1. Bem n wan ta eŋɛ Yuun Tusere Bisega la poan ti la dɛna pupeelum bɔ’ɔra tɔ?

 BISƐ la wan ta dɛna pupeelum se’em, se’em ma’a ti kum isigere la wan ta pɔsɛ Krista Yuun Tusere Bisega poan la! Sɛba woo nɛreba n ki la, iisi kiti mɛ ti ba le nyɛ ba. La me ani Yehowa la bala. (Yob 14:15) La wan dɛna pupeelum la nɛreba n wan le naɛ taaba tinparɛ wa zuo za’a la. Wuu to daa zamesɛ sɛla zaseŋɔ sɛka n tole la poan la, “tontɔɔdoma” la, sɛba yu’ura n boi vom gɔŋɔ la poan la “wan isige ge vɔna.” (Tm. 24:15; Yon 5:29) Daanse’ere to nɛreba zo’e zo’e n ki la wan pa’asɛ nɛresɛba ti ba wan isige ba yia ti ba vɔna tinparɛ wa zuo la. * Leyɛ’ɛsa, “sɛba n daɣɛ tontɔɔdoma,” bana dela sɛba n yuun ka nyɛ yɔ’ɔ ti ba zamesɛ baŋɛ Yehowa bii pu’usɛ en la yelemɛŋɛrɛ ge nyaa ki la “wan isige ge nyɛ gãkerɛ.”

2-3. (a) Wuu Isaiah 11:9, 10 n pa’alɛ se’em la, pa’alegɔ tuunkãtɛ n gani za’a asaala zi’irego poan wan ta dɛna la bem? (b) To wan sɔsɛ la bem zaseŋɔ wa poan?

² La yele pakɛ mɛ ti ba pa’alɛ sɛba za’a ti ba wan ta isige  la. (Isa. 26:9; 61:11) Bala la, ba wan dekɛ pa’alegɔ n gani za’a asaala zi’irego poan pa’alɛ nɛreba. (Kaalɛ Isaiah 11:9, 10.) Bem zuo? Yele deyima dela, sɛba n daɣɛ tontɔɔdoma la ti ba wan isige ba la nari ti ba zamesɛ baŋɛ Yezu Krista, Na’am la, lua bunɔ la, la Yehowa yu’urɛ la a sɔ’ɔlum la yele. Hali tontɔɔdoma la me wan nara ti ba zamesɛ baŋɛ Yehowa n yuun lilige a puti’irɛ n de se’em bɔ’ɔra tinparɛ wa fii fii la. Nɛreba wa n yuun tari sakerɛ la basɛba yuun ki mɛ ti la yue ge ti ba nyaa gulesɛ Yehowa yelesum la eŋɛ Baabule la poan. Tontɔɔdoma la sɛba n daɣɛ tontɔɔdoma la wan ta zamesɛ yɛla zo’e zo’e.

³ Zaseŋɔ wa poan ti wan sɔsɛ soke ana wa: Bem yɛla n wan basɛ ti pa’alegɔ tuunkãtɛ wa tum soŋa? Sore kani poan ti pa’alegɔ tuuma wa wan soŋɛ ti nɛreba yu’ura bɔna vom gɔŋɔ la poan wuusa bii ba kan bɔna bim? Soke ana lebesego pakɛ to mɛ zina beere. Wuu to wan zamesɛ se’em la, yetɔɣebiŋa ase’a n boi Daniel la Liligere gɔnɔ la poan la wan soŋɛ tɔ ti to bɔkɛ sɛla n wan eŋɛ ba san ta isige nɛreba kum poan. Yia, basɛ ya ti to geele ya pupeelum yelese’a ti Daniel 12:1, 2 yuun tɔɣɛ de yele.

4-5. Daniel 12:1 tɔɣɛ ba’asegɔ saŋa la yele la wani?

⁴ Kaalɛ Daniel 12:1. Daniel gɔŋɔ la pa’alɛ la yelese’a n wan eŋɛ doose taaba ba’asegɔ saŋa la poan. Makerɛ, Daniel 12:1 pa’alɛ ti Mikael, n de Yezu Krista la ze la “saazuo soŋera [Naayinɛ] nɛreba.” Yetɔɣebiŋere la n tɔɣɛ sɛla kalam wa la, yuun tum tuuma la yuun 1914 se’em ma’a ti ba yuun loe Yezu ti a dɛna Naayinɛ saazuo Na’am la Naba la.

