ti nɔŋɔ kɛ̃ ba. Soo Hing yeti la yuun ba’ɛ wuŋɛ eŋa ta gaŋɛ mɛ. A yuun tɔɣɛ yelese’a n daani en la bo Yehowa ti a soŋɛ en. Dɔgeta la ti ba yuun keŋɛ ta nyɛ en la yuun boti a soŋɛ ba mɛ. Gɔmena la n yuun soŋɛ en la zuo ti a yuun nyɛ zɛ’an n makɛ ma’a kɛ̃’ɛra. Soo Hing yeti: “To yuun baŋɛ ti Yehowa nu’o bo yele wa poan mɛ. A sirum dela ‘se’em n keleseri zusega.’”​—Ym. 65:2.

15. Bem n yuun soŋɛ mabipɔka ayima ti a baŋɛ ti Yehowa lebese a zusega mɛ?

¹⁵ La dela to tara sakerɛ ta’an baŋɛ Yehowa n lebeseri to zusega la se’em. Yehowa ka lebeseri to zusega yelekirega sore poan ge eŋa n lebeseri to zusega se’em la dela sɛla n wan soŋɛ tɔ ti to kelum tara yelemɛŋɛrɛ bɔ’ɔra to saazuo Sɔ la. Bala la, ni kɔ’ɔn bisa Yehowa n wan lebese ho zusega la se’em. La yuun ani mabipɔka Yoko wuu Yehowa ka lebeseri a zusega me la. Bala la, a yuun pɔsɛ gulesɛ la yelese’a ti a zusɛ Yehowa ti a eŋɛ bo en la. Pooren, eŋa n yuun lebe ta bisɛ yelese’a ti a zusɛ ɛɛra la, a yuun baŋɛ ti Yehowa lebese a zusega la zo’e zo’e mɛ hali yelese’a ti a zusɛ ge tamɛ ba yele la. Saŋa ase’a, tomam me ni nara ti to su’use ge ti’isɛ taɣesɛ Yehowa n lebese to zusega se’em.​—Ym. 66:19, 20.

16. To wan eŋɛ la wani ta’an tara sakerɛ to zusega poan? (Hebru 11:6)

¹⁶ To ka yeen ita pa’ala ti to tari la sakerɛ bɔ’ɔra Yehowa zusega poan ma’a ge to me tari sakerɛ mɛ la Yehowa n doli  sore se’ere woo poan lɛbesa to zusega la. (Kaalɛ Hebru 11:6.) Geele Mike la a pɔɣa, Chrissy yele la bisɛ. Ba yuun boti la ba ta tuna Betel. Mike yeti: “Mam la n pɔɣa gulesɛ tisɛ mɛ yuuma zo’e zo’e poan ge zusɛ Yehowa tabelɛ tabelɛ ti a soŋɛ tɔ. Ge ba yuun ka yi to.” Mike la Chrissy yuun kelum tara puti’irɛ ti Yehowa mi eŋa n wan dekɛ ba tum tuuma se’em. Ba yuun kɔ’ɔn kelum mɔɔra mɛ tuna la ba paŋa za’a dɛna sore ŋmɛ’adoma, tuna zɛse’esi n eeri soŋerɛ ge me laɣum mɛta na’am pu’usegɔ deto. Zina, ba tuni la kaarɛ bisega tuuma la. Mike yeti: “Yehowa yuun ka lebese to zusega la ton boti ni de se’em la ge a tuɣum eŋɛ la sɛla n ani soŋa gana za’a bo to.”

17-18. Wuu Yooma 86:6, 7 n yele se’em la, to wan ta’an tara puti’irɛ la bem poan?

¹⁷ Kaalɛ Yooma 86:6, 7. David yuun mi soŋa soŋa ti Yehowa keleseri ge me wan lebese a zusega la. Ho me ta’an tara putɛdena. Ton sɔsɛ yelese’a zaseŋɔ wa poan la basɛ ti to baŋɛ ti Yehowa wan ta’an bo to yɛm ge basɛ ti to tara paŋa ta’an ŋmibe yele poan. A ta’an doose to mabinɔɔrɛ la poan bii sɛba n nan ka pu’useri en la, soŋɛ tɔ yelese’ere woo poan.

¹⁸ La daɣɛ saŋa woo ti Yehowa wan lebese to zusega ti to nyɛ ge to mi ti a wan lebese a. A wan bo to yelese’a n pakɛ tɔ sansɛka n nari poan. Bala la, kelum tara sakerɛ ho zusega poan ge me tara puti’irɛ ti Yehowa wan bisa hɔ nananawa. A wan basɛ ti ‘bunvɔa woo nyɛ eŋa n boti sɛla’ tinpaalega la poan.​—Ym. 145:16.