Yuun kaŋa la, tigere la yuun eŋɛ la teere ti Baabule Zamesegɔdoma la tara nɔyinɛ ba pu’usegɔ poan. Bakwai la poan The Watch Tower la tari la gulesegɔ n tɔɣeri pa’ala Baabule yɛla vuurɛ ti ba ni tara Zusera, tara Pɛɣera ge me Pa’ala Naayinɛ n eŋɛ sɛla bo ba. Baabule Zamesegɔdoma yuun le maalɛ la kalenda n pa’alɛ Baabule gulesegɔ ti ba wan tara ita zamesegɔ bakwai woo poan, la yuunɛ ti ba wan yuum ba san ita bamea Baabule zamesegɔ bii deodoma pu’usegɔ.

Zamesegɔ poan, Baabule Zamesegɔdoma la ni “tɔɣera” la yelese’a ti ba nyɛ na’am mɔɔlegɔ poan, pa’ala sɛla n sɔi ti ba pɛɣera Yehowa ge ni yuum yuunɛ bii ba zusɛ. Eva Barney n yuun de yuun 15 ge muse ko’om yuun 1923 la yeti: “Ho san bɔta ti ho tɔɣɛ pa’alɛ Naayinɛ n eŋɛ sɛla bo ho, la yuun dela ho isige saazuo ge nyaa yeti, ‘Mam boti n tɔɣɛ la Naayinɛ n eŋɛ yelese’a bo mam.’” Mabiisi basɛba yuun nɔŋɛ la ba tɔɣera pa’ala Naayinɛ n eŋɛ sɛla bo ba. Mabipɔka Barney tɔ̃kɛ yeti: “Mabia Godwin yuun dela bunkutɛ ge tara yɛla zo’e zo’e ti a tɔɣɛ pa’alɛ Naayinɛ n eŋɛ sɛla bo en. Ge a pɔɣa n yuun ta baŋɛ ti mina n biseri zamesegɔ la bisɛ ti a tɔɣeri zɔ’ɔra me la, a yuun ɛbegɛ a sira la mɛ ti a zi’ire.”

Ŋmarega woo poan, tansugere woo ni dekɛ la dabeserɛ n boi de to’ore Zusɛ, Pɛɣɛ Naayinɛ ge Pa’alɛ Naayinɛ n eŋɛ sɛla bo ba. The Watch Tower April 1, 1923 tɔɣɛ zamesegɔ wa yele yeti: “La nari ti ba dekɛ awa pusuka tɔɣɛ pa’alɛ yelese’a ti ba nyɛ na’am mɔɔlegɔ poan ge kpemese taaba giila. . . . To tari sakerɛ ti zamesegɔ wa wan kpemese mabiisi la giila ti ba ana du’a du’a la taaba.”

Charles Martin n de yuun pia la awɛi na’am mɔɔlegɔdaana ze’ele Vancouver, Canada tiŋa la yuun nyɛ nyuurɔ mɛ zo’e zo’e zamesegɔ wa poan. Pooren, a yuun yeti: “Zamesegɔ wa soŋɛ mam ti mam mina mam wan ta’an tɔɣɛ sɛla na’am mɔɔlegɔ poan. To poan ayima yuun ni tɔɣɛ pa’alɛ la yelese’a ti a nyɛ na’am mɔɔlegɔ poan. Wana wa yuun basɛ ti mam mina la mam wan tɔɣɛ sɛla la mam wan lebese se’em nɛra san soke mam sɛla.”

“Dabese’a ti ba tara kena na’am mɔɔlegɔ la” ni basɛ ti ba tara la nɔyinɛ. April 1, 1923  The Watch Tower la yeti: “Lan wan eŋɛ se’em ti to tara nɔyinɛ tuna la. . . , Atalatadaarɛ, May 1, 1923 dela na’am mɔɔlegɔ dabeserɛ. Bala pooren, ŋmarega woo Atalatadaarɛ, . . . nɛra woo nari ti a laɣum pa’asɛ la tuunɛ la poan.”

