ZASEŊƆ 47
Da Basɛ Ti Sɛsɛla Yelege Ho Yehowa Zɛ’an
“O Yehowa, mam delum la hon.”—YM. 31:14.
YUUNƐ 122 Be Steadfast, Immovable!
YELEKPINA a
1. To eŋɛ la wani baŋɛ ti Yehowa boti la a ana du’a du’a la tɔ?
YEHOWA yele to mɛ ti to vurege du en. (Yam. 4:8) A boti la a dɛna to Naayinɛ, to Sɔ la to Zɔ. A ni lɛbesa to zusega mɛ ge me soŋera tɔ biɣi biɣi saŋa. A me doli la a tigere la poan pa’ala tɔ ge tɛ’ɛla tɔ. Ge bem n nari ti to eŋɛ ta’an vurege du Yehowa?
2. To wan eŋɛ la wani ta’an vurege du Yehowa?
2 To san zusera Yehowa ge kaala a Yelesum la ge me ti’isa taɣesa de poan, to wan vurege du en. To san ita bala, to wan nɔŋɛ en ge ti to puurɛ me pee la en. La wan soŋɛ tɔ ti to nana a nɔɔrɛ ge dekera pumpɛɣum se’ere n nari bɔ’ɔra en. (Lil. 4:11) To san baŋɛ Yehowa soŋa soŋa, bala wan soŋɛ tɔ ti to dekɛ tomesi delum Yehowa la a tigere la n soŋeri to la.
3. Kolekpabɛ’a la tiregeri la wani ti a ta’an yelege to Yehowa zɛ’an ge bem n wan soŋɛ tɔ ti to kan malum basɛ to Naayinɛ la, la a tigere la? (Yooma 31:13, 14)
3 Kolekpabɛ’a la tiregeri mɛ ti a yelege to Yehowa zɛ’an, yele yele wuu se’em ma’a ti yeledaaŋɔ paara tɔ. A iti la wani ta’an ita bala? A tiregeri la fii fii ti a basɛ ti to da dekɛ tomesi delum Yehowa la a tigere la. Ge to wan ta’an zabɛ la en. To sakerɛ san kpe’em ge ti to dekɛ tomesi delum Yehowa soŋa soŋa, to kan malum basɛ Naayinɛ la a tigere la.—Kaalɛ Yooma 31:13, 14.
4. To wan sɔsɛ la bem zaseŋɔ wa poan?
4 To zaseŋɔ wa poan, to wan sɔsɛ yɛla atã n ta’an ze’ele yiŋa paɛ tɔ tansugere la poan. Yɛla wa za’a ta’an basɛ ti to kan dekɛ tomesi delum Yehowa la a tigere la. Yele ana wan ta’an yelege to Yehowa zɛ’an la wani? Ge to wan eŋɛ la wani ta’an zabɛ la Sitaana?
SE’EM MA’A TI YELEDAAŊƆ PAƐ TƆ
5. Sarɔkuni poan ti yeledaaŋɔ wan ta’an basɛ ti to kan dekɛ tomesi delum Yehowa la a tigere la?
5 Saŋa ase’a, yeledaaŋɔ n ni paɛ tɔ—maɣesɛ wuu to yire nɛreba ta’an giisa tɔ bii to tuuma ta’an sa’am. Sore kuni poan ti yele ana wan ta’an basɛ ti to kan dekɛ tomesi delum Yehowa tigere la ge me ta’an yelege to a zɛ’an? Yɛla san paara tɔ sa’ana to suure, to ta’an ni ana bura. Sitaana ni bɔta la to ti’isa ti Yehowa ka nɔŋɛ tɔ. Kolekpabɛ’a la ni bɔta la to ti’isa ti Yehowa bii A tigere la n basɛ ti to namesa. Yele dena taaba n yuun paɛ Israeldoma la n yuun boi Egypt tiŋa la. Yia la, ba yuun sakɛ ti Yehowa n loe Moses la Aron ti ba faaɛ ba yamenɛ poan basɛ. (Yɛh. 4:29-31) Ge pooren, Faro n yuun mɛleseri ba la, ba yuun nyɔni la Moses la Aron ti bamam n basɛ ti yeledaaŋɔ la paɛ ba. Ba yuun yele ba yeti: “Yamam n tari yele na biŋe tomam la Faro la a yamesi la tiŋasuka, nyaa dekɛ su’a eŋɛ ba nu’usin ti ba ku to wa.” (Yɛh. 5:19-21) Ba yuun nyɔni la Naayinɛ yelemɛŋɛrɛ yamesi. Bisɛ lan yuun de susa’aŋɔ se’em! Ho san ŋmibera yeledaaŋɔ poan ti la yue, ho wan eŋɛ la wani ta’an kelum dekɛ homea delum Yehowa la a tigere la soŋa soŋa?
