Basɛ ti n yele ya mam eŋɛ se’em kɛ̃ tɛm woo na’am tuuma la poan ge nyaa yele ya sɛla n yuun eŋɛ pooren.

Ba dɔɣɛ mam la Curaçao tiŋa n boi Caribbean yuun 1942 poan. Mam sɔ ze’ele la Suriname tiŋa ge tuuma zuo ti a yuun keŋɛ Curaçao tiŋa. Yuuma fii pooren ge ti ba yuun dɔɣɛ mam la, mam sɔ yuun pa’asɛ la Yehowa Sɛɛradoma sɛba n muse ko’om yia Curaçao tiŋa. a La boi bim ti tomam n de a kɔma la yuun ka boti to zamesa Baabule la ge a yuun zameseri la to mɛ bakwai woo. Mam yuun de yuun 14 la, mam sɔ yuun tari to za’a lebe la Suriname ti a ta bisera a ma n kuregɛ.

Suriname tiŋa poan, mam yuun nyɔɣɛ la bunbilipaalesi sɛba n mɔ’ɛ nini pu’usa Yehowa zɔtɔ. Ba yuun gaŋɛ mam la yuuma fii ge me dɛna sore ŋmɛ’adoma. Ba yuun san tɔɣera yelese’a n eŋɛ na’am mɔɔlegɔ poan, ba puurɛ ni kɔ’ɔn pee mɛ. Tansugere zamesegɔ san ni ta ba’asɛ, mam la mam zɔdoma la yuun ni sɔsera la Baabule yɛla. Saŋa ase’a to yuun ni zi’a la yiŋa, bisera ŋmarebɛa ge sɔsera. Mam zɔdoma la yuun soŋɛ mam mɛ ti mam baŋɛ mam boti sɛla n vom poan. Mam yuun boti la n tum bo Yehowa. Bala la, mam yuun de yuun 16 la ti mam muse ko’om. Pooren, mam yuun de yuun 18 ti mam pɔsɛ sore ŋmɛ’a tuuma.

Mam zamesɛ la yɛla zo’e zo’e sore ŋmɛ’a tuuma la poan. Yele ana me soŋɛ mam mɛ paa tɛm woo na’am tuuma la poan. Makerɛ, yele ayima ti mam yuun zamesɛ dela, la yele n pakɛ se’em ti to kumesa nɛreba. Mam n yuun pɔsɛ sore ŋmɛ’a tuuma la, satiŋa na’am yetɔɣum yalegerɛdaana yu’urɛ n de Willem van Seijl n yuun ve’e mam  lɛm amea. b A yuun pa’alɛ mam la mam wan tuna tansugere tuuma se’em. Sankaŋa la, mam yuun ka mi ti la nari ti n nyɛ kumesegɔ la bala. Yuunse’ere n taɣelɛ la, ba yuun loe mam mɛ ti n dɛna sore ŋmɛ’adaana n boi a to’ore ge ti pooren mam yuun bisera zamesegɔ tigesego n boi zãzaarɛ Suriname goo la poan. Mam puurɛ pee mɛ la mabiisi la n kumesɛ mam se’em la! Kɔ’ɔn pɔsɛ sankaŋa, mam kɔ’ɛ n puti’irɛ mɛ ti n tɔɣesa ba ge me kumesa basɛba.

Yelese’ere n pa’asɛ buyi ti mam zamesɛ dela mam wan vɔna n vom naana ge maasum n mea se’em. Ŋmarega la pɔsega poan, mam la n sore ŋmɛ’a tadaana la yuun ni maasum la yelese’a n pakɛ tɔ ŋmarega la poan. To poan ayima n yuun ni keŋɛ tinkãtɛ la poan ta da sɛla ti to ɛɛra la. To yuun ni nyɔkera tomea mɛ la ton sa’ani ligeri se’em ge me maɣesa to dia la ti la ta’an paɛ ŋmarega la ba’asegɔ. Sɛla san ta pɔ’ɛ tɔ goo la poan, nɛreba fii wa n yuun wan ta’an soŋɛ tɔ. Mam mi ti mam yuun de bia ge zamesɛ mam wan vɔna n vom naana ge maasum n mea se’em la soŋɛ mam mɛ ti mam puti’irɛ bɔna Yehowa tuuma la poan.

