1. Wuu Malaki 3:16 n pa’alɛ se’em la, bem gɔŋɔ ti Yehowa gulesa ge bem n boi bim?

 YEHOWA dekɛ la yuun tusa n wana gulesa gɔŋɔ n boi de to’ore. Gɔŋɔ wa tari la nɛreba yu’ura, kɔ’ɔn pɔsera la Abel n yuun de sɛɛradaana la. * (Lu. 11:50, 51) Yuuma zo’e zo’e poan ti Yehowa gulesa yu’ura pa’asa gɔŋɔ wa poan. Zina beere wa, gɔŋɔ wa tari la yu’ura tusa tusa. Baabule la poan, gɔŋɔ wa yu’urɛ dela “tiisegɔ gɔŋɔ,” “vom gɔŋɔ la,” la “vom gɔnkile la.” Zaseŋɔ wa poan, to wan tɔɣɛ de yele ti ku dela “vom gɔŋɔ la.”​—Kaalɛ Malaki 3:16; Lil. 3:5; 17:8.

2. Nɛrebani yu’ura n boi vom gɔŋɔ la poan ge to me wan eŋɛ la wani ti to yu’ura ta’an bɔna bim?

² Gɔŋɔ wa n boi de to’ore la tari la sɛba woo n nɔŋɛ Yehowa ge tara zoolum bɔ’ɔra a yu’urɛ la, yu’ura. Nɛrebana n wan nyɛ daarewoo nyɔvore. Zina beere wa, to san tara bɔnsoŋa la Yehowa doose la a Dayɔa Yezu Krista lua bunɔ kaabegɔ la poan, ba me wan ta’an gulesɛ to yu’ura eŋɛ gɔnkaŋa poan. (Yon 3:16, 36) To tari puti’irɛ ti to bɔna la saazuo bii tingɔŋɔ wa zuo woo, to za’a waabi boti la to yu’ura bɔna gɔnkaŋa poan!

3-4. (a) To yu’ura san bɔna gɔŋɔ la poan nananawa, bala pa’alɛ ti to wan nyɛ daarewoo nyɔvore? Tɔɣɛ pa’alɛ. (b) To wan sɔsɛ la bem yele zaseŋɔ kuna la zaseŋɔ sɛka n taɣelɛ la poan?

 ³ Bala pa’alɛ ti sɛba woo yu’ura n boi gɔŋɔ wa poan la wan ba’asum nyɛ daarewoo nyɔvore? To wan nyɛ sokere wa lebesego la Yehowa n tɔɣɛ sɛla bo Moses ti la bɔna Yɛhega 32:33. Yehowa yeti: “Se’em n tum be’em giisɛ mam la, n wan saalum a yu’urɛ mam gɔŋɔ la poan.” Bala la, ba ta’an saalum bii duuse yuse’a n boi gɔŋɔ la poan nananawa la. La ani wuu Yehowa ni dekɛ la pɛnsulɛ gulesɛ yu’ura wa la. (Lil. 3:5) La nari ti to tiregɛ basɛ ti to yu’ura bɔna gɔŋɔ la poan ta paɛ se’em ma’a ti la ana wuu ba dekɛ la pɛni gulesɛ to yu’ura ti la bɔna wuusa.   

⁴ Bala ta’an basɛ ti to sɔkera sokere ase’a. Makerɛ, Baabule la yeti bem la sɛba yu’ura n boi vom gɔŋɔ la poan la, la sɛba yu’ura n ka boi bim la? Sankani ti sɛba yu’ura n kelum bɔna gɔŋɔ la poan la, wan ta nyɛ daarewoo nyɔvore? Beni n wan eŋɛ sɛba n ki ge ka nyɛ yɔ’ɔ ta’an baŋɛ Yehowa la? La wan ta’an eŋɛ ti ba gulesɛ ba yu’ura eŋɛ gɔŋɔ wa poan? To wan nyɛ sokere ana lebesego zaseŋɔ wa poan la zaseŋɔ sɛka n taɣelɛ la.

NƐREBANI YU’URA N BOI GƆŊƆ LA POAN?

5-6. (a) Wuu Filipi 4:3 n pa’alɛ se’em la, nɛrebani yu’ura n boi vom gɔŋɔ la poan? (b) Sankani ti ba wan gulesɛ ba yu’ura eŋɛ vom gɔŋɔ la poan ti la bɔna bim wuusa?