6. To zamesɛ la bem nɔdɛ’ɛsa Habakuk zɛ’an la ton wan ta’an ŋmibe gurebisɛ poan se’em? (Habakuk 3:17-19)
6 Yele Yehowa sɛla woo n boi ho suuren ge a wan soŋɛ hɔ. Daaŋɔ yɛla zo’e zo’e yuun paɛ nɔdɛ’ɛsa Habakuk mɛ. Saŋa kayima, la yuun ani wuu Habakuk yuun ti’isɛ ti Yehowa ka fabeli eŋa yele. A yuun yele Yehowa la ani en se’em mɛ. A yuun yeti: “O Yehowa, yuuma a lɛ ti mam yi’ira hɔ ti ho soŋɛ mam, ti ho ka kɛlesa wa? . . . Beni n sɔi ti ho bo yɔ’ɔ ti namesegɔ bɔna?” (Hab. 1:2, 3) Yehowa yuun kelese a yelemɛŋɛrɛ yameŋa wa zusega mɛ. (Hab. 2:2, 3) Habakuk n yuun ti’isɛ taɣesɛ Yehowa n faari a nɛreba basera se’em la, a yuun le nyɛ la pupeelum. Habakuk yuun baŋɛ ti Yehowa fabeli a yele mɛ ge me wan soŋɛ en ti a ta’an ŋmibe gurebisɛ poan. (Kaalɛ Habakuk 3:17-19.) To zamesɛ la bem? Yɛla san paara hɔ, zusɛ Yehowa ge yele en la ani ho se’em ge me nyaa gura en ti a soŋɛ hɔ. Ho san eŋɛ bala, ho wan ta’an tara puti’irɛ ti Yehowa wan bo ho paŋa ti ho ta’an ŋmibe. Ho san baŋɛ ti a soŋeri ho mɛ, ho wan tara sakerɛ n kpe’em bɔ’ɔra en.
7. Shirley yidoma yuun tiregeri ti ba pã’asɛ en la wani ge bem yuun soŋɛ en ti a kɔ’ɔn tara sakerɛ bɔ’ɔra Yehowa?
7 Tuna vo’osum poan yɛla daarewoo. Wana n yuun soŋɛ mabipɔka Shirley n boi Papua New Guinea tiŋa poan se’em ma’a ti yeledaaŋɔ yuun paɛ en la. b Shirley deodoma yuun naseri mɛ ge ti saŋa ase’a, la yuun ni kpe’em mɛ ti ba ta’an nyɛ dia di. Shirley yizuo nɛra ayima yuun tiregɛ mɛ ti a basɛ ti Shirley da dekɛ amea delum Yehowa. A yizuo nɛra la yuun yeti: “Hon ni kɔ’ɔn tɔɣera ti Naayinɛ zilam vo’osum la n soŋeri hɔ. Soŋerɛ la bɛɛ? Ho deodoma kelum nasera mɛ. Ho sa’ani la ho saŋa la ho ni dɔla mɔɔla la.” Shirley yeti: “Mam yuun soke n mea yeti: ‘Naayinɛ sirum fabeli to yele?’ Bilam bilam ti mam yuun zusɛ Yehowa ge yele en sɛla woo n boi mam puti’iren. Mam yuun kɔ’ɔn kaala la Baabule la, la to gɔnɔ la ge me kɔ’ɔn mɔɔla ge kena zamesegɔ.” La yuun ka yue ge ti a bɔkɛ ti Yehowa kɔ’ɔn bisera a deodoma mɛ. A deodoma yuun ka gã kom. Ba me yuun tari pupeelum mɛ. Shirley yeti: “Mam yuun bɔkɛ ti Yehowa n lebeseri mam zusega.” (1 Tim. 6:6-8) Ho san kɔ’ɔn ita yelese’a n basɛ ti ho tara bɔnsoŋa la Yehowa, hon me kan bo yɔ’ɔ ti yeledaaŋɔ bii puti’ira ayi ayi yelege ho fɔregɛ Yehowa zɛ’an.
