1. To wan eŋɛ la wani baŋɛ yelemɛŋɛrɛdaana?

 YELEMƐŊƐRƐDAANA dela se’em n tɔɣeri yelemɛŋɛrɛ ge ita sɛla ti a ni yele la. (Ym. 15:4) Nɛreba mi ti ba wan ta’an dekɛ bamea delum en. To me boti la to mabiisi la ta’an dekɛ bamea delum to. Bem ti to wan eŋɛ ti ba ta’an dekɛ bamea delum to?

2. To wan eŋɛ la wani pa’alɛ ti to tari yelemɛŋɛrɛ?

² To kan ta’an pɛregɛ nɛreba ti ba dekɛ bamea delum to. La nari ti to eŋɛ sɛla. Nɛreba n wan ta’an dekɛ bamea delum to ani wuu to nyɛti ligeri se’em la. La kpe’em mɛ ti to nyɛ ligeri ge la dela naana ti la bɔregɛ. Yelemɛŋɛrɛ, Yehowa eŋɛ la yɛla n basɛ ti to dekɛ tomea delum en. A kan makɛ eŋɛ sɛla n wan sa’am to suure sɛla n sɔi la “eŋa n iti yelese’a woo la dela yelemɛŋɛrɛ.” (Ym. 33:4) A me boti la to tɔɣesa en. (Ep. 5:1) Basɛ ya ti to sɔsɛ ya Yehowa yamesi basɛba n yuun tɔɣesɛ ba saazuo sɔ wa ge me yuun eŋɛ pa’alɛ ti ba tari yelemɛŋɛrɛ. To me wan zamesɛ hala anuu n wan soŋɛ tɔ ti to tara yelemɛŋɛrɛ ti nɛreba ta’an dekɛ bamea delum to.

3-4. Nɔdɛ’ɛsa Daniel yuun eŋɛ la wani pa’alɛ ti a tari yelemɛŋɛrɛ ge bala basɛ ti la nara ti to geele la bem?

³ Nɔdɛ’ɛsa Daniel yuun eŋɛ la makesonɛ pa’alɛ ti a tari yelemɛŋɛrɛ. La boi bim ti Babilondoma n yuun nyɔkɛ en  ti a dɛna yameŋa ge la yuun ka yue ti nɛreba baŋɛ ti a dela mina ti ba wan ta’an dekɛ bamea delum en. Yehowa n yuun soŋɛ en ti a pa’alɛ Babilon Naba Nebukadnezar zaaseŋɔ la vuurɛ la, bala yuun basɛ ti nɛreba malum dekɛ bamea delum en mɛ paa. Daarɛ deyima, Daniel yuun nari ti a yele naba la ti Yehowa puurɛ ka pee la en ge naba ka boi n wan bɔta ti a wum yeledena wa. La yuun dela a dekɛ sukpe’ene tɔɣɛ se’ere n sɔi la Nebukadnezar sunsɔa ka ani soŋa! (Da. 2:12; 4:20-22, 25) Yuuma zo’e zo’e pooren, Daniel yuun le eŋɛ pa’alɛ ti a tari yelemɛŋɛrɛ la eŋa n yuun nyaŋɛ tɔɣɛ pa’alɛ yelekiriga gulesegɔ la n di’e Babilon nayire dangoone poan vuurɛ la. (Da. 5:5, 25-29) Pooren, Darius n de Midia buraa la, la a kpɛ’ɛndoma me yuun baŋɛ ti “vo’osum n boi de tɔka” n boi Daniel poan. Ba yuun sakɛ ti Daniel dela “yelemɛŋɛrɛdaana ge me daa ka tuna a tuuma bura bura bii tara ŋmɛlema tuuma.” (Da. 6:3, 4) Sira, hali baɣekaabereba wa n yuun de bisegadoma la yuun baŋɛ ti ba wan ta’an dekɛ bamea delum Yehowa yameŋa wa!

⁴ To san tɛ̃ra Daniel makesonɛ wa, la nari ti to soke tomea: ‘Sɛba n ka boi tansugere la poan mi ti mam dela nɛrekani taaba? Ba mi ti mam dela nɛresɛka n tuni n tuuma soŋa ge ti ba wan ta’an dekɛ bamea delum?’ Beni n sɔi ti la nara ti to lebese soke ana wa? Se’ere n sɔi la  to san tara yelemɛŋɛrɛ, to wan basɛ ti Yehowa nyɛ pɛ̃ka.

