ZASEŊƆ 45
Yehowa N Iti Se’em Soŋera Tɔ Ti To Tuna To Na’am Tuuma La
“Ba wan ta baŋɛ ti nɔdɛ’ɛsa n daa boi ba poan.”—EZE. 2:5.
YUUNƐ 67 “Preach the Word”
YELEKPINA a
1. To mi la bem ge bem puti’irɛ ti to tara?
TO MI ti to san tuna na’am mɔɔlegɔ tuuma la, nɛreba wan giisa tɔ. Giisegɔ wa wan ta’an gaŋɛ bala beere sa’am. (Da. 11:44; 2 Tim. 3:12; Lil. 16:21) Ge to mi ti Yehowa wan soŋɛ tɔ. Bem zuo? Yehowa ni kɔ’ɔn soŋɛ a yamesi mɛ ti ba ta’an tum ba tuuma ba’asɛ, la ka pakɛ la tuuma la n kpe’em se’em. Makerɛ, basɛ ya ti to geele ya yelese’a n yuun eŋɛ nɔdɛ’ɛsa Ezekiel vom poan. A yuun mɔɔli bɔ’ɔra la Yudadoma n yuun de yamesi bɔna Babilon.
2. Yehowa yuun tɔɣɛ pa’alɛ ti nɛresɛba ti Ezekiel tɔɣera pa’ala ba la ani la wani ge to wan sɔsɛ la bem zaseŋɔ wa poan? (Ezekiel 2:3-6)
2 Nɛrebani taaba ti Ezekiel yuun mɔɔla bɔ’ɔra ba? Yehowa yuun pa’alɛ ti ba dela nɛreba “tuba n kpa” ti ba “sunya kãbɛ” ge ti ba ita “kpenkpasi.” Ba yuun tari la pɔɣeleŋɔ wuu gɔ̃’ɔsi la ge tara dɛŋa wuu nahe la. Bala n sɔi ti Yehowa yele Ezekiel sugumnɔɔrɛ zo’e zo’e yeti: “Da zɔta dabeem”! (Kaalɛ Ezekiel 2:3-6.) Ezekiel yuun nyaŋɛ tum a na’am mɔɔlegɔ tuuma la mɛ sɛla n sɔi la (1) Yehowa n yuun tum en, (2) Naayinɛ vo’osum la n yuun bo en paŋa, (3) Naayinɛ yelesum la n yuun soŋɛ en. Yɛla atã wa yuun soŋɛ Ezekiel la wani? La me soŋeri tomam la wani zina beere wa?
YEHOWA N YUUN TUM EZEKIEL
3. Yetɔɣebuni n yuun kpemese Ezekiel giila ge Yehowa yuun tɔɣɛ la bem pa’alɛ ti A wan soŋɛ en?
3 Yehowa yuun yele Ezekiel yeti: “[Mam] n tuni hɔ.” (Eze. 2:3, 4) Yetɔɣebuna wa yuun kpemese Ezekiel giila mɛ. Beni n sɔi? Nɔkpe’ene kai ti a yuun tiɛ ti Yehowa yuun tɔɣɛ la yetɔɣebuna taaba se’em ma’a ti a yuun loe Moses la Isaiah ti ba dɛna A nɔdɛ’ɛseba la. (Yɛh. 3:10; Isa. 6:8) Ezekiel yuun mi ti Yehowa yuun soŋɛ nɔdɛ’ɛseba bayi wa mɛ ti ba ta’an ŋmibe ze’ele ba yeledaaŋɔ poan. Yehowa yuun yele Ezekiel sugumnɔɔrɛ buyi yeti: “[Mam] n tuni hɔ.” Yɛm yuun boi bim mɛ la nɔdɛ’ɛsa wa n dekɛ amea delum Yehowa ti a soŋɛ en la. Leyɛ’ɛsa, Ezekiel gɔŋɔ la poan, zɛ’ɛsi zo’e zo’e la yeti: “Yehowa daa tɔɣɛ bo mam yeti.” (Eze. 3:16) Zɛ’ɛsi zo’e zo’e poan me la gulesɛ yeti, “Yehowa le tɔɣɛ bo mam yeti.” (Eze. 6:1) Yelemɛŋɛrɛ, Ezekiel yuun sirum baŋɛ ti Yehowa n tum en. Leyɛ’ɛsa, Ezekiel n yuun de malemadaana bia la zuo, a sɔ yuun ta’an pa’alɛ en ti Yehowa yuun ni yele A nɔdɛ’ɛseba la ti A wan soŋɛ ba. Yehowa yuun tɔɣɛ bo Isaak, Yakob la Yeremia ayima ayima yeti: “Mam boi me la hɔ.”—Pin. 26:24; 28:15; Yer. 1:8.
