ZASEŊƆ 40
YUUNƐ 30 My Father, My God and Friend (Mam Sɔ, Mam Naayinɛ la Mam Zɔ)
Yehowa “N Bogole Sɛba Sunya N Sagom La Suunre”
“Enŋa n bogole sɛba sunya n sagom la suunre, ge tebera ba pogoloŋɔ la.”—YM. 147:3.
YELEKPINE
Yehowa fabeli sɛba suure n sa’am la yele mɛ. Zaseŋɔ wa poan, to wan bisɛ Yehowa n iti se’em buɣela to suure ge me soŋera tɔ ti to ta’an buɣela nɛresɛba me suure n sa’am la suure.
1. La ni ana Yehowa la wani daaŋɔ san paara a yamesi?
YEHOWA nyɛti yelese’a woo n paari a yamesi mɛ tingɔŋɔ wa zuo. A mi se’em ma’a ti to puurɛ ni pee bii se’em ma’a ti to suure sa’am. (Ym. 37:18) Yehowa puurɛ ni pee mɛ a san nyɛ ti daaŋɔ n paari tɔ ge ti to kelum tiregera ita sɛla ti a bɔta! A kɔ’ɔn bɔta la a soŋɛ tɔ ge me buɣelɛ to suure.
2. Yehowa iti la bem bɔ’ɔra sɛba suure n sa’am la ge to wan eŋɛ la wani basɛ ti Yehowa soŋɛ tɔ?
2 Yooma 147:3 pa’alɛ ti, Yehowa ‘n tiberi sɛba n pɔɣelum’ ti ba suure sa’am la. Gulesegɔ wa pa’alɛ la Yehowa n doli mama sore poan tibera sɛba suure n sa’am la se’em. To wan eŋɛ la wani ta’an basɛ ti Yehowa soŋɛ tɔ? To bisɛ ya makerɛ wa. Dɔgeta n mi tibegɔ paa ta’an tibɛ nɛra n pɔɣelum soŋa soŋa. Ge la nari ti nɛra la me dɔla dɔgeta la n pa’alɛ en yelese’a woo la ti la soŋɛ en. Bala mea nɔɔ ti la nara ti to dɔla Yehowa pa’alegɔ ta’an nyɛ tibegɔ. Zaseŋɔ wa poan, to wan bisɛ Yehowa n tɔɣɛ sɛla bo nɛresɛba suure n sa’am la. To me wan bisɛ ton wan dekɛ a ka’aŋɔ la tum tuuma se’em ti la soŋɛ tɔ.
YEHOWA BASƐ TI TO BAŊƐ TI TO TARI TUULUM MƐ
3. Beni n sɔi ti nɛreba basɛba ti’isa ti ba ka tari vuurɛ?
3 To boi la tinsɛka poan ti nɛreba zo’e zo’e ka tara nɔŋerɛ. Bala basɛ ti nɛreba basɛba ti’isa ti bamam ka tari vuurɛ. Mabipɔka ayima yu’urɛ n de Helen a yeti: “Mam dɔɣereba yuun ka nɔŋɛ mam la fii me. Mam sɔ yuun daani mɛ paa ge me yuun kɔ’ɔn tuura mam daarewoo ti n ka tari vuurɛ.” Wuu Helen la, daanse’ere nɛra tabelɛ tum ho la be’em, zɛregɛ hɔ bii basɛ ti la ana ho wuu ho ka tari vuurɛ la. La san dɛna bala, la ta’an kpe’em bo ho ti ho sakɛ ti nɛreba sirum nɔŋɛ hɔ.
4. Wuu Yooma 34:18 n pa’alɛ se’em la, la ani Yehowa la wani la sɛba suure n sa’am la ge a biŋe nɔɔrɛ ti a eŋɛ la bem bo ba?
4 Hali nɛreba san ka ita to soŋa, to ta’an tara suure lua ti Yehowa nɔŋɛ to mɛ ge ti to me dɛna tuulum bɔ’ɔra en. Naayinɛ “lɛm mɛ la sɛba sunya n sagom.” (Kaalɛ Yooma 34:18.) Ho san ti’isa ti ho ka tari vuurɛ, tɛ̃ra ti Yehowa nyɛ la ho halesoma la ge yi ho. (Yon 6:44) Yehowa kɔ’ɔn maasum mɛ ti a soŋɛ hɔ se’ere n sɔi la, a nɔŋɛ ho mɛ paa.
