1. La vuurɛ dela bem ti to ‘tara putɛsonɛ’? (2 Timoti 4:5)

 YELE san eŋɛ ti to sunsɔa nyie, la ta’an kpe’em bo to mɛ ti to tara yelemɛŋɛrɛ bɔ’ɔra Yehowa la a tigere la. To wan eŋɛ la wani ta’an ŋmibe yeledaaŋɔ aŋa poan? La nari ti to tara putɛsonɛ ge kɔ’ɔn pigera ge me kɔ’ɔn “nyɛ nyɛɣerɛ sakerɛ la poan.” (Kaalɛ 2 Timoti 4:5.) To san ma’ara tomea, ti’isa soŋa soŋa, ge gɛɛla yɛla wuu Yehowa n geele yɛla se’em la, bala n pa’alɛ ti to tari la putɛsonɛ. To san ita bala, to kan basɛ ti to sunsɔa tee ton nari ti to ti’isa se’em.

2. To wan sɔsɛ la bem zaseŋɔ wa poan?

² Zaseŋɔ sɛka n tole la poan, to daa geele la yeledaaŋɔ atã n wan ta’an ze’ele yiŋa paɛ tɔ tansugere la poan. Zaseŋɔ wa poan, to wan geele yeledaaŋɔ atã n wan ta’an ze’ele tansugere la poan paɛ tɔ ti la kpe’em bo to ti to tara yelemɛŋɛrɛ bɔ’ɔra Yehowa. Ba dela, (1) mabia san eŋɛ sɛla ti la daam tɔ, (2) ba san dɔlegɛ to tuberɛ, la (3) la san kpe’em bo to ti to doose tigere la n iti teere se’a. To wan eŋɛ la wani ta’an tara putɛsonɛ ge kɔ’ɔn ana tapilapi la Yehowa la a tigere la se’em ma’a ti yeledaaŋɔ ana paɛ tɔ?

3. Mabia san eŋɛ sɛla ti la daam tɔ, to ta’an ni eŋɛ la wani?

³ Mabia tabelɛ eŋɛ ho sɛla ti la daam hɔ? Daanse’ere a dela mabia n tari yɔ’ɔ tansugere la poan. Daanse’ere mabia  la ka ti’isɛ ti a eŋɛ sɛla n wan daam hɔ. (Arom 3:23; Yam. 3:2) Ge eŋa n daa eŋɛ sɛla la kelum daam ho mɛ. Yele la ta’an basɛ ti ho ka ta’an gisera soŋa. Ho daa ta’an puɣum ti’isa ti, ‘Mabia san ta’an eŋɛ wana, Naayinɛ tigere n nɔn wana?’ Sitaana n kɔ’ɔn bɔta ti to ti’isa se’em n bala. (2 Ko. 2:11) Putɛ-ana wa ta’an basɛ ti to yelege tomea Yehowa la a tigere la poan. Bala la, mabia san eŋɛ sɛla ti la daam tɔ, to wan eŋɛ la wani kan ti’isa putɛbe’ero?

4. Yosef yuun eŋɛ la wani tara putɛsonɛ ba yuun vɛɣeni en la ge to wan ta’an zamesɛ la bem a makesonɛ la poan? (Pin’ileŋɔ 50:19-21)

⁴ Da eŋɛ suure. Se’em ma’a ti Yosef yuun dɛna bunbilipaalega la, a suurɔ la yuun vɛɣeni en mɛ. Ba yuun dini en mɛ, hali ge yuun bɔta ti ba ku en. (Pin. 37:4, 18-22) Pooren, ba yuun koose en mɛ ti a dɛna yameŋa. Bala zuo la, wuŋerɛ n yuun paɛ en ti la paɛ wuu yuun 13. Yosef yuun ta’an ti’isɛ ti Yehowa ka nɔŋɛ en. A me yuun ta’an ti’isɛ ti Yehowa tamɛ eŋa yele mɛ se’em ma’a ti a ɛɛra soŋerɛ la. Ge Yosef yuun ka eŋɛ suure. A yuun tuɣum ma’ɛ la amea ti la pa’alɛ ti a tari la putɛsonɛ. Se’em ma’a ti a yuun nyɛ yɔ’ɔ ti a lerege sanɛ la, a yuun ka eŋɛ bala ge a yuun tuɣum eŋɛ pa’alɛ ti a nɔŋɛ a suurɔ la mɛ ge me di sugeri bo ba. (Pin. 45:4, 5) Yosef n yuun ti’iseri soŋa soŋa la n sɔi ti a yuun ta’an eŋɛ bala. A yuun ka ti’isa la amea yeledaaŋɔ la ge a yuun tuɣum basɛ ti a puti’irɛ bɔna la Yehowa poan. (Kaalɛ Pin’ileŋɔ 50:19-21.) To zamesɛ la bem? Nɛra san nyie ho sunsɔa, da eŋɛ suure la Yehowa bii ho ti’isa ti Yehowa basɛ ho mɛ. Ge tuɣum ti’isɛ bisɛ eŋa n soŋeri ho se’em ti ho ta’an ŋmibera yeledaaŋɔ la poan. Leyɛ’ɛsa, nɛreba san nyie ho sunsɔa, basɛ ti nɔŋerɛ la ti ho tara la pĩ ba tuure la.​—1 Pe. 4:8.