⁵ Ge, ba yuun yele Daniel yeti Yezu wan ta “isige ze’ele” “susa’aŋɔ saŋa . . . ti ka taaba nan ka tabelɛ paɛ tinsɛka ta paɛ sankaŋa.” “Susa’aŋɔ saŋa” wa dela “mɛlesekãtɛ” ti Matu 24:21 tɔɣɛ de yele la. Yezu wan isige ze’ele bii zabɛ po’e Naayinɛ nɛreba susa’aŋɔ saŋa ba’asegɔ poan n de Armagedon. Liligere gɔŋɔ la tɔɣɛ nɛrebana wa yele yeti ba dela “nɛrekooŋɔ” la “n ze’ele mɛlesekãtɛ la poan yese na.”​—Lil. 7:9, 14.

6. Nɛrekuuŋɔ la san pĩɛ mɛlesekãtɛ la ba’asɛ, bem n wan eŋɛ? Tɔɣɛ pa’alɛ. (Le kaalɛ sɛba ti ba wan isige ba tinparɛ wa zuo la yele n boi “Sokese’a Ti Sɛba N Kaali La Sɔkera” la poan.)

⁶ Kaalɛ Daniel 12:2. Nɛrekuuŋɔ la san pĩɛ susa’aŋɔ saŋa la ba’asɛ, bem n wan eŋɛ? Yetɔɣebiŋere wa ka tɔɣeri Naayinɛ nɛreba vo’osum poan kum isigere yele n wan tum tuuma ba’asegɔ dabesa la poan wuu to yuun ti’isɛ se’em la. * Ge la pa’alɛ la kum isigere seko n wan tum tuuma tinpaalega la poan. Beni n sɔi ti to kɔ’ɛ to puti’irɛ bala? Ban dekɛ yelebire la n de “tontonɔ” tum tuuma Yob 17:16 poan se’em la vuurɛ me dela “Yɔɔ.” Bala pa’alɛ ti Daniel 12:2 tɔɣeri la nɛreba n wan sirum isige kum poan ba’asegɔ dabesa la ki’ileŋɔ poan la Armagedon pooren yele.   

7. (a) Sore kani poan ti nɛreba basɛba wan isige nyɛ “daarewoo nyɔvore”? (b) Beni n sɔi ti la wan dɛna “kum isigere soŋa”?

⁷ Daniel 12:2 n yeti nɛreba basɛba wan isige nyɛ “daarewoo nyɔvore” la vuurɛ?  La vuurɛ dela yuun 1,000 la poan sɛba ti ba isige la san zamesɛ baŋɛ bii kɔ’ɔn baŋera Yehowa la Yezu ge nana ba, ba wan nyɛ daarewoo nyɔvore. (Yon 17:3) Wana wan dɛna “kum isigere soŋa” gana ba yuun isige nɛreba kum poan se’em diimi sa la. (Heb. 11:35) Bem zuo? Sɛla n sɔi la nɛrebama yuun le ki mɛ.

8. Sore kani poan ti basɛba wan isige nyɛ “ɛregerɛ la zɛregerɛ wuusa”?

⁸ Ge daɣɛ sɛba woo ti ba wan isige la n wan sakɛ dɔla Yehowa pa’alegɔ la. Daniel yetɔɣebiŋere la yeti, basɛba wan isige nyɛ “ɛregerɛ la zɛregerɛ wuusa.” Bamam n wan eŋɛ kpenkpasi la zuo la ba yu’ura kan bɔna vom gɔŋɔ la poan ge me kan nyɛ daarewoo nyɔvore. Ge ba wan tuɣum nyɛ la “zɛregerɛ wuusa,” bii sa’aŋɔ. Bala la, Daniel 12:2 tɔɣɛ pa’alɛ la sɛla n wan paɛ nɛresɛba woo ti ba wan isige ba ge ti ba nyaa tuna tuunse’a.  * (Lil. 20:12) Basɛba wan nyɛ daarewoo nyɔvore ge basɛba kan nyɛ.

9-10. Mɛlesekãtɛ la san ta ba’asɛ, bem n wan le eŋɛ ge bani n “wan niɛ nyaɣera wuu saazuo n ani se’em la”?

⁹ Kaalɛ Daniel 12:3. “Susa’aŋɔ saŋa” la san ta ba’asɛ, bem n wan le eŋɛ? Daniel 12:2 la 3 tɔɣɛ pa’alɛ la sɛla n wan eŋɛ mɛlesekãtɛ la pooren.

