1. Naayinɛ yamesi yuun nyɛ paŋa la wani diimi sa?

 BAABULE la pa’alɛ ti sɛba n tari sakerɛ la kpe’em mɛ. Ge se’em n yuun tari paŋa gana za’a ba poan la yuun ka tari paŋa saŋa woo. Saŋa ase’a, Naba David ni ti’isɛ ti eŋa ‘kpe’em wuu zoore la’ ge ti saŋa ase’a me ‘dabeem’ yuun ni tara en. (Ym. 30:7) Naayinɛ yuun dekɛ la a vo’osum la soŋɛ Samson ti a tara paŋa n ka tari makerɛ. Ge Samson yuun mi ti Yehowa san ka bo en paŋa, ‘tɔregɔ wan kɛ̃ en ti a ana wuu nɛreba n ani se’em la.’ (Ken. 14:​5, 6; 16:17) Yehowa n yuun soŋɛ buraasi wa la n sɔi ti ba yuun tara paŋa.

2. Beni n sɔi ti tuuntuna Paul yuun yeti, tɔregɔ san ni paɛ eŋa, eŋa ni nyɛ la paŋa? (2 Ko. 12:​9, 10)

² Tuuntuna Paul yuun baŋɛ ti eŋa me eeri la Yehowa bo en paŋa. (Kaalɛ 2 Korint 12:​9, 10.) Wuu to zo’e zo’e la, bã’asi n yuun daani Paul. (Ga. 4:​13, 14) Saŋa ase’a, la yuun ni kpe’em bo en mɛ ti a tum sɛla n ani soŋa. (Arom 7:​18, 19) Saŋa ase’a me, dabeem n ni tari en ti a ka mina sɛla n wan paɛ en. (2 Ko. 1:​8, 9) Ge tɔregɔ n yuun paɛ Paul la, a yuun le nyɛ la paŋa. Wani wani? Yehowa n yuun bo Paul paŋa ti a kpe’em.

3. Soke aŋa bɛɛ ti to wan nyɛ ba lebesego zaseŋɔ wa poan?

³ Yehowa yeti, a wan basɛ ti tomam me tara paŋa. (1 Pe. 5:10) Ge to san ka tiregɛ eŋɛ sɛla to kan nyɛ paŋa wa. Makerɛ, loore engine n ni basɛ ti de ta’an zɔta ge la dela dɔleba la isige loore la ti de ta’an keŋɛ eŋa n boti zɛ’an. Bala mea nɔɔ, Yehowa kɔ’ɔn maasum mɛ ti a basɛ ti to tara  paŋa. Ge la nari ti to eŋɛ sɛla ta’an nyɛ nyuurɔ de poan. Yehowa eŋɛ la bem maaseŋɔ ti a basɛ ti to ta’an tara paŋa? La nari ti to me eŋɛ la bem ta’an tara paŋa la? To wan nyɛ soke ana wa lebesego to san geele Yehowa n yuun soŋɛ Baabule poan nɛreba batã n de nɔdɛ’ɛsa Yona, Yezu ma Mary la tuuntuna Paul se’em. To me wan le bisɛ Yehowa n doli sore ana mea nɔɔ kelum kpɛmesa a yamesi giila se’em zina beere wa.

4. To wan eŋɛ la wani ti Yehowa basɛ ti to tara paŋa?

⁴ Sore deyima poan ti to wan ta’an nyɛ paŋa Yehowa zɛ’an dela zusega. Yehowa ni lebese la to zusega ti to nyɛ ‘pansɛka n gaŋɛ asaala paŋa.’ (2 Ko. 4:7) To wan le nyɛ paŋa to san kaala a Yelesum la ge ti’isa taɣesa. (Ym. 86:11) Yehowa yelesum n boi Baabule la poan la ‘tari la paŋa.’ (Heb. 4:12) To san zusa Yehowa ge kaala a Yelesum la, a wan bo to paŋa ti to ta’an ŋmibe, tara pupeelum bii tum tuunkpe’eŋo. Tɛ̃ra Yehowa n yuun basɛ ti nɔdɛ’ɛsa Yona tara paŋa se’em.

