1-2. (a) Soke ani ti to wan sɔsɛ zaseŋɔ wa poan? (b) Bem n pa’alɛ ti Yehowa kɔ’ɔn bɔta ti a soŋɛ to mɛ?

 YEHOWA wan ta’an soŋɛ tɔ ti to ŋmibera yeledaaŋɔ poan ge pu’usa en la pupeelum. A iti la bem soŋera tɔ? To wan eŋɛ la wani ta’an nyɛ nyuurɔ zo’e zo’e la Yehowa n soŋeri to se’em la? To wan nyɛ soke ana wa lebesego zaseŋɔ wa poan. Ge ti to nyaa sɔsɛ soke ana wa la, basɛ ya ti to sɔsɛ soke dena wa yele: Yehowa sirum boti a soŋɛ tɔ?

² Gɔnseko ti tuuntuna Paul yuun gulesɛ bo Hebrudoma la ta’an soŋɛ ti to nyɛ lebesego la. Paul gulesɛ yeti: “Yehowa n de mam soŋera; Mam kan zɔta dabeem. Asaala wan ta’an eŋɛ mam la bem?” (Heb. 13:6) Baabule viisegɔ gɔnɔ pa’alɛ ti kaalegɔ zɛ’an wa poan, yelebire la n de “soŋera” la vuurɛ dela nɛra n ni eŋɛ kalam ti a soŋɛ nɛra n kaaseri ɛɛra soŋerɛ. Makɛ bisɛ ti ho nyɛ la Yehowa n eŋɛ kalam ti a faaɛ nɛra n boi wuŋerɛ poan basɛ. Yelebire wa vuurɛ pa’alɛ ti Yehowa sirum kɔ’ɔn bɔta mɛ ti a dɛna to Soŋera. Yehowa n soŋeri to la zuo, to wan ta’an ŋmibe gurebisɛ poan la pupeelum.

3. Sarɔtɔ totã aŋa bɛɛ ti Yehowa dɔla soŋera tɔ ti to ta’an ŋmibera la pupeelum?

³ Yehowa soŋeri to la sarɔtuni poan ti to ta’an ŋmibera la pupeelum? To kaalɛ ya Isaiah gɔŋɔ la nyɛ lebesego la. Bem zuo? Isaiah yetɔɣebiŋe’a la zo’e zo’e kɔ’ɔn tɔɣera la Naayinɛ yamesi yele zina beere wa. Leyɛ’ɛsa, Isaiah n ni  tɔɣɛ Yehowa yele se’em la ni basɛ ti la dɛna la naana ti to ta’an bɔkɛ. To dekɛ Isaiah a zuo 30 eŋɛ makerɛ. Isaiah dekɛ la yɛla eŋɛ makerɛ pa’alɛ Yehowa n soŋeri a nɛreba se’em la (1) eŋa n keleseri to soŋa soŋa ge lɛbesa to zusega, (2) eŋa n bo’ori to pa’alegɔ se’em, la (3) eŋa n kã’ari bɔ’ɔra to se’em nananawa ge wan kelum kã bo to beere sa’am. To sɔsɛ ya sarɔtɔ totã wa poan ti Yehowa dɔla soŋera to se’em.

4. (a) Isaiah saŋa la poan, Yehowa yuun pa’alɛ ti Yudadoma la ani la wani ge a yuun bo yɔ’ɔ ti bem n paɛ ba? (b) Yehowa yuun tɔɣɛ la bem yelesonɛ bo sɛba n tari sakerɛ la? (Isaiah 30:18, 19)

