1. Bem n de to “vo’osum poan yɛla” ge yele aŋa wan ta’an basɛ ti to tara pupeelum la wani?

 YELEMƐŊƐRƐ pupeelum daɣɛ pupeelum sebo n ka yuuri ge fɔ̃regera. Yelemɛŋɛrɛ pupeelum ni kɔ’ɔn bɔna la nɛra la mɛ. Sore kani poan? Yezu n yuun bo a zoore zuo yetɔɣum la, a pa’alɛ ti: “Pupeelum boi mɛ la sɛba n ti’iseri ba vo’osum poan yɛla.” (Mt. 5:3) Yezu yuun mi ti ba naam nɛresaaleba mɛ ti ba bɔta ti ba mina ba Naaŋɔdaana Yehowa Naayinɛ ge pu’usa en. Bala n de to “vo’osum poan yɛla.” Yehowa n de “pupeelum Naayinɛ” la zuo, sɛba n pu’useri en la me ta’an tara pupeelum.​—1 Tim. 1:11.

2-3. (a) Wuu Yezu n yuun pa’alɛ se’em la, bani n wan ta’an tara pupeelum? (b) To wan zamesɛ la bem zaseŋɔ wa poan ge beni n sɔi ti la nara?

² La nari ti to bɔŋa zɛ’an ana soŋa ge ti to nyaa tara pupeelum? Aayi. Yezu zoore zuo yetɔɣum la poan la, a yuun yele la sɛla n de yelepakerɛ. “Sɛba n kaaseri”​—daanse’ere ba tum la be’em ti la daana ba zuo bii daaŋɔ yɛla n paara ba ta’an kelum tara pupeelum. Yezu yuun le yeti “sɛba ti ba mɛlesa ba tontɔɔ tuuma zuo” bii sɛba ti ba “ɛ̃regera” ba la bamam n doli Krista la zuo, me ta’an tara pupeelum. (Mt. 5:4, 10, 11) Ge la wan eŋɛ la wani ti to ta’an tara pupeelum bɔnkaŋa taaba poan?

³ Yezu yuun pa’alɛ tɔ ti sɛla n bo’ori to pupeelum daɣɛ la to bɔŋa zɛ’an n ani soŋa zuo ge la dela tomam n eeri to vo’osum poan yɛla ge vuta du’ura Naayinɛ. (Yam. 4:8) To wan eŋɛ la wani ta’an eŋɛ bala? To zaseŋɔ wa poan, to wan sɔsɛ la yɛla atã n wan soŋɛ tɔ ti to tara yelemɛŋɛrɛ pupeelum.

4. Bem yele n deŋɛ nɛŋa n wan ta’an basɛ ti to nyɛ yelemɛŋɛrɛ pupeelum? (Yooma 1:1-3)

⁴ YELE 1: La dela to dita vo’osum poan dia ta’an tara yelemɛŋɛrɛ pupeelum. Nɛresaaleba la dusi za’a nari ti ba dita dia mɛ ta’an vɔna. Ge nɛresaaleba ma’a n wan ta’an di vo’osum poan dia. La me kɔ’ɔn pakɛ to mɛ. Bala n sɔi ti Yezu yuun yeti: “Asaala ka vɔi la boom ma’a zuo ge a vɔi doose la yetɔɣum woo n ze’eti Yehowa nɔɔren” na. (Mt. 4:4) Bala la, la ka nari ti to vĩ daayinɛ kan di vo’osum poan dia n boi Naayinɛ yelesum la n de Baabule la poan. Yuumadaana la yuun yeti: ‘Pupeelum boi mɛ la nɛresɛka n nɔŋɛ Yehowa lɔɔ la ge me kaala ku bulika la yu’uŋɔ.’​—Kaalɛ Yooma 1:1-3.

5-6. (a) To wan ta’an zamesɛ la bem Baabule la poan? (b) Baabule la wan ta’an soŋɛ to la wani?