5. Beni n sɔi ti nɔdɛ’ɛsa Yona yuun ɛɛra sukpe’ene?

⁵ Nɔdɛ’ɛsa Yona yuun nari ti a tara la sukpe’ene. Dabeem n yuun tari Yona ti a keŋɛ zɛ’an ti Yehowa tum en la. Bala la, a yuun dekɛ la ɔɔreŋɔ tee yɛ’ɛsa zɛ’an. Bala zuo kusebekãtɛ n yuun ta lɔbera la, la yuun gee fii ti eŋa la nɛresɛba n yuun boi ɔɔreŋɔ la poan la ki. Ban yuun lobe en basɛ ko’om la poan la, eŋa n ta pikɛ la ti a boi la zimkãtɛ puuren. Hon ti’isɛ ti la yuun ani Yona la wani? A yuun ti’isɛ ti a yeti a ki mɛ? A yuun ti’isɛ ti Yehowa zaɣesɛ en mɛ? Wana wa za’a ta’an basɛ ni ti Yona ana bura.

6. Wuu Yona 2:​1, 2, 7 n pa’alɛ se’em la, bem n yuun basɛ ti Yona tara paŋa eŋa n yuun boi zimkãtɛ la puuren la?

⁶ Yona yuun eŋɛ la wani ta’an tara paŋa eŋa n yuun boi ziho la puuren la? A yuun zusɛ la Yehowa. (Kaalɛ Yona 2:​1, 2, 7.) La boi bim ti a yuun ka nam Yehowa ge a yuun tari suure lua ti eŋa n sirege amea tee la, Yehowa wan kelese en. Yona me yuun le ti’isɛ taɣesɛ Baabule gulesegɔ la mɛ. Sɛla n basɛ ti to baŋɛ bala dela, a zusega la n boi Yona a zuo 2 la, a yuun dekɛ la yelebɛa se’a n boi Yooma gɔŋɔ la poan nɔɔ tum tuuma. (Makerɛ, dekɛ Yona 2:​2, 5 makɛ Yooma 69:1; 86:7.) La niɛ peelumi ti Yona yuun mi Yooma gɔŋɔ la mɛ soŋa. A bɔŋa la poan ti a yuun ti’isɛ taɣesa la, a yuun mi ti Yehowa wan soŋɛ en. Pooren ziho la yuun ukɛ Yona basɛ la doone ti a nyaa maasum ti a tum tuunse’ere ti Yehowa dekɛ bo en la.—Yna 2:10–3:4.

7-8. Mabia ayima n boi Taiwan iti la wani ta’an ŋmibera?

⁷ Yeledaaŋɔ zo’e zo’e san paara tɔ Yona yele la wan soŋɛ tɔ. Makerɛ, mabia ayima yu’urɛ n de Zhiming b n boi Taiwan ge bɛ̃’ɛra paa. Leyɛ’ɛsa la nari ti a ŋmibe la a yidoma n yaɛ en la a sakerɛ la zuo. Zusega la zamesegɔ n ni basɛ ti a tara paŋa. A yeti, “saŋa ase’a yele san paɛ mam, mam ni ba’ɛ ti’isa mɛ, ka nyɛta nɛŋa ita n mea zamesegɔ.” Ge a ka basɛ ti a giila kɔ’ɔsɛ. A yeti, “Yia la, mam ni zusɛ la Yehowa. Ge nyaa ni dekɛ n earphones gba kɛlesa tigere la yuuma. Saŋa ase’a mam ni yuuna la fii fii ti la ta ana mam mama ge ti n nyaa pɔsɛ zamesa.”

⁸ Zhiming n iti amea zamesegɔ la soŋɛ  en ti a ta’an ŋmibera bɔŋa n kpe’em poan. Makerɛ, ban yuun eŋɛ en ɔperesa la ba’asɛ la, nɛɛsi la yuun yele en yeti, a ziim la n pɔ’ɛ la zuo la wan nara ti ba kɛ̃’ɛsɛ en ziim. Ge ti ba nyaa eŋɛ en ɔperesa la, Zhiming yuun kaalɛ la mabipɔka ayima zi’irego poan yele ti ba yuun eŋɛ en ɔperesa kaŋa mea taaba nɔɔ. Eŋa me ziim yuun pɔ’ɛ mɛ hali gaŋɛ Zhiming denɛ la ge a yuun eŋɛ ɔperesa la ge ka to’e ziim. Yele wa yuun kpemese la Zhiming giila ti a tara sakerɛ.