SE’EM MA’A TI BA MƐLESA MABISƐBA N BOI TO NƐŊA LA
8. Bem n wan ta’an paɛ mabisɛba n boi nɛŋa Yehowa tigere la poan la?
8 To dindoma kɔ’ɔn dɔla la lasebaarɛ yɛla poan la social network poan parena yɛla bɔ’ɔra mabisɛba n boi nɛŋa Yehowa tigere la poan la. (Ym. 31:13) Ba paɣɛ to mabiisi basɛba mɛ ge yeti ba dela tuunfɛ̃’ɛsadoma. Yele dena taaba yuun paɛ yuun kɔbesɛka n deŋɛ nɛŋa Kristakɔma la mɛ, ban yuun parum yɛla bo tuuntuna Paul ge nyɔkɛ en la. Kristakɔma wa yuun eŋɛ la wani?
9. Kristakɔma basɛba yuun eŋɛ la wani se’em ma’a ti ba yuun paɣɛ tuuntuna Paul la?
9 Yuun kɔbesɛka n deŋɛ nɛŋa la Kristakɔma basɛba yuun ka soŋeri tuuntuna Paul, ban yuun nyɔkɛ en paɣɛ Arom tiŋa la. (2 Tim. 1:8, 15) Bem zuo? Vi yuun tari ba la Paul, ti nɛreba yuun yeti a dela tuunfɛ̃’ɛsadaana la zuo? (2 Tim. 2:8, 9) Bii dabeem n yuun tari ba ti ba ti’isa ti ba wan mɛlesɛ bamam me? La yeen dɛna se’em za’a, makɛ bisɛ la yuun wan ana Paul se’em. Paul yuun ŋmibe yɛla zo’e zo’e poan mɛ, hali ge pɔ̃sɛ a nyɔɔrɛ bo ba. (Tm. 20:18-21; 2 Ko. 1:8) To da makɛ ana wuu nɛresɛba n yuun ka soŋɛ Paul la! Ba san mɛlesa mabisɛba n boi to nɛŋa la, bem n nari ti to tɛ̃ra?
10. La nari ti to tɛ̃ra la bem ba san mɛlesa mabisɛba n boi nɛŋa la ge bem zuo?
10 Tɛ̃ra sɛla n sɔi ti ba mɛlesa tɔ la mina n basɛ ti mɛlesegɔ la paara tɔ. Yi’i Timoti 3:12 yeti: “Sɛba woo n boti ba tara pu’usegɔ n di mi’a ba vom poan ge dɔla Krista Yezu wan nyɛ yaarɛ.” Bala la, la ka nari ti la eŋɛ to pakerɛ la Sitaana n kɔ’ɔn mɛlesa mabisɛba n boi nɛŋa la. A boti la mabiisi wa da tara yelemɛŋɛrɛ bɔ’ɔra Yehowa ge me bɔta ti dabeem kɛ̃ tɔ.—1 Pe. 5:8.
