1. Peter yuun eŋɛ la bem la eŋa n yuun nyɔɣɛ zim yelekirega sore poan la?

 PETER yuun kɔ’ɔn lɔbera la zim yu’uŋɔ la za’a ge ka nyɔkera sɛsɛla. La yuun eŋɛ en la pakerɛ la Yezu n yele en yeti: ‘Tari ho ɔɔreŋɔ la sige ko’om la tiŋasuka sa la ho lobe ho yuka la ge ho wan nyɔɣɛ zim.’ (Lu. 5:4). Peter yuun ka tari puti’irɛ ti eŋa wan nyɛ zim nyɔɣɛ. La bala za’a la, a yuun doose la Yezu n pa’alɛ en se’em la. Eŋa n yuun lobe yuka la ba’asɛ la, a yuun nyɔɣɛ la zim ti yuka la ãasum. Peter n baŋɛ ti sɛla ti ba nyɛ la dela yelekirega la, la yuun eŋɛ eŋa la sɛba n laɣum lɔbera la ‘pakerɛ.’ Peter yeti: ‘Keŋɛ n zɛ’an sa ti mam dela be’emdaana.’ (Lu. 5:​6-9) Peter yuun ta’an ti’isa ti la ka nari ti a bɔna Yezu zɛ’an.

2. To san geele Peter yele la, la wan soŋɛ to la wani?

² Peter yuun tɔɣɛ la sira. A yuun dela be’emdaana. Baabule la basɛ ti to baŋɛ ti a yuun tɔɣɛ ge eŋɛ la yɛla ase’a ti pooren ti la daana en. La tabelɛ ana hon wuu lan yuun ani Peter se’em la? Ho tari la halebe’o ti ho tiregera ti ho basɛ dɛ bii hon tari la inbuulegɔ? La san dɛna bala, ho san zamesɛ Peter yele la, la wan buɣelɛ ho suure. Wani wani? Geele yele wa bisɛ: Ba ta’an kan gulesɛ ni Peter yele la eŋɛ Baabule la poan. Ge ba gulesɛ ti la bɔna bim ti to ta’an zamesɛ la sɛla. (2 Tim. 3:​16, 17) To san zamesɛ baŋɛ Peter n yuun tari inbuulegɔ ti la ana wuu tomam inbuulegɔ la, la wan soŋɛ tɔ ti to baŋɛ ti Yehowa ka eeri ti to ana kasi. A boti la to kɔ’ɔn tiregera la ka pakɛ la to inbuulegɔ la.

3. Beni n sɔi ti la nara ti to tiregera?

³ Beni n sɔi ti la nara ti to tiregera? Se’ere n sɔi la to san tiregera to wan nyɛ nɛŋa tɔlega. Makerɛ, nɛra san bɔta ti a mina kɔ̃legɔ ŋmɛ’a a wan dekɛ la yuuma zo’e zo’e zamesɛ. Pɔsega la, a ta’an ŋmɛ’ɛra burena ge a san kelum zamesa a  wan ba’asum ta zaŋɛ. Hali a san puɣum mina ŋmɛ’a la se’em me a wan ta tue. Hali la bala la, a ni kelum kɔ’ɔn tiregera mɛ zamesa. Bala mea nɔɔ, hali to san basɛ halebe’o, to ta’an ni ta yibegɛ lu mɛ ge kelum tiregera. To za’a ni ta’an tɔɣɛ bii ita yɛla ase’a ti pooren la ni ta daana tɔ. La se’em me, to san tiregera Yehowa wan soŋɛ tɔ ti to nyɛta nɛŋa tɔlega. (1 Pe. 5:10) Basɛ ya ti to bisɛ ya Peter n yuun tiregɛ se’em ge bisɛ Yezu n yuun tari giile bɔ’ɔra en se’em hali la a tuure la. Bala wan soŋɛ tɔ ti to ana tapilapi pu’usa Yehowa.

