Sokese’a Ti Sɛba N Kaali La Sɔkera
Israeldoma la n yuun boi pɔɣentia la poan la, ba yuun tari dia pa’asɛ mana la kɔɔresi poan mɛ?
Israeldoma la yuun kɔ’ɔn dita la mana yuun 40 ti ba yuun bɔna pɔɣentia la poan la. (Yɛh. 16:35) Sugumnɔɔrɛ buyi ti Yehowa yuun bo ba kɔɔresi. (Yɛh. 16:12, 13; Kan. 11:31) Ge Israeldoma la yuun kelum tara la dia basɛba ti ba wan ta’an di.
Makerɛ, saŋa ase’a Yehowa yuun ni tara a nɛreba la keŋɛ la ‘zɛ’an ti ba wan ta’an zi’ire vo’ose.’ Ba yuun ta’an ni nyɛ dia bii ko’om bilam mɛ. (Kan. 10:33) Zɛ’ɛsi wa ayima dela Elim bulesi la, ‘zɛsɛka ti kulesi siyi la Dãbino tiisi pisiyopɔi bɔna la.’ (Yɛh. 15:27) Gɔŋɔ la n de Plants of the Bible la yeti Dãbino tia dela ‘tisɛka ti ba dita zo’e zo’e pɔɣentia poan, . . . ti ba me tara ita kaam ge le mɛta ba yɛa.’
Israeldoma la yuun ni ta’an ze’ele bulesi se’a ti zina beere wa ti ba yi’ira ti Feiran n laɣum pa’asɛ Feiran Bũ’ɔ la poan. a Gɔŋɔ la n de Discovering the World of the Bible la yeti, bũ’ɔ wa ‘zaaɛ paɛ la mɛɛla 81 [130 km], ana soŋa paa ti nɛreba mina bim Sinai tiŋa.’ La tɔ̃kɛ yeti: ‘Nɛra san keŋɛ mɛɛla 28 ze’ele bũ’ɔ la poan, a wan ta paɛ la Feiran Bulesi la n boi zɛ’an la. Bulesi wa boi la kunkune zuo n wɔɣɛ paɛ santira 2,000 [610 m] ge yalegɛ paɛ mɛɛla 3 [4.8 km]. Dãbino tiisi n kɔ’ɔn bɔna bim ti la ana soŋa la zuo, ba dekɛ zɛ’an wa makɛ la Eden gaadin la. Yuuma zo’e zo’e n wana ti nɛreba kena zɛ’an wa poan Dãbino tiisi la zuo.’
Dãbino tiisi n boi Feiran bulesi la zɛ’an
Israeldoma n yuun ta yɛsera Egypt tiŋa la, ba yuun tari la boom, kaam, zom la laasi ti ba wan tara duɣera. Yelemɛŋɛrɛ la dela, lɔɣetuna wa yuun kan yue ge ba’asɛ. Ba me yuun tari la ‘dusi zo’e zo’e.’ (Yɛh. 12:34-39) Ge pɔɣentia la n yuun tuulegɛ se’em la yuun ta’an basɛ ti dusi basɛba ki. Dusi la basɛba yuun dela dia bɔ’ɔra Israeldoma la. Ba yuun ta’an kaabɛ basɛba me bo baɣa. b (Tm. 7:39-43) La bala za’a, Israeldoma la yuun kelum tara dusi zo’e mɛ. To baŋɛ wana la ban yuun ka tari sakerɛ, ti Yehowa yele ba yeti: ‘Ya kɔma wan yee kalam dɛna dunkeenma yuuma 40.’ (Kan. 14:33) Ba dusi wa yuun basɛ ti ba nyɛta la iilum la nɛnɔ ɔbera. Ge bala yuun ka seke ba sɛla n sɔi la ba za’a yuun dela tusetusa atã yuuma 40 la poan. c
Bɛsa ti dusi la yuun nyɛta dia la ko’om nyuura? d Sankaŋa la, saa yuun niiri zɔ’ɔra mɛ ge ti tiisi zo’e zo’e bɔna pɔɣentia la poan. Insight on the Scriptures, Volume 1 la yeti yuuma 3,500 n tole la, “ko’om yuun boi zɛsɛka ti Israeldoma yuun bɔna la gana zina beere wa. To mi wana mɛ soŋa soŋa se’ere n sɔi la zɛse’esi n kĩisɛ dɛna bũ’ɔrɔ la yuun dela kolaasi.” La bala za’a la, pɔɣentia la poan yuun tari la dabeem. (Tɛɛ. 8:14-16) Yehowa yuun san ka doose ni yelekirega sore poan bo ba ko’om, Israeldoma wa la ba dusi la za’a yuun wan ki ni.—Yɛh. 15:22-25; 17:1-6; Kan. 20:2, 11.
Moses yuun yele Israeldoma la ti Yehowa dekɛ la mana la diisi ba ‘ti a pa’alɛ ba ti asaala ka vɔi la boom ma’a zuo ge a vɔi mɛ la yelese’ere woo n ze’ele Yehowa nɔɔren na.’—Tɛɛ. 8:3.
a Bisɛ May 1, 1992, The Watchtower, gɔn. 24-25.
b Baabule la tɔɣeri la saŋa sugumnɔɔrɛ buyi ti Israeldoma la yuun dekɛ dusi kaabɛ bo Yehowa pɔɣentia la poan. Yia saŋa la yuun dela sansɛka ti ba yuun yeti ba loe malemadoma la; yi’i saŋa la yuun dela Azootole la. Israeldoma la yuun eŋɛ yele aŋa wa la 1512 G.Y.B. poan, yuuma ayi pooren ti ba yuun yese Egypt tiŋa la.—Mal. 8:14–9:24; Kan. 9:1-5.
c Israeldoma la n yuun boi pɔɣentia la poan ta paɛ yuuma 40 la ba’asegɔ la, ba yuun nyɛ la dusi zo’e zo’e zaberɛ poan. (Kan. 31:32-34) Hali la bala za’a, ba yuun kelum dita la mana ta paɛ se’em ma’a ti ba kɛ̃ Pu’ulumbiŋere Tiŋa la poan.—Yos. 5:10-12.
d Sɛla ka boi n pa’alɛ ti dusi la me yuun diti la mana sɛla n sɔi la Yehowa n yuun pa’alɛ lan nari ti nɛra dekɛ se’em ta di ge a yuun ka tɔɣɛ dusi la yele.—Yɛh. 16:15, 16.
