LA KPE’EM bo ho mɛ ti ho zamesa Baabule la bakwai woo? Saŋa ase’a, hon ni ti’isa ti Baabule zamesegɔ siirɛ la inya? La ta’an ni ana to za’a bala. Ge ti’isɛ bisɛ yɛla ase’a ti to ita daarewoo n de wuu inya sɔa. La ni dɛna la to tiregɛ sɔ inya. Ge to san ni sɔ inya ba’asɛ, la ni ana to la mama. Baabule zamesegɔ me ani wuu nɛra n dekɛ ko’om sɔ a inya. (Ep. 5:26) Bisɛ yɛla ase’a n wan soŋɛ hɔ:

• Maasum ho saŋa. Homea Baabule zamesegɔ laɣum pa’asɛ la “sɛla n de ma’an” ti Kristabia nara ti a ita. (Flp. 1:10) Gulesɛ sɛla ti ho maasum la labelɛ ho kuleŋa nɔɔren bii zɛ’an ti ho wan nyɛta, lan wan eŋɛ se’em ti ho kan tamɛ. Ho ta’an sɛtɛ alarm ti la tiɛ hɔ hon wan zamesɛ sansɛka.

• Bisɛ sɛla n pakɛ hɔ. Hon wan bɔta ti ho ita ho zamesegɔ la wani? Makerɛ, la wan dɛna naana bɔ’ɔra hɔ ti ho dekɛ awa ayina eŋɛ ho zamesegɔ la? Bii ho wan bɔta ti ho zamesa fii fii tabela taaba? Homea n mi sɛla n wan makɛ bo ho. Bala la, ŋmɛresɛ ho zamesegɔ saŋa la ti la makɛ la bala. Ho zamesegɔ saŋa la san paɛ ti zinyagerɛ tara hɔ, ho ta’an dekɛ mita pia zamesɛ. Ho san zamesa fii fii bala, ho wan zamesɛ zo’e gana hon puɣum ka zamesɛ. Daanse’ere ho san zamesɛ mita pia la ba’asɛ, ho puurɛ wan pee ti ho bɔta ti ho le zamesɛ pa’asɛ.—Flp. 2:13.

• Te’ele maasum hon wan zamesɛ sɛla. To san yeti to zamesɛ ge nyaa ti’isa ton wan zamesɛ sɛla, la wan pa’alɛ ti to ka tari to saŋa la tuna soŋa. (Ep. 5:16) Ho san te’ele gulesɛ hon boti ho zamesɛ sɛla la biŋe, la wan soŋɛ hɔ. Ho san ka bɔkɛ sɛla, gulesɛ de pa’asɛ yelese’a ti ho puɣum gulesɛ biŋe la poan.

• Ni eŋɛ teere la san nara. Ho ta’an ni eŋɛ teere ho maaseŋɔ la poan, maɣesɛ wuu hon tari tɛm se’em zamesa, la yelese’a ti ho zamesa. Sɛla n pakɛ dela, ho ta’an ita zamesegɔ la bakwai woo. Sɛla n wan ta’an soŋɛ hɔ dela, ho san bisɛ ti la nari, tee dabeserɛ, la ho zamesegɔ saŋa la, hon wan zamesɛ yue se’em bii yelese’a ti ho wan zamesa.

To san zamesa bakwai woo, to wan nyɛ nyuurɔ. To wan ana du’a du’a la Yehowa, tara yɛm ti la me ana to mama.—Yos. 1:8.