1. Ba ta’an soke to la bem to san bɔna tuuma zɛ‘an bii sukuu poan?

 LA NI ana hon la wani ho tuuntuna tadaana bii ho sukuu tadaana san soke ho sakerɛ yɛla? Hon paleŋa ni ɛkɛ mɛ? La ni ana to zo’e zo’e la bala. Ge sokere kaŋa wan soŋɛ tɔ ti to bɔkɛ nɛra la n ti’iseri se’em la eŋa n sakɛ bo yelese’a ti la ta’an dɛna naana bɔ’ɔra tɔ ti to mɔɔlɛ yelesoma la bo en. Ge saŋa ase’a, nɛra ta’an soke to sɛla bɔta ti a ŋmɛ nɔkpe’ene la tɔ. Bala ka eŋɛ to pakerɛ se’ere n sɔi la nɛreba basɛba pareni bɔ’ɔra to la ton sakɛ bo yelese’a la. Leyɛ’ɛsa, to boi la ‘ba’asegɔ dabesa la’ poan ti nɛreba ‘ka tara nɔyinɛ’ ge me tuna ‘gbiregere tuuma.’—2 Tim. 3:​1, 3.

2. Beni n sɔi ti to bɔta ti to dɛna nɛremamadoma?

² Ho ta’an ti’isa ti, ‘Mam wan eŋɛ la wani tɔɣera mama ge mina guŋerɛ nɛra san bɔta ti a ŋmɛ nɔkpe’ene la mam doose la mam sakɛ bo sɛla?’ Sɛla n wan soŋɛ hɔ dela ho dɛna nɛremama. Nɛremama tã amea tara mɛ a sunsɔa san nyie bii a san ka mina eŋa n wan lebese se’em. (Mag. 16:32) Ge la daɣɛ naana ti ho ana mama. Ho wan eŋɛ la wani ta’an dɛna nɛremama? Ho wan eŋɛ la wani ta’an lebese mama sore poan nɛra san ŋmɛ’ɛra nɔkpe’ene ho sakerɛ yɛla poan? Ho san dɛna dɔɣera, ho wan eŋɛ la wani soŋɛ ho kɔma ti ba ta’an tɔɣɛ po’e ba sakerɛ mama sore poan? Basɛ ya ti to bisɛ.

3. Beni n sɔi ti to wan ta’an yeti ho san dɛna nɛremama, bala ka pa’alɛ ti ho dela tarema? (2 Timoti 2:​24, 25)

³ Ho san dɛna nɛremama, bala ka pa’alɛ ti ho dela tarema.  La nari ti ho tara paŋa ta’an ana mama yeledaaŋɔ san paɛ hɔ. Mama laɣum pa’asɛ la ‘vo’osum wɔla la poan.’ (Ga. 5:​22, 23) Greek yelebire ti ba lerege de ti “mama” la, ba ta’an le dekɛ pa’alɛ yeho n gbiti ge ta ana baalam. Yeen ti’isɛ bisɛ yeho n gbiti ge ta ana baalam yele. La boi bim ti a kelum tara paŋa ge a nyaa ni ana la baalam. Tomam me wan eŋɛ la wani ta’an dɛna nɛremama ge kelum tara paŋa? To kan ta’an eŋɛ bala tomea paŋa poan. La nari ti to zusɛ Naayinɛ ti a dekɛ a vo’osum la soŋɛ tɔ ti to ta’an tara haledena wa. Nɛreba zo’e zo’e baŋɛ ban wan eŋɛ se’em ta’an ana mama. Makerɛ, mabiisi zo’e zo’e eŋɛ pa’alɛ ti ba dela nɛremamadoma se’em ma’a ti nɛreba tiregera ti ba ŋmɛ nɔkpe’ene la ba la. Wana basɛ ti nɛreba tara la putɛsonɛ la Sɛɛradoma. (Kaalɛ 2 Timoti 2:​24, 25.) Sodeni poan ti ho wan ta’an dɛna nɛremama ti la pa’alɛ ti ho tari paŋa?