4. Wuu Luke 5:​5-10 n pa’alɛ se’em la Peter yuun tɔɣɛ amea yele la wani ge Yezu yuun buɣelɛ a suure la wani?

⁴ Baabule la ka pa’alɛ sɛla n sɔi ti Peter yuun yeti a dela be’emdaana bii eŋa n yuun tue se’em. (Kaalɛ Luke 5:​5-10.) Ge a yuun tue yɛla ase’a poan mɛ. Yezu yuun baŋɛ ti Peter zoti la dabeem. Bala yuun ta’an basɛ ti a ti’isa ti eŋa ka nari. Yezu me yuun le mina ti Peter ta’an kelum tara sakerɛ. Bala, Yezu yuun yele Peter yeti a ‘da basɛ ti sɛla daana en.’ Yezu n yuun tari putɛsonɛ la Peter se’em la n basɛ ti a yuun tee. Pooren Peter la a suɔ Andrew yuun basɛ ba zim nyɔka tuuma la ge dɔla la Mɛzaaya la tɛm woo. Bala yuun basɛ ti ba nyɛ la kã’a n ka tari makerɛ.—Mr. 1:​16-18.

5. Peter yuun nyɛ la bem kã’a la eŋa n yuun basɛ a dabeem ge sakɛ dɔla Yezu la?

⁵ Peter n yuun doli Krista la yuun basɛ ti a nyɛ la zi’irego poan yɛla zo’e zo’e. A yuun nyɛ Yezu n tiberi nɛreba, sa’asa kolekpabɛ’ɛsi ge isige nɛreba kum poan. b (Mt. 8:​14-17; Mark 5:​37, 41, 42) Peter yuun le nyɛ la liligere n pa’alɛ Yezu n wan ta dɛna Naayinɛ Na’am la poan naba se’em beere sa’am. Peter yuun ka malum tamɛ yele dena wa. (Mark 9:​1-8; 2 Pe. 1:​16-18) Peter yuun kan nyɛ ni yele dena wa a yuun san ka doli ni Yezu. Bisɛ a puurɛ n yuun pee se’em la eŋa n yuun ka basɛ ti putɛbe’ero wa gu en ti a kan nyɛ kã’a wa la!

6. Peter yuun nyaŋɛ a inbuulegɔ la me yoi? Tɔɣɛ pa’alɛ.

⁶ Hali la Peter n yuun nyɛ ge wum yelese’a la, a yuun kelum tara inbuulegɔ mɛ. Geele yele ana wa bisɛ. Yezu n yuun tɔɣɛ pa’alɛ eŋa n wan nyɛ namesegɔ ge ki doose yetɔɣebiŋ’a la n pa’alɛ se’em la, Peter yuun zɛregɛ en mɛ. (Mark 8:​31-33) Peter la tuuntuneba la basɛba yuun ni  kɔ’ɔn ŋmɛ’ɛra la nɔkpe’ene ti ba baŋɛ mina n gani za’a ba poan. (Mark 9:​33, 34) Yu’unseko ti ba yuun yeti ba ku Yezu la Peter yuun eŋɛ la kiri kiri ta kɛ buraa kayima tuberɛ wike. (Yon 18:10) Yu’unkuŋɔ mea nɔɔ dabeem zuo ti Peter yuun zaɣesɛ ti eŋa ka mi Yezu sugumnɔɔrɛ butã. (Mark 14:​66-72) Bala yuun basɛ ti Peter kaasɛ mɛ paa.—Mt. 26:75.

7. Peter yuun nyɛ la bem yɔ’ɔ Yezu kum isigere pooren?

⁷ Yezu yuun ka gɛ̃ tuuntuna wa suure n sa’am la basɛ. Yezu n yuun isige kum poan la, a yuun bo Peter la yɔ’ɔ ti a eŋɛ pa’alɛ ti a tari nɔŋerɛ bɔ’ɔra en. Yezu yuun yele Peter ti a sirege amea bisera a piisi la. (Yon 21:​15-17) Peter yuun sakɛ ya. A yuun boi Yerusalem mɛ Pentecost dabeserɛ la ge yuun laɣum pa’asɛ sɛba ti zilam vo’osum la loe ba yia la.