5. Miqueas yuun eŋɛ la wani tara putɛsonɛ se’em ma’a ti a yuun bisɛ ti nɛreba n vɛɣeni en la?

⁵ Geele keema ayima n ze’ele South America ti a yu’urɛ dɛna Miqueas yele wa bisɛ. b A tɛ̃ri ti saŋa kayima, mabiisi n boi nɛŋa tansugere la poan yuun mugeseri eŋa mɛ. A yeti: “Mam suure nan ka tabelɛ sa’am bala. Mam paleŋa n yuun ɛ̃kɛ. Mam yuun ka ta’an gisera yu’uŋɔ ge me yuun ni kɔ’ɔn kaasa, se’ere n sɔi la, n kan ta’an eŋɛ sɛsɛla.” Ge Miqueas yuun kelum tara putɛsonɛ mɛ ge yuun nyɔkera amea la eŋa n ti’iseri se’em. A yuun ni kɔ’ɔn zusa la saŋa woo ti Yehowa bo en zilam vo’osum ge bo en paŋa ti a ta’an ŋmibe. A me yuun kaali la yelese’a n boi tigere gɔnɔ la poan n wan ta’an soŋɛ en. To zamesɛ la bem? Mabia san eŋɛ sɛla ti ho sunsɔa nyie, ma’ɛ homea ge da ti’isa putɛbe’ero. Daanse’ere ho ka mi yelese’ere n basɛ ti nɛra la tɔɣɛ bii eŋɛ eŋa n eŋɛ sɛla la. Bala la, zusɛ Yehowa ti a soŋɛ hɔ ti ho gɛɛla yɛla wuu ho mabia la n geeli yɛla se’em la. Bala wan soŋɛ hɔ ti ho baŋɛ ti ho mabia la ka mi ge eŋɛ hɔ ge me wan soŋɛ hɔ ti ho ta’an di sugeri bo en. (Mag. 19:11) Tɛ̃ra ti Yehowa mi sɛla n paɛ ho la mɛ. A me wan bo ho paŋa ti ho ta’an ŋmibe yele la poan.​—2 Yel. 16:9; Pa. 5:8.

6. Beni n sɔi ti la dɛna ninmɔ’ɔrɛ ti to bɔkɛ ti Yehowa n nɔŋɛ to la zuo ti a dɔlegera to tuberɛ? (Hebru 12:5, 6, 11)

⁶ Tubedɔlegerɛ ta’an basɛ ti to suure sa’am. Ge to san kɔ’ɔn ti’isa la susa’aŋɔ  la ma’a, to ta’an ti’isɛ ti tubedɔlegerɛ la ka nari ge me kan ta’an soŋɛ tomam, bii to ta’an bisɛ ti ba vɛɣeni to mɛ. Bala ta’an gu to ti to kan bɔkɛ ti, Yehowa n nɔŋɛ to zuo ti a dɛmesa tɔ. (Kaalɛ Hebru 12:5, 6, 11.) To san eŋɛ sunsɔa, Sitaana wan nyɛ yɔ’ɔ ti a ta’an gurɛ to bisɛ. A boti la to ni zaɣesɛ tubedɔlegerɛ. Hali nɔyalegerɛ la dela, a wan bɔta ti to basɛ Yehowa pu’usegɔ ge yese tansugere la poan. Ba san dɔlegɛ ho tuberɛ, ho wan eŋɛ la wani ta’an tara putɛsonɛ?