4. To wan ta’an zamesɛ la bem yese Isaak n yuun de nɛremama la poan?

⁴ Yɛla zo’e zo’e n boi Baabule la poan n pa’alɛ ho san dɛna nɛremama, lan tari nyuurɔ se’em. Makerɛ dela Isaak yele la. Se’em ma’a ti a yuun ta kɛ̃’ɛra Gerar n de Filistidoma tiŋa la, a dindoma la yuun li la lɔɔsi la za’a ti a sɔ yamesi yuun tu la. Isaak n wan tuɣum zabɛ ni to’e zɛ’an la, a yuun dekɛ la a deodoma tee keŋɛ zɛ’an n zãɛ ta tu lɔɔsi toseto. (Pin. 26:​12-18) Ge Filistidoma la yuun le yeti ko’om la n boi zɛ’an la me dela bamam denɛ. Wana za’a poan, Isaak yuun eŋɛ pa’alɛ ti a tari la suma’asum. (Pin. 26:​19-25) Beni n yuun soŋɛ en ti a ana mama hali la nɛreba n yuun boti ba nyie a sunsɔa la? Nɔkpe’ene kai ti, a yuun biseri la a dɔɣereba n iti se’em, tɔɣesa Abraham n yuun tari suma’asum se’em, la Sarah n yuun ani ‘baalam ge tara sumama vo’osum’ la.—1 Pe. 3:​4-6; Pin. 21:​22-34.

5. Bem makerɛ n pa’alɛ ti dɔɣereba n de Kristakɔma wan ta’an pa’alɛ ba kɔma ti ba ana mama?

⁵ Kristakɔma Dɔɣereba, tara ya suure lua ti ya wan ta’an pa’alɛ ya kɔma ti ba dɛna nɛremamadoma. Basɛ ti to geele ya Maxence n de yuuma 17 yele la bisɛ. La yuun nari ti a ŋmibera la nɛresɛba n yiiri a sunsɔa sukuu la na’am mɔɔlegɔ poan la. A dɔɣereba yuun ma’ɛ la bamea pa’alɛ en eŋa n wan eŋɛ se’em ta’an dɛna nɛremama. Ba yeti, “Maxence nyaa bɔkɛ ti la ka kpe’em ti ho lebese sose’ere n ka ani soŋa poan nɛra san basɛ ti ho sunsɔa nyie. Ge nɛresɛka n sirum tari paŋa dela se’em n tã nyɔkera amea.” Pupeelum la dela, Maxence baŋɛ eŋa n wan eŋɛ se’em ta’an dɛna nɛremama.

6. Zusega wan soŋɛ to la wani ti to eŋɛ pa’alɛ ti to dela nɛremamadoma?

⁶ To wan eŋɛ la wani nɛreba san nyie to sunsɔa maɣesɛ wuu se’em ma’a ti nɛra sa’am to Naayinɛ la yu’urɛ bii ɛ̃regera Baabule la? La nari ti to zusɛ Yehowa ti a bo to a vo’osum la a yɛm ti to ta’an lebese mama sore poan. Ge la san dɛna ti pooren to baŋɛ ti ton lebese ni se’em la ka nari? To ta’an le zusɛ yele la poan ge ti’isɛ bisɛ ton wan eŋɛ se’em ta’an lebese soŋa yele san eŋɛ. Bala ti Yehowa wan dekɛ a zilam vo’osum la soŋɛ tɔ ti to ta’an nyɔkera tomea ge eŋɛ pa’alɛ ti to dela nɛremamadoma.

7. To san tɛ̃ra gulesegɔ basɛba, la wan soŋɛ to la wani bɔŋa n kpe’em poan? (Magaha 15:​1, 18)

⁷ Baabule gulesegɔ basɛba wan soŋɛ to la san kpe’em bo to ti to tɔɣɛ mama. Naayinɛ vo’osum la wan ta’an soŋɛ tɔ ti to tɛ̃ra gulesegɔ bama. (Yon 14:26) Makerɛ,  naresum yɛla n boi Magaha gɔŋɔ la poan la wan ta’an soŋɛ tɔ ti to ana mama. (Kaalɛ Magaha 15:​1, 18.) Baabule gɔŋɔ wa le pa’alɛ to la, lan ani soŋa se’em ti to ana mama bɔŋa la san kpe’em poan.—Mag. 10:19; 17:27; 21:23; 25:15.

