ZASEŊƆ 43
YUUNƐ 90 Encourage One Another (Kpɛmesa Ya Taaba Giila)
Hon Wan Eŋɛ Se’em Kan Tara Puti’ira Ayi Ayi
“Ya han wom yelese’ere woo, magahɛ ya de behɛ dene ane se’em.”—1 TES. 5:21.
YELEKPINE
Ton wan eŋɛ se’em ta’an basɛ puti’ira ayi ayi ge kelum pu’usa Yehowa.
1-2. (a) Yehowa yamesi ni ta’an soke bamea la bem sokere? (b) To wan sɔsɛ la bem zaseŋɔ wa poan?
SAŊA ase’a to ta’an ni tara puti’ira ayi ayi. a Makerɛ, bunbilipaalega n pu’useri Yehowa ta’an tara puti’ira ayi ayi ti’isa ti Yehowa ka fabeli a yele. Bala ta’an basɛ ti a kan bɔta ti a muse ko’om. Bii mabia n yuun de bunbilipaalega ge loe ti a dekɛ a saŋa zo’e zo’e tum bo Yehowa gana eŋa n wan bɔ ligeri. A nyaa dela bunkutɛ ge walesa bisera a deodoma. Bala ta’an tee a puti’irɛ ti a nyaa tara puti’ira ayi ayi yeti, mam yuun loe la loesonɛ? Bii mabipɔka n kuregɛ ge ka le tara paŋa giila ta’an kɔ’ɔsɛ ti a ti’isa ti eŋa kan le ta’an tum eŋa n yuun tuni yelese’a la. Hon tabelɛ soke homea soke ana wa: ‘Yehowa nɔɔ mi ti mam boi? Mam n kuuri n mea se’em tuna bɔ’ɔra Yehowa la, nyuurɔ bɛɛ? Mam n ze wa, n wan le ta’an eŋɛ la bem bo Yehowa?’
2 To san ka tiregɛ nyɛ soke ana wa lebesego, la ta’an basɛ ti to ka le tara sakerɛ Yehowa poan bii to kɔ’ɔn basɛ Yehowa pu’usegɔ. Zaseŋɔ wa poan, to wan bisɛ Baabule naresum yɛla n wan soŋɛ tɔ ti to kan tara puti’irɛ ayi ayi n de wuu (1) Yehowa ka fabeli to yele, (2) ton loe se’em la ka ani soŋa, bii (3) to ka le tara tuunɛ Yehowa zɛ’an.
BEM N WAN SOŊƐ TƆ TI TO KAN TARA PUTI’IRA AYI AYI?
3. To wan eŋɛ la wani kan tara puti’ira ayi ayi?
3 Sɛla n wan soŋɛ to dela to ɛ Naayinɛ Yetɔɣum la poan nyɛ sokese’a n daani to la lebesego. To san eŋɛ bala, to sakerɛ wan kpe’em ge ti tomam la eŋa bɔŋa la me ana soŋa. Bala me wan basɛ ti to ta’an “sɛ ze’ele mɛ soŋa soŋa.”—1 Ko. 16:13.
4. To wan eŋɛ la wani ta’an maɣesɛ sɛla woo bisɛ soŋa soŋa? (1 Tesalonika 5:21)
4 Kaalɛ 1 Tesalonika 5:21. Tɛ̃ra ti Baabule la yele to ti, “ya han wom yelese’ere woo, magahɛ ya de behɛ dene ane se’em.” To wan eŋɛ la wani ta’an eŋɛ bala? To san tara puti’ira ayi ayi yele poan, la nari ti to viisɛ Baabule la baŋɛ lan tɔɣɛ de yele se’em. Makerɛ, geele bisɛ ti bunbilepaalega n ti’iseri ti daanse’ere, Yehowa ka fabeli a yele. La nari ti a sakɛ eŋa n ti’iseri sɛla wa? Aayi, la nari ti a “magahɛ de behɛ.” Eŋa n wan eŋɛ se’em ta’an eŋɛ bala dela a zamesɛ Baabule la ta’an baŋɛ Yehowa n ti’iseri a yele se’em.