⁵ Baabule la poan, Yehowa doose la nɔŋerɛ sore poan bo to pa’alegɔ la wan eŋɛ se’em ti to ta’an tara pupeelum. To zamesɛ baŋɛ sɛla n sɔi ti a naam tɔ. To mi to wan eŋɛ se’em ta’an vurege lɛm en ge ti a ta’an di to be’em sugeri bo to. To me le zamesɛ baŋɛ eŋa n wan basɛ ti beere sa’am ana soŋa se’em. (Yer. 29:11) Yelemɛŋɛrɛ wa ti to zamesɛ Baabule poan la basɛ ti to puurɛ pee mɛ!

⁶ To mi ti Baabule la tari la ka’aŋɔ zo’e zo’e ti to wan ta’an dekɛ tum tuuma to vom poan. To san dɔla ka’aŋɔ la, to wan ta’an tara pupeelum. Daaŋɔ san paara hɔ ti ho giila kɔ’ɔsɛ, nyɛta nɛŋa kaala Yehowa yelesum la ge ti’isa taɣesa. Yezu yuun yeti: “Popeelom ton bɔna la sɛba n  kelehere Na’ayenɛ yelehom ge eta n bote ba eta se’em la!”​—Luke 11:28.

7. Ho wan eŋɛ la wani ta’an nyɛ nyuurɔ zo’e zo’e la hon nyɛti nɛŋa kaala Naayinɛ Yelesum la?

⁷ Ho san kaala Naayinɛ Yelesum la, ni ma’ɛ homea ta’an kaala ku soŋa soŋa. Yele kana taaba tabelɛ paɛ hɔ? To makɛ yeti nɛra n duɣɛ disɛka ti ho nɔŋɛ ge daanse’ere hon daa ba’ɛ kabela la zuo bii ho puti’irɛ n daa boi zɛ’an la zuo, ho daa kɔ’ɔn vɔla dia la mɛ ge ka ma’ɛ homea di dia la soŋa. Ge hon di dia la ba’asɛ la, ho bɔkɛ ti ho daa ba’ɛ di dia la kalam ge ho wan boti ni ti ho ta’an ma’ɛ ni homea wum dia la nyɛlum. Hon tabelɛ kaalɛ Baabule la kalam kalam ge ka ma’ɛ homea zamesɛ baŋɛ sɛla n boi bim la? Ni ma’ɛ homea kaala Naayinɛ Yelesum la pupeelum; ni ŋmaɛ hon kaali sɛla la foote ho puti’irɛ poan, ni makɛ bisɛ ti ho wuni sɛba n tɔɣeri la kɔ̃a mɛ ge ti’isɛ hon kaali sɛla la yele. Yele aŋa za’a wan basɛ ti ho tara pupeelum.

8. Sore kuni poan ti “sakerɛ la yɛm yameŋa la” nyaŋɛ tuna ba tuuma? (Bisɛ tiŋanɔɔrɛ yelesum la.)

⁸ Yezu yuun loe “sakerɛ la yɛm yameŋa la” ti ba bɔ’ɔra a nɛreba vo’osum poan dia sansɛka n nari poan. To me kɔ’ɔn dita tiɣera mɛ vo’osum poan. * (Mt. 24:45) Baabule n de gɔnseko n deŋɛ nɛŋa ti sakerɛ yameŋa la tara duɣera vo’osum poan dia bɔ’ɔra tɔ. (1 Tes. 2:13) Vo’osum poan dia wa soŋeri to mɛ ti to baŋera Baabule la n pa’ali Yehowa n ti’iseri se’em. Bala n sɔi ti to kaala Pigera Zontua la Awake! gɔnɔ, la yelese’a n boi jw.org poan la. To ni maasum mɛ ge nyaa keŋɛ bakwai poan, la bakwai la ki’ileŋɔ zamesegɔ. JW Broadcasting^® la me san bɔna, ho ta’an bisera ŋmarega woo yetɔɣum la. To san dita vo’osum poan dia soŋa, bala wan soŋɛ tɔ ti to ta’an eŋɛ yelese’ere n pa’asɛ buyi n wan bo to yelemɛŋɛrɛ pupeelum la.