5. Beni n sɔi ti nɛreba yuun mina ti Hanania dela yelemɛŋɛrɛdaana?

⁵ Yuun 455 G.Y.B., se’em ma’a ti Nehemia n de Gɔvena la, yuun malum mɛ Yerusalem lalesi la ba’asɛ la, a yuun ɛ la burasɛba n tari yelemɛŋɛrɛ ti ba bisera tiŋa la. Nɛresɛba ti Nehemia yuun loe la, ba poan ayima yuun dela Hanania n de Suka Zɛ’an bisegadaana la. Baabule la tɔɣɛ Hanania yele yeti, a yuun “ba’ɛ dɛna la buraa n tari yelemɛŋɛrɛ ge zɔta yelemɛŋɛrɛ Naayinɛ la gana nɛreba zo’e zo’e.” (Ne. 7:2) Hanania n yuun nɔŋɛ Yehowa ge ka bɔta a sa’am a suure la n sɔi ti a yuun mɔ’ɛ nini la tuunsɛka woo ti ba yuun bo en. To san tara hala ana, la wan soŋɛ tɔ ti to tara yelemɛŋɛrɛ Naayinɛ pu’usegɔ tuuma poan.

6. Tikikus yuun eŋɛ la wani pa’alɛ ti a dela tuuntuna Paul zɔ n tari yelemɛŋɛrɛ?

⁶ Bisɛ Tikikus, n de tuuntuna Paul zɔsonkɔ makesonɛ la. Ban yuun nyɔkɛ Paul paɣɛ en yire la, a yuun dekɛ amea delum la Tikikus ge tɔɣɛ a yele yeti a dela “yelemɛŋɛrɛ tuuntuna.” (Ep. 6:21, 22) Paul yuun dekɛ amea delum en mɛ ge mina ti a wan tara gɔnɔ la ta bo mabiisi n boi Epesus la Kolose ge kpemese ba giila ge buɣelɛ ba suure. Tikikus yele wa basɛ ti to baŋɛ ti buraasi n tari sakerɛ la yelemɛŋɛrɛ n biseri to vo’osum poan yɛla zina wa.​—Kol. 4:7-9.

7. Ho wan ta’an zamesɛ la bem keendoma la keendoma soŋerɛdoma zɛ’an la ba tari yelemɛŋɛrɛ se’em ho tansugere poan la?

⁷ Zina beere wa, to puurɛ pee mɛ la keendoma la keendoma soŋerɛdoma n tari yelemɛŋɛrɛ se’em la. Wuu Daniel, Hanania, la Tikikus la, ba ni mɔ’ɛ la nini la ba tuuma. Makerɛ dela, to san keŋɛ bakwai la poan zamesegɔ, nɔkpe’ene kai ti ba ni puɣum pu tuuma la bo nɛra woo mɛ. Bisɛ keendoma la puurɛ n ni pee se’em la ba mi ti sɛba n tari tuunɛ la wan sirum maasum ge tum ba tuunɛ la soŋa zamesegɔ poan la! Makerɛ, to kan zɔta ti to beem to Baabule zamesegɔdaana ti a wa’an bakwai la ba’asegɔ poan zamesegɔ na ge ti’isa ti mabia wan tamɛ kan maasum a yetɔɣedɔɔ. To mi soŋa soŋa ti gɔnseto ti to wan tara kena na’am mɔɔlegɔ la wan bɔna. Mabiisi wa n tari sakerɛ la kɔ’ɔn bisa to mɛ soŋa soŋa, to me pu’usɛ Yehowa mɛ la bamam n boi la! Sarɔtɔ ani poan ti to wan ta’an eŋɛ pa’alɛ ti to tari yelemɛŋɛrɛ?   

