Hon wan bɔta ti ho bɔkɛ hon zameseri sɛla la soŋa? Ho ta’an eŋɛ yele ana wa ta’an nyɛ zɛ’an ani soŋa zamesɛ:

• Bisɛ zɛ’an n makɛ ma’a. Bisɛ zɛ’an n ani filam ti bugum bɔna bim ti ho ta’an nyɛta kaala soŋa. Ho ta’an dekɛ kuka la teebule zĩ’ire zamesɛ bii ho yese yiŋa ta bisɛ zɛ’an n ani soŋa zĩ’ire.

• Bisɛ zɛ’an ti ho wan bɔna ho ma’a. Yezu yuun ni isige la bulika asubaa keŋɛ zɛ’an n ani siim ta zusɛ. (Mr. 1:35) Ho me san kan ta’an bɔna ho ma’a, ho ta’an yele ho deodoma bii hon naɛ la sɛba kɛ̃’ɛra la ti ho zameseri mɛ, ho me ka boti voole.

• Basɛ ti ho puti’irɛ bɔna bɔbeyinɛ. Da basɛ ti sɛla buruna ho puti’irɛ. Ho san tara fon bii tablet, eŋɛ ku ti la ana siim lan wan eŋɛ se’em ti la kan daana ho zamesegɔ la. Ho me san tiɛ ti la nari ti ho eŋɛ sɛla, gulesɛ biŋe ho san ba’asɛ ti ho ta tum. La san kpe’em bo ho ti ho puti’irɛ bɔna zamesegɔ la poan, ho ta’an isige dɔlegɛ sia bii ho keŋɛ kaɛ fii.