⁵ Nɛrebani yu’ura n boi gɔŋɔ wa poan? To wan sɔsɛ la nɛreba sugumnɔɔrɛ bunuu yele ta’an nyɛ sokere wa lebesego. Nɛreba wa basɛba yu’ura boi vom gɔŋɔ la poan mɛ ge ti basɛba yu’ura ka bɔna bim.   

⁶ Nɛresɛba n deŋɛ nɛŋa la dela sɛba ti  ba loe ba ti ba naɛ la Yezu di na’am saazuo. Ba yu’ura boi vom gɔŋɔ la poan nananawa? Ɛɛ. Wuu tuuntuna Paul yetɔɣum la ti a yuun tɔɣɛ bo a “tuuntuneba tadaandoma” n boi Filipi n pa’alɛ se’em la, looredoma la ti ba beem ba ti ba naɛ la Yezu bisera la yu’ura boi vom gɔŋɔ la poan mɛ. (Kaalɛ Filipi 4:3.) Ge ba san bɔta ti ba yu’ura kelum bɔna gɔŋɔ la poan, la dela ba kelum tara yelemɛŋɛrɛ. Ba san nyɛ ba ki’i daalesum ge nyaa ki bii ge ti mɛlesekãtɛ la nyaa pɔsɛ, Naayinɛ nyaa wan gulesɛ ba yu’ura eŋɛ gɔŋɔ la poan ti la bɔna wuusa.​—Lil. 7:3.

7. Liligere 7:16, 17 soŋɛ to la wani ti to bɔkɛ se’em ma’a ti ba wan gulesɛ pisina la poan nɛrekuuŋɔ la yu’ura eŋɛ vom gɔŋɔ la poan ti la bɔna wuusa?

⁷ Nɛresɛba n pa’asɛ sugumnɔɔrɛ buyi dela pisena la poan nɛrekuuŋɔ la. Nananawa ba yu’ura boi vom gɔŋɔ la poan? Ɛɛ. Ba yu’ura wan kelum bɔna vom gɔŋɔ la poan ba san ta pĩɛ Armagedon? Ɛɛ. (Lil. 7:14) Yezu yuun yeti nɛrebana wa n ani wuu piisi la wan nyɛ “daarewoo nyɔvore.” (Mt. 25:46) Ge sɛba n wan pĩɛ Armagedon la kan nyɛ daarewoo nyɔvore bilam bilam. La wan ana wuu ba kelum dekɛ la pɛnsulɛ gulesɛ ba yu’ura eŋɛ vom gɔŋɔ la poan la. Yezu Yuun Tusere Bisega la poan, a “wan bisera ba ge tari ba ta paɛ vom ko’om bulesi la poan.” Nɛresɛba n sakɛ Krista pa’alegɔ la ge ti Yehowa gãkɛ ba ti ba tari yelemɛŋɛrɛ la, bamam ti ba wan gulesɛ ba yu’ura eŋɛ vom gɔŋɔ la poan ti la bɔna wuusa.​—Kaalɛ Liligere 7:16, 17.

8. Nɛrebani yu’ura n ka boi vom gɔŋɔ la poan ge bem n wan ta paɛ ba?

⁸ Nɛresɛba n pa’asɛ sugumnɔɔrɛ butã dela buusi la ti ba wan sa’am ba Armagedon poan la. Ba yu’ura ka boi vom gɔŋɔ la poan. Yezu yeti “ba wan ŋmaɛ nɛrebana wa basɛ ti ba kan bɔna daarewoo.” (Mt. 25:46) Vo’osum la yuun basɛ ti Paul yele to yeti “nɛrebana wa wan nyɛ gãkerɛ n de daarewoo sa’aŋɔ.” (2 Tes. 1:9; 2 Pe. 2:9) Bala mea n wan paɛ sɛba n mi soŋa soŋa ge tum be’em giisɛ zilam vo’osum la. Bamam me wan nyɛ daarewoo sa’aŋɔ ge daɣɛ daarewoo nyɔvore. La niɛ peelum ti ba kan nyɛ kum isigere. (Mt. 12:32; Mr. 3:28, 29; Heb. 6:4-6) Nananawa, basɛ ya ti to sɔsɛ ya nɛreba sugumnɔɔrɛ buyi ti ba wan isige ba tinparɛ wa zuo.

SƐBA N WAN NYƐ KUM ISIGERE

9. Wuu Tooma 24:15 n pa’alɛ se’em la, nɛreba sugumnɔɔrɛ buyi bani ti ba wan isige ba tinparɛ wa zuo ge ba yɛla boi tɔka tɔka la wani?