9. Tɔregɔ san paɛ hɔ ho wan eŋɛ la bem?(Bisɛ fɔɔra la.)

⁹ Yeledaaŋɔ san paɛ hɔ, la ni ani hɔ la bura ti ho ka ta’an zusa Yehowa? bii la ni kpe’em bo ho mɛ ti ho zamesa? Tɛ̃ra ti Yehowa bɔkɛ la ani ho se’em la mɛ soŋa soŋa. Bala tara suure lua ti ho san puɣum tɔɣɛ yɛla fii wa ho zusega poan, Yehowa wan kelese. (Ep. 3:20) Ho san bɛ̃’ɛra bii tɔregɔ n paɛ hɔ ti ho ka nyaŋɛ kaalɛ bii zamesɛ Baabule la, ho ta’an kelese kɔ̃a Baabule kaalegɔ la bii Baabule gɔnɔ toseto. Ho me ta’an kelese to yuuma la bii ho keŋɛ jw.org ta bisɛ vidiyodoma. To san zusɛ Yehowa ge ɛɛra to zusega la lebesego Baabule la poan, Yehowa wan basɛ ti to tara paŋa.

10. To mabiisi kpemeseri to giila la wani?

¹⁰ Yehowa wan ta’an basɛ ti mabiisi soŋɛ tɔ ti to tara paŋa. Ba wan ta’an buɣelɛ to suure paa yeledaaŋɔ poan bii ba soŋɛ tɔ ti to ta’an tum tuunɛ n kpe’em. (Kol. 4:​10, 11) To eeri zɔdoma mɛ yele yele wuu ‘wuŋerɛ poan.’ (Mag. 17:17) Tɔregɔ san paɛ tɔ to mabiisi wan ta’an soŋɛ to inganɛ poan, buɣelɛ to suure ge me kpemese to giila ti to kelum pu’usa Yehowa. Basɛ ti to geele ya nɛreba n yuun soŋɛ Yezu ma Mary ti a nyɛ paŋa se’em.

11. Beni n sɔi ti Mary yuun nara ti a tara sukpe’ene?

¹¹ Mary yuun nari ti a tara la sukpe’ene ta’an tum Yehowa n boti se’em. Yeen ti’isɛ bisɛ lan yuun ani Mary se’em, maleka  Gabriel n yuun yele en yeti a kan gã’arɛ la buraa ge nyɔkɛ puurɛ la. La boi bim ti a yuun ka dɔɣɛ kurum ge la yuun nari ti a bisɛ bia wa n wan ta dɛna Mɛzaaya beere sa’am la. A yuun ka tabelɛ gã’arɛ la buraa ge a yuun nari ti a yele Yosef ti eŋa nyɔkɛ la puurɛ. Bisɛ bala n yuun wan kpe’em bo en se’em?—Lu. 1:​26-33.

12. Wuu Luke 1:​39-45 n pa’alɛ se’em la, Mary yuun nyɛ sukpe’ene la wani?

¹² Mary yuun nari ti a tara sukpe’ene la wani ta’an tum tuunkpe’eŋo wa? A yuun basɛ ti nɛreba n soŋɛ en. Makerɛ, a yuun soke Gabriel ti a soŋɛ en ti a baŋɛ eŋa n wan eŋɛ se’em ta’an tum tuunɛ la. (Lu. 1:34) Bilam pooren ti a yuun keŋɛ Yuda tiŋa ‘n boi zoore bɔba’ ti a ta bisɛ a suɔ Elizabet. A kenɛ la yuun tari la nyuurɔ. Elizabet yuun pɛ̃ɣɛ Mary mɛ. Ti Yehowa me doose a poan tɔɣɛ giilekpeŋere yɛla ti Mary bia wa wan ta tum. (Kaalɛ Luke 1:​39-45.) Mary yuun yeti Yehowa ‘dekɛ a nu’usi la tuna la tuun nyalema.’ (Lu. 1:​46-51) Gabriel la Elizabeth n yuun soŋɛ Mary ti a tara sukpe’ene.