La boi bim ti Paul yuun boi la sarega ge Onesiforus yuun dekɛ la sukpe’ene soŋɛ en. Zina beere wa, to mabiisi me soŋeri ba mabisɛba ti ba paɣɛ ba la mɛ wuu itipa’alegɔ foote wa n basɛ ti la niɛ peelumi se’em la (Bisɛ kaalegɔ zɛ’an 11-12)
11. To zamesɛ la bem Onesiforus yele la poan? (2 Timoti 1:16-18)
11 Kɔ’ɔn soŋera ho mabiisi ge kɔ’ɔn ana tapilapi la ba. (Kaalɛ 2 Timoti 1:16-18.) Yuun kɔbesɛka n deŋɛ la Kristabia ayima yu’urɛ n de Onesiforus yuun eŋɛ la sɛla n boi de to’ore ban yuun paɣɛ Paul la. “Valum daa ka tari en la [Paul] sarega bãsi la.” Onesiforus yuun ɛ Paul mɛ ge yuun soŋɛ en ti a nyɛ yelese’a n pakɛ en. Onesiforus yuun pɔ̃sɛ la a nyɔɔrɛ ta’an eŋɛ bala. To zamesɛ la bem? La ka nari ti to zɔta dabeem la nɛresaaleba ti la gu to ti to kan soŋera to mabisɛba ti ba mɛlesa ba la. To tiregɛ ya la to paŋa za’a soŋɛ ba. (Mag. 17:17) To mabiisi la boti la to nɔŋɛ ba ge soŋera ba.
12. To zamesɛ la bem yese to mabiisi n boi Russia tiŋa poan?
12 Geele bisɛ to mabiisi n boi Russia tiŋa n ni eŋɛ se’em soŋɛ ba mabisɛba ti ba paɣɛ ba la. Ba san ni tari to mabiisi basɛba zom kootin, mabiisi zo’e zo’e ni keŋɛ ta soŋɛ ba mɛ. To zamesɛ la bem? Ba san sa’am to mabisɛba n boi to nɛŋa la yu’ura bii nyɔkɛ ba bii mɛlesa ba, da basɛ ti ho paleŋa ɛ̃ɣera. Zusera bɔ’ɔra ba, soŋera ba deodoma ge kelum bisera yelese’a ti ho wan ta’an eŋɛ soŋɛ ba.—Tm. 12:5; 2 Ko. 1:10, 11.
SE’EM MA’A TI BA Ɛ̃REGERA TƆ
13. Nɛreba n ɛ̃regeri to se’em la, wan eŋɛ la wani basɛ ti to ta’an kan dekɛ tomesi delum Yehowa la a tigere la?
13 To yidoma, to tuuntuna tadaandoma bii to sukuu tadaandoma ta’an ɛ̃regera tɔ la ton tuni na’am mɔɔlegɔ tuuma la ge me dɔla Yehowa pa’alegɔ la. (1 Pe. 4:4) Ba ta’an yeti: “Mam kɔ’ɔn nɔŋɛ ho mɛ ge ya pu’usegɔ yɛla la ka nɛ nini.” Basɛba ni zɛregɛ to mɛ la tomam ani se’em la nɛresɛba ti ba yese ba tansugere la poan la. Ba ni yeti: “Yamam iti la bala ge yeti yamam tari la nɔŋerɛ?” Yele ana taaba ta’an basɛ ti to pɔsɛ ti’isa buyi buyi. To ta’an pɔsɛ ti’isa ti: ‘Yehowa eeri la n tum zɔɛ n paŋa beene bo en? A tigere la ba’ɛ pɛ̃regera to mɛ?’ La san ana ho bala, ho wan eŋɛ la wani ta’an ana du’a du’a la Yehowa la a tigere la?