5. To wan ta’an zamesɛ la bem la Yezu n yuun soŋɛ nɛresɛba ti ba kɛsera ba la?
5 To san bisɛ Yezu n yuun iti a yɛla se’em, to wan baŋɛ lan ni ana Yehowa se’em. Makerɛ, Yezu n yuun boi tiŋa wa zuo la, a yuun soŋɛ nɛresɛba ti ba kɛsera ba la mɛ ge me yuun eŋɛ pa’alɛ ti a tari ba giile. (Mt. 9:9-12) Se’em ma’a ti pɔka ayima n yuun tari bãyaalega kalum Yezu fuo ge tara sakerɛ ti a wan nyɛ tibegɔ la, Yezu yuun tɔɣɛ buɣelɛ a suure mɛ ge pɛ̃ɣɛ en la a sakerɛ la. (Mr. 5:25-34) Yezu yuun eŋɛ pa’alɛ la a Sɔ n ani se’em. (Yon 14:9) Bala la, ho ta’an tara suure lua ti Yehowa nɔŋɛ ho mɛ ge me nyɛta ho halesoma la n de wuu sakerɛ, la hon nɔŋɛ en la.
6. La san ana ho wuu ho ka tari vuurɛ, ho wan eŋɛ la wani?
6 La san kelum ana ho wuu ho ka tari vuurɛ, ho wan eŋɛ la wani? Kaala Baabule la zɛse’esi n pa’alɛ ti Yehowa nɔŋɛ ho mɛ ge ti’isa taɣesa. b (Ym. 94:19) Da tara homea makera la nɛreba. Da basɛ ti sɛla ti ho kan ta’an eŋɛ la yele daana hɔ. Yehowa ka eeri ho tum zɔɛ ho paŋa beene. (Ym. 103:13, 14) Nɛra san tabelɛ eŋɛ ho sɛla n ka ani soŋa, da dekɛ bala zɛregera homea. La daɣɛ hon ta’asɛ. Tɛ̃ra ti, Yehowa wan gãkɛ la sɛba n tum be’em la ge soŋɛ sɛba ti ba tum ba be’em la. (1 Pe. 3:12) Sandra ti a dɔɣereba yuun tum en sɛla n ka ani soŋa a bunbilimen la yeti, “Mam ni kɔ’ɔn zusera la Yehowa ti a soŋɛ mam ti n bisa nyɛta n halesoma la wuu eŋa n nyɛti mam se’em la.”
7. Yelese’a n tabelɛ paɛ to la wan ta’an soŋɛ to la wani Yehowa pu’usegɔ poan?
7 Tara puti’irɛ ti Yehowa wan ta’an doose ho poan soŋɛ nɛreba. La dela yɔ’ɔ kãtɛ ti to naɛ la Yehowa tuna na’am mɔɔlegɔ tuuma la. (1 Ko. 3:9) Yelese’a n paɛ ho kurum la ta’an basɛ ti ho zɔta nɛreba nimbũ’ɔ ge me bɔkera ba. Ho me wan mina hon wan soŋɛ ba se’em. Yehowa la mabiisi la yuun soŋɛ Helen ti to puɣum tɔɣɛ a yele la mɛ, ti nananawa eŋa me wan ta’an soŋɛ nɛreba. A yeti: “Mam daa ti’isɛ ti mam ka tari tuulum ge Yehowa soŋɛ mam ti n baŋɛ ti a nɔŋɛ mam mɛ. Mam me ta’an soŋɛ nɛreba.” Helen nyaa tari pupeelum mɛ. A nyaa dela sore ŋmɛ’adaana.
YEHOWA BOTI LA TO SAKƐ TI A DI SUGERI BO TO MƐ
8. Yehowa yele to la bem ti la bɔna Isaiah 1:18?
8 La kelum daana Yehowa yamesi basɛba mɛ la be’em sebo ti ba eŋɛ ti la tole la. Ge la nari ti to tɛ̃ra ti, la dela Yehowa n nɔŋɛ to la zuo ti a dekɛ lua bunɔ la bo to. Nɔkpe’ene kai ti a boti la to nyɛ nyuurɔ lua bunɔ la poan. Yehowa yeti, to san nyaŋɛ ‘maalɛ’ c yelese’a n boi tomam la eŋa tiŋasuka la, a me wan di sugeri bo to. (Kaalɛ Isaiah 1:18.) To puurɛ pee mɛ la Yehowa n ni di sugeri bo to la! A me kan malum tamɛ yelesoma se’a ti to eŋɛ la.—Ym. 103:9, 12; Heb. 6:10.