13. Mabipɔka ayima n boi Bolivia n yuun ɛ soŋerɛ mabiisi zɛ’an la, ba yuun soŋɛ en la wani?

¹³ Wuu Mary la, mabiisi wan ta’an soŋɛ hɔ ti ho tara sukpe’ene. Mabipɔka Dasuri n ze’ele Bolivia, yuun nari ti a tari la sukpe’ene. Dasuri sɔ n yuun ta bɛ̃’ɛra gã asibitin la, a yuun kɔ’ɔn bɔna la a zɛ’an bisera en. (1 Tim. 5:4) La yuun daɣɛ naana. A yeti, “Saŋa zo’e zo’e, mam giila n ni kɔ’ɔsɛ.” Pɔsega la a yuun ka ɛ soŋeri. A yeti, “Mam yuun ka boti n daam mabiisi la. Mam yuun ti’isɛ ti, ‘la dela Yehowa n wan soŋɛ mam’. Ge pooren, mam yuun baŋɛ ti, mam n ka basɛ ti mabiisi la soŋera mam la zuo, mam ma’a n tiregeri ita sɛla woo.” (Mag. 18:1) Dasuri yuun nyaa gulesɛ la gɔŋɔ bo a zɔdoma basɛba tɔɣɛ pa’alɛ a bɔŋa la n ani se’em. A yeti, “Mam kan ta’an tɔɣɛ pa’alɛ mabiisi la n yuun kpemese mam giila se’em. Ba yuun tari la dia wa’ana bo mam asibitin ge kaalɛ Baabule gulesegɔ n buɣeli suure bo mam. Bisɛ lan ani soŋa se’em ti to mina ti to ka boi to ma’a. To za’a laɣum pa’asɛ la Yehowa yizuo la poan. To mabiisi la me boti la ba soŋera tɔ, buɣela to suure daaŋɔ san paɛ tɔ ge kpemese to giila ti to kelum pu’usa Yehowa.”

14. Beni n sɔi ti la nara ti to basɛ ti keendoma la soŋɛ tɔ?

¹⁴ Yehowa le dɔla la keendoma la poan kpɛmesa to giila. Ba dela bo’olum ti Yehowa dekɛ bo to, ti ba kpɛmesa to giila ge buɣela to suure. (Isa. 32:​1, 2) Bala la, ho san tara yeledaaŋɔ, yele keendoma la ge da gu’una ti ho tara ba ka’aŋɔ la tuna tuuma. Yehowa wan ta’an doose ba poan basɛ ti ho tara paŋa.

15. Kristakɔma za’a tari la bem beere sa’am puti’irɛ?

¹⁵ Baabule pu’ulumbiŋ’a yɛla wan basɛ ti ho tara beere sa’am puti’irɛ la paŋa ta’an kɔ’ɔn pu’usa Yehowa. (Arom 4:​3, 18-20) Kristakɔma basɛba tari puti’irɛ ti ba wan ta bɔna saazuo vɔna daarewoo ge ti basɛba me tara puti’irɛ ti ba wan ta bɔna paradiisi tingɔŋɔ wa zuo vɔna daarewoo. To beere sa’am puti’irɛ la n soŋeri tɔ ti to ŋmibera yeledaaŋɔ poan, mɔɔla yelesoma la ge me tuna tansugere tuuma. (1 Tes. 1:3) Beere sa’am putɛ-ana n yuun kpemese tuuntuna Paul giila.

16. Beni n sɔi ti Paul yuun nara ti a tara sukpe’ene?

 ¹⁶ Paul yuun nari ti a tari la sukpe’ene. Eŋa n yuun gulese gɔŋɔ ta bo Korintdoma la, a yuun dekɛ amea makɛ la yɔɣɔrɔ laa. ‘Daaŋɔ’ la ‘yaarɛ’ n yuun paɛ en ti a tara ‘puti’ira ayi ayi’. Ba yuun ‘ŋmɛ’ en mɛ ti a vom bɔna dɛŋa poan. (2 Ko. 4:​8-10) Paul satiŋa na’am mɔɔlegɔ kaarɛ tuuma sugumnɔɔrɛ butã poan ti a yuun gulesɛ yele wa. Eŋa n yuun gulesɛ yele wa ba’asɛ la, yeledaaŋɔ zo’e zo’e n yuun le paɛ en. Nɛreba yuun ŋmɛ en, nyɔkɛ en paɣɛ ge ti a yuun gee fii la a ki ko’om poan.