⁹ Baabule la tɔɣɛ la nɛreba sugumnɔɔrɛ buyi n wan nyɛ yɔ’ɔ ti ba isige ba ti ba vɔna daarewoo tinparɛ wa zuo, “tontɔɔdoma,” la “sɛba n daɣɛ tontɔɔdoma” la. (Kaalɛ Tooma 24:15.) “Tontɔɔdoma” la dela sɛba n yuun vɔi ge pu’usa Yehowa yelemɛŋɛrɛ sore poan. Ge “sɛba n daɣɛ tontɔɔdoma” la yuun ka pu’useri Yehowa la yelemɛŋɛrɛ. Yelemɛŋɛrɛ, ba zo’e zo’e yuun kɔ’ɔn tuna la be’em. Nɛreba sugumnɔɔrɛ buyi wa ti ba wan isige la pa’alɛ ti ba yu’ura boi vom gɔŋɔ la poan mɛ? Basɛ ya ti to sɔsɛ ya nɛreba sugumnɔɔrɛ buyi wa yele ta’an nyɛ sokere la lebesego.

10. Beni n sɔi ti ba wan isige “tontɔɔdoma” la ge ba poan basɛba wan nyɛ la bem yɔ’ɔ? (Le kaalɛ sɛba ti ba wan isige ba tinparɛ wa zuo la yele n boi “Sokese’a Ti Sɛba N Kaali La Sɔkera” la poan.)

¹⁰ “Tontɔɔdoma” la n de nɛresɛba n pa’asɛ sugumnɔɔrɛ bunaasi. Ban yuun vɔi la, ba yu’ura yuun boi vom gɔŋɔ la poan mɛ. Ban yuun ki la, ba saalum ba  yu’ura gɔŋɔ la poan basɛ mɛ? Aayi, sɛla n sɔi la Yehowa nɛŋan, ba kelum ‘vɔna’ mɛ ti a tɛ̃ra ba yele. Yehowa “daɣɛ ki’indoma Naayinɛ ge a dela vɔpa Naayinɛ, sɛla n sɔi la ba za’a vɔi mɛ a nɛŋan.” (Lu. 20:38) Bala pa’alɛ ti tontɔɔdoma la san isige vɔna tinparɛ wa zuo, ba yu’ura wan bɔna vom gɔŋɔ la poan ge la wan ana wuu ba dekɛ la “pɛnsulɛ” gulesɛ a la. (Lu. 14:14) Nɔkpe’ene kai ti sɛba ti ba wan isige ba la, ba poan basɛba wan nyɛ yɔ’ɔ dɛna “nabiisi tinparɛ wa za’a poan.”​—Ym. 45:16.

11. “Sɛba n daɣɛ tontɔɔdoma” la wan ta nara ti ba zamesɛ la bem ge ti ba yu’ura ta’an bɔna vom gɔŋɔ la poan?

¹¹ Nyaa geele sɛba n pa’asɛ sugumnɔɔrɛ bunuu, “sɛba n daɣɛ tontɔɔdoma” la yele. Daanse’ere ban yuun ka mi Yehowa yɛla la zuo, ba yuun ka vɔi tontɔɔ vom ge nyaa ki. Bala zuo la, ba yu’ura yuun ka boi vom gɔŋɔ la poan. Ge Naayinɛ san isige ba, a wan bo ba la yɔ’ɔ ti ba yu’ura ta’an bɔna vom gɔŋɔ la poan. “Sɛba n daɣɛ tontɔɔdoma” la wan ɛɛra la soŋerɛ paa. Basɛba yuun tuni la tuunfɛ̃’ɛsa n gaam be’ero ge nyaa ki. Denɛ zuo la, ba wan pa’alɛ ba, ba nari ti ba vɔna ba vom ti la makɛ la Yehowa tontɔɔ pa’alegɔ la se’em. Bala la, Naayinɛ Na’am la wan dekɛ la pa’alegɔ n gaŋɛ za’a asaala zi’irego poan pa’alɛ nɛreba.   

12. (a) Bani n wan ta pa’ala sɛba n daɣɛ tontɔɔdoma la? (b) Bem n wan paɛ sɛba n zaɣesɛ ka dekɛ sɛla ti ba zamesɛ la tum tuuma?