Yob yuun ka sakɛ bo pumpɔreŋɔ seto ti a zɔdoma la yuun tara ɛ̃regera en la. Ge a yuun tuɣum kɔ’ɔn lu la a suure ti a tara birikinte bɔ’ɔra Yehowa (Bisɛ kaalegɔ zɛ’an 14)
14. To wan eŋɛ la wani nɛreba san ɛ̃regera tɔ la tomam n doli Yehowa pa’alegɔ la? (Yooma 119:50-52)
14 Kɔ’ɔn tiregɛ dɔla Yehowa pa’alegɔ la. Yob yuun kɔ’ɔn dɔla Yehowa pa’alegɔ mɛ, la ka pakɛ la nɛreba n yuun ɛ̃regeri en se’em. Yob zɔdoma la ayima yuun boti Yob ti’isɛ ti a doli Naayinɛ lɔɔ woo bii a ka doli woo, a yele ka pakɛ. (Yob 4:17, 18; 22:3) Ge Yob yuun ka sakɛ pumpɔreŋɔ wa. Yob yuun mi ti Yehowa n pa’alɛ som la be’em yɛla se’em la dela tontɔɔ ge me yuun maasum ti a dɔla bala. A yuun ka bo yɔ’ɔ ti nɛreba basɛ ti a pisegɛ a birikinte la basɛ. (Yob 27:5, 6) To zamesɛ la bem? Da bo yɔ’ɔ ti nɛreba ɛ̃regerɛ basɛ ti ho ti’isa buyi buyi la Yehowa pa’alegɔ. Ti’isɛ ho vom poan bisɛ yelese’a n tabelɛ paɛ hɔ. Daanse’ere ho nyɛ sugumnɔɔrɛ zo’e zo’e ti ho san ita sɛla ti Yehowa bɔta, ho ni nyɛta nyuurɔ mɛ. Kɔ’ɔn pa tigere sɛka n doli pa’alegɔ ana wa poore. To san ita bala, la ka pakɛ la nɛreba n keseri to se’em, ba kan makɛ yelege to Yehowa zɛ’an.—Kaalɛ Yooma 119:50-52.
15. Beni n sɔi ti nɛreba yuun ɛ̃regera Brizit?
15 Geele Brizit yele la bisɛ. A dela mabipɔka n ze’ele India. A yizuo nɛreba n yuun ɛ̃regeri en a sakerɛ la zuo. Eŋa n yuun muse ko’om 1997 la, la yuun ka yue ti a sira n daɣɛ mabia tuuma sa’am. Bala la, a sira la yuun kɔ’ɛ puti’irɛ ti eŋa la Brizit la ba bipugeto bayi la, wan keŋɛ ta naɛ la eŋa dɔɣereba n boi tiŋa kayima poan laɣum kɛ̃’ɛra. Ge yelekãra n yuun le paɛ Brizit. A sira n yuun ka tari tuuma la zuo la, Brizit yuun nari ti a tuna saŋa woo ta’an soŋera a deodoma. Leyɛ’ɛsa, tansugere sɛka n yuun lɛm en la, yuun zãɛ paɛ la mɛɛla 220. Susa’aŋɔ yele la dela, a sira yizuo nɛreba la yuun giiseri en mɛ a sakerɛ la zuo. Ba yuun giiseri Brizit se’em la yuun gaam la be’ero ti Brizit la a deodoma la yuun le tee keŋɛ zɛ’an. Pooren ti a sira la ki. Bala pooren, a bipugela n de yuun 12 ma’a n yuun ki cancer bã’a zuo. Nɔyalegerɛ yele la dela, Brizit yidoma yuun yeti Brizit n sɔi ti yele ana wa paɛ en. Ba yuun yele en yeti a san ka lebege ni Yehowa Sɛɛradoma ayima, yeledi’ima wa woo kan paɛ ni en. Ge a yuun kɔ’ɔn dekɛ amea delum la Yehowa ge kɔ’ɔn ana la a tigere la tapilapi.