Yelese’ere n pa’asɛ butã ti mam zamesɛ dela, lan ani soŋa se’em ti ho pa’ala nɛreba bamea yetɔɣum poan. Mam ta’an tɔɣera la Dutch, Solemiine, Papiamento la Sranantongo (ti ba le yi’ira dɛ Sranan yetɔɣum la), n de yetɔɣesebo ti nɛreba zo’e zo’e tɔɣera Suriname tiŋa poan. Ge goo la poan la, mam yuun baŋɛ ti nɛreba keleseri yelesoma la mɛ to san tɔɣera bamea yetɔɣum bɔ’ɔra ba. La yuun kpe’em bo mam mɛ ti n zamesɛ yetɔɣum ase’a n de wuu Saramaccan yetɔɣum. Ge mam puurɛ pee mɛ la mam yuun tiregɛ zamesɛ la. Mam nyaŋɛ pa’alɛ nɛreba zo’e zo’e yelemɛŋɛrɛ la mɛ, mam tã ba yetɔɣum tɔɣera la zuo.

La dela yelemɛŋɛrɛ ti vi yuun paɛ mɛ saŋa ase’a. Makerɛ, daarɛ deyima ti mam yuun bɔta ti n soke Baabule zamesegɔdaana ayima n tɔɣeri Saramaccan yetɔɣum la ani n se’em la a puurɛ n duni la. Ziti mam tuɣum soke en la a san nyɔkɛ puurɛ! A puurɛ yuun ka pee la mam sokere la. La boi bim ti mam yuun tuuri mɛ ge mam yuun ãregeri n mea mɛ zamesa nɛreba la yetɔɣum.

Yuun 1970 poan ti ba yuun loe mam ti n dɛna gingilega kaarɛ bisegadaana. Yuun denɛ la, mam yuun dekɛ la sinii la zuo n de “Visiting the World Headquarters of Jehovah’s Witnesses” la pa’alɛ zamesegɔ tigesego zo’e zo’e goo la poan. To san yeti to kaɛ mabiisi wa, mam la mabiisi basɛba yuun ni dekɛ la ɔɔreŋɔ keŋɛ ba zɛ’an. To ni dekɛ la generator, gasoline tank n makɛ ma’a, kerosene kanɛɛsi la lɔɣeseto ti to wan dekɛ eŋɛ sinii la. To ni san paɛ zɛ’an la poan, to ni vaɛ lɔɣɔrɔ la za’a mɛ tari keŋɛ zɛ’an ti to wan eŋɛ sinii la. Mam nɔŋɛ  sɛla paa to kaarɛ tuuma la poan dela nɛreba la n yuun nɔŋɛ siniidoma wa se’em la. Mam puurɛ yuun pee mɛ ti n soŋɛ nɛreba ti ba zamesɛ baŋɛ Yehowa la a tinparɛ wa zuo bɔberɛ tigere la. Mam n yuun soŋɛ nɛreba ti ba ana du’a du’a la Yehowa la, yuun basɛ ti mam puurɛ pee mɛ paa la n tuuma la.

Mam yuun de nɛreyone la yuun basɛ ti mam tuna n tuuma la zɔ’ɔra mɛ ge mam yuun kelum bɔta n di pɔɣa mɛ. Mam yuun zusɛ mɛ ti n nyɛ pɔka n wan ta’an ŋmibe ti to naɛ taaba tum tɛm woo na’am tuuma la, la pupeelum goo la poan. Yuunɛ pooren, mam yuun ta lɛɣera la Ethel, n de sore ŋmɛ’adaana n boi a to’ore ge me kɔ’ɔn kuura amea tuna tuuma la. Kɔ’ɔn pɔsɛ eŋa n yuun de bia, Ethel yuun nɔŋɛ tuuntuna Paul yele mɛ ge me yuun bɔta ti a ãregera amea na’am mɔɔlegɔ tuuma la poan wuu Paul la. September 1971 poan ti mam yuun di en ti to naɛ taaba tuna kaarɛ bisega tuuma la.