¹⁰ Bani n “wan niɛ nyaɣera wuu saazuo n ani se’em la”? To nyɛ lebesego la ze’ele la Yezu yetɔɣum la n boi Matu 13:43 n yeti: “Sankaŋa la, tontɔɔdoma la wan niɛ nyaɣera soŋa soŋa wuu wuntɛɛŋa la ba Sɔ Na’am la poan.” Yezu n yuun yele sɛla kalam wa pa’alɛ ti a tɔɣeri la “Na’am la poan dayɔɔsi” n de a loore suurɔ la yele, bamam n wan naɛ la en di Na’am saazuo. (Mt. 13:38) Bala la, Daniel 12:3 tɔɣeri la looredoma la yele la ban wan ta tuna tuunsɛka Yuun Tusere Bisega la poan.

11-12. Nɛreba 144,000 la wan tuna la bem tuuma yuun 1,000 la poan?

¹¹ Sore kani poan ti looredoma la wan “basɛ ti nɛreba zo’e zo’e dɛna tontɔɔdoma”? Looredoma la wan naɛ la Yezu Krista tuna soŋa soŋa ta’an bisɛ pa’alegɔ tuuma la n wan ta tuna tinparɛ wa zuo yuun 1,000 la poan la. Nɛreba 144,000 la yeen kan dɛna la nadoma ma’a ge ba me wan dɛna malemadoma. (Lil. 1:6; 5:10; 20:6) Bala la, ba wan soŋɛ “tibera tisi la” nɛreba fii fii ta basɛ ti nɛresaaleba le ana kasi. (Lil. 22:1, 2; Eze. 47:12) Bisɛ la wan dɛna nyɛɛma se’em bɔ’ɔra looredoma la!

¹² Bani n wan dɛna “nɛreba zo’e zo’e” la ti ba wan basɛ ti ba dɛna tontɔɔdoma la? Ba dela sɛba ti ba wan ta isige ba, la sɛba n pĩɛ Armagedon la kɔnsɛba ti ba wan ta dɔɣɛ ba tinpaalega la poan. Yuun 1,000 la san ta ba’asɛ, nɛra woo wan ana kasi tinparɛ wa zuo. Bala la, wani ma’a ti ba wan dekɛ pɛni gulesɛ ba yu’ura eŋɛ vom gɔŋɔ la poan wuusa ge daɣɛ pɛnsulɛ?

13-14. Nɛresɛba n wan ta ana kasi bɔna tinparɛ wa zuo la, nari ti ba eŋɛ la bem ge ta’an nyɛ daarewoo nyɔvore?

¹³ La dela to tɛ̃ra ti nɛra san ana kasi,  bala ma’a ka pa’alɛ ti a wan nyɛ daarewoo nyɔvore. Ti’isɛ Adam la Hawa yele. Ba yuun ani la kasi ge ba yuun nari ti ba eŋɛ pa’alɛ ti ba nani Yehowa Naayinɛ ge ti a nyaa bo ba daarewoo nyɔvore. Ge susa’aŋɔ yele la dela, ba yuun zaɣesɛ mɛ ka kelese en.​—Arom 5:12.

¹⁴ Bem n wan eŋɛ nɛresɛba n wan ta bɔna tinparɛ wa zuo yuun 1,000 ba’asegɔ la poan? Ba za’a wan ta ana kasi. Nɛreba wa n wan ta ana kasi la za’a wan nam bo Yehowa bisega wuusa? Bii basɛba wan ana wuu Adam la Hawa n yuun ani kasi ge kelum ka tara sakerɛ la? Soke ana nari ti to nyɛ i lebesego mɛ ge to wan eŋɛ la wani nyɛ lebesego la?   

15-16. (a) Sankani ti asaala woo wan nyɛ yɔ’ɔ ti a eŋɛ pa’alɛ ti a tari yelemɛŋɛrɛ bɔ’ɔra Yehowa? (b) Ki’i gurebisɛ la san ta ba’asɛ, bem n wan eŋɛ?   