16. Brizit nyɛ kã’a la wani la eŋa n kɔ’ɔn ana tapilapi la Yehowa la a tigere la?
16 Brizit n yuun kɛ̃’ɛri zãɛ la tansugere la n boi zɛ’an la zuo la, gingilega kaarɛ bisegadaana la yuun yele en ti a ta’an tuna na’am mɔɔlegɔ tuuma la, a gingilega la poan ge ita zamesegɔ a yire poan. Pɔsega la, a yuun bisɛ ti yele wa kpe’em bo en mɛ. Ge a yuun doose ka’aŋɔ la mɛ. A yuun tɔɣeri yelesoma la bɔ’ɔra nɛreba mɛ, ita zamesegɔ a yire poan ge yuun ni nyɛ saŋa ni naɛ la a bipugeto la ti ba ita deodoma pu’usegɔ. A yuun nyɛ la bem nyuurɔ? Brizit yuun pɔsɛ zamesa nɛreba zo’e zo’e Baabule la mɛ ti ba zo’e zo’e me muse ko’om. Yuun 2005 poan ti a pɔsɛ tuna sore ŋmɛ’a tuuma la. A yuun nyɛ nyuurɔ mɛ la eŋa n yuun dekɛ amea delum Yehowa ge kɔ’ɔn ana tapilapi la Yehowa tigere la. A bipugeto la me kɔ’ɔn tara la sakerɛ pu’usa Yehowa. Nananawa, tansuga bayi n boi a gingilega la poan! Brizit sakɛ ti Yehowa n bo en paŋa ti a ta’an ŋmibe yeledaaŋɔ la woo poan.
KƆ’ƆN TARA YELEMƐŊƐRƐ BƆ’ƆRA YEHOWA LA A TIGERE LA
17. La nari ti to kɔ’ɛ to puti’irɛ ti to eŋɛ la bem?
17 Sitaana boti to ti’isa ti wuŋerɛ san paara tɔ, Yehowa kan soŋɛ tɔ. A me kelum bɔta la to ti’isa ti to san pa Yehowa tigere la poore, to vom kan ana soŋa. Sitaana boti la to paleŋa ni ɛ̃kɛ ba san sa’am mabisɛba n boi to nɛŋa la yu’ura, mɛlesa ba bii paɣɛ ba. A me doli la ɛ̃regerɛ poan ti a basɛ ti to da dekɛ tomesi delum Yehowa la A tigere la. Ge to mi a bɛ̃tɔ la mɛ ge me kan basɛ ti a pã’asɛ tɔ. (2 Ko. 2:11) Kɔ’ɔn kɔ’ɛ ho puti’irɛ ti ho zaɣesɛ Sitaana pumpɔreŋɔ la ge tuɣum tara yelemɛŋɛrɛ bɔ’ɔra Yehowa la A tigere la. Tɛ̃ra ti, Yehowa kan malum basɛ hɔ. (Ym. 28:7) Bala la, da basɛ ti sɛsɛla yelege ho Yehowa zɛ’an!—Arom 8:35-39.
18. To wan sɔsɛ la bem zaseŋɔ sɛka n taɣelɛ la poan?
18 Zaseŋɔ wa poan, to sɔsɛ la yeledaaŋɔ se’a n wan ta’an ze’ele yiŋa paɛ tɔ tansugere la poan. Ge yeledaaŋɔ se’a n ze’eti tansugere la poan paara to la, ta’an basɛ ti la kpe’em bo to ti to dekɛ tomesi delum Yehowa la a tigere la. To wan eŋɛ la wani ta’an ŋmibe yeledaaŋɔ aŋa poan soŋa soŋa? To wan sɔsɛ yele dena wa zaseŋɔ sɛka n taɣelɛ la poan.
YUUNƐ 118 “Give Us More Faith”
a To san bɔta ti to tara sakerɛ ge ŋmibera, la nari ti to dekɛ tomesi delum Yehowa la a tigere la. Sitaana kɔ’ɔn tiregera mɛ ti a dekɛ gurebisɛ paɛ tɔ, la wan eŋɛ se’em ti to da dekɛ tomesi delum Naayinɛ la a tigere la. Zaseŋɔ wa poan, to wan sɔsɛ yɛla atã ti Kolekpabɛ’a la ita ge baŋɛ tomam n wan eŋɛ se’em ta’an kelum tara yelemɛŋɛrɛ.
b Ba tee yu’ura ase’a mɛ.