9. Beni n sɔi ti la ka nara ti to kɔ’ɔn ti’isa yelese’a ti to eŋɛ ti la tole la?
9 Ho san tum la be’em kurum ti la kelum daana hɔ, ti’isa yelese’a ti ho ta’an ita nananawa, la hon wan ta eŋɛ sɛla beere sa’am. Geele tuntuna Paul yele la bisɛ. A suure yuun sa’am mɛ la eŋa n tabelɛ mɛlesɛ Kristakɔma se’em la. La bala za’a, a yuun mi ti Yehowa puɣum di sugeri bo en mɛ. (1 Tim. 1:12-15) A yuun basɛ ti eŋa n tum yelese’a n ka ani soŋa ti la tole la kɔ’ɔn daana en mɛ yoi? Aayi. Wuu eŋa n yuun ka basɛ ti eŋa n yuun de Yuda buuri nɛrekãtɛ yele le pakɛ en se’em la, bala mea nɔɔ ti a yuun ka basɛ ti eŋa n yuun eŋɛ sɛla la daana en. (Flp. 3:4-8, 13-15) Paul yuun tuɣum mu’ɛ la nini la a na’am mɔɔlegɔ tuuma la ge bisa beere sa’am ti a wan le eŋɛ sɛla pa’asɛ. Wuu Paul la, ho kan ta’an tee yelese’a ti ho eŋɛ ti la tole la. Nananawa, ho ta’an pɛ̃ɣera Yehowa ge ita sɛla n wan basɛ ti a puurɛ pee. Ho me ta’an ti’isa yelese’a ti a biŋe nɔɔrɛ ti a wan eŋɛ bo ho la yele.
10. To san baŋɛ ti to yuun eŋɛ la sɛla ti la daam nɛreba basɛba, to wan eŋɛ la wani?
10 To suure ni sa’am mɛ to san baŋɛ ti ton yuun tum be’em sebo la daam nɛreba basɛba mɛ. La san dɛna bala, ho wan eŋɛ la wani? Tiregɛ maalɛ yeledaaŋɔ la. Eŋɛ pa’alɛ ge me yele ba ti ho tue mɛ. (2 Ko. 7:11) Zusɛ Yehowa ti a soŋɛ nɛresɛba ti ho itigɔ la daam ba la. Yehowa wan ta’an soŋɛ ya ti ya kelum pu’usa en ge tara suma’asum.
11. To wan ta’an zamesɛ la bem Yona yele la poan? (Bisɛ gɔŋɔ wa foote.)
11 Nyɔɣɛ yɛm ho tuure la poan ge basɛ ti Yehowa dekɛ ho tum tuuma. To geele nɔdɛ’ɛsa Yona yele la bisɛ. Yehowa yuun tum Yona ti a keŋɛ la Nineveh ge Yona yuun tulege keŋɛ la zɛ’an yoo. Yehowa yuun dɔlegɛ Yona tuberɛ mɛ. A me yuun nyɔɣɛ yɛm mɛ de poan. (Yna 1:1-4, 15-17; 2:7-10) Yehowa yuun ka gɛ̃ Yona basɛ. Naayinɛ yuun le yele Yona mɛ ti a keŋɛ Nineveh, ti a nyaa sakɛ ge keŋɛ. La boi bim ti a suure yuun sa’am mɛ la eŋa n yuun tue la ge a yuun ka basɛ ti bala gu en ti a ka tum Yehowa tuunɛ la.—Yna 3:1-3.
Yona n yuun ze’ele ziho la puuren yese na la, Yehowa yuun le yele en yeti a keŋɛ Nineveh ta mɔɔlɛ A yɛla la bo ba. (Bisɛ kaalegɔ zɛ’an 11)
YEHOWA NI DEKƐ LA A ZILAM VO’OSUM LA SOŊƐ TƆ TI LA ANA TO MAMA
12. Yeledaaŋɔ san paɛ tɔ bii to suɔ san ki, Yehowa ni buɣelɛ to suure la wani? (Filipi 4:6, 7)
12 Yeledaaŋɔ san paɛ tɔ bii to suure n sa’am, Yehowa ni dekɛ la a zilam vo’osum la buɣelɛ to suure. To geele ya Ron la Carol yele la bisɛ. Yele deyima n yuun eŋɛ ti la daam ba paa. Ba dayua n yuun ku amea. Ba yuun yeti: “Yeledaaŋɔ zo’e zo’e paɛ to kurum mɛ ge yele dena wa n gaŋɛ za’a. To yuun ni koŋe la guum ge Yehowa suma’asum la ti Filipi 4:6, 7 (Kaalɛ) tɔɣɛ de yele la ni basɛ ti la ana to la mama. Yeledaaŋɔ san paɛ hɔ ti la wuna hɔ, yele Yehowa lan ani ho se’em. Ho ta’an zusɛ Yehowa sugumnɔɔrɛ zo’e zo’e, la sansɛka woo ti ho bɔta. (Ym. 86:3; 88:1) Kɔ’ɔn zusa Yehowa ti a bo ho a zilam vo’osum la. A kan mɔŋɛ hɔ, a wan ba’asum soŋɛ hɔ.—Lu. 11:9-13.