5. To wan eŋɛ la wani ta’an baŋɛ Yehowa n lebese to sokere la se’em?
5 To san ni kaala Baabule la, la ani wuu Yehowa n tɔɣeri bɔ’ɔra tɔ. To san ɛɛra ti to baŋɛ Yehowa n lebese to sokere la se’em, la daɣɛ to yeen kaala Baabule la ge la nari ti to eŋɛ sɛla pa’asɛ. La nari ti to zamesa Baabule la zɛse’esi n wan soŋɛ tɔ ti to ta’an nyɛ to sokere la lebesego. Sɛla n wan soŋɛ tɔ ti to ta’an ita bala dela to ita viisegɔ to gɔnɔ la poan. (Mag. 2:3-6) La nari ti to zusɛ Yehowa ti a soŋɛ tɔ ti to ta’an nyɛ to sokere la lebesego. To ta’an bisɛ Baabule naresum yɛla, la yelese’a n wan ta’an soŋɛ tɔ to bɔŋa la poan. La me wan ana soŋa ti to kaala Baabule poan nɛresɛba n yuun tari sakerɛ ge ti ba bɔŋa, la ba ti’isegɔ me yuun ana wuu tomam la.
6. To san kena zamesegɔ, la soŋeri to la wani?
6 To san zamesa Baabule la tansugere poan, la ani wuu Yehowa n tɔɣeri bɔ’ɔra to la. To san kena zamesegɔ saŋa woo, mabia ta’an bo yetɔɣum bii lebesego ti la soŋɛ tɔ ti to nyɛ to sokere la lebesego. (Mag. 27:17) Basɛ ya ti to bisɛ sɛla n wan soŋɛ tɔ ti to ta’an nyɛ sokese’a n daani to la lebesego.
LA SAN ANA HO WUU YEHOWA KA FABELI HO YELE, HO WAN EŊƐ LA WANI?
7. Nɛreba basɛba ta’an ni soke bamea yeti bem?
7 Hon tabelɛ soke homea yeti, ‘Yehowa nɔɔ mi ti mam boi?’ La san ana ho wuu ho yele ka pakɛ, ho ta’an ti’isa ti hon kan malum ta’an dɛna saazuo la tingɔŋɔ wa Naaŋɔdaana la zɔ. Naba David me yuun tabelɛ ti’isɛ bala mɛ. La yuun eŋɛ en la pakerɛ la Yehowa n tɛ̃ri asaala yele la. A yuun yeti: “Na’ayenɛ, asaala dela bem te a yele pakɛ hɔ? Asaala dela bem te ho tɛn’ɛha a yele?” (Ym. 144:3) Ho wan eŋɛ la wani ta’an nyɛ sokere kana taaba lebesego?
8. Wuu 1 Samuel 16:6, 7, 10-12 n pa’alɛ se’em la, Yehowa ni nyɛ la bem nɛra poan?
8 Baabule la pa’alɛ to ti, nɛresɛba n bisɛ ti bamam yele ka pakɛ la, Yehowa tɛ̃ri ba yele. Makerɛ, Yehowa yuun tum la Samuel ti a keŋɛ Yesse yire la poan ta loe Yesse dayua ayima ti a dɛna Israeldoma naba. Yesse yuun yi la a dayɔɔsi bayopɔi la ge basɛ David n de bia ba poan la. b Ge la dela David ti Yehowa yuun loe. (Kaalɛ 1 Samuel 16:6, 7, 10-12.) Yehowa yuun nyɛ sɛla n boi David suuren mɛ. A yuun dela mina n nɔŋɛ vo’osum poan yɛla.