8. Beni n sɔi ti la ana soŋa ti to ti’isɛ bisɛ sɛla n sɔi ti nɛreba ni soke to sakerɛ yɛla?

⁸ Bɔkerɛ ta’an soŋɛ to mɛ. (Mag. 19:11) Nɛra n tari bɔkerɛ ta’an nyɔkɛ amea nɛra san ŋmɛ’ɛra nɔkpe’ene la en a sakerɛ yɛla poan. Saŋa zo’e zo’e nɛreba san soke to sɛla, ba ni ka pa’alɛ to sɛla n sɔi ti ba soke to bala. Ge ti to nyaa lebese sokere la, la nari ti to mina ti to kan ta’an baŋɛ sɛla n basɛ ti nɛra la soke sokere la.—Mag. 16:23.

9. Sodeni poan ti Gideon yuun eŋɛ pa’alɛ ti a tari bɔkerɛ ge ana mama eŋa la Efraimdoma yele la poan?

⁹ Geele bisɛ Gideon n yun lebese Efraimdoma la se’em. Ba sunsɔa n yuun nyie ti ba soke en sɛla n sɔi ti a ka yi bamam ti ba naɛ la en zabɛ Israeldoma dindoma la. Ge beni n sɔi ti ba sunsɔa yuun nyie bala? Daanse’ere la yuun daam ba mɛ. Gideon yuun eŋɛ pa’alɛ ti a tari la bɔkerɛ. A yuun tiregeri ti a bɔkɛ sɛla n sɔi ti  ba sunsɔa nyie bala. Baabule la yeti, ‘eŋa n yuun tɔɣɛ ba’asɛ la, ba sunsɔa daa ma’ɛ mɛ.’—Ken. 8:​1-3.

10. Beni n wan soŋɛ tɔ ti to baŋɛ ton wan eŋɛ se’em ta’an lebese sɛba n sokere tɔ to sakerɛ yɛla la? (1 Peter 3:15)

¹⁰ To tuuntuna tadaana bii to sukuu tadaana ta’an soke to sɛla n sɔi ti to nana Baabule pa’alegɔ la. To wan tiregɛ tɔɣɛ po’e to sakerɛ ge le eŋɛ pa’alɛ ti to bo’ori nɛra la gilema. (Kaalɛ 1 Peter 3:15.) La wan ana soŋa ti ho ti’isɛ bisɛ a sokere la n wan ta’an soŋɛ ho se’em ti ho zamesɛ baŋɛ sɛla yele n pakɛ en gana ho ti’isa ti a boti a zɛregɛ la hon. La ka pakɛ la sɛla n sɔi ti nɛra soke sokere ge to ni tiregɛ mɛ ti to lebese en mama sore poan. To lebesego ta’an basɛ ti a le geele a puti’irɛ la bisɛ. La san ta dɛna ti a yetɔɣum la dela kɛsega, ton boti to eŋɛ sɛla dela to lebese mama sore poan.—Arom 12:17.

11-12. (a) Bem ti la nara ti ho ti’isa soŋa ta’an lebese sokese’a n kpe’em? (Bisɛ foote la.) (b) Bo makerɛ pa’alɛ nɛra sokere n wan ta’an bo yɔ’ɔ se’em ti ya sɔsɛ soŋa soŋa.

¹¹ Geele makerɛ wa bisɛ. Ho tuuntuna tadaana ta’an soke ho sɛla n sɔi ti to ka dita dɔɣum daarɛ de’eŋo. A puti’irɛ ta’an dɛna la ba ka bo’ori to yɔ’ɔ ti to ita sɛla ti to bɔta? Bii a ti’isɛ ti ton ka diti dɔɣum daarɛ de’eŋo dela, la wan sa’am tuuntuneba la nɔyinɛ la? To ta’an deŋɛ nɛŋa pɛɣɛ to tuuntuna tadaana la, la eŋa n ti’iseri nɛreba yele se’em la ge basɛ ti a baŋɛ ti tomam me boti la pupeelum bɔna tuuma la poan. Wana wan basɛ ti to nyɛ yɔ’ɔ naɛ la en sɔsɛ Baabule la n pa’alɛ dɔɣum daarɛ yele se’em la.