9. Bem yele n pa’asɛ buyi n wan ta’an bo to yelemɛŋɛrɛ pupeelum?

⁹ YELE 2: To san bɔta ti to tara yelemɛŋɛrɛ pupeelum la dela to dɔla Yehowa pa’alegɔ. Yuumadaana la yuun yeti: “Pupeelum boi mɛ la se’em woo n zoti Yehowa, se’em n boi A sarɔtɔ la poan la.” (Ym. 128:1) Ton zoti Yehowa la pa’alɛ ti to bo’ori en la gilema paa ge kan eŋɛ sɛla n wan sa’am a suure. (Mag. 16:6) Bala la, to kɔ’ɔn dɔla la Naayinɛ n pa’alɛ to sɛla n de som la be’em ti la bɔna Baabule la poan la. (2 Ko. 7:1) To wan tara pupeelum to san ita yelese’a ti Yehowa nɔŋɛ ge zaɣesɛ yelese’a ti a yaɛ la.​—Ym. 37:27; 97:10; Arom 12:9.

10. Wuu Arom 12:2 n pa’alɛ se’em la, la nari ti to eŋɛ la bem?

¹⁰ Kaalɛ Arom 12:2. Nɛra ta’an mina ti Yehowa tari kpe’eŋo mɛ ti a pa’alɛ sɛla n de som la sɛla n de be’em ge la nari ti a sakɛ dɔla Naayinɛ pa’alegɔ la. Makerɛ, nɛra ta’an mina ti gɔmɛt tari sore ti a pa’alɛ nɛreba n nari ti ba zɔta se’em palɛ zuo. Ge daanse’ere a kan sakɛ dɔla ban pa’alɛ se’em la. Bala zuo la, a ta’an zɔta a loore la zɔɔra ba pa’alɛ se’em la. Ton ni ita se’em la ni pa’alɛ ti to sirum sakɛ ti Yehowa pa’alegɔ n ani soŋa ti to dɔla. (Mag. 12:28) La yuun ani David la bala se’ere n sɔi la a yuun tɔɣɛ Yehowa yele yeti: “Ho pon te’ele pa’ale mam sɔrɔɔ seko n dole yɛ’a vom poan la. Ho wan  perɛ mam mɛ la popeelom ho neŋan, ge dekɛ mam zin’ire ho zuɔ nu’o te n dita na’am n ka tare ba’ahegɔ.”​—Ym. 16:11.

11-12. (a) To suure san sa’am bii to giila san kɔ’ɔsɛ, bem n nari ti to bisɛ tomea soŋa? (b) Filipi 4:8 wan ta’an soŋɛ to la wani ti to ta’an ni loe to de’eŋo soŋa?

¹¹ To suure san sa’am bii to giila n kɔ’ɔsɛ, to ta’an ɛɛra to wan eŋɛ se’em ta’an yese tomea yele la poan. Bɔkerɛ boi bim ge la dela to bisɛ tomea soŋa ge kan eŋɛ sɛla ti Yehowa yaɛ.​—Ep. 5:10-12, 15-17.

¹² Tuuntuna Paul n yuun gulesɛ a gɔŋɔ bo Filipi Kristakɔma la, a yuun kpemese ba giila ti ba ti’isa yelese’a n de ‘tontɔɔ, ana kasi, dɛna nɔŋerɛ ge tara pɛ̃ka.’ (Kaalɛ Filipi 4:8.) Paul yuun ka guleseri de’eŋo yɛla ge eŋa n yuun gulesɛ sɛla la ta’an soŋɛ tɔ ti to loe to de’eŋo yɛla soŋa. Eŋa wana bisɛ: Kaalegɔ zɛsɛka woo ti ho nyɛ yelebire n de “yɛla” tee dekɛ yelebɛa ana eŋɛ bini n de wuu “yuuma,” “sinii,” “sɔlema gɔnɔ,” bii “vidiyo de’eŋo.” Ho san ita wana, la wan soŋɛ hɔ ti ho baŋɛ yelese’a n ani soŋa bɔ’ɔra Naayinɛ la yelese’a n ka ani soŋa. To wan bɔta ti to vom kɔ’ɔn makɛ ma’a la sɛla ti Yehowa pa’alɛ la. (Ym. 119:1-3) Bala nyaa wan basɛ ti to tara putɛkeeŋa n ani fa’a, ta’an eŋɛ yelese’ere n taɣelɛ la ge nyɛ yelemɛŋɛrɛ pupeelum.​—Tm. 23:1.