9. Beni n sɔi ti ho wan ta’an tara suure lua ti Yehowa fabeli ho yele? (Bisɛ foote la.)
9 Ti’isɛ bisɛ Yehowa n puɣum eŋɛ sɛla pa’alɛ ti a ti’iseri ho yele. A bo’ori ho la ka’aŋɔ ti la soŋera hɔ, ho bɔŋa la poan. (Ym. 32:8) Bala pa’alɛ ti a mi ho mɛ soŋa soŋa. (Ym. 139:1) Ho san dekɛ Yehowa pa’alegɔ la tum tuuma ge nyɛ lan soŋeri ho se’em, ho wan baŋɛ ti a fabeli ho yele. (1 Yel. 28:9; Tm. 17:26, 27) Yehowa nyɛti hon mɔɔri se’em nana en ge pu’usa en la mɛ. A nyɛti ho halesoma la mɛ ge bɔta ti a dɛna ho zɔ. (Yer. 17:10) Ho me san bɔta ti ho dɛna a zɔ, a puurɛ wan pee.—1 Yo. 4:19.
“Ho han ɛ [Yehowa], ho wan nyɛ en.”—1 Yel. 28:9 (Bisɛ kaalegɔ zɛ’an 9) c
HO SAN TABELƐ KƆ’Ɛ HO PUTI’IRƐ YELE POAN TI HO BISƐ TI LA KA ANI SOŊA, HO WAN EŊƐ LA WANI?
10. To san ti’isa tomam n yuun kɔ’ɛ to puti’irɛ se’em yɛla poan, to ta’an ni sɔkera tomea la bem yɛla?
10 Saŋa ase’a, nɛreba basɛba ni ti’isa ti daanse’ere bamam n yuun kɔ’ɛ ba puti’irɛ se’em la ka ani soŋa. Daanse’ere, ba yuun basɛ la tuuma n wan basɛ ti ba nyɛ ligeri, la wan eŋɛ se’em ti ba ta’an pu’usa Yehowa soŋa soŋa. Ge ba nyaa nyɛ ti nɛresɛba n yuun mu’ɛ nini tuna ba tuuma la tari la ligeri ge ti ba vom nyaa ana lumta. Bala ta’an basɛ ti mabiisi wa sɔkera bamea yeti: ‘La yele yuun pakɛ ti n basɛ n tuuma ge dekɛ n paŋa za’a tum bo Yehowa? Bii la yuun nari ti n bɔna n tuuma la poan, la wan eŋɛ se’em ti n ta’an nyɛ ligeri zo’e zo’e nananawa?’
11. Bem yele n yuun daani se’emdaana n gulesɛ Yooma 73 la?
11 Ho san tabelɛ soke homea soke ana wa, tɛ̃ra lan yuun ani nɛresɛka n yuun gulesɛ Yooma 73 la se’em. A yuun ni nyɛta la nɛresɛba n ka pu’useri Yehowa ti ba tara imma’asum, tara ligeri ge ti sɛsɛla me ka daana ba. (Ym. 73:3-5, 12) A yuun ni san nyɛ ba vom n ani soŋa se’em la, la yuun ni ta’an basɛ ti a ti’isa ti Yehowa pu’usegɔ ka tari vuurɛ. Eŋa n yuun ti’iseri yelese’a ti la kɔ’ɔsa a giila la yuun basɛ ti a yeti, “too sigere mam zuo mɛ.” (Ym. 73:13, 14) A yuun eŋɛ la wani ta’an ŋmibe yele wa poan?
12. Wuu Yooma 73:16-18 n pa’alɛ se’em la, bem n yuun soŋɛ yuumadaana la ti a giila ka le kɔ’ɔsɛ?
12 Kaalɛ Yooma 73:16-18. Yuumadaana la yuun nyaa keŋɛ la Yehowa pu’usegɔ yire la poan. Eŋa n yuun keŋɛ bim ta naɛ la Yehowa nɛreba bɔna la, n yuun soŋɛ en ti a ti’isɛ yele la soŋa. A yuun ti’isɛ ti nɛreba la vom ani la lumta ge a yuun ta baŋɛ ti ba ka tari beere sa’am puti’irɛ. Eŋa n yuun bɔkɛ yele la soŋa soŋa la yuun basɛ ti a giila ka le kɔ’ɔsɛ. A yuun nyaa baŋɛ ti eŋa n kɔ’ɛ a puti’irɛ ti a pu’usa Yehowa la n ani soŋa. Bala la, a yuun nyaa lu la a suure ti a wan kɔ’ɔn pu’usa la Yehowa.—Ym. 73:23-28.
