Mabiisi zo’e zo’e n yuun mɔɔli la zuo, ba yuun eeri la gɔnɔ zo’e zo’e. Mabiisi la n yuun boi Brooklyn Betel la n yuun maali magazindoma la ge ba yuun kelum basɛ ti gɔnɔ maalegɔdoma n maala gɔnkãra bɔ’ɔra ba. Ŋmaresi zo’e zo’e poan ti ba yuun ka ta’an maalɛ gɔnɔ ti ba tara kena na’am mɔɔlegɔ la, mabia Rutherford yuun soke Robert Martin, se’em n yuun biseri factory la nyaa ba wan ta’an maala bamea gɔnɔ.

Mabia Martin yuun yeti, “bala dela putɛsonɛ sɛla n sɔi la, la nari ti to tara tomea factory ta’an maala tomea gɔnɔ.” Mabiisi la yuun haɛ la zɛ’an n boi 18 Concord Street n boi Brooklyn ge me da lɔɣeseto ti ba wan dekɛ tum la.

Daɣɛ nɛra woo puurɛ n yuun pee la tuunɛ wa. Kompine sɛka n yuun maali to gɔnɔ la zuodaana n yuun wa’ana kaɛ to factory paalega la bisɛ. A yuun yeti: “Ya tari la gɔnɔ maalegɔ maɣazim n ani soŋa ge ya se’em ka boi n mi ka tuunɛ, ŋmaresi siyoobe poan sɛla woo wan basɛ yoo.”

Mabia Martin yeti “la yuun ani wuu yɛm boi bim mɛ ge tomam mi ti Yehowa wan soŋɛ tɔ, a me yuun sirum soŋɛ to mɛ.” Mabia Martin yuun tɔɣɛ la sira. La yuun ka yue ti maɣazim paalega la yuun maala gɔnɔ 2,000 daarewoo.

Yehowa nɛreba yuun maali bamea gɔnɔ toseto mɛ ge me yuun nyaa dɔla walesi poan mɔɔla yetɔɣum la bɔ’ɔra nɛreba. Alaserɛdaarɛ wuntɛɛŋa, February 26, 1922, ti Mabia Rutherford yuun pɔsɛ tɔɣɛ walesi poan. Walesi tuuma zɛ’an n boi Los Angeles, California, U.S.A tiŋa poan ti a yuun bo yetɔɣum zuo n de “Nɛreba Zo’e Zo’e N Vɔi Wa Kan Malum Ki.”

 Nɛreba n paɛ wuu 25,000 n yuun kelese yetɔɣum wa. Nɛreba wa basɛba yuun gulesɛ la gɔnɔ pa’alɛ ba puurɛ n pee se’em la yetɔɣum wa. Willard Ashford n yuun kɛ̃’ɛri Santa Ana, California tiŋa me yuun gulesɛ gɔŋɔ bo mɛ. A pɛɣɛ Mabia Rutherford mɛ la eŋa n bo a yetɔɣum la ti la “kɛ̃’ɛra suure se’em la.” A yuun le yeti: “Nɛreba batã n daa bɛ̃’ɛri gã’a tomam yire ti la kan ta’an eŋɛ ni ti n wa’ana kelese ho yetɔɣum la hali ho san puɣum bo ni dɛ to yire dapoore.”

Bakwai se’a n yuun taɣelɛ la mabiisi la yuun tɔɣɛ walesi poan zo’e mɛ. Yuunɛ la ki’ileŋɔ poan la, Pigera Zontua la yuun kɛkɛ yeti “la wɔ̃ni ti nɛreba 300,000 n kelese yetɔɣum la walesi poan.”

Nɛreba puurɛ n yuun pee se’em la yuun kpemese Baabule zamesegɔdoma wa giila mɛ ti ba kɔ’ɛ ba puti’irɛ ti ba wan mɛ bamea walesi tuuma zɛ’an n boi Staten Island n ka zaaɛ la Brooklyn Betel la. Yuunse’a n taɣelɛ la, Baabule Zamesegɔdoma la yuun tari la WBBR Station, mɔɔla Na’am yelesum la ti la paara zɛ’ɛsi zo’e zo’e.