⁴ Isaiah a zuo 30 poan, Yehowa tɔɣɛ pa’alɛ ti Yudadoma la dela “tubekpirega kɔma,” nyaa “tara be’em malum pa’asa be’em poan.” A tɔ̃kɛ yeti: “Nɛrebana wa iti la kpenkpasi, . . . zaɣesɛ ti ba kan kelese Yehowa lɔɔ la.” (Isa. 30:1, 9) Nɛreba la n yuun zaɣesɛ ti ba kan kelese Naayinɛ la zuo, Isaiah yuun tɔɣɛ biŋe ti Yehowa wan bo yɔ’ɔ ti wuŋerɛ paɛ ba. (Isa. 30:5, 17; Yer. 25:8-11) Yelemɛŋɛrɛ, Babilondoma la yuun tari ba keŋɛ la Babilon ti ba ta dɛna yamesi. Ge Yudadoma basɛba yuun tari sakerɛ mɛ, ti Isaiah me yuun tɔɣɛ yelesonɛ bo ba. A yuun yele ba yeti, la keni na Yehowa wan basɛ ti ba lebe bamea tiŋa. (Kaalɛ Isaiah 30:18, 19.) Bala mea n yuun sirum eŋɛ. Yehowa yuun faaɛ ba yese Babilon tiŋa mɛ. Ge la yuun dekɛ la yuuma zo’e zo’e ge ti Yehowa nyaa faaɛ ba basɛ. Isaiah n yuun gulesɛ yeti, “Yehowa ma’ɛ la amea gura ti a soŋɛ ya la” pa’alɛ ti la wan yue ge ti a nɛreba la nyɛ faarɛ. Yelemɛŋɛrɛ la dela, Israeldoma la yuun dela yamesi bɔna Babilon ti la paɛ yuun 70 ge ti ba poan basɛba nyaa lebe Yerusalem. (Isa. 10:21; Yer. 29:10) Israeldoma n yuun de yamesi bɔna Babilon la, ba suure n yuun sa’am ti ba kaasa ge ban yuun nyaa lebe ba tiŋa la, ba puurɛ yuun pee mɛ.

5. Isaiah 30:19 tɔɣɛ la bem ti la buɣelɛ to suure?

⁵ Zina beere wa, Isaiah 30:19 dela giilekpeŋere bɔ’ɔra tɔ. La yeti: “Ho san kaasɛ bo en ti a soŋɛ hɔ, a wan soŋɛ hɔ.” (Isa. 30:19) Isaiah basɛ ti to baŋɛ ti Yehowa ani la kɛli kɛlesa to kaasega la, a me wan eŋɛ kalam lebese to zusega la. Isaiah tɔɣɛ pa’asɛ yeti: “A san kɔ’ɔn kelese ho ba’asɛ, a wan lebese ho.” Yetɔɣum buna wa basɛ ti to baŋɛ ti to Sɔ la kɔ’ɔn bɔta mɛ ti a soŋɛ sɛba n zuseri en la. Ton mi dena wa la soŋeri to mɛ ti to ta’an ŋmibera la pupeelum.

6. Sodeni poan ti Isaiah yetɔɣum la pa’alɛ ti Yehowa keleseri tomam ayima ayima woo zusega mɛ?

⁶ Kaalegɔ zɛ’an wa le pa’alɛ tɔ zusega yele la wani? Yehowa keleseri tomam ayima ayima woo zusega mɛ. Beni n sɔi ti to wan ta’an yele bala? Isaiah a zuo 30 la poan, Yehowa tɔɣɛ yeti, “ya” ti la pa’alɛ ti a tɔɣeri bɔ’ɔra la nɛreba la za’a. Ge a kaalegɔ zɛ’an 19 la poan a yeti, “ho” ti la pa’alɛ ti a tɔɣeri bɔ’ɔra ba la ayima ayima. Isaiah gulesɛ yeti: “Ho kan makɛ kaasɛ”; “a wan soŋɛ hɔ”; “a wan lebese ho.” Yehowa dela Sɔ n tari nɔŋerɛ. Bala zuo la a kan makɛ yele a dayɔa bii a bipugela giila n kɔ’ɔsɛ ti, “La nari ti ho tara paŋa wuu ho suɔ la.” Ge a fabeli tomam ayima ayima woo yele mɛ ge kɛlesa to zusega soŋa soŋa.​—Ym. 116:1; Isa. 57:15.

7. Sodeni poan ti Isaiah la Yezu pa’alɛ la yele n pakɛ se’em ti to kɔ’ɔn zusera?

⁷ Sɛla san pakɛ tɔ ti to zusɛ Yehowa, a  ni eŋɛ la kalam bo to paŋa ti to ta’an ŋmibe. Gurebisɛ la san ka tole wuu tomam n ti’iseri se’em la, la nari ti to kelum zusera Yehowa ti a bo to paŋa ti to ta’an ŋmibe. A boti to ita la bala. Isaiah yetɔɣum la vuurɛ n bala. A yuun yeti: “Da malum basɛ ti [Yehowa] vo’ose.” (Isa. 62:7) Bala vuurɛ? La nari ti to kɔ’ɔn zusera Yehowa ti la ana wuu to ka basɛ ti Yehowa vɔ’ɔsa mɛ la. Isaiah yetɔɣum la basɛ ti to tiɛ la Yezu maɣesa la n tɔɣeri zusega yele ti la bɔna Luke 11:8-10, 13. Bilam Yezu kpemese to giila ti to “mɔregɛ zusa” ‘ɛɛra’ zilam vo’osum la. To ta’an zusɛ Yehowa ti a pa’alɛ tɔ ti to ta’an kɔ’ɛ to puti’irɛ soŋa yɛla poan.