13. Ho san tabelɛ kɔ’ɛ ho puti’irɛ yele poan ge ti la daana hɔ, ho wan eŋɛ la wani? (Bisɛ foote la.)
13 Ho me san ti’isa sɛla ti la kɔ’ɔsa ho giila, ho ta’an tɔɣesɛ yuumadaana la n yuun eŋɛ sɛla la. Ho wan eŋɛ la bem? Tɛ̃ra tuunsoma la woo ti ho tum kurum la, la Yehowa n kã bo ho se’em. Kelum tɛ̃ra ti Yehowa ka soŋeri sɛba n ka pu’useri en la. Nɛresɛba n ka pu’useri Yehowa la zo’e zo’e kɔ’ɔn ti’isa la ba basɛ ti ba vom ana lumta se’ere n sɔi la, ba ka tari beere sa’am puti’irɛ. Ge ho nyɛ Yehowa n eŋɛ yelese’a bo ho nananawa mɛ. Kelum mina ti a wan eŋɛ yelesoma n gani bala bo ho beere sa’am. (Ym. 145:16) Le ti’isɛ yele wa bisɛ. Ho kan ta’an baŋɛ ho vom n wan ana ni se’em ho san ka pu’usa Yehowa. Ge ton mi sɛla dela: To san nɔŋɛ Yehowa, la nɛreba, ti bala basɛ ti to kɔ’ɛ to puti’irɛ eŋɛ sɛla, to wan tara pupeelum.
Ti’isa yelese’a ti Yehowa pu’ulum biŋe ti a wan eŋɛ bo ho beere sa’am la (Bisɛ kaalegɔ zɛ’an 13) d
HO SAN TI’ISA TI HON KA TARI VUURƐ YEHOWA NƐŊAN, HO WAN EŊƐ LA WANI?
14. Basɛba bɔŋa ani la wani ge bem sokere ti ba ni sɔkera bamea?
14 Yehowa yamesi basɛba ti’isɛ ti ba kan ta’an tum zo’e zo’e bo Yehowa se’ere n sɔi la, ba kuregɛ mɛ ti basɛba me bɛ̃’ɛra. Ba me ta’an dɛna tarendoma. Bala ta’an basɛ ti ba ti’isa ti ba yele ka pakɛ Yehowa. Ba ta’an ni soke yeti, ‘Mam yele pakɛ Yehowa?’
15. Se’emdaana n gulesɛ Yooma 71 la yuun tari suure lua la bem poan?
15 La me yuun ani se’emdaana n gulesɛ Yooma 71 la bala. A yuun zusɛ yeti: “Da zagahɛ mam n paŋa ba’ahegɔ saŋa.” (Ym. 71:9, 18) La boi bim ti yuumadaana la giila yuun kɔ’ɔsɛ mɛ ge a yuun tari sakerɛ ti a san pu’usa Yehowa, a wan soŋɛ en. Yuumadaana la yuun nyaa baŋɛ ti Yehowa puurɛ ni pee mɛ la sɛba n tiregeri pu’usa en, la ka pakɛ la ba yeledaaŋɔ la.—Ym. 37:23-25.