13. Bem yele n pa’asɛ butã n wan ta’an basɛ ti to tara yelemɛŋɛrɛ pupeelum? (Yon 4:23, 24)

¹³ YELE 3: La nari ti ho basɛ ti Yehowa pu’usegɔ deŋɛ nɛŋa ho vom poan. Yehowa n de to naaŋɔdaana la zuo, la nari ti to pu’usa en mɛ soŋa soŋa. (Lil. 4:11; 14:6, 7) Bala la, la nari ti to deŋɛ nɛŋa pu’usa en sose’ere poan ti a bɔta, pu’usa en “vo’osum la yelemɛŋɛrɛ poan.” (Kaalɛ Yon 4:23, 24.) To boti la Naayinɛ zilam vo’osum la pa’alɛ tɔ to wan pu’usa Naayinɛ se’em, la wan eŋɛ se’em ti to pu’usegɔ la makɛ la yelemɛŋɛrɛ la n boi a yelesum poan la. To san puɣum bɔna tinsɛka poan ti ba gu to tuuma la, to pu’usegɔ la n nari ti la deŋɛ nɛŋa. Nananawa, to mabiisi n gaŋɛ 100 ti ba paɣɛ ba la bamam n de Yehowa Sɛɛradoma la zuo. * Hali la bala za’a la, to puurɛ pee mɛ ti ba tiregɛ la ba paŋa za’a ta’an zusa, zamesa ge tɔɣera Naayinɛ la a Na’am la bɔ’ɔra. Nɛreba san ɛregera tɔ bii yaɛ tɔ, to mi ti Yehowa boi mɛ la tɔ ge me wan kã bo to.​—Yam. 1:12; 1 Pe. 4:14.

14. Bem n yuun paɛ to mabiburaa n de bunbilipaalega Tajikistan tiŋa poan ge beni n sɔi?

¹⁴ Zi’irego poan yɛla sirum basɛ ti la niɛ peelumi ti yɛla atã wa ti to sɔsɛ la sirum bo’ori yelemɛŋɛrɛ pupeelum mɛ la ka pakɛ la to bɔŋa zɛ’an n ani se’em. Geele bisɛ sɛla n yuun paɛ Jovidon Bobojonov n de yuun 19 ge ze’ele Tajikistan tiŋa. A yuun zaɣesɛ ti a kan tum soogɛa tuuma. October 4, 2019, ba yuun keŋɛ ta nyɔkɛ en mɛ a yire poan ge paɣɛ en ti la paɛ ŋmaresi ge ita en wuu a tuɣum dɛna la tuunfɛ’ɛsadaana la. Tisi zo’e zo’e yuun wum ŋmɛlema tuuma wa yele mɛ. Ba yuun yeti, ba ni ŋmɛ en mɛ ge bɔta ti a pɔ nɔɔrɛ sakɛ soogɛa tuuma la. Ba yuun nyaa gãkɛ en ti a tue mɛ ge tari en ta paɣɛ ti a tuna. Pooren ti tiŋa la zuodaana nyaa basɛ ti ba yese en. Mɛlesegɔ wa poan la, Jovidon kɔ’ɔn kelum tara birikinte la pupeelum mɛ. Wani wani?  Eŋa n kɔ’ɔn basɛ ti a vo’osum yele pakɛ en la n soŋɛ en.

