Paul tɔɣɛ ti la bɔna 1 Korint 15:8 yeti: “Ba’asegɔ za’a la, a daa niɛ amea pa’alɛ la mam ti la ana wuu ba dɔɣɛ mam la kãserɛ.” Saŋa n tole la, to yuun tɔɣɛ pa’alɛ ti Paul yuun tɔɣeri la amea zi’irego poan yele, se’em ma’a ti a yuun nyɛ liligere poan ti Yezu tara kpe’eŋo bɔna saazuo la. La yuun ani wuu a nyɛ la yɔ’ɔ ti ba te’ele dɔɣɛ en bii isige en ti a tara vo’osum poan vom. La yuun dekɛ la yuuma zo’e zo’e ge ti kum isigere kaŋa taaba nyaa pɔsɛ. Ge ton malum zamesɛ gulesegɔ la soŋa soŋa se’em la basɛ ti to baŋɛ ti la yele pakɛ mɛ ti to demese to bɔkɛ yele wa se’em.

La dela yelemɛŋɛrɛ ti Paul tɔɣeri la sɛla n yuun eŋɛ se’em ma’a ti a yuun lebege Kristabia la. Ge eŋa n yeti ‘ba dɔɣɛ eŋa la kãserɛ’ la vuurɛ? La vuurɛ ta’an dɛna yɛla zo’e zo’e.

A teeri la di’i en mɛ ti la dɛna pakerɛ. Pɔka san dɔɣɛ kãserɛ, la ni dɛna la yele pakerɛ. Se’em ma’a ti Saul (se’em n yuun nyaa ta dɛna Paul la) yuun yea Damaskus ti a ta mɛlesɛ Kristakɔma la n boi bim la, a yuun ka ti’isɛ ti a wan nyɛ Yezu n isige kum poan la liligere poan. Paul n yuun lebege Kristabia la, yuun eŋɛ en la pakerɛ. La me yuun eŋɛ Kristakɔma sɛba ti a yea ti a ta mɛlesɛ ba la, la pakerɛ. Leyɛ’ɛsa yele wa yuun ba’ɛ dɛna la yele pakerɛ, ti la yuun basɛ ti a fɔ saŋa wana fii wa.​—Tm. 9:1-9, 17-19.

A teere la yuun eŋɛ la “sansɛka n ka makɛ poan.” Greek yelebire la ti ba lerege de ti “mina ti ba dɔɣɛ kãserɛ la,” ba me ta’an lerege dɛ ti “mina ti ba dɔɣɛ sansɛka n ka makɛ poan.” The Jerusalem Bible la lerege de yeti: “La daa ani wuu ba dɔɣɛ mam la sansɛka ti nɛnɛra ka ti’isɛ de yele.” Sansɛka ti Paul yuun lebege Kristabia la, Yezu yuun puɣum lebe saazuo mɛ. Kaalegɔ zɛse’esi n deŋɛ nɛŋa la poan la, Paul n yuun tɔɣɛ nɛresɛba yele la yuun nyɛ Yezu n isige kum poan lebe saazuo mɛ ge Paul mea yuun ka nyɛ en. (1 Ko. 15:4-8) Yezu n yuun kɔ’ɔn di’i Paul, niɛ amea pa’alɛ en la yuun yu’ɛ la yɔ’ɔ bo en ti la tuɣum ana wuu la dela “sansɛka n ka makɛ la.”

A yuun sirege la amea. Gɔnmi’ileba basɛba yeti Paul n yuun tɔɣɛ sɛla kalam wa la ta’an pa’alɛ ti a bisɛ pɔ’ɛ la amea. Paul yuun san ti’isa bala, a yuun boti a pa’alɛ ti eŋa ka nari ti a dɛna tuuntuna. Yelemɛŋɛrɛ, a yuun yeti: “Mam n pɔ’ɛ tuuntuneba la za’a poan ge ti la me ka nara ti ba yi’ira mam tuuntuna se’ere n sɔi la, mam daa namesɛ Naayinɛ tansugere la mɛ. Ge Naayinɛ zu’usegɔ zuo ti mam dɛna mam n de sɛla wa.”​—1 Ko. 15:9, 10.

Bala la, la ani wuu Paul yuun tɔɣeri la se’em ma’a ti Yezu yuun di’i en niɛ amea pa’alɛ en la, bii a teere saŋa la n ka makɛ se’em, bii eŋa n bisɛ ti a yuun ka nari ti a nyɛ liligere kaŋa taaba la. La yeen dɛna se’em, yele wa yuun dela ninmɔ’ɔrɛ bɔ’ɔra Paul. La yuun niɛ peelum bo en ti Yezu sirum isige kum poan mɛ ti nɔkpe’ene ka bɔna bim. Bala zuo ti saŋa zo’e zo’e a ni tɔɣera yele pakerɛ wa yele a san tɔɣera Yezu kum isigere la yele bɔ’ɔra nɛreba.​—Tm. 22:6-11; 26:13-18.