¹² To ta’an eŋɛ bala mea nɔɔ sansɛka ti nɛra soke to sokese’a n kpe’em. Buraasi n gã la taaba la pɔɣesi n gã la taaba yele la, ho sukuu tadaana ta’an yeti la nari ti Yehowa Sɛɛradoma tee ba puti’irɛ n de se’em yele la poan. A boti la a yeti a ka bɔkɛ Yehowa Sɛɛradoma puti’irɛ n de se’em doose la buraasi n gã la taaba la pɔɣesi n gã la taaba la? Bii la wan ta’an dɛna ti a zɔ bii a suɔ n laɣum pa’asɛ ba poan? A ti’isɛ ti to dini nɛresɛba n ani bala la me yoi? La wan nara ti to basɛ ti a baŋɛ ti to ti’iseri nɛra woo yele mɛ ge bɔ’ɔra nɛra woo gilema la eŋa n tari yɔ’ɔ ti a kɔ’ɛ a puti’irɛ se’em. b (1 Pe. 2:17) To nyaa wan pa’alɛ en Baabule la n wan soŋɛ to se’em to san dɔla a ge tara pupeelum to vom poan.

13. Sodeni poan ti to wan ta’an soŋɛ nɛra n ti’iseri ti yɛm ka boi bim ti to sakɛ bo Naayinɛ?

¹³ Nɛra san kɔ’ɔn ŋmɛ’ɛra nɔkpe’ene la tɔ, la ka nari ti to kɔ’ɔn kabeli ti’isa ti tomam mi eŋa n sakɛ bo yelese’a mɛ. (Titus 3:2) Makerɛ, ho sukuu tadaana yeti yɛm ka boi bim ti ho sakɛ bo Naayinɛ. La dela ho kɔ’ɔn ti’isa ti a sakɛ bo la lebege lebege pa’alegɔ ge mina de yɛla zo’e zo’e? Daanse’ere a yeen tɔɣera la eŋa n wum sɛla. Hon wan tuɣum basɛ ni ti ya sɔsɛ lebege lebege yele la, dekɛ sokere basɛ ho sukuu tadaana la ti a ti’isa de yele ge ti ya sɔsɛ pooren. Ho ta’an basɛ ti a kɛ̃ jw.org ta kaalɛ zaseŋɔ yele n tɔɣeri naaŋɔ yɛla. Pooren a ta’an bɔta ti a sɔsɛ zaseŋɔ yele bii vidiyo n boi bim. To san pa’ala ti to tari gilema sore kana poan, la wan ta’an soŋɛ en ti a bɔta ti a zamesɛ Baabule yɛla zo’e zo’e pa’asɛ.

14. Niall yuun dekɛ to intanɛt tuuma zɛ’an la soŋɛ a kilaasi bia la wani ti a bɔkɛ nɛreba n pareni se’em bɔ’ɔra Yehowa Sɛɛradoma?

¹⁴ Bunbilipaalega ayima yu’urɛ n de  Niall dekɛ to intanɛt tuuma zɛ’an la pa’alɛ ti nɛreba n ti’iseri Yehowa Sɛɛradoma yele se’em la daɣɛ yelemɛŋɛrɛ. A yeti, “Mam kilaasi tadaana ni yɛta mam yeti mam ka sakɛ bo Naayinɛ yɛla se’ere n sɔi la mam sakɛ bo la Baabule la gana yelemɛŋɛrɛ.” Eŋa n yuun ka bo Niall yɔ’ɔ ti a tɔɣɛ a sakerɛ yɛla la, Niall yuun pa’alɛ en ti a kɛ̃ jw.org ta bisɛ bɔberɛ la n de “Naaŋɔ lɔɣɔrɔ zamesegɔ yɛla la Baabule la.” Pooren, Niall yuun baŋɛ ti a tadaana la kaalɛ zaseŋɔ yele la mɛ ge bɔta ti a sɔsɛ naaŋɔ yele la en. Ho me ta’an nyɛ nyuurɔ wuu bala mea nɔɔ.

15. Dɔɣereba wan eŋɛ la wani pa’ala ba kɔma ti ba tɔɣera mama sore poan ba sukuu tadaandoma san zɛregera ba, ba sakerɛ yɛla zuo?

¹⁵ Dɔɣereba dela ba pa’ala ba kɔma soŋa ti ba ta’an mina ban wan tɔɣera mama sore poan se’em nɛreba san ta zɛregera ba sakerɛ yɛla zuo. (Yam. 3:13) Dɔɣereba basɛba san ita deodoma pu’usegɔ, ba ni pa’ala ba kɔma la ban wan tɔɣera se’em. Ba ni sɔsɛ la yelese’a ti ba wan ta’an soke ba sukuu poan, ita itipa’alegɔ pa’ala ba ge pa’ala ba ban wan tɔɣera mama sore poan se’em ti gilema bɔna bim.—Bisɛ daka la zuo n de “ Itipa’alegɔ Wan Ta’an Soŋɛ Ho Deodoma.”