4. Bem subuɣelegɔ yetɔɣum n yuun kpemese Ezekiel giila?
4 Israeldoma zo’e zo’e wan kelese Ezekiel mɔɔlegɔ la? Yehowa yuun yeti: “Israeldoma wa wan zaɣesɛ ti ba kelese ho, ban puɣum ka kɛlesa mam mɛŋa la zuo.” (Eze. 3:7) Nɛreba la n yuun zaɣesɛ Ezekiel la pa’alɛ ti ba yuun zaɣesɛ la Yehowa. Yetɔɣe-ana wa yuun buɣelɛ Ezekiel suure ti a baŋɛ ti nɛreba la n zaɣesɛ en la ka pa’alɛ ti a ka tum a tuuma la soŋa. Yehowa yuun le buɣelɛ Ezekiel suure ti a baŋɛ ti eŋa n tɔɣɛ yelese’a la san ta tum tuuma, “nɛreba la wan baŋɛ ti nɔdɛ’ɛsa n daa boi ba poan.” (Eze. 2:5; 33:33) Nɔkpe’ene kai ti subuɣelegɔ yetɔɣe-ana wa yuun kpemese Ezekiel giila mɛ ti a ta’an tuna a na’am tuuma la.
YEHOWA N TUM TOMAM ME ZINA BEERE WA
Wuu Ezekiel la, nɛreba ta’an ka kɛlesa tɔ bii giisera tɔ ge tomam mi ti Yehowa boi mɛ la tɔ (Bisɛ kaalegɔ zɛ’an 5-6)
5. Wuu Isaiah 44:8 n yele se’em la, bem n bo’ori to paŋa?
5 Tomam me wan ta’an nyɛ paŋa la to mi ti Yehowa n tum to la. La dela na’asegɔ bɔ’ɔra tɔ la eŋa yi’iri to A “sɛɛradoma” la. (Isa. 43:10) Bisɛ lan de yɔ’ɔkãtɛ se’em! Yehowa yuun yele Ezekiel yeti: “Da zɔta dabeem,” Yehowa me yele tomam yeti: “Da basɛ ya ti ya paleŋa ɛɣera.” Beni n sɔi ti yɛm kan bɔna bim ti to zɔta sɛba n giiseri to la? Wuu Ezekiel la, Yehowa me n tum tomam ge soŋera tɔ.—Kaalɛ Isaiah 44:8.
6. (a) Yehowa tɔɣɛ buɣelɛ to suure la wani? (b) Bem n bo’ori to paŋa ge buɣela to suure?
6 Yehowa kpemese to giila ti a wan soŋɛ tɔ. Yehowa yuun yeti: “Ho san kena ko’om poan, mam wan bɔna la hɔ ge ti kolaasi la me kan di ho. Ho san kena bugum poan la kan di ho ge ti bugum zɛleŋa la me kan lakɛ hɔ.” Bala pooren ti a yeti, “ya dela mam sɛɛradoma.” (Isa. 43:2) Se’em ma’a ti to ni tuna to na’am mɔɔlegɔ tuuma la, daaŋɔ yɛla n ani wuu kokemɔ la bugum n paari tɔ. Ge la bala za’a la, Yehowa soŋera to mɛ ti to kɔ’ɔn kelum mɔɔla. (Isa. 41:13) Wuu Ezekiel saŋa la, nɛreba zo’e zo’e zina me zaɣeseri yelesum la mɛ. La nari ti to tɛ̃ra ti bamam n zaɣesɛ to sɔsega la ka pa’alɛ ti to ka tum to tuuma la soŋa la ton de Naayinɛ Sɛɛradoma la. Ton mi ti Yehowa puurɛ ni pee la to mɛ, to san mɔɔla a yelesum la bo’ori to la paŋa ge buɣela to suure. Tuuntuna Paul yuun yeti: “Naayinɛ wan yɔ ba ayima woo yɛsera la sɛla la sɛla ti ba tum.” (1 Ko. 3:8; 4:1, 2) Mabipɔka ayima n de sore ŋmɛ’adaana yeti: “La dela pupeelum bɔ’ɔra mam ti n baŋɛ ti Yehowa yɔɔri to mɛ dɔla la to tuuma.”