17. Wuu 2 Ko. 4:​16-18 n pa’alɛ se’em la, bem n yuun basɛ ti Paul nyɛ sukpe’ene ta’an ŋmibe?

¹⁷ Paul n yuun ti’iseri a beere sa’am puti’irɛ yɛla la zuo, a yuun nyɛ sukpe’ene mɛ ŋmibe. (Kaalɛ 2 Korint 4:​16-18.) A yuun yele Korintdoma la ti, hali eŋa san puɣum ‘bãlɛ’, a kan basɛ ti a giila kɔ’ɔsɛ. Paul yuun kɔ’ɔn ti’isɛ la a beere sa’am puti’irɛ la yele. Eŋa n yuun tari puti’irɛ ti a wan ta bɔna saazuo la, yuun dela ‘na’asegɔ paa’ gana namesegɔ seko woo n yuun paari en la. Paul yuun ti’iseri la a beere sa’am puti’irɛ wa yele. Bala yuun basɛ ti a inya la ‘kpeŋera mɛ dabeserɛ woo.’

18. Beere sa’am puti’irɛ la kpemese Tihomir la a deodoma giila la wani?

¹⁸ Mabia Tihomir n ze’ele Bulgaria basɛ ti beere sa’am puti’irɛ la n kpemesa a giila paa. Yuuma fii n tole ti a yibega Zdravko nyɛ accident ki. Wana wa zuo, Tihomir suure yuun sa’am mɛ paa. Eŋa la a deodoma n ti’iseri kum isigere yele la n basɛ ti ba ta’an ŋmibera. A yeti: “To ni sɔsɛ la ton wan ta seke Zdravko zɛ’an, disɛka ti to wan duɣɛ bo en, nɛresɛba ti to wan beem ba ti to laɣum di, la ton wan yele en ba’asegɔ dabesa la yɛla se’em.” Tihomir yeti, eŋa la a deodoma n ti’iseri beere sa’am puti’irɛ la yele la n soŋeri ba ti ba ta’an ŋmibera ge kɔ’ɔn gura se’em ma’a ti Yehowa wan isige a yibega la.

19. Ho wan ta’an eŋɛ la bem ti ho beere sa’am puti’irɛ la ana kankaŋi? (Bisɛ foote la.)

 ¹⁹ Ho wan eŋɛ la wani basɛ ti ho beere sa’am puti’irɛ la ana kankaŋi? Makerɛ, ho san tara puti’irɛ ti ho wan ta vɔna tinparɛ wa zuo, kaala ge ti’isa taɣesa Baabule la n tɔɣɛ Paradiisi n wan ta ana se’em la yele. (Isa. 25:8; 32:​16-18) Ti’isɛ bisɛ vom n wan ta ana se’em tinpaalega la poan. Bisɛ nyɛ homea bim. Ho nyɛ la bani? Ho wuni la bem? La ana hon la wani? Ho san bɔta ti ho ti’isɛ soŋa soŋa baŋɛ Paradiisi n wan ta ana se’em, bisɛ fɔɔra la n boi to gɔnɔ poan la bii ho bisɛ vidiyo yuuma n de wuu The New World to Come, Just Around the Corner, bii Imagine the Time. To san ti’isa to beere sa’am yele saŋa woo, to yeledaaŋɔ la ‘kan yue’ ge ana to faɣa faɣa. (2 Ko. 4:17) Yehowa n bo ho beere sa’am puti’irɛ la wan soŋɛ hɔ ti ho ta’an ŋmibe.

20. Hali tɔregɔ san paɛ tɔ to wan eŋɛ la wani ta’an le nyɛ paŋa?

²⁰ Hali tɔregɔ san paɛ tɔ, ‘Naayinɛ wan basɛ ti to tara paŋa.’ (Ym. 108:13) Yehowa puɣum bo ho la yelese’a n wan basɛ ti ho tara paŋa. Bala la, ho san bɔta ti ho tum tuunkpe’eŋo, ta’an ŋmibe bii ho ta’an tara pupeelum, kɔ’ɔn zusɛ Yehowa ge ita homea zamesegɔ ti la soŋɛ hɔ. Basɛ ti mabiisi la kpemese ho giila, nyɛ saŋa ti’isa ho beere sa’am puti’irɛ la yele. Ho san ita bala, ‘pansɛka n ze’ele Naayinɛ zɛ’an na la, wan basɛ ti ho kpe’em ti ho ta’an di’isa suure ŋmibera yele woo poan la pupeelum.’—Kol. 1:11.