8. To wan eŋɛ la wani pa’alɛ ti to tã tomea tara nɛreba yɛla poan? (Magaha 11:13)

⁸ To nɔŋɛ to mabiisi la mɛ ge ti ba yele me pakɛ tɔ. Ge la nari ti to tana tomea tara ge da liɣera ti to baŋɛ ba suɣelum yɛla. Yuun kɔbesɛka n deŋɛ nɛŋa Krista tansugere la poan, nɛreba basɛba yuun dela “yelebibisadoma ge tara ba nɛŋa kɛ̃’ɛsa nɛreba yɛla poan, ni tɔɣera yelese’a n ka nari ti ba tɔɣera.” (1 Tim. 5:13) To kan bɔta ti to ana wuu bamam la. Ge to makɛ yeti mabia n tɔɣɛ a yele bo ho ge yeti da yele nɛnɛra. Daanse’ere, mabipɔka n tɔɣɛ a bã’a bii gurebisɛ yele bo to ge yele to yeti to da tɔɣɛ bo nɛra. La nari ti to doose eŋa n yele to sɛla la. *  (Kaalɛ Magaha 11:13.) Basɛ ya ti to geele ya yɛla ase’a poan ti la yele pakɛ ti to da tɔɣera nɛreba suɣelum yɛla.

9. Deodoma wan eŋɛ la wani pa’alɛ ti ba tari yelemɛŋɛrɛ?

⁹ Deo poan. Nɛra woo n boi deo la poan ka nari ti a tɔɣera ba deo la suɣelum yɛla. Makerɛ, mabipɔka ta’an ita sɛla n de sia sia bɔ’ɔra a sira. Mabia wa wan dekɛ yele wa tɔɣɛ bo nɛreba ti vi di a pɔɣa la? Aayi, a kan eŋɛ bala! A nɔŋɛ a pɔɣa la mɛ ge me kan bɔta ti a eŋɛ sɛla daam en. (Ep. 5:33) Bunbilipaalesi me boti la ba bɔ’ɔra ba gilema. Dɔɣereba me nari ti ba mina bala soŋa. Ba kan tɔɣera ba kɔma la tuure yɛla bɔ’ɔra nɛreba ti vi di ba. (Kol. 3:21) Kɔma nari ti ba tara yɛm ge da tɔɣera ba deo yɛla bɔ’ɔra nɛreba ti vi da di ba deodoma. (Tɛɛ. 5:16) Deodoma san ka tɔɣera ba deo yɛla bɔ’ɔra nɛreba, la wan basɛ ti ba suure kɛ̃ taaba.

10. Ho wan eŋɛ la bem pa’alɛ ti ho dela zɔsonkɔ? (Magaha 17:17)

¹⁰ To zɔdoma. Tɛm busebo, to zo’e zo’e ni bɔta la to tɔɣɛ to suure yele bo to zɔsonkɔ. Saŋa ase’a la ta’an ni kpe’em mɛ. La ta’an ka malum tɔ ti to tɔɣera to yɛla bɔ’ɔra nɛreba ge to san baŋɛ ti sɛla ti to yele to zɔ la a dekɛ tɔɣɛ bo la nɛreba, la wan daam tɔ. Ge bisɛ to puurɛ n ni pee se’em nɛra san ka tɔɣɛ to suɣelum yele bo nɛra! A dela ‘zɔsonkɔ.’​—Kaalɛ Magaha 17:17.

11. (a) Keendoma la ba pɔɣeba iti la wani ti la pa’alɛ ti nɛreba wan ta’an dekɛ bamea delum ba? (b) To zamesɛ la bem la keema n maalɛ tansugere suɣelum yele ge nyaa ta paɛ yire? (Bisɛ foote la.)