NAAYINƐ VO’OSUM LA N YUUN BO EZEKIEL PAŊA
EEzekiel nyɛ la Yehowa toroko liligere poan n basɛ ti a tara suure lua ti Yehowa wan soŋɛ en ti a ta’an tum a na’am mɔɔlegɔ tuuma la (Bisɛ kaalegɔ zɛ’an 7)
7. Se’em ma’a ti Ezekiel ni ti’isɛ liligere wa ti a nyɛ la, la yuun ni soŋɛ en la wani? (Bisɛ gɔŋɔ wa nɛŋa foote.)
7 Ezekiel yuun nyɛ Naayinɛ vo’osum n tari paŋa se’em mɛ. A yuun nyɛ liligere poan ti, zilam vo’osum la tuni malesi la poan mɛ la wiilekãra la n boi saazuo toroko la poan la. (Eze. 1:20, 21) Ezekiel yuun eŋɛ la wani? A gulesɛ yeti, “Mam n daa nyɛ bala la mam daa lu la teŋa aliko.” Yele la yuun ba’ɛ eŋɛ Ezekiel la pakerɛ ti a lu tiŋa. (Eze. 1:28) Pooren, Ezekiel ni san ti’isa liligere yele wa n kɛ̃’ɛri suure la, la yuun ni basɛ ti a sakerɛ kpe’em mɛ. La yuun ni soŋɛ en ti a baŋɛ ti Naayinɛ vo’osum la ta’an basɛ ti a tum a na’am tuuma la soŋa soŋa.
8-9. (a) Ezekiel yuun nyɛ la bem se’em ma’a ti Yehowa yuun bo en nɔɔrɛ ti a isige la? (b) Yehowa yuun le kpemese Ezekiel la wani ti a ta’an tɔɣɛ bo nɛreba tuba n kpirɛ?
8 Yehowa yuun bo Ezekiel nɔɔrɛ yeti: “Asaala dayɔa wa, isige ze’ele ho nama zuo ti n ta’an tɔɣɛ bo ho.” Yetɔɣum wa la Naayinɛ voʼosum la n yuun bo Ezekiel paŋa ti a taʼan isige zeʼele. Ezekiel yuun gulesɛ yeti: “Vo’osum n daa kɛ̃ mam poan ge basɛ ti mam isige ze’ele n nama zuo.” (Eze. 2:1, 2) Pooren, Ezekiel na’am mɔɔlegɔ tuuma la poan, Naayinɛ “nu’o” n de Naayinɛ zilam vo’osum la n yuun boi a zuo. (Eze. 3:22; 8:1; 33:22; 37:1; 40:1) Naayinɛ vo’osum la n yuun bo Ezekiel paŋa ti a ta’an tuna a tuuma la. A tuuma la yuun dela, a mɔɔla bɔ’ɔra nɛresɛba zuo n ku’ɛ ge ti ba suure me kãbɛ la. (Eze. 3:7) Yehowa yuun yele Ezekiel yeti: “Mam basɛ ti ho nɛŋa kpe’em mɛ wuu ba nɛŋa n kpe’em se’em la ge basɛ ti ho gbe’ere me kpe’em wuu ba gbɛ’ɛra n kpe’em se’em la. Mam basɛ ti ho gbe’ere kpe’em mɛ wuu diamond kugere, hali kpe’em gaŋɛ taŋa. Da zɔta dabeem la ba bii ho paleŋa ɛ̃kɛ la ba nɛsi la n ani se’em.” (Eze. 3:8, 9) La wɔ̃ni ti Yehowa yuun yele Ezekiel ti: ‘Da basɛ ti nɛreba la tuba n kpirɛ la kɔ’ɔsɛ ho giila. N wan bo ho paŋa.’