16. Sodeni poan ti sɛba n kuregɛ la tara tuulum bɔ’ɔra Yehowa? (Yooma 92:12-15)
16 Ho san kuregɛ, ti’isɛ Yehowa n geele ho yele se’em. La boi bim ti ho nyaa taregɛ mɛ ge Yehowa wan soŋɛ hɔ ti ho kelum pu’usa en soŋa soŋa. (Kaalɛ Yooma 92:12-15.) Da ti’isa hon kan ta’an le eŋɛ sɛla la ge tuɣum ti’isa hon wan ta’an eŋɛ sɛla. Ho ta’an doose ho makesonɛ la poan kpemese ho mabiisi giila ge me basɛ ti ba baŋɛ ti ho ti’iseri ba yele. Ho ta’an yele ba Yehowa n soŋɛ ho se’em ta paɛ nananawa. Ho me ta’an le yele ba Baabule pu’ulumbiŋ’a se’a ti ho ana lɛɛ gura. Leyɛ’ɛsa, tɛ̃ra ti ho san zusa bɔ’ɔra mabiisi, la wan soŋɛ ba. (1 Pe. 3:12) La ka pakɛ la to bɔŋa la n ani se’em, to za’a waabi tari sɛla n wan eŋɛ bo Yehowa, la to mabiisi.
17. Beni n sɔi ti la ka nara ti to tara tomea makera taaba?
17 Ho suure san sa’am la hon ka nyaŋɛ tum zo’e zo’e bo Yehowa la, tara suure lua ti Yehowa kelum geele ho ti ho tari tuulum. Ho ta’an bɔta ti ho tara homea makera la mabiisi. Ge da ita bala! Beni n sɔi? Se’ere n sɔi la Yehowa ka tari to makera la taaba. (Ga. 6:4) Makerɛ, Mary yuun dekɛ la kaam n tari nyuuŋo soŋa ge eŋɛ ligeri bo Yezu. (Yon 12:3-5) Ge pu’usegɔ yire la poan pɔkuurɛ la me yuun dekɛ la ligekɔ̃ba ayi n pɔ’ɛ eŋɛ ligeri daka la poan. (Lu. 21:1-4) Ge Yezu yuun bisɛ ti ba za’a waabi tari sakerɛ mɛ. Yezu yuun tɔɣesɛ a Sɔ mɛ ti la di mi’a. Bala la, Yehowa puurɛ pee mɛ la sɛla woo ti to ita bɔ’ɔra en la. Sɛla n pakɛ en dela hon nɔŋɛ en ge tara sakerɛ bɔ’ɔra en la ge daɣɛ hon tum zo’e se’em.
18. Bem n wan soŋɛ tɔ ti to kan tara puti’ira ayi ayi? (Bisɛ daka la zuo n de “ Baabule La Wan Ta’an Soŋɛ Hɔ Ti Ho Kan Tara Puti’ira Ayi Ayi.”)
18 Saŋa ase’a, to ta’an ni tara puti’ira ayi ayi. Wuu ton puɣum zamesɛ baŋɛ se’em la, Baabule la wan ta’an soŋɛ tɔ ti to kan tara puti’ira ayi ayi. Tiregɛ nyɛ sokese’a n daani ho la lebesego. Ho san eŋɛ bala, la wan basɛ ti ho giila kpeŋe. Yehowa ti’iseri ho yele mɛ. A puurɛ pee mɛ la hon dekɛ a pu’usegɔ deŋɛ nɛŋa la, a me wan kã bo ho. Tara suure lua ti Yehowa nɔŋɛ a yamesi mɛ ge me fabela ba yele.
YUUNƐ 111 Our Reasons for Joy (Sɛla N Bo’ori To Pupeelum)
a YELEBIRE VUURƐ: Zaseŋɔ wa poan, to wan sɔsɛ puti’ira ayi ayi yele. Puti’ira ayi ayi wa ta’an basɛ ti to ti’isa ti to ka tari vuurɛ Yehowa nɛŋan. Bii la ta’an basɛ ti to ti’isa ti ton kɔ’ɛ to puti’irɛ se’em la ka ani soŋa. Puti’ira ayi ayi wa ka pa’alɛ ti to ka tari sakerɛ Yehowa pu’ulumbiŋ’a la poan.
b La boi bim ti Baabule la ka pa’alɛ tɔ David yuuma n yuun de se’em, se’em ma’a ti Yehowa yuun loe en la ge a yuun ta’an dɛna yuun pia la atã yɛ’ɛsa yuun pia la awɛi.—Kaalɛ September 1, 2011, The Watchtower, gɔn. 29, kz. 2.