8. Isaiah 30:20, 21 yuun tum tuuma la wani diimi saŋa la?

⁸ Kaalɛ Isaiah 30:20, 21. Babilon lengimadoma n yuun ta kaɛ Yerusalem yuunɛ la girego la, la yuun ba’ɛ wuŋɛ nɛreba la mɛ ti wuŋerɛ la ana wuu dia la ko’om bɔ’ɔra ba. Kaalegɔ zɛ’ɛsi 20 la 21 la poan, Yehowa yuun yele Yudadoma la yeti, ba san basɛ ba be’em ge tee ba halɛ, a wan faaɛ ba basɛ. Isaiah yuun yeti Yehowa dela “Pa’alekãtɛ Daana N Gaŋɛ Za’a” ge pu’ulumbiŋe ti Yehowa wan pa’alɛ ba la nari ti ba pu’usa En se’em ti a puurɛ pee. Yetɔɣum ana yuun tum tuuma mɛ Yudadoma n yuun yese yamenɛ poan la. Yehowa yuun sirum tum pa’alɛ ti a dela ba Pa’alekãtɛ Daana N Gaŋɛ Za’a. A me yuun pa’ali a nɛreba la mɛ ti ba le basɛ ti yelemɛŋɛrɛ pu’usegɔ bɔna. To puurɛ me pee mɛ la Yehowa n de to Pa’alekãtɛ Daana N Gaŋɛ Za’a la.

9. Zina beere wa, sarɔkuni poan ti Yehowa pa’ala tɔ?

⁹ Isaiah dekɛ la makerɛ tɔɣɛ pa’alɛ ti Yehowa pa’ali to mɛ sarɔtɔ toyi poan. Yia la, Isaiah yeti: “Ya wan nyɛ ya Pa’alekãtɛ Daana N Gaŋɛ Za’a la, la ya nini.” Makerɛ wa poan, Pa’alegɔdaana la kɔ’ɔn zɛ’a la zamesegɔdoma la nɛŋan. La dela yɔ’ɔ bɔ’ɔra tɔ la Naayinɛ n pa’ali tɔ zina beere wa la. Yehowa pa’ali to la wani? A doli la a tigere la poan pa’ala tɔ. Bisɛ to puurɛ n pee se’em la pa’alesoŋɔ wa ti to nyɛta Yehowa tigere la poan la! Pa’alegɔ seto ti to wuna to tansugere zamesegɔ poan, laɣesegɔ poan, to gɔnɔ poan, broadcasting poan la sarɔtɔ toseto poan la, soŋeri to mɛ ti to ta’an ŋmibera la pupeelum.

10. Sore deni poan ti to wuna “yelesum n tɔɣeri [to] pooren”?

 ¹⁰ Isaiah pa’alɛ to mɛ sarɔsɛka n pa’asɛ buyi ti Yehowa dɔla pa’ala tɔ. A yeti: “Yamea tuba wan wum yelesum n tɔɣeri ya pooren.” Nɔdɛ’ɛsa wa tɔɣɛ pa’alɛ ti Yehowa ani wuu pa’alegɔdaana n boi a zamesegɔdoma pooren ge pa’ala ba sarɔseko n nari ti ba doose. Zina beere wa, to wuni Naayinɛ kɔ̃a n tɔɣeri to pooren mɛ. Wani wani? Diimi sa ti ba puɣum gulesɛ Naayinɛ yelesum eŋɛ Baabule la poan. Bala la, to san kaala Baabule la, la ani wuu to wuni la Naayinɛ kɔ̃a n tɔɣeri to pooren la.​—Isa. 51:4.