13. Zilam vo’osum la wan ta’an soŋɛ to la wani ti to kelum tara yelemɛŋɛrɛ pu’usa Yehowa? (Epesus 3:16)
13 Yeledaaŋɔ tabelɛ paɛ hɔ ti ho giila kɔ’ɔsɛ? Zilam vo’osum la ta’an kpemese ho giila ti ho kelum tara sakerɛ pu’usa Yehowa. (Kaalɛ Epesus 3:16.) To geele mabipɔka Flora yele la bisɛ. Eŋa la a sira yuun dela satiŋa na’am yetɔɣum yalegerɛdoma. A sira yuun tum la pɔɣedisa’aŋɔ ti ba basɛ taaba. Flora yeti: “Mam suure yuun sa’am mɛ la eŋa n yuun eŋɛ bala la, ti mam yɛm bɔi. Mam yuun kɔ’ɔn zusɛ la Yehowa ti a dekɛ a zilam vo’osum la soŋɛ mam. Mam yuun ka ti’isɛ ti n wan nyaŋɛ ŋmibe ge Yehowa n yuun soŋɛ mam ti n ta’an ŋmibe.” Flora nyaa baŋɛ ti, Yehowa n yuun soŋɛ eŋa ti a malum dekɛ amea delum en ge wan le kelum soŋɛ en ti a ta’an ŋmibe yeledaaŋɔ woo poan. A le yeti: “Yelese’a n boi Yooma 119:32 la pa’alɛ la Yehowa n soŋɛ mam se’em. Bilam yeti: ‘Mam dole la ho nɔɔrɛ la. Se’ere n sɔe la ho bo’ore mam la bɔkerɛ zo’e zo’e.’”
14. To wan eŋɛ la wani ti Yehowa dekɛ a zilam vo’osum la soŋɛ tɔ?
14 Ho san zusɛ Yehowa, ti a dekɛ a zilam vo’osum la soŋɛ ho ba’asɛ, bem n nari ti ho eŋɛ? Ita yelese’a n wan basɛ ti a kɔ’ɔn soŋera hɔ la a zilam vo’osum la. Yele ana wa dela, ho kena zamesegɔ ge mɔɔla yelesoma la. Ho me san kaala Baabule la daarewoo ge ti’isa taɣesa, la wan soŋɛ hɔ ti ho ta’an bɔkɛ Naayinɛ puti’irɛ. (Flp. 4:8, 9) Ho san kaala Baabule la, bisɛ nɛresɛba ti yeledaaŋɔ yuun paɛ ba, la Yehowa n yuun soŋɛ ba ti ba ta’an ŋmibe se’em. Yeledaaŋɔ zo’e zo’e yuun paɛ Sandra ti to puɣum tɔɣɛ a yele la mɛ. A yeti: “Yosef yele la n yuun kpemese mam giila. Yosef yuun ka basɛ ti yeledaaŋɔ se’a n paɛ en la sa’am eŋa la Yehowa bɔŋa la.”—Pin. 39:21-23.
YEHOWA TARI LA TO MABIISI LA BUƔELA TO SUURE
15. Bani n wan ta’an buɣelɛ to suure ge ba wan ta’an soŋɛ to la wani? (Bisɛ foote la.)
15 Yeledaaŋɔ san paɛ tɔ, to mabiisi la wan ta’an “soŋɛ” tɔ ge buɣelɛ to suure. (Kol. 4:11) Yehowa n tari to mabiisi la buɣela to suure la pa’alɛ ti a nɔŋɛ to mɛ. Yeledaaŋɔ san paɛ tɔ, to mabiisi la ni naɛ la to mɛ bɔna ge me ni kɛlesa tɔ. Ba ta’an kaalɛ Baabule gulesegɔ kpemese to giila bii ba naɛ la to zusɛ. d (Arom 15:4) Saŋa ase’a, mabiisi ta’an pa’alɛ Yehowa puti’irɛ n de se’em yele la poan, ti la soŋɛ tɔ ti to ta’an ŋmibera. To mabiisi la me ta’an eŋɛ yɛla ase’a soŋɛ tɔ, maɣesɛ wuu ba duɣɛ dia bo to.