¹² Bani n wan ta pa’ala sɛba n daɣɛ tontɔɔdoma la? Ba dela nɛrekuuŋɔ la, la tontɔɔdoma la ti ba wan ta isige ba la. La wan eŋɛ se’em ti sɛba n daɣɛ tontɔɔdoma la yu’ura bɔna vom gɔŋɔ la poan la, la yele wan pakɛ ti ba tara bɔnsoŋa la Yehowa ge kã bamea bo en. Yezu Krista la a gãkerɛ tadaandoma la puurɛ wan pee ti ba baŋɛ sɛba n daɣɛ tontɔɔdoma wa n nyɛti nɛŋa tɔlega se’em. (Lil. 20:4)  Nɛresɛka n zaɣesɛ soŋerɛ wa, hali a san puɣum dɛna yuun 100, ba wan ku en. (Isa. 65:20) Yehowa la Yezu mi sɛla n boi nɛreba suuren mɛ ge me kan bo yɔ’ɔ ti nɛreba sa’am tinpaalega la.​—Isa. 11:9; 60:18; 65:25; Yon 2:25.

SƐBA WAN ISIGE NYƐ VOM TI SƐBA ISIGE NYƐ GÃKERƐ

13-14. (a) To yuun bɔkɛ Yezu yetɔɣum la n boi Yon 5:29 la, la wani? (b) Bem ti la nara ti to tɛ̃ra de yele a yetɔɣum wa poan?

¹³ Yezu me yuun tɔɣɛ sɛba n wan isige vɔna tinparɛ wa zuo yele mɛ. A yuun yeti: “Saŋa la keni na ti sɛba woo n boi yɔɔrɔ poan la wan wum a kɔ̃a ge yese na, sɛba n tum tuunsoma la wan isige ge vɔna ti sɛba n tum tuunbe’ero la wan isige ge nyɛ gãkerɛ.” (Yon 5:28, 29) Yezu yetɔɣum wa vuurɛ?

¹⁴ Sansɛka n tole la, to yuun bɔkɛ Yezu yetɔɣum wa ti la pa’alɛ la nɛresɛba ti ba wan isige ba la n wan tum tuunse’a ba kum isigere pooren; bala pa’alɛ ti basɛba wan isige tuna tuunbe’ero ge ti basɛba me isige tuna tuunsoma. Ge tɛ̃ra ti Yezu yuun ka yeti sɛba ti ba wan isige la wan tum tuunsoma bii ba wan tum tuunbe’ero. A yuun tɔɣɛ la sɛla n puɣum eŋɛ tole. A yuun tɔɣɛ la sɛba n “tum tuunsoma” la sɛba n “tum tuunbe’ero” yele. Bala pa’alɛ ti ba tum tuun aŋa mɛ ge nyaa ki. Bɔkerɛ boi bim mɛ, daɣɛ bala? Sɛla n sɔi la ba kan bo nɛra yɔ’ɔ ti a tum tuunbe’ero tinpaalega la poan. Bala la, sɛba n daɣɛ tontɔɔdoma la yuun tum tuunbe’ero aŋa mɛ ge nyaa ki. Ge to wan bɔkɛ Yezu n yeti basɛba “wan isige ge vɔna” ti basɛba “isige ge nyɛ gãkerɛ” la, la wani?

15. Bani n “wan isige ge vɔna” ge bem zuo?

¹⁵ Tontɔɔdoma la n yuun tum tuunsoma ge nyaa ki la “wan isige ge vɔna,” sɛla n sɔi la ba yu’ura puɣum deŋɛ bɔna vom gɔŋɔ la poan mɛ. Bala pa’alɛ ti Yon 5:29 n tɔɣɛ “sɛba n tum tuunsoma” kum isigere yele la, la Tooma 24:15 n tɔɣɛ “tontɔɔdoma” kum isigere yele la za’a dela buyina. To bɔkɛ se’em wa nyaa kɔ’ɔn makɛ mɛ la sɛla n boi Arom 6:7 n yeti: “Se’em n ki la, ba basɛ a be’em bo en mɛ.” Be’em sebo ti tontɔɔdoma wa yuun tum ge nyaa ki la saalum mɛ ge Yehowa kelum tɛ̃ra ba yelemɛŋɛrɛ tuuma la mɛ. (Heb. 6:10) Yelemɛŋɛrɛ, tontɔɔdoma wa ti ba wan isige la kelum nara ti ba tara sakerɛ la wan eŋɛ se’em ti ba yu’ura kelum bɔna vom gɔŋɔ la poan.