11. To san wan nyaŋɛ ŋmibera la pupeelum, la nari ti to eŋɛ la bem ge bem zuo?

¹¹ To wan eŋɛ la wani ta’an nyɛ nyuurɔ yese Yehowa n pa’ali to se’em dɔla a tigere, la a Yelesum la poan la? Tɛ̃ra ti Isaiah tɔɣɛ la yɛla ayi. Yia, “sore la n wana.” Yi’i, “keni ya ka poan.” (Isa. 30:21) To san mina “sore la,” bala ma’a ka seke. La nari ti to ‘kena de poan.’ Yehowa Yelesum, la a tigere la pa’ali to mɛ Yehowa n eeri sɛla to zɛ’an. To le zamesɛ baŋɛ to wan eŋɛ se’em dekɛ sɛla ti to zamesɛ la tum tuuma. To san ɛɛra to ŋmibera ge pu’usa Yehowa la pupeelum, la nari ti to eŋɛ yɛla ayi wa. Bala n wan basɛ ti to nyɛ Yehowa kã’a.

12. Wuu Isaiah 30:23-26 n pa’alɛ se’em la, Yehowa yuun kã bo a nɛreba la wani?

¹² Kaalɛ Isaiah 30:23-26. Yetɔɣebiŋere wa yuun tum tuuma la wani bo Yudadoma sɛba n yuun ze’ele Babilon yamenɛ poan lebe Israel tiŋa la? Yehowa yuun bo ba la yɛla zo’e zo’e n soŋeri ba ti ba ta’an vɔna ge pu’usa en soŋa soŋa. Yehowa yuun kã bo a nɛreba mɛ ti ba nyɛ dia zo’e zo’e. Ge sɛla n gaŋɛ dela, a yuun bo ba la vo’osum poan dia ge soŋɛ ba ti ba le pɔsɛ pu’usa en sarɔseko n nari poan. Naayinɛ nɛreba wa ka tabelɛ nyɛ kã’a zo’e zo’e Naayinɛ zɛ’an wuu sankaŋa la. Wuu kaalegɔ zɛ’an 26 n pa’alɛ se’em la, Yehowa yuun soŋɛ ba mɛ ti ba bɔkɛ a yelesum la. (Isa. 60:2) Yehowa yuun kã bo a nɛreba mɛ ti ba tara paŋa ge pu’usa en la pupeelum “se’ere n sɔi la ba suure [yuun] ani la mama.”​—Isa. 65:14.

13. Yetɔɣebiŋere la n yeti yelemɛŋɛrɛ pu’usegɔ wan le bɔna la, tum tuuma la wani tomam dabesa wa poan?

¹³ Yetɔɣebiŋere la n yeti yelemɛŋɛrɛ pu’usegɔ wan le bɔna la tɔɣeri la tomam  zina beere wa yele? Ɛɛ! Sodeni poan? Kɔ’ɔn pɔsɛ 1919 Y.B. poan, nɛreba tustusa n yese bamea Babilon Kãtɛ la n de tingɔŋɔ wa za’a waabi pumpɔreŋɔ pu’usegɔ la poan. Ba nyaa boi la zɛsɛka n nyani Israel Pu’ulumbiŋe Tiŋa la. Ba boi la vo’osum paradiisi la poan. (Isa. 51:3; 66:8) Bem n de vo’osum poan paradiisi la?

14. Bem n de vo’osum poan paradiisi la ge bani n boi bim zina beere wa? (Bisɛ Yelesum Vuurɛ.)

¹⁴ Kɔ’ɔn ze’ele yuun 1919 Y.B. poan, looredoma la boi la vo’osum paradiisi la poan ge tara pupeelum. b Pooren, sɛba n tari puti’irɛ ti ba bɔna tinparɛ wa zuo la n de “pisena” la, me pa’asɛ vo’osum tiŋa wa poan mɛ ge nyɛ Yehowa kã’a zo’e zo’e.​—Yon 10:16; Isa. 25:6; 65:13.

15. Vo’osum poan paradiisi la boi la bɛ?

¹⁵ Vo’osum tiŋa la bii paradiisi la boi la bɛ zina beere wa? Yehowa yamesi boi tingɔŋɔ wa zɛ’an woo mɛ. Bala la, vo’osum paradiisi ti ba bɔna ka poan la me boi tingɔŋɔ wa zɛ’an woo mɛ. Bala la, la ka pakɛ la ton kɛ̃’ɛri zɛ’an tingɔŋɔ wa zuo, to san kɔ’ɔn mɔ’ɛ nini yelemɛŋɛrɛ pu’usegɔ poan, to ta’an pa’asɛ vo’osum paradiisi la poan.