9 Bala pooren, Naayinɛ vo’osum la yuun soŋɛ Ezekiel mɛ ti a ta’an tum a na’am mɔɔlegɔ tuuma la. Ezekiel yuun gulesɛ yeti, “Ti Yehowa nu’o paŋa la paɣa n zuo.” Nɔdɛ’ɛsa wa yuun dekɛ paɛ la bakwai zamesɛ bɔkɛ yelesum wa vuurɛ ge ta’an tɔɣɛ la sukpe’ene. (Eze. 3:14, 15) Yehowa yuun nyaa yele en ti a keŋɛ bɔ̃’ɔ poan. Bilam ti “vo’osum kɛ̃ [a] poan.” (Eze. 3:23, 24) Ezekiel yuun kɔ’ɔn maasum mɛ ti a pɔsɛ a na’am tuuma la.
NAAYINƐ VO’OSUM LA N BO’ORI TO PAŊA ZINA BEERE WA
Wuu Ezekiel la, bem n soŋeri tomam zina beere wa ti to tuna to na’am mɔɔlegɔ tuuma la? (Bisɛ kaalegɔ zɛ’an 10)
10. Bem soŋerɛ ti to ɛɛra ti to ta’an tum to na’am mɔɔlegɔ tuuma la ge bem zuo ti to ɛɛra soŋerɛ?
10 Bem soŋerɛ ti to ɛɛra ti to ta’an tum to na’am tuuma la? To ti’isɛ bisɛ sɛla n yuun paɛ Ezekiel ta’an nyɛ lebesego la. Ge ti a yuun pɔsɛ a na’am mɔɔlegɔ la, Naayinɛ vo’osum la yuun bo en la paŋa. Wuu Ezekiel la, Naayinɛ vo’osum la ma’a n wan nyaŋɛ soŋɛ ti to tum na’am mɔɔlegɔ tuuma la. Bem zuo? Sɛla n sɔi la Sitaana zaberɛ mɛ la tɔ ti a ta’an gu to na’am mɔɔlegɔ tuuma la. (Lil. 12:17) Nɛreba zo’e zo’e ti’isɛ ti Sitaana ba’ɛ tara la paŋa ti to kan nyaŋɛ zabɛ la en. Ge to doli la na’am mɔɔlegɔ tuuma la poan zabera nyaŋera en! (Lil. 12:9-11) Sarɔkuni poan? To san tuna na’am mɔɔlegɔ la, to ni eŋɛ pa’alɛ ti to paleŋa ka ɛɣeri la Sitaana vuusego la. Sansɛka woo ti to mɔɔla, to ni nyaŋɛ Sitaana mɛ. Bala la to wan yeti bem, la ton nyaŋɛ tuna to na’am mɔɔlegɔ tuuma la hali la giisegɔ poan la? To wan ta’an yeti zilam vo’osum la n bo’ori to paŋa ge ti Yehowa me puurɛ pee la tɔ.—Mt. 5:10-12; 1 Pe. 4:14.
11. Naayinɛ vo’osum la wan soŋɛ to la wani ge to wan eŋɛ la wani kɔ’ɔn nyɛta vo’osum la?
11 To san ti’isɛ bisɛ Yehowa n yuun bo Ezekiel paŋa se’em ti a ta’an mɔɔla la, to wan ta’an zamesɛ la bem de poan? Naayinɛ vo’osum la wan bo to paŋa ti to ta’an nyaŋɛ daaŋɔ seko woo n paari tɔ na’am mɔɔlegɔ poan. (2 Ko. 4:7-9) To wan ta’an eŋɛ la bem kɔ’ɔn nyɛta Naayinɛ vo’osum la? La nari ti to kɔ’ɔn zusera saŋa woo ɛɛra bu ge sakɛ ti Yehowa keleseri to zusega mɛ. Yezu yuun yele a podɔleba la yeti: “Kɔ’ɔn sokeri ya, . . . kɔ’ɔn eeri ya, . . . kɔ’ɔn ŋmɛ’ɛri ya.” Yehowa me wan “dekɛ zilam vo’osum bo sɛba woo n zuseri en la.”—Lu. 11:9, 13; Tm. 1:14; 2:4.