16. Ban yeti nɛreba “wan isige ge nyɛ gãkerɛ” la, pa’alɛ la bem?

¹⁶ Ge bem n wan paɛ sɛba n yuun tum tuunbe’ero ge nyaa ki la? La boi bim ti ban yuun ki la, ba be’em la saalum mɛ ge ba ka eŋɛ pa’alɛ ti ba tum tontɔɔ tuuma. Ba yu’ura ka boi vom gɔŋɔ la poan. Bala la, “sɛba n tum tuunbe’ero” kum isigere la, la “sɛba n daɣɛ tontɔɔdoma” kum isigere la ti Tooma 24:15 tɔɣɛ ba yele la za’a dela buyina. Bamam “wan isige ge nyɛ gãkerɛ.” * Bala pa’alɛ ti Yezu wan viisɛ ba yɛla bisɛ. (Lu. 22:30) La wan dekɛ la saŋa ti Yezu baŋɛ nyaa la nari ti ba yu’ura bɔna vom gɔŋɔ la poan bii la ka nari. Sɛba n daɣɛ tontɔɔdoma la san basɛ ba be’em la ge kã bamea bo Yehowa,  ba yu’ura nyaa wan bɔna vom gɔŋɔ la poan.   

17-18. Sɛba woo ti ba wan isige ba ti ba vɔna tinparɛ wa zuo la, nari ti ba eŋɛ la bem ge “tuunse’a” ti Liligere 20:12, 13 tɔɣɛ de yele la pa’alɛ la bem?

¹⁷ Sɛba ti ba wan ta isige ba la, yuun de tontɔɔdoma bii daɣɛ tontɔɔdoma woo, ba wan nara ti ba nana lɔɔse’a n boi gɔnkila paala la poan n wan ta bɔna yuun 1,000 la poan la. Tuuntuna Yon yuun tɔɣɛ pa’alɛ sɛla ti a nyɛ liligere poan la yeti: “Ti mam nyɛ ki’indoma, nɛrekãra la nɛrebibisi ti ba zɛ’a na’am kuka la nɛŋan ti gɔnkila yu’ɛ. Ge ba daa yu’ɛ la gɔnkile kuyima; ku dela vom gɔnkile la. Ba daa dekɛ la sɛla n boi gɔnkila la poan la gãkɛ ki’indoma la n tum tuunse’a la.”​—Lil. 20:12, 13.

¹⁸ Bem ‘tuuma’ ti ba wan dekɛ gãkɛ sɛba ti ba wan isige ba la? La wan dɛna la ba tum tuunse’a ge nyaa ki la? Aayi! Tɛ̃ra ti sɛba n ki la, ba basɛ ba be’em bo ba mɛ. Kalam la, ba “tum tuunse’a la” daɣɛ ban yuun vɔi ge tum tuunse’a la. Ge la tuɣum dɛna la ban dekɛ yelese’a ti ba pa’alɛ ba tinpaalega la poan tum tuuma se’em. Hali nɛreba n yuun tari sakerɛ n de wuu Noah, Samuel, David la Daniel wan nara ti ba zamesɛ baŋɛ Yezu Krista ge tara sakerɛ a lua bunɔ la poan. Nɛrebana san nara ti ba eŋɛ bala, sɛba n yi daɣɛ tontɔɔdoma la nari ti ba eŋɛ gaŋɛ bala!

19. Beni n nyaa wan paɛ sɛba n zaɣesɛ yɔ’ɔkãtɛ wa?

¹⁹ Beni n nyaa wan paɛ sɛba n zaɣesɛ yɔ’ɔkãtɛ wa? Liligere 20:15 yeti: “Se’em yu’urɛ n daa ka boi vom gɔŋɔ la poan, ba daa dekɛ en lobe basɛ la bugum mɔɣerɛ la poan.” Ɛɛ, ba wan sa’am ba ti ba kan le bɔna wuusa. Bisɛ la yele n pakɛ se’em ti to tiregɛ basɛ ti to yu’ura bɔna vom gɔŋɔ la poan bala wuusa!

20. Bem pupeelum tuunɛ ti ba wan tum Yuun Tusere Bisega la poan? (Bisɛ gɔŋɔ wa nɛŋa foote.)

²⁰ Bisɛ Yuun Tusere Bisega la n wan ta tara pupeelum se’em! Na’am wa poan, ba wan tum la pa’alegɔ tuuma n gaŋɛ za’a tinparɛ wa zuo. Ge la me wan dɛna la sansɛka ti ba wan viisɛ tontɔɔdoma la sɛba n daɣɛ tontɔɔdoma la sareŋɔ. (Isa. 26:9; Tm. 17:31) Ba wan tum pa’alegɔ tuuma wa la wani? Zaseŋɔ sɛka n taɣelɛ la wan soŋɛ tɔ ti to bɔkɛ yɔ’ɔkãtɛ wa ti to puurɛ pee.