Ethel dɔɣereba yuun ka ba’ɛ tara. Bala la, a yuun tã amea tara mɛ ti to ta’an tuna kaarɛ tuuma la goo la poan. Makerɛ, to san maasum ti to keŋɛ ta kaɛ tansuga goo la poan, to yuun ni pakɛ la lɔɣɔrɔ fii. To yuun ni pɛɛra lɔɣɔrɔ ge sɔɔra la kulaasi poan. Tomam yuun diti sɛla woo ti mabiisi la yuun ni dɔɣera bɔ’ɔra to la mɛ​—wɔɔrɔ, zim la sɛla deene ti ba ni nyɔkɛ goo poan bii kulesi poan. Ba yuun ni san ka tara laasi, ba yuun ni eŋɛ to dia eŋɛ la kodu vuurɔ poan. Ba yuun san ka tara desuntɔ, tomam yuun tari la to nu’usi dita. Mam la Ethel bisɛ ti tomam n naɛ taaba tuna Yehowa tuuma la basɛ ti to dɛna la mi’a n kalɛ butã, tara paŋa. (Pa. 4:12) Tomam ka bisɛ ti sɛla boi n tari nyuurɔ gana vo’osum poan tuuma wa!

 Daarɛ deyima to yuun keŋɛ ta kaɛ la to mabiisi goo poan ge lɛbera na. Dadendaarɛ yɛla n bala ti n pɔsɛ tɔɣɛ de yele to sɔsega wa poan la. Ɔɔreŋɔ la n yuun paɛ zɛ’an ti komi’isi la ba’ɛ ŋmɛ̃’ɛra la, ku yuun muse mɛ ge le puke. Yelesonɛ la dela, ton yuun yɛ ko’om futo la yuun soŋɛ to mɛ ti to kelum bɔna ɔɔreŋɔ la poan. Ge tomam ɔɔreŋɔ la yuun pirɛ mɛ la ko’om. To yuun ka’ɛ dia la n boi to duɣerɔ la poan la basɛ la kulega la poan ge nyaa tara duɣerɔ la zaara ko’om la n boi ɔɔreŋɔ la poan la basera.

To yuun ka le tara dia. Bala zuo la, tomam yuun nyaa bɛ̃ti la zim ge to yuun ka nyɛ sɛsɛla. To yuun zusɛ la Yehowa ti a bo to dia daandindaarɛ. To yuun zusɛ ba’asɛ la, mabia ayima n yuun lobe zimbaŋa nyɔkɛ zimkãtɛ ti tomam tonuu la obe yu’unkuŋɔ la, kɔ’ɔn tiɣɛ.

Mam la Ethel yuun nyɛ la kã’a ton yuun tum kaarɛ tuuma la paɛ yuuma anuu la. Mam pɔɣa yuun tari la puurɛ. Mam yuun baŋɛ ti a tari la puurɛ la, mam puurɛ n yuun pee, la boi bim ti mam yuun ka mi bala n wan tee to vom se’em. Mam la Ethel yuun kɔ’ɔn bɔta ti to san wan nyaŋɛ, to kelum tuna tɛm woo na’am tuuma la. Yuun 1976 ti to dɔɣɛ to dayɔa Ethniël. Yuuma ayi la girego pooren ti to le dɔɣɛ to dayɔa Giovanni.

Suriname n yuun eeri soŋerɛ sankaŋa la zuo la, tigere yile la yuun eŋɛ la maaseŋɔ ti n kelum dɛna gingilega kaarɛ bisegadaana ge bisera n kɔma la. To dayɔɔsi la n yuun pɔ’ɛ la zuo, ba yuun basɛ ti mam ɛɛra kaara la tansuga fii bisa. Bala yuun bo mam la yɔ’ɔ ti n dekɛ bakwai fii tum kaarɛ tuuma la ŋmarega la poan ge dekɛ bakwai se’a n gee la tum sore ŋmɛ’a tuuma tansugere la poan. Ethel la to kɔma la yuun ni doose mam mɛ keŋɛ tansuga se’a n lɛm to yire la. Ge mam yuun san yɛ’ɛsa ti n kaɛ tansuga bii eŋɛ laɣesegɔ goo la poan, mam yuun ni keŋɛ la n ma’a.