Hali la Baabule Zamesegɔdoma n de bunbilipaalesi yuun laɣum tuna tuunɛ wa mɛ. Hazel Burford n yuun de yuun pia la ayoobe ma’a sankaŋa la yuun yeti: “Bulletin la yuun tari la na’am mɔɔlegɔ sɔsega ti to ni kɔ’ɔn tiregɛ tɛ̃ra a. a Mam la mam sɔyaaba yuun ni kɔ’ɔn mu’ɛ la nini tuna na’am mɔɔlegɔ tuuma wa.” Ge la yuun eŋɛ Mabipɔka Burford la pakerɛ la mabia ayima n yuun bisɛ ti eŋa ka nari ti a laɣum po mɔɔla la. A yeti: “Mabia ayima n yuun de bunkutɛ yuun tɔi la laɣɛ laɣɛ ti mam da tɔɣɛ. Sankaŋa la, Baabule Zamesegɔdoma la basɛba yuun ka bɔkɛ ti bunbilipaalesi wan ta’an laɣum po pɛ̃ɣera to Naaŋɔdaana la na’am mɔɔlegɔ poan.” (Ym. 148:​12, 13, King James Version) Ge Mabipɔka Burford yuun kelum mɔɔla mɛ. Pooren, a yuun keŋɛ la Gilead Sukuu kilaasi n pa’asɛ buyi ge nyaa ta dɛna satiŋa na’am yetɔɣum yalegerɛdaana Panama tiŋa. Pooren mabiisi la yuun tee ba puti’irɛ mɛ la ban geele bunbilipaalesi se’em na’am mɔɔlegɔ tuuma la poan la.

Tinkãra laɣesegɔ me basɛ ti mabiisi la tari la nɔyinɛ. Laɣesegɔ wa zo’e zo’e yuun tari la na’am mɔɔlegɔ dabesa, wuu laɣeseko ti ba yuun eŋɛ Winnipeg, Canada tiŋa la. Makerɛ, ba yuun eŋɛ la laɣesegɔ Winnipeg, Canada tiŋa ti ba yuun loe March 31 ti sɛba woo n wa’an laɣesegɔ na la, keŋɛ ta mɔɔlɛ. To yuun ni nyɛta la nɛreba zo’e zo’e na’am mɔɔlegɔ poan ti ba kɛlesa. August a dabesa anuu poan, nɛreba tusa ayopɔi n yuun wa’an Winnipeg laɣesegɔ la na. Laɣesegɔ kuŋɔ ti to nyɛ nɛreba zo’e gaŋɛ Canada tiŋa poan sankaŋa.

Laɣesegɔ n boi de to’ore ti Yehowa Sɛɛradoma yuun eŋɛ yuun 1923 poan dela August 18-26 bɔna Los Angeles, California tiŋa poan. Bakwai fii ge ti laɣesegɔ la nyaa paɛ la,  lasebaarɛdoma n yuun mɔɔlɛ laɣesegɔ la yele ge ti Baabule Zamesegɔdoma la me yuun tɔ̃rɛ beeŋo gɔnɔ n gaŋɛ 500,000. Ba yuun dekɛ la banners labelɛ lɔa tara mɔɔla laɣesegɔ la yele.

Asibidaarɛ August 25, Mabia Rutherford yuun bo la yetɔɣum zuo n de “Piisi La Buusi.” A yuun tɔɣɛ pa’alɛ ti “piisi” la dela nɛresɛba n wan ta bɔna paradiisi tingɔŋɔ wa zuo. A me yuun le kaalɛ la laɣesegɔ yɛla ti la zuo dɛna “Ka’aŋɔ.” Ka’aŋɔ wa dela to zaɣesɛ pumpɔreŋɔ Kristakɔma ge yele putɛsonɛdoma ti ba zɔ yese “Babilon Kãtɛ La” poan. (Lil. 18:​2, 4) Pooren, Baabule Zamesegɔdoma wa n boi tinparɛ wa za’a poan la wan tɔ̃rɛ gɔnpiɣesi bo nɛreba tusa tusa.

Laɣesegɔ la ba’asegɔ daarɛ la, nɛreba n gaŋɛ tusa pitã n wum Mabia Rutherford yetɔɣum la zuo n de “Tisi Za’a Maasum Bamea Ye’a La Armagedon Ge Nɛreba Tustusa N Vɔi Nananawa Kan Le Malum Ki.” Baabule Zamesegɔdoma la n yuun ti’isɛ ti nɛreba zo’e zo’e wan wa’an laɣesegɔ la na la, ba yuun keŋɛ ta haɛ la Los Angeles Coliseum. Mabiisi la n yuun boti nɛra woo ta’an wum soŋa soŋa la, ba yuun dekɛ la maɣazim la n boi Stadium la poan la tum tuuma. Nɛreba zo’e zo’e yuun kelese laɣesegɔ la mɛ radio poan.

Yuun 1923 poan, ba yuun baŋɛ ti na’am yelesoma la paɛ Africa, Europe, India la South America tisi mɛ. A. J. Joseph la a pɔɣa n yuun boi India tiŋa la ba kɔma ba yoobe la, yuun soŋeri mɛ ti ba maala gɔnɔ Hindi, Tamil, Telugu la Urdu yetɔɣum poan.