NAAYINƐ YELESUM LA N YUUN BO EZEKIEL PAŊA
12. Wuu Ezekiel 2:9–3:3 n yele se’em la, gɔnkile la yuun ze’ele la bɛ na ge bem n yuun boi ku poan?
12 Daɣɛ Naayinɛ vo’osum la ma’a n yuun bo Ezekiel paŋa ge Naayinɛ yelesum me yuun bo en paŋa mɛ. Liligere poan, Ezekiel nyɛ la gɔnkile n boi nɛra nu’usin. (Kaalɛ Ezekiel 2:9–3:3.) Gɔnkile wa ze’ele la bɛ na? Bem n boi ku poan? Ku yuun bo Ezekiel paŋa la wani? To bisɛ ya. Gɔnkile wa yuun ze’ele la Naayinɛ na’am kuka la zɛ’an na. Daanse’ere, Yehowa yuun doose la malesi banaasi la ti Ezekiel yuun te’ele nyɛ la poan ayima dekɛ gɔnkile la bo en. (Eze. 1:8; 10:7, 20) Gɔnkile wa yuun tari la Naayinɛ gãkerɛ yɛla zo’e zo’e ti Ezekiel yuun nara ti a tɔɣɛ bo tubekakpiregadoma la n yuun boi yamenɛ poan la. (Eze. 2:7) Ba yuun gulesɛ yɛla wa eŋɛ la gɔnkile la nɛŋa la ku poore.
13. Yehowa yuun yele Ezekiel ti a dekɛ gɔnkile la eŋɛ la bem ge beni n sɔi ti gɔnkile la yuun za’asum?
13 Yehowa yuun yele nɔdɛ’ɛsa la ti a obe gɔnkile la “pirɛ [a] puurɛ.” Ezekiel yuun sakɛ obe gɔnkile la za’a mɛ. Liligere la kalam bɔba vuurɛ? Ezekiel yuun nari ti a bɔkɛ yetɔɣesebo ti a wan tɔɣɛ la vuurɛ. La yuun nari ti yelesum la kɛ̃ a suure ti a ta’an mɔɔlɛ dɛ bo. Sɛla n yuun nyaa eŋɛ dɛna pakerɛ. Ezekiel yuun baŋɛ ti gɔnkile wa “za’asum wuu seerum la.” (Eze. 3:3) Bem zuo? Ezekiel n yuun nyɛ yɔ’ɔ ti a tɔɣɛ Yehowa yele bo nɛreba la, yuun dela sɛla n za’asum bii ana soŋa bɔ’ɔra en. (Ym. 19:8-11) A puurɛ yuun pee mɛ la Yehowa n sakɛ ti a dɛna a nɔdɛ’ɛsa la.
14. Bem n yuun soŋɛ Ezekiel ti a tum a tuuma la?
14 Pooren, Yehowa yuun yele Ezekiel yeti: “Kɛlesa mam soŋa soŋa ge dekɛ yelese’a ti n tɔɣera bɔ’ɔra ho wa eŋɛ ho suuren.” (Eze. 3:10) Yehowa yuun yele Ezekiel wana ti a tɛ̃ra yelese’a n boi gɔnkile la poan la ge ti’isa de taɣesa. Bala yuun bo Ezekiel la paŋa ge me soŋɛ en ti a ta’an tɔɣɛ yetɔɣum n tari paŋa bo nɛreba la. (Eze. 3:11) Ezekiel n yuun bɔkɛ Naayinɛ yelesum la ge sakɛ bo de la zuo, a yuun maasum mɛ ti a tum a tuuma la ba’asɛ soŋa.—Dekɛ makɛ Yooma 19:14.
NAAYINƐ YELESUM N BO’ORI TO PAŊA ZINA BEERE WA
15. To san ɛɛra ti to ŋmibera, bem n nari ti to dekɛ eŋɛ to “suuren”?
15 La nari ti to basɛ ti Naayinɛ yelesum la bɔ’ɔra to paŋa ti to ta’an ŋmibera na’am mɔɔlegɔ la poan. La nari ti to dekɛ sɛla woo ti Yehowa pa’ala to la eŋɛ to “suuren.” Yehowa doli la Baabule la poan tɔɣera bɔ’ɔra tɔ. To wan eŋɛ la wani ta’an basɛ ti Naayinɛ Yelesum la kpemese to giila, tɛɛra to puti’irɛ ge ta’an baŋɛ la ani to se’em?
