Ba yuun ni doose la bɔpaka la ta kɛ̃ Zilam bɔ’ɔ la poan. New World Translation of the Holy Scriptures ti ba malum demese ge ti yuun 2023 paɛ la yeti, ‘bɔpaka la n boi de nɛŋan la woko zuni la yire la yaleŋa, dɛna santira 20, ti ka saazuo woko dɛna santira 120.’ (2 Yel. 3:4) Leregere ase’a pa’alɛ ti bɔpaka la wɔɣɛ paɛ la “santira 120” ti la pa’alɛ ti deo la woko dela 53 meters!

Ge New World Translation la ti ba printɛ yuun 2023 la tɔɣɛ Solomon pu’usegɔ yire bɔpaka la yele ti: ‘La wɔɣɛ paɛ la santira 20,’ bii 9 meters. a Basɛ ti to geele ya sɛla n sɔi ti to eŋɛ teere dena wa.

1 Nadoma 6:3 ka tɔɣɛ bɔpaka la saazuo woko yele. Yeremia n gulesɛ yele wa la tɔɣɛ la bɔpaka la nɔɔren woko, la de ko’olum yele ge a ka tɔɣɛ de saazuo woko yele. A zuo buyopɔi la poan, a le tɔɣɛ la lɔɣɔrɔ ase’a n boi pu’usegɔ yire la poan yele, maɣesɛ wuu nyɔɣum Kokãtɛ laa, ze’elesi pia, la nyɔɣum piila bayi n ze bɔpaka la nɛŋan. (1 Na. 7:​15-37) Bɔpaka la san sirum wɔɣɛ gaŋɛ ni 50 meters ge me wɔɣɛ gaŋɛ pu’usegɔ yire la, beni n sɔi ti Yeremia ka tɔɣɛ de saazuo woko yele? Hali yuun kɔbesi pooren, Yuda gɔnguleseba yuun yeti bɔpaka la yuun ka wɔɣɛ gaŋɛ Solomon pu’usegɔ yire la.

Gɔnmi’ileba ka sakɛ ti bɔpaka la saazuo woko san de ni satira 120, pu’usegɔ yire daangɔɔma la wan ta’an basɛ ti de ze’ele soŋa. Diimi deo woɣero n de wuu Egypt pu’usegɔ yire nayasi la tilin bɔba yuun yalegɛ mɛ ge ti saazuo la dɛna mika. Ge Solomon pu’usegɔ yire la yuun boi la de to’ore. Gɔnmi’ileba pa’alɛ ti ku lalesi la yuun ka kãregɛ zɔɛ santira ayoobe bii 2.7 meters. Theodor Busink n mi deto yɛla yeti: “Pu’usegɔ yire nayaŋa la daangoone n yuun kãregɛ se’em la zuo, bɔpaka la yuun kan ta’an wɔɣɛ paɛ santira 120.”

Daanse’ere ba yuun ka malum gulesɛ yelese’a n boi 2 Yelebiŋ’a 3:4 la soŋa. La boi bim ti diimi gɔnɔ ase’a yeti la dela “120” ge diimi gɔnɔ ase’a me ti to wan ta’an delum a n de wuu yuun kɔbesɛka n pa’asɛ bunuu Codex Alexandrinus, la yuun kɔbesɛka n pa’asɛ buyoobe Codex Ambrosianus la yeti, la dela “santira 20.” Beni n sɔi ti gɔngulesa wan ta’an tue gulesɛ “120”? Hebru yetɔɣum poan, yelebɛa la n de “kɔbega” la “santira” la wɔ̃ni mɛ. Bala la, gɔngulesa yuun ta’an tue gulesɛ “kɔbega” ge basɛ “santira.”

La boi bim ti to tiregeri mɛ ti to bɔkɛ ge pa’alɛ Solomon pu’usegɔ yire la yɛla nima nima ge sɛla yele n pakɛ paa dela pu’usegɔ yire la n ze’ele bo sɛla, n de vo’osum poan pu’usegɔ yire la. Bisɛ to puurɛ n pee se’em la Yehowa n beem a yamesi za’a ti ba pu’usa en a vo’osum poan pu’usegɔ yire la poan la!—Heb. 9:​11-14; Lil. 3:12; 7:​9-17.