16. To wan eŋɛ la wani ta’an kelum nyɛta vo’osum poan paradiisi la n som se’em la?

¹⁶ To san bɔta ti to kɔ’ɔn bɔna vo’osum paradiisi la poan, la nari ti to puurɛ pee la Krista tansugere la n boi tingɔŋɔ wa zuo la. To wan eŋɛ la wani ta’an eŋɛ bala? La dela to ti’isa to mabiisi la halisoma yele ge daɣɛ ba tuure yɛla la. (Yon 17:20, 21) Beni n sɔi ti bala yele pakɛ? Geele makerɛ wa bisɛ. Ho san keŋɛ gaadin poan, ho wan nyɛ tiisi buuri buuri n boi bim. Bala mea nɔɔ, to tansuga la poan zina beere wa, nɛreba to’ore to’ore boi bim mɛ n ani wuu tiisi n boi to’ore to’ore se’em la. (Isa. 44:4; 61:3) La nari ti to kɔ’ɔn bisera la “goo” la za’a n ani soŋa se’em ge daɣɛ to bisera “tiisi” sɛba n lɛm to la n tari daaŋɔ se’em. La ka nari ti to  bo yɔ’ɔ ti tomam n ka ani ma’a la bii to mabiisi n ka ani ma’a la burum to puti’irɛ ti to kan nyɛta tingole wa za’a Krista tansugere la n som se’em la.

17. Tomam ayima ayima wan ta’an eŋɛ la wani basɛ ti nɔyinɛ bɔna tansugere la poan?

¹⁷ Tomam ayima ayima wan eŋɛ la wani ta’an basɛ ti nɔyinɛ bɔna tansugere la poan? La dela to ɛɛra suma’asum. (Mt. 5:9; Arom 12:18) Sansɛka woo ti to ni tiregɛ ti to tara suma’asum la to mabiisi n boi tansugere la poan, to ni basɛ ti vo’osum paradiisi la som mɛ pa’asɛ. La nari ti to tɛ̃ra ti sɛba woo n boi vo’osum paradiisi la poan, Yehowa n ve’e ba wa’an yelemɛŋɛrɛ pu’usegɔ poan na. (Yon 6:44) Makɛ bisɛ Yehowa puurɛ n ni pee se’em, a san ni nyɛ a yamesi la n tari tuulum la n tiregeri ti ba tara suma’asum la nɔyinɛ la taaba!​—Isa. 26:3; Hag. 2:7.

18. Bem yɛla n nari ti to ti’isa taɣesa ge bem zuo?

¹⁸ Naayinɛ kã’ari bɔ’ɔra a yamesi mɛ. Bala la, to wan eŋɛ la wani ta’an nyɛ nyuurɔ a kã’a la poan? To san zamesɛ Naayinɛ Yelesum, la to gɔnɔ la, to ta’an ni ti’isɛ taɣesa de yele soŋa soŋa. To san zamesa ge ti’isa taɣesa, bala wan soŋɛ tɔ ti to tara ‘mabinɔŋerɛ’ la “giile bɔ’ɔra taaba” tansugere la poan. (Arom 12:10) To san ti’isa taɣesa kã’a seto ti to tara nananawa, bala wan basɛ ti tomam la Yehowa bɔnsoŋa la kpe’em. To me san ti’isa taɣesa Yehowa n pu’ulumbiŋe ti a kã yelese’a bo to beere sa’am la, bala wan soŋɛ tɔ ti to kɔ’ɔn pu’usa en soŋa soŋa daarewoo. Yele ana wa za’a wan soŋɛ tɔ ti to pu’usa Yehowa la pupeelum nananawa.

19. (a) Wuu Isaiah 30:18 n yele se’em la, to tari puti’irɛ la bem poan? (b) Bem n wan soŋɛ tɔ ti to ta’an ŋmibera la pupeelum?

¹⁹ Yehowa “wan isige” zabɛ faaɛ tɔ se’em ma’a ti a sa’am tingɔnbe’o wa la. (Isa. 30:18) To mi ti Yehowa n de ‘tontɔɔ gãkerɛ Naayinɛ la,’ a kan bo yɔ’ɔ ti Sitaana tiŋa wa yue gaŋɛ la nari se’em. (Isa. 25:9) To kɔ’ɔn nyɔkɛ la tomea gura se’em ma’a ti Yehowa wan ta faaɛ to basɛ. Nananawa, to kɔ’ɛ la to puti’irɛ ti to nɔŋɛ zusega, zamesa Naayinɛ Yelesum ge tara tuna tuuma ge me ti’isa taɣesa eŋa n kã bo to se’em la. To san ita bala, Yehowa wan soŋɛ tɔ ti to ta’an pu’usa en ge ŋmibera la pupeelum.