Baabule Zamesegɔdoma Alfred Joseph la Leonard Blackman n yuun kɛ̃’ɛri Sierra Leone la, yuun gulesɛ bo la tigere zuo la n boi Brooklyn, New York la ɛɛra soŋerɛ. April 14 poan 1923, ba yuun nyɛ ban eeri sɛla la. Alfred yeti, “Daarɛ deyima Asibidaarɛ yu’uŋɔ ti nɛra yi mam fon poan. Mam wum la kunkokãtɛ n soke mam yeti, “Hon de se’em n gulesɛ bo Watch Tower Society ɛɛra na’am mɔɔlegɔdoma la?” Ti mam lebese yeti, “Ɛɛ”. Ti nɛra la yeti, “Aatɔ, ba tum la mam.” Ziti kɔ̃a la dela William R. Brown. Eŋa la a pɔɣa Antonia la ba poyɔɔsi bayi Louise la Lucy n ze’ele Caribbean na. La yuun ka le yue ti Mabia Brown la a deodoma paɛ na.

Alfred tɔ̃kɛ yeti: “Yiim beere bulika mam la Leonard n yuun iti bakwai poan Baabule  zamesegɔ ta gorege zuo nyɛ burawaɣelɛ n ze kuleŋa nɔɔren. A yuun dela Mabia Brown. A yuun kɔ’ɔn mɔ’ɛ la nini la yelemɛŋɛrɛ la ti a bɔta ti a bo yetɔɣum beere san yilegɛ.” La yuun ka paɛ ŋmarega ti Mabia Brown bo gɔnseto woo ti a yuun tari wa’ana la. La yuun ka yue ti a to’e gɔnɔ 5,000. La yuun ka le yue ti gɔnɔ la pilum ba’asɛ ti a ɛɛra gɔnɔ leyɛ’ɛsa. Ge Mabia Brown yuun ka kooseri gɔnɔ. Yuuma zo’e zo’e ti a yuun mɔ’ɛ nini pu’usa Yehowa la, a yuun san ni bɔ’ɔra yetɔɣum, a ni yeti, Baabule la yeti. Bala n sɔi ti ba yuun siɣɛ a yu’urɛ ti Bible Brown.

Germany tiŋa poan, mabiisi la yuun kɔ’ɛ ba puti’irɛ ti ba yese Barmen tigere yile la poan kun yuun pɔ’ɛ la zuo. Leyɛ’ɛsa, ba yuun wum ti France lengima n yeti ba zabɛ la tiŋa la. Baabule Zamesegɔdoma la yuun nyɛ la deo soŋɔ n boi Magdeburg ti ba wan ta’an maala gɔnɔ bini. June 19 poan, mabiisi la yuun pakɛ gɔnɔ maalegɔ maɣazim la lɔɣɔrɔ toseto keŋɛ la Betel paalega la n boi Magdeburg la. Daanse’ere daarɛ ti ba yele tigere zuo la ti ba yese ba’asɛ mɛ la, lasebaarɛ gɔnɔ mɔɔlɛ ti France zabɛ to’e Barmen tiŋa la. Mabiisi la pu’usɛ Yehowa la eŋa n te’ele ba ge soŋɛ ba la.

Mabia George Young yuun keŋɛ la Brazil ta mɔɔlɛ na’am yetɔɣesomɔ la, laɣum soŋɛ ti ba mɛ tigere yile ge me leregera The Watch Tower Portuguese yetɔɣum poan. Ŋmaresi fii poan, a yuun bo gɔnɔ n gaŋɛ 7,000. Sarah Ferguson puurɛ yuun pee la Mabia Young n yuun wa’ana bisɛ ba la. Kɔ’ɔn pɔsɛ yuun 1899 ti a kaala The Watch Tower la ge a yuun ka kã amea muse ko’om. Ŋmaresi fii pooren, Mabipɔka Ferguson la a kɔma banaasi yuun nyaa nyɛ la yɔ’ɔ muse ko’om.

Yuunɛ la ba’asegɔ bɔba ti The Watch Tower December 15, 1923 tɔɣɛ pa’alɛ Baabule Zamesegɔdoma la n eŋɛ teere se’em ba zamesegɔ poan, na’am mɔɔlegɔ poan la laɣesegɔ poan. “Nɔkpe’ene kai ti, bala yuun basɛ ti mabiisi la tara la sakerɛ n kpe’em . . . Basɛ ya ti to maasum ya ge kɔ’ɔn mu’ɛ nini tuna Naayinɛ tuuma la, la pupeelum ge gura yuun 1924.”

Yuun 1924 wan dɛna la pupeelum bɔ’ɔra Baabule Zamesegɔdoma la. Mabiisi la n boi Betel la dekɛ la ŋmaresi zo’e zo’e tuna zɛ’an n boi Staten Island n lɛm tigere zuo la n boi Brooklyn la. Ba yuun mɛ zɛ’an wa ba’asɛ la yuun 1924. Bala n yuun soŋɛ mabiisi la ti ba tara nɔyinɛ mɔɔla yetɔɣesomɔ la ti la yiregera zɛ’an woo.