¹¹ Tansugere la poan. Keendoma sɛba n ka tɔɣeri suɣelum yɛla bɔ’ɔra nɛreba, dela “suka zɛ’an ti kusebego ka daana, dɛna suka zɛ’an” bɔ’ɔra ba mabiisi la. (Isa. 32:2) To mi to wan ta’an tɔɣɛ bo burabana wa ge tara suure lua ti sɛla ti to tɔɣɛ bo ba la, ba kan tɔɣɛ bo nɛra.  To kan pɛregera ba ti ba tɔɣɛ suɣelum yɛla bo to. Leyɛ’ɛsa, to puurɛ pee mɛ la keendoma pɔɣeba, sɛla n sɔi la ba ka liɣeri ti ba baŋɛ yɛla ba sireba zɛ’an. Yelemɛŋɛrɛ, la dela yelesonɛ la keendoma pɔɣeba n ka mi to mabiisi suɣelum yɛla la. Keema ayima pɔɣa yeti: “Mam puurɛ pee la mam sira n ka yeti mam mabisɛba ti a kena kaara ba bii sɛba n eeri vo’osum poan soŋerɛ suɣelum yɛla, hali a ka puti ba yu’ura. Mam sira n ka yeti mam suɣelum yɛla la basɛ ti mam ka fabela la yelese’a ti n kan ta’an eŋɛ sɛsɛla. Bala basɛ ti mam ta’an sɔsa la nɛra woo mɛ tansugere la poan. La basɛ ti mam baŋɛ ti n san tɔɣɛ n suɣelum yɛla bo n sira, a kan tɔɣɛ yele aŋa bo nɛreba.” Yelemɛŋɛrɛ, to za’a waabi boti la nɛra woo mina ti to dela yelemɛŋɛrɛdoma. Bem hala n wan soŋɛ tɔ ti to ta’an tara yelemɛŋɛrɛ? Basɛ ya ti to sɔsɛ ya hala anuu yele.

12. Beni n sɔi ti to wan ta’an yeti nɔŋerɛ n wan basɛ ti to ta’an dekɛ tomea delum taaba? Bo makerɛ.

¹² Nɔŋerɛ n ni basɛ ti nɛreba ta’an dekɛ bamesi delum taaba. Yezu yeti nɔse’a ayi n gani za’a dela to nɔŋɛ Yehowa la to tadaana. (Mt. 22:37-39) Ton tari nɔŋerɛ bɔ’ɔra Yehowa la zuo ti to tɔɣesa a yelemɛŋɛrɛ tuuma la. Makerɛ, ton tari nɔŋerɛ bɔ’ɔra to mabiisi la zuo ti to ka tɔɣera ba suɣelum yɛla bɔ’ɔra nɛreba. To kan makɛ bɔta ti to tɔɣɛ nɛreba yele ti la dɛna daaŋɔ, vi bii susa’aŋɔ bɔ’ɔra ba.​—Yon 15:12.

13. Sarɔkuni poan ti sirege n mea wan soŋɛ tɔ ti to tara yelemɛŋɛrɛ?

¹³ Sirege n mea wan soŋɛ tɔ ti to tara yelemɛŋɛrɛ. Kristabia n siregeri amea kan bɔta ti a deŋɛ nɛŋa tɔɣɛ yele bo nɛreba nyɛ yu’urɛ. (Flp. 2:3) A kan bɔta ti a basɛ ti nɛreba baŋɛ ti eŋa mi la ninmɔ’ɔrɛ bii suɣelum yɛla ti la ka nari ti a tɔɣɛ de yele. Sirege n mea wan soŋɛ tɔ ti to kan tara to puti’irɛ tɔɣera yelese’a ti Baabule la bii to Baabule gɔnɔ la ka tɔɣɛ de yele la.   

14. Bɔkerɛ wan soŋɛ to la wani ti to ta’an tara yelemɛŋɛrɛ?

¹⁴ Bɔkerɛ wan soŋɛ Kristabia ti a mina ti “saŋa boi ti ho sina, ti saŋa me bɔna ti ho tɔɣɛ.” (Pa. 3:7) Buuri ase’a yetɔɣum poan, ba ni makɛ yeti, “yetɔɣum dela salenpɛɛlega ti siŋa dɛna salema.” Bala pa’alɛ ti, saŋa ase’a hon sini sɔ̃ɛ hon tɔɣɛ. Bala n sɔi ti Magaha 11:12 ka’am to yeti: “Mina n tari bɔkerɛ paa ni sina mɛ.” Geele makerɛ wa bisɛ. Keema n kumesɛ ti ba ni yele en ti a soŋɛ tansuga ase’a ti yɛla ni paɛ ba. Keema ayima n tɔɣɛ a yele se’em n wana, “A ni bisɛ amea soŋa mɛ ge ka tɔɣera tansuga la suɣelum yɛla.” Keema wa n tari bɔkerɛ se’em la basɛ ti amea tansugere keendoma tara la gilema bɔ’ɔra en. Ba mi ti a kan tɔɣɛ ba suɣelum yɛla bo nɛreba.