16. La nari ti to eŋɛ Naayinɛ Yelesum la wani ge to wan eŋɛ la wani ta’an bɔkɛ dɛ?
16 To san dita dia la bo’ori to la paŋa, bala mea nɔɔ ti to san zamesa Naayinɛ yelesum ge ti’isa taɣesa de poan to sakerɛ ni kpe’em mɛ. Sɛla ti Yehowa bɔta ti to ita n bala. Yehowa boti la to basɛ ti a Yelesum la “pirɛ [to] puurɛ,” bala pa’alɛ ti to bɔkɛ a yelesum la soŋa soŋa. To wan ta’an eŋɛ bala to san zusa, kaala ge ti’isa taɣesa. Yia la, to ni zusɛ mɛ ta’an maasum to suure bɔkɛ Naayinɛ yelesum la. Sɛla n taɣelɛ dela to kaalɛ Baabule la. Sɛla n pa’asɛ dela to ni su’use mɛ ge ti’isa taɣesɛ to kaalɛ sɛla la. Bem nyuurɔ ti to wan nyɛ? To san ti’isa taɣesa, bala n wan basɛ ti to ta’an bɔkɛ Naayinɛ yelesum la soŋa ti to sakerɛ kpe’em.
17. Beni n sɔi ti la yele pakɛ ti to ti’isa taɣesa to kaali sɛla Baabule la poan la?
17 Beni n sɔi ti la yele pakɛ ti to kaala Baabule la ge ti’isa taɣesa? To san ita bala, la wan bo to paŋa ti to ta’an mɔɔla Na’am yelesum la nananawa ge me wan soŋɛ tɔ ti to ta’an mɔɔlɛ gãkerɛ yele la beere sa’am. To san ti’isa taɣesa Yehowa hala la, la ni soŋɛ to mɛ ti tomam la eŋa ana du’a du’a la taaba. Bala wan basɛ ti to tara suma’asum la pupeelum.—Ym. 119:103.
TO GIILA N KPEŊE TI TO ŊMIBERA
18. Nɛresɛba n boi to gingilega la poan la wan ta bɔkɛ la bem ge beni n sɔi?
18 Ezekiel yuun dela nɔdɛ’ɛsa ge tomam daɣɛ nɔdɛ’ɛseba. Ge to kɔ’ɔn kɔ’ɛ la to puti’irɛ ti to mɔɔlɛ Yehowa yelesum n boi Baabule poan la ta paɛ se’em ma’a ti a bɔta. Gãkerɛ saŋa la san paɛ, nɛreba n boi to gingilega la poan kan yeti bamam ka wum kaka la bii Naayinɛ tamɛ ba yele mɛ. (Eze. 3:19; 18:23) Ge ba wan baŋɛ ti to daa mɔɔli la Naayinɛ yelesum bɔ’ɔra ba.
19. Bem n wan bo to paŋa ti to ta’an tum to na’am mɔɔlegɔ tuuma la?
19 Bem n wan bo to paŋa ti to ta’an tum to na’am mɔɔlegɔ tuuma la? La dela yɛla atã la n yuun soŋɛ Ezekiel la. To kɔ’ɔn mɔɔla mɛ se’ere n sɔi la to mi ti Yehowa n tum tɔ. Naayinɛ zilam vo’osum la, la A Yelesum la n bo’ori to paŋa. Yehowa wan soŋɛ tɔ ti to giila kpeŋe ti to tuna na’am mɔɔlegɔ tuuma la ge me ŋmibe “ta paɛ ba’asegɔ.”—Mt. 24:13.
YUUNƐ 65 Move Ahead!
a Zaseŋɔ wa poan, to wan geele yɛla atã n yuun soŋɛ nɔdɛ’ɛsa Ezekiel ti a ta’an tum a na’am mɔɔlegɔ tuuma la soŋa. To san zamesɛ Yehowa n yuun soŋɛ a nɔdɛ’ɛsa wa se’em la, la wan basɛ ti to tara sakerɛ Yehowa poan ti a me wan soŋɛ tɔ ti to ta’an tum to na’am mɔɔlegɔ tuuma la.