16-17. Deodoma san ita itipa’alegɔ, la wan soŋɛ ba kɔma la wani?

¹⁶ Deodoma san ita itipa’alegɔ, la wan soŋɛ ba kɔma ti ba tara sakerɛ ge me wan ta’an tɔɣɛ ba sakerɛ yɛla bo nɛreba. “Young People Ask” bɔberɛ la n boi jw.org tari la bɔberɛ ti bunbilipaalesi wan ta’an gulesɛ yɛla. Ba maalɛ bɔberɛ wa ti la soŋɛ la bunbilipaalesi ti ba sakerɛ kpe’em ge me ta’an soŋɛ ba ti ba mina ban wan tɔɣera se’em. Deodoma san laɣum zamesa  bɔberɛ wa, la wan soŋɛ ba za’a ti ba mina ban wan tɔɣɛ po’e ba sakerɛ la se’em mama la gilema sore poan.

¹⁷ Bunbilipaalega ayima yu’urɛ n de Matthew tɔɣɛ pa’alɛ ban ni ita itipa’alegɔ ba deo poan la n soŋerɛ en se’em. Ba deodoma pu’usegɔ poan, Matthew la a dɔɣereba ni viisɛ mɛ bisɛ yelese’a n ta’an paɛ en ba sukuu poan. A yeti: “To ni ti’isɛ bisɛ la sokese’a ti ba wan ta’an soke. To ni viisɛ ge maasum la ton wan tɔɣɛ de se’em. Mam san mina n sakerɛ yɛla soŋa, mam puti’irɛ ni bɔna la bɔberɛ yinɛ ge ti la ni dɛna naana bɔ’ɔra mam ti n ana mama n san ni tɔɣera bɔ’ɔra nɛreba.”

18. Kolose 4:6 pa’alɛ to la bem ninmɔ’ɔrɛ yele?

¹⁸ To san puɣum pa’alɛ yɛla ti la niɛ peelumi la se’em me, daɣɛ nɛra woo n wan bɔta ti a bɔkɛ. Ge to san mina guŋerɛ ge tɔɣera mama sore poan, la wan soŋɛ ba. (Kaalɛ Kolose 4:6.) To san tɔɣera to sakerɛ yɛla bɔ’ɔra nɛra, la ta’an ana wuu ton ŋmɛ boole bo en. To ta’an ŋmɛ fii bo en bii to ŋmɛ kpe’eŋo kpe’eŋo pɔɣelum en. To san ŋmɛ fii bo en, a ta’an gi boole la ti to kelum ŋmɛ’ɛra. Bala mea nɔɔ ti to san mina guŋerɛ ge tɔɣera la mama, nɛreba wan bɔta ti ba kelese ge naɛ la to zamesa. Ge nɛra san ŋmɛ’ɛra nɔkpe’ene bii zɛregera tɔ, la ka nari ti to tɔkɛ̃ sɔsega la. (Mag. 26:4) Ge daɣɛ nɛra woo n ani bala. Nɛreba zo’e zo’e ta’an bɔta ti ba kelese.

19. Bem n wan basɛ ti to ana mama to san tɔɣera to sakerɛ yɛla?

¹⁹ To wan ta’an nyɛ nyuurɔ zo’e zo’e to san dɛna nɛremamadoma. Zusɛ Yehowa ti a soŋɛ hɔ ti ho ta’an ana mama ho san sɔsa la nɛra n ŋmɛ’ɛri nɔkpe’ene bii n zɛregeri hɔ.Tɛ̃ra ti, ho san ana mama, bala wan gu ti nɔkpe’ene kan bɔna ya sɔsega poan. Hon wan lebese mama la gilema sore poan la wan basɛ ti sɛba n ka boti ba kelese Baabule yelesum la tee ba puti’irɛ ge bɔta yelesum la. Ni ‘kɔ’ɔn maasum’ tɔɣera ho sakerɛ yɛla ge me ‘tɔɣera mama ti gilema bɔna bim.’ (1 Pe. 3:15) Yelemɛŋɛrɛ, hon de nɛremama la wan basɛ ti ho tara paŋa!