8. Peter yuun tue la wani Antiok tiŋa?

⁸ Hali Peter n yuun de loore Kristabia la, a yuun kelum tara inbuulegɔ mɛ. Naayinɛ yuun tum Peter ti a keŋɛ Cornelius n daɣɛ Yuda nɛra la zɛ’an. Bilam ti a yuun dekɛ a zilam vo’osum la loe en. Bala niɛ peelumi pa’alɛ ti Naayinɛ ka gãseri. Bala la, sɛba n daɣɛ Yudadoma la wan ta’an pa’asɛ Krista tansugere la poan. (Tooma 10:​34, 44, 45) Bilam pooren ti Peter yuun pɔsɛ ita yɛla ase’a ti a ka tabelɛ zaasum ti a wan eŋɛ, naɛ la satima la dita. (Ga. 2:12) Ge Yuda kristakɔma la yuun ti’isi ti Yudadoma la satima yuun ka nari ti ba laɣum dita. Sɛba n yuun tari putɛdenɛ la n yuun keŋɛ Antiok la, Peter yuun ka le naɛ la satima mabiisi la dita. Daanse’ere a yuun zoti la dabeem ti la wan daam Yuda kristakɔma la. Tuuntuna Paul yuun nyɛ Peter niɣisi tuuma la mɛ ge kɔ’ɔn ka’am en nɛreba la nɛŋan. (Ga. 2:​13, 14) Hali la tuure aŋa wa poan la Peter yuun kelum tiregera mɛ. Beni n yuun soŋɛ en?

9. Yon 6:​68, 69 pa’alɛ ti Peter yuun tari yelemɛŋɛrɛ la wani?

⁹ Peter yuun tari la yelemɛŋɛrɛ ka basɛ ti sɛla gu en ti a kan dɔla Yezu. Daarɛ deyima ti Yezu yuun tɔɣɛ sɛla ti podɔleba la yuun ka bɔkɛ la, Peter yuun eŋɛ pa’alɛ ti a tari yelemeŋerɛ. (Kaalɛ Yon 6:​68, 69.) Ba yuun ka guri bii ɛɛra ti a tɔɣɛ pa’alɛ de vuurɛ n de se’em ti ba zo’e zo’e yuun basɛ Yezu dɔlega la. Ge Peter yuun ka eŋɛ bala. A yuun mi ti Yezu ma’a n tari ‘yetɔɣesebo n bo’ori vom sebo n ka tari ba’asegɔ.’

10. Yezu yuun eŋɛ la bem pa’alɛ ti a tari suure lua la Peter? (Bisɛ foote la.)

¹⁰ Yezu yuun ka zaɣesɛ Peter. Yu’unseko ti Yezu yuun yeti a ki la, a yuun mi ti Peter la tuuntuneba la wan zaɣesɛ en. La bala za’a la, Yezu yuun tari puti’irɛ ti Peter wan kelum tara sakerɛ. (Luke 22:​31, 32) Yezu yuun bɔkɛ ti ‘vo’osum la ani la lɛɛ ge inya la n ani buulegɔ.’ (Mark 14:38) Hali Peter n yuun zaɣesɛ ti a ka mi Yezu la, a yuun ka gɛ̃ tuuntuna wa basɛ. Yezu n yuun isige a kum poan la, a yuun keŋɛ la Peter zɛ’an se’em ma’a ti a yuun bɔna a ma’a la. (Mark 16:7; Luke 24:34; 1 Ko. 15:5) Bisɛ la yuun kpemese Peter giila se’em!

11. Yezu yuun soŋɛ Peter la wani ti a mina ti Yehowa wan soŋɛ en?

¹¹ Yezu yuun basɛ ti Peter baŋɛ ti Yehowa wan soŋɛ en. Yezu n yuun isige kum poan la a yuun doose la yelekirega sore poan basɛ ti Peter la a tuuntuneba tadaandoma la nyɔɣɛ zim. (Yon 21:​4-6) Nɔkpe’ene kai ti yelekirega wa basɛ ti Peter  baŋɛ ti Yehowa wan bo en yelese’a n pakɛ en la. Daanse’ere tuuntuna wa yuun tiɛ la Yezu yetɔɣum la ti a yeti Yehowa wan bo sɛba woo n ‘kɔ’ɔn ɛɛra Na’am la yia la’ yelese’a n pakɛ ba la. (Mt. 6:33) Bala yuun basɛ ti Peter dekɛ na’am mɔɔlegɔ tuuma la ti la dɛna yia a vom poan ge nyaa basɛ zim nyɔka tuuma la. Bala la, yuun 33 Y.B. poan Pentecost daarɛ la, a yuun dekɛ la sukpe’ene mɔɔlɛ ge soŋɛ nɛreba zo’e zo’e ti ba baŋɛ yelemɛŋɛrɛ la. (Tm. 2:​14, 37-41) Pooren a yuun soŋɛ Samariadoma la satima la ti ba baŋɛ Krista. (Tm. 8:​14-17; 10:​44-48) Nɔkpe’ene kai ti Yehowa dekɛ Peter mɛ tum zo’e zo’e ti a soŋɛ nɛreba buuri buuri ti ba pa’asɛ tansugere la poan.