7. (a) Wuu foote la n pa’alɛ se’em la, Peter n yuun sakɛ tubedɔlegerɛ la, Yehowa yuun dekɛ en tum tuuma la wani? (b) Hon zamesɛ la bem Peter yele la poan?

⁷ Nam tubedɔlegerɛ ge me eŋɛ teere. Yezu yuun demese Peter mɛ tuuntuneba basɛba nɛŋan ti la gaŋɛ buyina. (Mr. 8:33; Lu. 22:31-34) Vi yuun ta’an di Peter mɛ. Ge Peter yuun kelum ana la tapilapi la Yezu. A yuun nam tubedɔlegerɛ la mɛ ge me nyɔɣɛ yɛm a tuure la poan. Bala zuo la, Yehowa yuun kã bo Peter mɛ la eŋa n tari yelemɛŋɛrɛ la ge me yuun bo en tuunkãra tansugere la poan. (Yon 21:15-17; Tm. 10:24-33; 1 Pe. 1:1) To wan ta’an zamesɛ la bem Peter yele la poan? To san ka ti’isa tubedɔlegerɛ la n basɛ ti vi di to se’em ge tuɣum sakɛ ka’aŋɔ la ge eŋɛ teere, to ni nyɛ nyuurɔ mɛ. Bala wan basɛ ti to dɛna tuulum nɛreba bɔ’ɔra Yehowa la to mabiisi la.

8-9. Ban yuun dɔlegɛ Bernardo tuberɛ la, la yuun ani en la wani ge bem n yuun soŋɛ en ti a demese a puti’irɛ?

⁸ Geele bisɛ sɛla n yuun paɛ to mabia Bernardo n ze’ele Mozambique tiŋa. Ba yuun to’e a kenɔ mɛ ti a ka le dɛna keema. Pɔsega la, la yuun ani Bernardo la wani? A yeti, “Mam yuun eŋɛ la sunsɔa se’ere n sɔi la, mam puurɛ yuun ka pee la tubedɔlegerɛ la.” A yuun ti’isɛ ti mabiisi la n boi tansugere la poan la wan ti’isa la be’em bɔ’ɔra eŋa. A yeti, “La yuun dekɛ la ŋmaresi fii ge ti mam nyaa bɔkɛ ti tubedɔlegerɛ tari nyuurɔ mɛ ge me ta’an dekɛ n mea delum Yehowa la a tigere la.” Bem n yuun soŋɛ Bernardo ti a nyɛ putɛsonɛ?

⁹ Bernardo yuun demese a puti’irɛ mɛ. A yeti: “Mam yuun de keema la, mam yuun ni dekɛ la Hebru 12:7 soŋɛ nɛreba  ti ba ta’an tara putɛsonɛ Yehowa tubedɔlegerɛ poan. Mam yuun nyaa soke n mea yeti, ‘Ani n nari ti a dekɛ gulesegɔ wa tum tuuma?’ La dela Yehowa yamesi za’a waabi.” Bernardo yuun le eŋɛ la sɛla pa’asɛ ta’an dekɛ amea delum Yehowa la A tigere la. A yuun mɔ’ɛ la nini kaala Baabule la daarewoo ge ti’isa taɣesa. La boi bim ti a yuun fabeli la a mabiisi la n wan geele en se’em ge a yuun naɛ la ba mɛ na’am mɔɔlegɔ poan ge me bɔ’ɔra lebesego tansugere zamesegɔ poan. Pooren, ba yuun le loe Bernardo mɛ ti a dɛna keema. Wuu Bernardo la, ba san dɔlegɛ ho tuberɛ, da ti’isa vi la yele ge tuɣum sakɛ ka’aŋɔ la ge eŋɛ teere. c (Mag. 8:33; 22:4) Ho san eŋɛ bala, Yehowa wan kã bo ho la hon ani tapilapi la eŋa la a tigere la.