15. Bo makerɛ pa’alɛ birikinte n wan soŋɛ ho se’em ti nɛreba ta’an dekɛ bamea delum ho.

¹⁵ Birikinte le dɛna la halɛ deyima n wan basɛ ti to ta’an dekɛ tomea delum taaba. To ni dekɛ tomea delum birikina mɛ sɛla n sɔi la, to mi ti a tɔɣeri la yelemɛŋɛrɛ saŋa woo. (Ep. 4:25; Heb. 13:18) Makerɛ, to yeti ho boti la ho kumesɛ homea ta’an pa’ala soŋa. Bala la, ho yele la nɛra ti a kelese ho yetɔɣum la ge pa’alɛ hon wan eŋɛ se’em ta’an kumesɛ pa’asɛ. Ani ti hon bisɛ ti a wan yele ho yelemɛŋɛrɛ? La wan dɛna la mina n wan yele ho sɛla ti ho bɔta ti ho  wum la bii mina n wan yele ho yelemɛŋɛrɛ la? Yele la niɛ peelum mɛ. Baabule la yeti: “Hon ka’am nɛra nyani hon parum ti ho nɔŋɛ en mɛ. Ho zɔ san pɔɣɔlum hɔ, la ani soŋa mɛ.” (Mag. 27:5, 6) La boi bim ti yia la, la ni kpe’em mɛ bo to ti to sakɛ ge to zɔ la yelemɛŋɛrɛ ka’aŋɔ la n wan ta soŋɛ tɔ pooren.

16. Magaha 10:19 pa’alɛ ti nyɔkɛ n mea yele pakɛ la wani?

¹⁶ Nyɔkɛ n mea yele pakɛ mɛ to san bɔta ti nɛreba dekɛ bamea delum to. Nyɔkɛ n mea wan soŋɛ tɔ ti to tana to nɔɔrɛ tara se’em ma’a ti la ita to wuu to tɔɣɛ suɣelum yele la. (Kaalɛ Magaha 10:19.) To ta’an baŋɛ ti la ni kpe’em bo to mɛ ti to nyɔkera tomea, se’em ma’a ti to ni bɔna social media poan. To san ka bisɛ tomea soŋa, to ta’an ta tɔɣɛ suɣelum yɛla mɛ nɛrekuuŋɔ poan ge ka mina. To me san kɔ’ɔn mɔɔlɛ yele la elɛktronik poan, to kan tara yɔ’ɔ n wan pa’alɛ ba wan dekɛ tum tuuma se’em bii la wan daam nɛreba se’em. Nyɔkɛ n mea wan soŋɛ tɔ ti to ana siim se’em ma’a ti sɛba n yaɛ to la pã’asa tɔ ti to tɔɣɛ suɣelum yɛla n wan basɛ ti dɛŋa paɛ to mabiisi. Yeledena ta’an eŋɛ mɛ ti pulesi sɔkera to yɛla tinsɛka ti ba dekɛ nu’o paɣelɛ to tuuma la zuo. To wan ta’an dekɛ naresum yele la n de to “dekɛ gareŋerɛ ga [to] nɔɔrɛ” la tum tuuma yeledena la yɛla ase’a me poan. (Ym. 39:1) To san bɔna la to deodoma, to zɔdoma, to mabiisi la se’em woo, la nari ti to tara yelemɛŋɛrɛ. To san wan tara yelemɛŋɛrɛ, la nari ti to nyɔkera tomea.

17. To wan eŋɛ la wani ta’an dekɛ tomea delum taaba to tansugere la poan?

¹⁷ Bisɛ la de pupeelum se’em la Yehowa n dekɛ to pa’asɛ mabinɔɔrɛ poan n tari nɔŋerɛ la yelemɛŋɛrɛ la! To za’a dela to eŋɛ pa’alɛ ti to mabiisi la wan ta’an dekɛ bamea delum to. To za’a san tiregɛ tara nɔŋerɛ, sirege n mea, bɔkerɛ, birikinte la nyɔkɛ n mea, la wan soŋɛ tɔ ti to ta’an dekɛ tomea delum taaba tansugere la poan. La dela to tiregɛ ita pa’ala ti to dela nɛresɛba ti nɛreba wan ta’an dekɛ bamea delum to. Basɛ ya ti to tɔɣesa to Naayinɛ Yehowa ge kɔ’ɔn ita pa’ala ti to tari yelemɛŋɛrɛ.