12. To san tɛ̃ra lan yuun ani Peter se’em la, bala wan soŋɛ to la wani to san tara inbuulegɔ ti la daana to?

¹² Yehowa wan soŋɛ tɔ ti to kɔ’ɔn tiregera ge la ta’an kan dɛna naana ti to ita bala. Yele yele wuu to san tara inbuulegɔ ti la yue. Saŋa ase’a to inbuulega la ta’an basɛ ti la kpe’em bo to gana la yuun ani Peter se’em la ge Yehowa wan bo to paŋa ti to kelum tiregera. (Ym. 94:​17-19) Makerɛ, mabia ayima n yuun gã la a buraasi tadaandoma ti la yue ge ti a nyaa ta baŋɛ yelemɛŋɛrɛ la. A yuun tirɛge basɛ yalumtuuma wa ge dabesa ase’a a kunkoma’asum la ni makɛ daana en mɛ. Beni n soŋɛ en ti a ta’an tiregera? A yuun yeti: “Yehowa n kpemese mam giila.” A le yeti: “Mam zamesɛ baŋɛ ti Yehowa ni dekɛ la a vo’osum la . . . , soŋɛ tɔ ti to vɔna vom sebo ti a bɔta. Hali la mam tuusiŋɔ la za’a, . . . Yehowa kpemese mam giila mɛ ge tara mam tuna tuuma.”

13. To wan eŋɛ la wani ta’an tɔɣesa Peter makesonɛ la n boi Tooma 4:​13, 29, 31? (Bisɛ foote la.)

¹³ Asaala dabeem n yuun basɛ ti Peter tue ge eŋa n yuun zusɛ la, a yuun nyɛ la sukpe’ene ge ka le zɔta dabeem. (Kaalɛ Tooma 4:​13, 29, 31.) Bem n wan ta’an nyaŋɛ to dabeem la. Geele yelese’a n yuun paɛ mabia ayima yu’urɛ n de Horst n de bunbilipaalega yuun bɔna Nazi Germany. Sankaŋa la nɛreba yuun dela ba pu’usa pu’usegɔ n boi de to’ore dɛna “Heil Hitler” ti la pa’alɛ ti “Hitler wan faaɛ to basɛ.” La boi bim ti Horst yuun mi ti la ka nari ti a pu’usɛ pu’usegɔ wa ge saŋa kasɛka eŋa n yuun tari dabeem la a tikiyadoma  la a sukuu tadaandoma la zuo ti a ni zɔ dabeem ge pu’usɛ pu’usegɔ wa. Horst dɔɣereba yuun ka zɛregɛ en ge ba yuun naɛ la en zusɛ Yehowa ti a bo en sukpe’ene. Horst dɔɣereba n yuun soŋɛ en ge ti a dekɛ amea delum Yehowa la zuo, a yuun ze’ele mɛ kankaŋi. Pooren a yuun yeti: “Yehowa yuun ka malum basɛ mam.” c