10. Bem teere n yuun ta’an kpe’em bo Israel buraasi basɛba?

¹⁰ Tigere la n eŋɛ teere se’a ta’an basɛ ti la pa’alɛ ton tari yelemɛŋɛrɛ se’em. To san ka bisɛ tomea soŋa, la wan ta’an basɛ ti to yelege tomea Yehowa zɛ’an. Makerɛ, ti’isɛ bisɛ Moses Lɔɔ la n yuun basɛ ti yɛla tee se’em bo Israeldoma la. Ban yuun ka tara Lɔɔ la, yidaandoma n yuun tuni malemadoma tuuma. Ba yuun ni mɛ la kãabegɔ bimbina ge me yuun ni ze’ele ba deodoma na’arɛ eŋɛ nyɔ̃’a bo Yehowa. (Pin. 8:20, 21; 12:7; 26:25; 35:1, 6, 7; Yob 1:5) Ge ba yuun bo ba Lɔɔ la, yidaandoma yuun ka le tara yɔ’ɔ ti ba eŋɛ bala. Yehowa yuun loe la malemadoma, Aron yizuo la poan ti ba ita kãabegɔ. Kɔ’ɔn pɔsɛ sankaŋa la, yidaana n daɣɛ Aron yaasi la ayima san tuna malemadoma tuuma, ba yuun ta’an ku en mɛ. d (Mal. 17:3-6, 8, 9) Teere wa yuun ta’an dɛna sɛla n sɔi ti Kora, Datan, Abiram, la nabiisi 250 la yuun ka nam bo Moses la Aron? (Kan. 16:1-3) To kan ta’an pa’alɛ. La yeen dɛna se’em, Kora la a tadaandoma la yuun ka tari yelemɛŋɛrɛ bɔ’ɔra Yehowa. La san kpe’em bo ho ti ho doose tigere la n eŋɛ teere se’a la, ho wan eŋɛ la bem?

11. Kohatdoma la basɛba yele la pa’alɛ to la bem?

¹¹ Laɣum dɔla tigere la teere woo. Israeldoma n yuun boi goo la poan la, Kohatdoma la yuun tari la tuunɛ n boi de to’ore. Israeldoma la san ta isigera, Kohatdoma la n ni zɛɛra nɔbiŋere daka la. (Kan. 3:29, 31; 10:33; Yos. 3:2-4) Bisɛ lan de yɔ’ɔ se’em! Ge yɛla yuun tee mɛ, Israeldoma la n yuun ta bɔna Pu’ulumbiŋe Tiŋa la poan la. Ba yuun ka le nara ti ba zɛɛra Daka la. Bala la, Solomon n yuun de naba la, a yuun basɛ ti Kohatdoma la basɛba dɛna la yuum yuuneba, ti basɛba bisera yasi ge ti basɛba me bisera dia deto. (1 Yel. 6:31-33; 26:1, 24) Gulesegɔ ka boi zɛ’an n pa’alɛ ti Kohatdoma la yuun nyɔni mɛ bii ɛɛra tuunsoma wuu ba yuun tari yɔ’ɔ se’em la. To wan ta’an zamesɛ la bem? Yehowa tigere la san eŋɛ teere, kɔ’ɔn dɔla dɛ la ho suure za’a, la san puɣum dɛna ti teere la paɛ ho mɛ. Tara pupeelum la tuunsɛka woo ti ba dekɛ bo ho. Tɛ̃ra ti la daɣɛ ho tuunɛ la n basɛ ti ho dɛna tuulum bɔ’ɔra Yehowa.  Hon nani Yehowa la yele n pakɛ en gana tuunsɛka woo.​—1 Sa. 15:22.

12. La yuun ani Zaina la wani ba yuun tee tuuma bo en ti a ka le bɔna Betel la?

¹² Geele Zaina yele la bisɛ. A yuun nɔŋɛ a tuuma la mɛ ge ba yuun tee la tuuma bo en. A yuun tum la Betel ti la gaŋɛ yuun 23 ge ti ba nyaa tee tuunɛ bo en ti a ka le bɔna Betel. A yeti: “Ba yuun tee mam tuuma la dela yelepakerɛ bɔ’ɔra mam. Mam yuun bisɛ ti mam ka tari vuurɛ ti mam sɔkera n mea yeti, ‘N eŋɛ la sɛla bii?’” Nimbãalega la dela, mabiisi basɛba yuun basɛ ti yele la gaŋɛ la nu’usi la ban yuun ni yɛta en ti: “Ho san mi ni tuuma la, tigere la wan basɛ ni ti ho kelum bɔna Betel tuna.” Zaina giila n yuun kɔ’ɔsɛ ti a yuun kaasa yu’uŋɔ woo. Ge a yeti: “Mam yuun ka tari puti’ira ayi ayi la tigere la bii Yehowa n nɔŋɛ mam se’em la.” Zaina yuun eŋɛ la wani kelum tara putɛsonɛ?