Mam yuun ni maasum n yɛla mɛ soŋa soŋa ta’an tum n tuuma la za’a. Mam yuun iti deodoma zamesegɔ mɛ bakwai woo. Mam yuun ni san keŋɛ ti n ta kaɛ tansuga se’a n boi goo la poan la, Ethel n yuun pa’ali kɔma la. Ge to san wan nyaŋɛ, to yuun ni naɛ la taaba ita yɛla ase’a. Mam la Ethel yuun ni naɛ la kɔma la mɛ  dɛ’ɛna bii ɛɛra. Mam yuun ni kɔ’ɔn maasena la tansugere tuuma ta paɛ yu’unsunsua. Ethel me kɔ’ɔn dɛna la pɔɣesonkɔ sɛka taaba ti Magaha 31:15 tɔɣɛ a yele la. A ni te’ele isige mɛ duɣɛ, la wan eŋɛ se’em ti to ta’an kaalɛ dabeserɛ la gulesegɔ la ge ti to kɔma la nyaa keŋɛ sukuu. Mam puurɛ pee mɛ la mam tari pɔɣa n kuuri amea soŋera mam, ti n ta’an tuna Yehowa tuuma la!

Mam la n pɔɣa yuun tiregɛ mɛ soŋɛ to kɔma ti ba nɔŋɛ Yehowa la na’am mɔɔlegɔ tuuma la. To yuun boti la to kɔma la tuna tɛm woo na’am tuuma la. To yuun boti la bamea dekɛ ba puti’irɛ eŋɛ bala ge daɣɛ ba eŋɛ tomam n boti sɛla. Tomam yuun kɔ’ɔn tɔɣera bɔ’ɔra ba ti tɛm woo na’am tuuma la tari pupeelum mɛ. Leyɛ’ɛsa, to yuun tɔɣɛ yeledaaŋɔ seto n boi bim mɛ ge basɛ ti ba baŋɛ Yehowa n kã bo to se’em. To me yuun basɛ ti to dayɔɔsi la dɔla la Sɛɛradoma n dekɛ Yehowa tuuma deŋɛ nɛŋa ba vom poan.

Yehowa yuun bo’ori to la yelese’a n pakɛ tɔ ti to ugera to kɔma la. Mam yuun kɔ’ɔn tiregera mɛ soŋera n deodoma. Mam yuun de sore ŋmɛ’adaana n boi de to’ore goo la poan ge nan ka di pɔɣa la, basɛ ti mam baŋɛ lan nari ti n ni te’ele maasum n ligeri se’em ta’an da lɔɣeseto n pakɛ to la. La boi bim ti to ni tiregera mɛ ita sɛla woo ti la makera ge saŋa ase’a to ni ka nyɛ sɛla woo n pakɛ to la. La san ni ta ana to bala, Yehowa n ni soŋɛ tɔ. Makerɛ, yuun 1980 pooren bɔba la yuun 1990 pɔsega bɔba, gbiregere n yuun boi Suriname. Yuun aŋa la, saŋa ase’a poan la, la yuun kpe’em mɛ ti to nyɛ sɛla n pakɛ tɔ. Hali la bala za’a la, Yehowa n yuun ugeri to.​—Mt. 6:32.

Tomam vom poan, Yehowa kɔ’ɔn soŋɛ to mɛ ti to tara pupeelum la ton tari sɛla la. To kɔma la basɛ ti to tara la pupeelum. Tomam me puurɛ pee mɛ la ton nyaŋɛ uge ba ti ba pu’usa Yehowa la. To puurɛ pee mɛ la ban tuni tɛm woo na’am tuuma la. Ethniël la Giovanni laɣum keŋɛ tiokrasi sukuudoma mɛ ge ti bamam la ba pɔɣeba laɣum tuna Suriname tigere yile la poan.

Mam la Ethel nyaa kuregɛ mɛ ge to kelum dɛna la sore ŋmɛ’adoma n boi ba to’ore, kɔ’ɔn mɔ’ɛ nini tuna bɔ’ɔra Yehowa. Ton kɔ’ɔn mɔ’ɛ nini la to tuuma la zuo, mam ka tari nɛŋa n wan zamesɛ ban buni ko’om se’em! Ge mam puurɛ pee mɛ. Mam san ti’isa n vom yɛla, mam baŋɛ ti mam n yuun de bunbilipaalega ge bɔta ti n tum tɛm woo na’am tuuma la dela yelesonɛ paa.