14. Keendoma n tari giile wan eŋɛ la wani ta’an buɣela mabiisi sunya?

¹⁴ Yehowa la Yezu kan malum gɛ̃ to basɛ. Peter n yuun zaɣesɛ Yezu la, a yuun nari ti a kɔ’ɛ la a puti’irɛ soŋa. A basɛ a dɔlega bii a tiregɛ kelum dɛna Krista podɔla? Yezu yuun zusɛ la Yehowa ti a soŋɛ Peter ti a sakerɛ la da miim. Yezu yuun tɔɣɛ zusega la yele bo Peter mɛ ge tara puti’irɛ ti pooren Peter wan ta’an kpemese eŋa podɔleba la giila. (Lu. 22:​31, 32) Bisɛ lan de subuɣelegɔ yele se’em bɔ’ɔra Peter a san ni ti’isa Yezu yetɔɣum wa. La san ta nara ti to kɔ’ɛ to puti’irɛ yele poan, Yehowa ta’an doose keendoma poan buɣelɛ to suure ti to kelum tara sakerɛ. (Ep. 4:​8, 11) Mabia ayima yu’urɛ n de Paul ge me dɛna keema tiregɛ buɣela la a mabiisi suure. A ni yele mabisɛba giila n kɔ’ɔsɛ la ti ba ti’isɛ bisɛ Yehowa n eŋɛ se’em basɛ ti ba baŋɛ yelemɛŋɛrɛ la. A nyaa ni basɛ ti ba baŋɛ ti Yehowa n tari yelemɛŋɛrɛ nɔŋerɛ la zuo a kan tamɛ ba yele. A tɔɣɛ ki’ilum yeti, “Mam nyɛ mabiisi zo’e zo’e giila n kɔ’ɔsɛ ti Yehowa soŋɛ ba ti ba kelum tiregera.”

15. Peter la Horst yele la pa’alɛ ti Matu 6:33 de yelemɛŋɛrɛ la wani?

¹⁵ Wuu Yehowa n yuun bo Peter la tuuntuneba la innaanɛ poan lɔɣɔrɔ se’em la, a me wan bo to innaanɛ poan lɔɣɔrɔ to san  basɛ ti na’am mɔɔlegɔ tuuma la dɛna yia bunɔ to vom poan. (Mt. 6:33) Tingɔŋɔ Wa Za’a Zaberɛ II n yuun ba’asɛ la, Horst ti to puɣum tɔɣɛ a yele la yuun ti’isɛ la eŋa n wan eŋɛ se’em ta’an tum sore ŋmɛ’a tuuma la. Nɔŋɔpɛɛlega n yuun tari en ti a yuun ka ti’isɛ ti a wan ta’an bisera amea ge kelum tuna sore ŋmɛ’a tuuma la. A wan eŋɛ la wani? A yuun kɔ’ɛ a puti’irɛ ti a eŋɛ bisɛ Yehowa n wan soŋɛ en se’em, nyaa dekɛ bakwai la za’a tum sore ŋmɛ’a soŋerɛ tuuma se’em ma’a ti kaarɛ bisegadaana yuun bɔna ba zɛ’an la. Bakwai la ba’asegɔ poan, la yuun eŋɛ en la pakerɛ la kaarɛ bisegadaana la n dekɛ ligeri n boi envelope poan bo en ge ka pa’alɛ mina n dekɛ ligeri la bo en. Ligeri la yuun zo’e mɛ ti a wan ta’an bisera amea ŋmaresi zo’e zo’e sore ŋmɛ’a tuuma la poan. Horst yuun geele bo’olum wa ti la dela sɛla ti Yehowa eŋɛ pa’alɛ ti a wan bisera en. A yuun dekɛ a vom dabesa za’a tuna la Na’am tuuma la.—Ma. 3:10.

16. Beni n sɔi ti la nara ti to zamesɛ Peter la a gɔnɔ toyi la yɛla zo’e zo’e?

¹⁶ Bisɛ Peter puurɛ n yuun pee se’em la eŋa n yuun yele Yezu yeti a ŋmɛregɛ a zɛ’an ti a yuun ka ŋmɛregɛ la! Krista yuun kɔ’ɔn kumesɛ Peter mɛ ti a tara sakerɛ la makesonɛ bɔ’ɔra Kristakɔma. To me zamesɛ nyɛ nyuurɔ zo’e zo’e la eŋa n yuun kumesɛ Peter se’em la. Peter yuun tɔɣɛ yele ana wa ase’a a gɔnɔ toyi ti a gulesɛ bo yuun kɔbesɛka n deŋɛ nɛŋa Kristakɔma tansugere la. Zaseŋɔ seko n taɣelɛ la, to wan zamesɛ yele aŋa a gɔnɔ toyi la poan ge bisɛ ton wan eŋɛ se’em ta’an dekɛ a tum tuuma zina beere wa.