13. Zaina yuun eŋɛ la wani ti a putɛyooro la ka nyaŋɛ en?

¹³ Zaina yuun ka basɛ ti putɛyooro la nyaŋɛ en. Wani wani? A yuun kaali la to gɔnɔ la n pa’alɛ eŋa n wan eŋɛ se’em maalɛ yelese’a n paari en la. Zaseŋɔ yele la n de “You Can Cope With Discouragement!” n boi February 1, 2001, The Watchtower poan la soŋɛ en mɛ paa. Zaseŋɔ yele wa tɔɣɛ pa’alɛ la, la yuun ani Baabule gɔngulesa Mark se’em a tuuma n yuun ta tee la. Zaina yeti, “Mark yele la yuun soŋɛ mam mɛ ti giilekɔ’ɔsegɔ ka nyaŋɛ mam.” Zaina me yuun ani la tapilapi la a zɔdoma. A yuun ka yelege amea bii bisɛ pɔ’ɛ amea. A yuun baŋɛ ti Yehowa vo’osum la n tuni tuuma a tigere la poan ge ti keendoma la me fabela a yele paa. A me yuun baŋɛ ti sɛla yele n pakɛ Yehowa tigere la dela to ta’an tum Yehowa tuuma la soŋa.

14. Bem teere n yuun kpe’em bo Vlado ge bem n yuun soŋɛ en?

¹⁴ Vlado dela keema n de yuun 73 bɔna Slovenia tiŋa. La yuun kpe’em bo en mɛ se’em ma’a ti ba yuun dekɛ ba tansugere la laɣum la tansugere ayima ge paɣɛ ba Na’am Pu’usegɔ Deo la. A yeti: “Mam yuun ka bɔkɛ sɛla n sɔi ti ba paɣɛ Na’am Pu’usegɔ Deo n ani soŋa bala ze’ele. La  yuun daam mam suure mɛ paa se’ere sɔi la ton malum maalɛ ka, la ka yue. Mam dela kampinta ge me yuun laɣum maalɛ kuɣesi la sisesi. Teere wa yuun daɣɛ naana bɔ’ɔra tomam sɛba n kuregɛ la.” Bem n soŋɛ Vlado ti a nam teere wa? A yeti: “To san dɔla teere se’a ti Yehowa tigere ita la, to ni nyɛta la kã’a. Teere ana wa maaseni tɔ gura la teere kãra beere sa’am.” Ba dekɛ la ya tansugere laɣum la tansugere ayima bii ba tee la ho tuuma ti la kpe’em bo ho? Kɔ’ɔn mina ti Yehowa bɔkeri lan ani ho se’em mɛ. Ho san dɔla teere ana taaba ge ana tapilapi la Yehowa la a tigere la, a wan sirum kã bo ho.​—Ym. 18:25.

15. To wan eŋɛ la wani ta’an tara putɛsonɛ yɛla san paara tɔ tansugere la poan?

¹⁵ Tingɔŋɔ wa ba’asegɔ n kɔ’ɔn pɔ̃ra la, to mina ti daaŋɔ ta’an ta bɔna tansugere la poan. Yele ana ta’an basɛ ti la daam tɔ la ton tari yelemɛŋɛrɛ se’em bɔ’ɔra Yehowa la. Bala la, la nari ti to tara putɛsonɛ. Mabia san eŋɛ ho sɛla n ka ani soŋa, da basɛ ti ho sunsɔa nyie. Ba san dɔlegɛ ho tuberɛ, da ti’isa vi la yele ge tuɣum sakɛ ka’aŋɔ la ge eŋɛ teere. Yehowa tigere la san eŋɛ teere ti la paɛ hɔ, yese ho suure za’a sakɛ ge nam pa’alegɔ la.

16. Ho wan eŋɛ la wani ta’an dekɛ homea delum Yehowa la a tigere la?

¹⁶ Ho wan ta’an dekɛ homea delum Yehowa la a tigere la, la san puɣum kpe’em bo ho. Ho san bɔta ho ta’an eŋɛ bala, la nari ti ho tara putɛsonɛ, ana bãalam, bɔkera yɛla ge me geele yɛla wuu Yehowa n geele a se’em. Tiregɛ zamesɛ ge me ti’isɛ taɣesɛ Baabule poan nɛreba n yuun ŋmibe se’em yele aŋa poan. Zusɛ Yehowa ti a soŋɛ hɔ. Da makɛ yelege homea la tansugere la. La san puɣum ana la se’em me, Sitaana kan ta’an yelege ho Yehowa zɛ’an bii A tigere la poan.​—Yam. 4:7.