Zɔdoma sɛba n nɔŋɛ Yehowa wan ta’an soŋɛ tɔ ge buɣelɛ to suure (Bisɛ kaalegɔ zɛ’an 15)
16. To wan eŋɛ la wani ti to mabiisi la ta’an soŋɛ tɔ?
16 Saŋa ase’a, la ni nara ti to basɛ ti nɛreba soŋɛ tɔ. To mabiisi la nɔŋɛ to mɛ ge me bɔta ti ba soŋɛ tɔ. (Mag. 17:17) Ge ba kan ta’an baŋɛ lan ani to se’em bii ton boti sɛla. (Mag. 14:10) Ho suure san sa’am, yele ho zɔsonkɔ lan ani ho se’em ti a soŋɛ hɔ. Basɛ ti a baŋɛ eŋa n wan ta’an eŋɛ sɛla soŋɛ hɔ. Ho me ta’an yele keendoma la ti ba soŋɛ hɔ. Mabipɔɣesi basɛba me ni yele la mabipɔka n bĩ vo’osum poan ti a soŋɛ ba.
17. Bem yɛla n wan ta’an basɛ ti la kpe’em bo to ti to ɛ soŋerɛ ge bem n wan soŋɛ tɔ?
17 Naɛ la mabiisi la bɔna saŋa woo. Saŋa ase’a, ho yeledaaŋɔ la ta’an basɛ ti ho bɔta ti ho bɔna ho ma’a. Mabiisi la me ta’an kan bɔkɛ lan ani ho se’em bii ba tɔɣɛ sɛla ti la daam hɔ. (Yam. 3:2) Hali la bala za’a, da yelege homea. Yehowa ta’an basɛ ti ba kpemese ho giila. Keema ayima yu’urɛ n de Gavin ti puti’ira bã’a daana en yeti: “Saŋa zo’e zo’e, mam ni ka bɔta ti n naɛ la nɛreba sɔsera.” Ge yelesonɛ la dela, Gavin ni kelum naɛ la mabiisi la sɔsera mɛ. Bala ni basɛ ti la ana en la lama lama. Mabipɔka Amy me yeti: “Yelese’a n tabelɛ paɛ mam la zuo, la kpe’em bo mam mɛ ti n tɔresɛ nɛreba. Wuu Yehowa la, mam kɔ’ɔn tiregera mɛ ti n nɔŋɛ ge tɔresɛ mabiisi la. Mam mi ti bala n wan basɛ ti mam la Yehowa puurɛ pee.”
YEHOWA PU’ULUMBIŊ’A LA WAN TA’AN BUƔELƐ TO SUURE
18. Bem ti Yehowa wan eŋɛ bo to beere sa’am ge la nari ti to ita la bem nananawa?
18 La kan yue, Yehowa wan yese yeledaaŋɔ la susa’aŋɔ yɛla za’a basɛ. (Lil. 21:3, 4) Sankaŋa la, to “kan le tɛnra yele kɛgehe la.” (Isa. 65:17) Hali nananawa, Yehowa kɔ’ɔn soŋera to mɛ to yeledaaŋɔ poan. Yehowa dole la sarɔtɔ zo’e zo’e poan buɣela to suure. Bala la, basɛ ti Yehowa soŋɛ hɔ. Tɛ̃ra ti Yehowa “tare [ho] a potɛ’ɛrɛ poan” mɛ.—1 Pe. 5:7.
YUUNƐ 7 Jehovah, Our Strength (Yehowa N De To Paŋa)
a Ba tee yu’ura ase’a mɛ.
b Bisɛ daka la zuo n de “ Yehowa Fabeli Ho Yele Mɛ.”
c To san wan nyaŋɛ ‘maalɛ’ yelese’a n boi tomam la Yehowa tiŋasuka la, la nari ti to basɛ to be’em, zusɛ en ti a di sugeri bo to ge tee tuna sɛla n ani soŋa. To me san tum be’em, la nari ti to yele keendoma la ti ba soŋɛ tɔ.—Yam. 5:14, 15.