¹⁵ Ba wan paɣɛ Sitaana yuun 1,000. Sankaŋa la, ba kan bo en yɔ’ɔ ti a pã’asɛ nɛreba. Ge yuun 1,000 la san ta ba’asɛ, ba wan yu’ɛ Sitaana basɛ. A nyaa wan tiregera ti a pã’asɛ nɛreba n ani kasi la. Gurebisɛ la poan, nɛresaaleba woo n nyaa ani kasi bɔna tinparɛ wa zuo la, wan nyɛ yɔ’ɔ ti ba eŋɛ pa’alɛ ti ba na’aseri Naayinɛ yu’urɛ ge nam bo a bisega la. (Lil. 20:7-10) Bamam  n wan eŋɛ sɛla se’em ma’a ti Sitaana wan gurɛ ba bisɛ la n wan pa’alɛ nyaa ba yu’ura wan bɔna vom gɔŋɔ la poan wuusa.   

¹⁶ Nɛreba basɛba ti ba ka pa’alɛ ba kãlɛ wan ta ana wuu Adam la Hawa, zaɣesɛ Yehowa bisega la. Bem n wan paɛ ba? Liligere 20:15 yele to yeti: “Se’em yu’urɛ n daa ka boi vom gɔŋɔ la poan, ba daa dekɛ en lobe basɛ la bugum mɔɣerɛ la poan.” Sira, ba wan sa’am sɛba n wan eŋɛ kpenkpasi wa ti ba kan le bɔna. Ge asaaleba zo’e zo’e n ani kasi la wan ta pĩɛ ki’i gurebisɛ la. Ba yu’ura nyaa wan bɔna vom gɔŋɔ la poan wuusa.   

17. Maleka yuun yele Daniel ti bem n wan eŋɛ tomam saŋa? (Daniel 12:4, 8-10)

¹⁷ Bisɛ to ti’iseri beere sa’am yɛla wa ti la dɛna pupeelum se’em! Ge maleka la yuun le yele Daniel la ninmɔ’ɔrɛ yele n wan ta eŋɛ tomam saŋa wa, n de “ba’asegɔ saŋa la.” (Kaalɛ Daniel 12:4, 8-10; 2 Tim. 3:1-5) Maleka la yuun yele Daniel yeti: ‘Yelemɛŋɛrɛ mi’ilum me wan zo’e.’ Sira, Naayinɛ nɛreba wan  ta bɔkɛ yetɔɣebiŋa se’a n boi Daniel gɔŋɔ la poan soŋa soŋa. Maleka la yuun le yeti, sankana wa poan “putɔpa la wan tuna ba putotuuma, putodaana ka boi n wan bɔkɛ.”

18. La kan yue bem n wan paɛ putɔpa la?

¹⁸ Zina wa la ta’an ana wuu putɔpa la tuni ba putotuuma la mɛ ge kelum bɔna fai. (Ma. 3:14, 15) Ge la kan yue Yezu wan gãkɛ nɛresɛba n ani wuu buusi la ge yese ba fɔregɛ sɛba n ani wuu piisi la poan. (Mt. 25:31-33) Putɔpa wa kan pĩɛ mɛlesekãtɛ la, Naayinɛ me kan isige ba tinpaalega la poan. Ba yu’ura kan bɔna “tiisegɔ gɔŋɔ” la poan ti Malaki 3:16 tɔɣɛ de yele la.

19. La nari ti to eŋɛ la bem nananawa ge bem zuo? (Malaki 3:16-18)

¹⁹ Nananawa n de sansɛka n nari ti to eŋɛ pa’alɛ ti to ka pa’asɛ putɔpa la poan. (Kaalɛ Malaki 3:16-18.) Yehowa laɣeseri la sɛba ti a geele ba ti ba dela “tuulum lɔkɔ,” bii lɔkɔ n boi de to’ore. To sirum boti la to laɣum pa’asɛ nɛrebana poan.

20. Bem ki’i pu’ulumbiŋere ti ba yuun yele Daniel ge beni n sɔi ti hon ana lɛɛ gura pu’ulumbiŋere la?

²⁰ Yelemɛŋɛrɛ, to boi la ninmɔ’ɔrɛ saŋa. Ge la kan yue yelekirisi wan tum. La gee fii putotuuma kan le bɔna. Bala pooren, to wan nyɛ ti Yehowa n yuun yele Daniel ti “ho wan le isige to’e ho tɔ̃tɛ dabesa la ba’asegɔ poan” la sirum tum tuuma. (Da. 12:13) Hon ani la lɛɛ gura se’em ma’a ti ba wan ta “isige” Daniel la ho nɛresɛba n ki la? La san dɛna bala, tiregɛ tara yelemɛŋɛrɛ nananawa ge tara puti’irɛ ti ho yu’urɛ wan kelum bɔna Yehowa vom gɔŋɔ la poan.