15. Sore kani poan ti Jovidon yuun nyɛta vo’osum poan dia se’em ma’a ti a yuun bɔna sarega la?

¹⁵ Jovidon yuun diti vo’osum poan dia mɛ, eŋa n yuun boi sarega la. A yuun eŋɛ la wani ta’an ita bala hali la eŋa n yuun ka tari Baabule bii Baabule gɔnɔ la? Mabiisi yuun ni da la dia ta bo en ge ni gulesɛ dabeserɛ la poan gulesegɔ eŋɛ dia baagidoma la poan. Bala la, a yuun ta’an kaala Baabule la daarewoo mɛ ge ti’isa taɣesa. Ban yuun yu’ɛ en basɛ la, a yuun ka’am nɛresɛba ti gurebisɛ nan ka paɛ ba la yeti: “La yele pakɛ mɛ ti ho dekɛ ho fai bɔŋa la tum soŋa soŋa ta’an mina Yehowa soŋa doose la hon kaali a Yelesum la, la to gɔnɔ la.”

16. Jovidon yuun dekɛ a puti’irɛ kpa la bem poan?

¹⁶ To mabia la yuun doli la Yehowa pa’alegɔ. A yuun ka ti’iseri konkoma’asum be’ero yɛla bii a tara sarum be’ero ge a yuun tuɣum dekɛ a puti’irɛ kpa la Yehowa poan. Jovidon yuun ni bisɛ la Naayinɛ naaŋɔ lɔɣɔrɔ n som se’em ti la eŋɛ en pakerɛ. Daarewoo bulika, a ni isige mɛ wuna niisi n kaaseri ge yuuna. Yu’uŋɔ woo a ni bisa la ŋmarega la ŋmarebɛa.  A yeti: “Yehowa na’aŋɔ lɔɣɔrɔ wa ni basɛ ti mam puurɛ pee mɛ ge ti mam giila me kpeŋe.” To nini san tiɣɛ la Yehowa vo’osum poan la inganɛ bo’olum la, to puurɛ wan pee ge ti bala me kpemese to giila ti to ta’an ŋmibera.

17. Sore kani poan ti 1 Peter 1:6, 7 n yele sɛla la, makɛ la nɛra n tabelɛ tu’usɛ Jovidon yele la taaba?

¹⁷ Jovidon me yuun dekɛ Yehowa pu’usegɔ deŋɛ la nɛŋa. A yuun mi ti la dela ninmɔ’ɔrɛ ti a tara birikinte bɔ’ɔra Naayinɛ. Yezu yuun yeti: “La dela ho Naayinɛ la ti ho nara ti ho pu’usa, la me dela eŋa ma’a ti la nara ti ho tuna zilam tuuma bɔ’ɔra.” (Lu. 4:8) Soogɛpa la ba nɛŋadoma la yuun boti la Jovidon basɛ a pu’usegɔ la. Ge a yuun ni zusa Yehowa la daarewoo bulika la yu’uŋɔ ti a soŋɛ en ti a ta’an ze’a kankaŋi ge da eŋɛ kɔll a sakerɛ poan. Hali la ŋmɛlema tuuma la ti ba yuun dekɛ eŋɛ Jovidon la, a yuun ka makɛ eŋɛ kɔll. Bala zuo la, a puurɛ nyaa pee mɛ ti a tari la sɛla ti a yuun ka tara se’em ma’a ti ba yuun nyɔkɛ en, ŋmɛ en ge paɣɛ en la. La dela sakerɛ n basɛ ti a ze’ele kankaŋi gurebisɛ poan.​—Kaalɛ 1 Peter 1:6, 7.

18. To wan eŋɛ la wani ta’an kelum tara to pupeelum la?

¹⁸ Yehowa mi yelese’a n wan basɛ ti to tara yelemɛŋɛrɛ pupeelum. Ho san ita yɛla atã la n bo’ori yelemɛŋɛrɛ pupeelum la, ho wan tara pupeelum hali la biɣi biɣi saŋa poan. Ho me wan ta’an yeti: “Pupeelum boi mɛ la nɛresɛba Naayinɛ n de Yehowa la!”​—Ym. 144:15.