June 15, 1922, Pigera Zontua la yuun yeti ba wan eŋɛ laɣesegɔ Cedar Point, Ohio tiŋa, kɔ’ɔn pɔsera September 5 ta paɛ 13, 1922 poan. Baabule Zamesegɔdoma la puurɛ yuun pee mɛ se’em ma’a ti ba yuun paɛ Cedar Point la.

Mabia Rutherford pɔsega yetɔɣum la poan, a yuun yele a kɛleseriba la yeti: “Mam ka tari puti’ira ayi ayi ti Yehowa wan kã bo laɣesegɔ wa ge me basɛ ti to di sɛɛra gana to puɣum ita se’em tingɔŋɔ wa zuo la.” Laɣesegɔ la poan, yetɔɣumdoma la yuun kpemese mabiisi la giila ti ba mɔ’ɛ nini la na’am mɔɔlegɔ tuuma la.

Azumadaarɛ, September 8, nɛreba n paɛ wuu 8,000 n yuun kɛ̃ deo la poan ge kɔ’ɔn ana lɛɛ gura Mabia Rutherford yetɔɣum la. Ba yuun tari puti’irɛ ti a wan tɔɣɛ pa’alɛ ba “ADV” la vuurɛ n de se’em ti ba gulesɛ eŋɛ beeŋo gɔŋɔ la poan la. Ban yuun zi’ire la, nɔkpe’ene kai ti ba yuun nyɛ la tanɛ n kãregɛ yula yetɔɣum bimbine la saazuo sa.  Arthur Claus, yuun ze’ele la Tulsa, Oklahoma, U.S.A tiŋa keŋɛ laɣesegɔ la, a yuun zi’ire la zɛsɛka ti a wan ta’an kelese laɣesegɔ la soŋa sɛla n sɔi la makrofon yuun ka boi deo la poan.

La wan eŋɛ se’em ti nɛreba kan kena tũuna la, kuka zuodaana la mɔɔlɛ ti ba da bo yɔ’ɔ ti nɛra kɛ̃ deo la poan se’em ma’a ti Mabia Rutherford bɔ’ɔra a yetɔɣum la. Bulika 9:30 poan, Mabia Rutherford pɔsɛ tɔɣera Yezu yelesum la n boi Matu 4:17: “Saazuo na’am la vurege lɛm mɛ.” Eŋa n tɔɣeri pa’ala nɛreba n wan wum Na’am wa yele se’em la, a yeti: “Yezu mɛŋa yuun yeti a saŋa la poan a wan doose na’am mɔɔlegɔ poan laɣesɛ nɛreba bo a mɛŋa ti ba dɛna yelemɛŋɛrɛdoma.”

Mabia Claus daa zi la deo la poan ge yeti: “To daa ani la kɛli ge kɔ’ɔn kɛlesa yetɔɣum la.” Ge la ka yue ti a daa bɛ̃’ɛra ge yese deo la poan. Arthur puurɛ daa ka pee la eŋa n yeseri la sɛla n sɔi la a mi ti ba kan sakɛ ti a le kɛ̃ na.

Mita fii pooren ti la yuun sɔ̃na en bɛ’ɛna. A yuun yeti eŋa n yuun leberi deo la poan la, a wum ti ba pa’ara la nu’usi kpe’eŋo kpe’eŋo. Bala yuun basɛ ti a inya kita mɛ paa. A yuun kɔ’ɛ a puti’irɛ ti la san dɛna ti a zom deo la saazuo sa ge ta’an wum yetɔɣum la soŋa, a wan eŋɛ bala. Sankaŋa la, Mabia Claus yuun dela yuun 23 ge ta’an zom deo la saazuo. Eŋa n yuun zom ta pɔ̃ra saazuo la, a yuun nyaa “wuni yetɔɣum la mɛ soŋa soŋa.”

La yuun daɣɛ Arthur ma’a. A zɔdoma basɛba yuun laɣum bɔna deo la saazuo mɛ. Ba poan ayima yu’urɛ n de Frank Johnson, yuun zɔ paɛ a zɛ’an soke en yeti “Hon tari sɔbila kalam?”

Ti Arthur yeti “ɛɛ mam tari.”

Ti Frank yeti “tomam kɔ’ɔn zusa mɛ ti to nyɛ nɛra n tari sua. Hon nyɛ tanɛ wa n kãregɛ  yula wa? Gulesegɔ n boi bim ti ba dekɛ lu labelɛ la kuto la. Kɛlesa Gãkerɛdaana la soŋa. * A san ta yeti, ‘mɔɔli ya, mɔɔli ya,’ ho ŋmaɛ mi’isi sinaasi la.”

Bala la, Arthur yuun zãli su’a la mɛ ge gura se’em ma’a ti la wan nara ti a ŋmaɛ. La ka yue ti Mabia Rutherford ta pɔ̃ra a yetɔɣum la ba’asegɔ. Mabia Rutherford giila n kpeŋe ge ti a puurɛ pee la, ti la ana wuu a nyabegɛ mɛ yeti: “Tara ya sakerɛ la yelemɛŋɛrɛ dita sɛɛra bɔ’ɔra Yehowa. Kɔ’ɔn keŋɛ ya ta zabɛ ta paɛ se’em ma’a ti pumpɔreŋɔ pu’usegɔ woo sa’am ba’asɛ. Mɔɔlɛ ya yelesum la zɛ’an woo. Tingɔŋɔ la nari ti ba mina ti Yehowa dela Naayinɛ, ti Yezu Krista me dɛna Nadoma Naba la Daandoma me Daana. Zina dabeserɛ wa boi la de to’ore. Bisɛ ya, Naba la pɔsɛ bisega mɛ! Yamam n de a tuuntuneba. Bala la, mɔɔli ya, mɔɔli ya, mɔɔli ya Naba la, la a Na’am la!”

Arthur yeti eŋa la mabiisi bana la ŋmaɛ mi’isi la ti tanɛ la yulege yula ana wuu la nari ti la ana se’em la. Wuu “ADV” kuusi la vuurɛ n de se’em solemiine poan la, la gulesɛ tanɛ la poan ti: “Mɔɔli ya Naba la, la a Na’am la.”

Cedar Point laɣesegɔ la yuun soŋɛ mabiisi la mɛ ti ba puti’irɛ kɔ’ɔn bɔna Na’am mɔɔlegɔ tuuma la n de ninmɔ’ɔrɛ la. Sɛba me n yuun mɔ’ɛ nini tuna tuuma wa la, puurɛ yuun pee mɛ. Colporteur (nananawa ti ba yi’ira ti sore ŋmɛ’adaana) n ze’ele Oklahoma, U.S.A. tiŋa gulesɛ yeti, “Tinsɛka ti to yuun tuna la dela coal tiŋa ge ti nɔŋɔ me yuun kɔ’ɔn bɔna bim.” A yeti nɛreba san ni kaalɛ nyɛ yelesum la n boi Golden Age magazine la, “ba nintam n ni zɔɣera.” A kilise a yetɔɣum la yeti, “to puurɛ ni pee mɛ paa la to ni ta’an buɣelɛ ba suure la.”

Baabule Zamesegɔdoma wa baŋɛ Yezu yelesum la n boi Luke 10:2 la dela ninmɔ’ɔrɛ yele. Bilam yeti: “Va’am la dia bi’ɛ zo’e mɛ ge tuuntuneba la pɔ’ɛ mɛ.” Yuunɛ la n ta ba’asɛ la, ba yuun malum maasum mɛ ti ba mɔɔlɛ Na’am yelesum la ti la paɛ zɛ’an woo.