1. Ge ti tuuntuna Peter nyaa ki la, Naayinɛ yuun basɛ ti a eŋɛ la bem?

 TUUNTUNA Peter yuun mi ti la kan yue a wan ki. A yuun dekɛ la yuuma zo’e zo’e pu’usa Yehowa, naɛ la Yezu tuna, keŋɛ tisi sise’esi poan ta mɔɔlɛ na’am yetɔɣesomɔ la ge yuun le dɛna tigere zuo bisegadoma la ayima. Peter n yuun mi ti la kan yue a wan ki la, Yehowa yuun bo en la tuuma zo’e zo’e ti a tum. Yuun 62 ta paɛ 64 Y.B bɔba, Yehowa yuun basɛ ti a gulesɛ la Baabule gɔnɔ toyi; yia la yi’i Peter. A yuun tari puti’irɛ ti a gɔnɔ wa wan ta soŋɛ Kristakɔma a kum la pooren.—2 Pe. 1:​12-15.

2. Beni n sɔi ti to wan yeti Peter yuun gulesɛ a gɔnɔ la sansɛka n nari poan?

² Peter yuun gulesɛ gɔnɔ wa la se’em ma’a ti ‘namesegɔ paara’ mabiisi la ti ba suure yuun sa’am la (1 Pe. 1:6) Nɛrebɛ’ɛsi n yuun tiregeri ti ba pa’ala pumpɔreŋɔ pa’alegɔ ge me bɔta ti ba basɛ ti halebe’ero bɔna Krista tansugere la poan. (2 Pe. 2:​1, 2, 14) Kristakɔma n yuun kɛ̄’ɛri Yerusalem la ba’asegɔ yuun pɔ̃ri mɛ. Arom lengimadoma n yuun yeti ba sa’am tiŋa la ti Yudadoma sɔ’ɔlum la kan le bɔna. (1 Pe. 4:7) Nɔkpe’ene kai ti Peter gɔnɔ la n yuun soŋɛ Kristakɔma la ti ba mina ba wan eŋɛ se’em ta’an ŋmibera yelese’a n paari ba la ge maasum bamea gura beere sa’am yɛla. b

3. Beni n sɔi ti la nara ti to zamesa Peter gɔnɔ toyi la?

 ³ La boi bim ti Peter yuun gulesɛ gɔntuna wa bo la yuun kɔbesɛka n deŋɛ nɛŋa Kristakɔma la ge Yehowa dekɛ ba pa’asɛ la A Yelesum la poan. Tomam me ta’an nyɛ nyuurɔ gɔntuna wa poan. (Arom 15:4) Tomam n boi tingɔŋɔ wa poan ti nɛreba tara sarumbe’ero la, yɛla me ta’an paɛ tɔ ti la kpe’em bo to ti to pu’usa Yehowa soŋa. Leyɛ’ɛsa, la kan yue mɛlesegɔ wan paɛ tɔ ti la gana mɛlesegɔ seko n yuun paɛ Yudadoma tiŋa ti ba nyɛ sa’aŋɔ la. Peter gɔnɔ toyi la tari la kã’aŋɔ zo’e zo’e n wan soŋɛ tɔ. Wana wan soŋɛ tɔ ti to kan zɔta nɛresaala, tara nɔŋerɛ bɔ’ɔra taaba ge kɔ’ɔn gura Yehowa dabeserɛ la. Yele ana wan soŋɛ keendoma ti ba ta’an bisera piisi la soŋa soŋa.

4. Wuu 2 Peter 3:​3, 4 n pa’alɛ se’em la, bem n wan ta’an basɛ ti to sakerɛ miim?

⁴ To laɣum la nɛresɛba n ka tari sakerɛ Baabule yetɔɣebiŋ’a la poan bɔna. Sɛba n ka boti Yehowa Sɛɛradoma yele la ɛregeri ba mɛ sɛla n sɔi la, ba yele wunse’eren sa ti ba’asegɔ la ye me na. Sɛba n zɛregeri to la parum ti la kan malum wa’ana. (Kaalɛ 2 Peter 3:​3, 4.) Ho san bɔna na’am mɔɔlegɔ poan ta tɔɣɛ bo nɛra, ho tuuma tadaana bii ho yire nɛra ti a yele wana, ta’an basɛ ti ho sakerɛ miim. Peter tɔɣɛ pa’alɛ sɛla n wan ta’an soŋɛ tɔ.

5. Bem n wan soŋɛ tɔ ti to tara putɛsonɛ la ba’asegɔ daarɛ la? (2 Peter 3:​8, 9)

⁵ La ta’an ana basɛba wuu Yehowa gu’uni mɛ ka sa’ana tingɔŋɔ la. Peter yelesum la ta’an soŋɛ tɔ ti to tara putɛsonɛ, sɛla n sɔi la Yehowa n geele tɛm se’em la boi la de to’ore la asaala n geele tɛm se’em la. (Kaalɛ 2 Peter 3:​8, 9.) Yuun tusere dela dabeserɛ yinɛ Yehowa nɛŋan. Yehowa tari la sugeri ka bɔta ti a sa’am nɛnɛra. A dabeserɛ la san paɛ, a wan sa’am tingɔŋɔ la. Bisɛ lan de yɔ’ɔ se’em bɔ’ɔra tɔ ti to dekɛ tɛm la n gee la mɔɔlɛ bo nɛra woo.

6. To wan eŋɛ la wani ta’an gura Yehowa dabeserɛ la? (2 Peter 3:​11, 12)

⁶ Peter yele to yeti to ‘gura’ Yehowa dabeserɛ la. (Kaalɛ 2 Peter 3:​11, 12.) To wan eŋɛ la wani ta’an eŋɛ bala? Dabeserɛ woo la dela to tiregɛ ti’isa kãsɛka ti to wan nyɛ tinpaalega la poan. Bisɛ nyɛ homea ti ho vo’oseri la kusebego soŋɔ, dita dinɔ’ɔma ge nyɛta ho nɛreba n ki la ti ba isigera ba. Le bisɛ nyɛ homea ti ho pa’ali la nɛreba n tabelɛ bɔna yuun kɔbesi zo’e zo’e n tole ti ba baŋɛ Baabule yetɔɣebiŋ’a n tum tuuma se’em. Ho san ti’isa taɣesa bala, la wan soŋɛ hɔ ti ho ana lɛɛ kɔ’ɔn gura. La me wan dɛna te’elego bo ho ti ho mina ti ba’asegɔ dabesa la kɔ’ɔn pɔ̃ra mɛ. Ton puɣum mina to beere sa’am n wan ta ana se’em la, to kan basɛ ti pumpɔreŋɔ pa’alegɔdoma ‘pã’asɛ’ tɔ.—2 Pe. 3:17.

7. Dabeem wan ta’an eŋɛ to la wani?

⁷ Ton kɔ’ɔn gura Yehowa dabeserɛ la, to boti to tiregɛ kɔ’ɔn mɔɔla la yelesoma la bɔ’ɔra nɛreba. Ge saŋa ase’a bɔŋa la ta’an basɛ ti dabeem tara tɔ ti to ka bɔta ti to tɔɣɛ. Beni n sɔi? Se’ere n sɔi la to zoti la dabeem la nɛreba. Bala n yuun paɛ Peter. Yu’unseko ti ba yuun nyɔkɛ Yezu la, Peter yuun zaɣesɛ ti eŋa daɣɛ Yezu podɔla ge yuun le ki’isɛ ti eŋa ka mi en! (Mt. 26:​69-75) Ge pooren Peter yuun nyaŋɛ a dabeem la ge nyaa gulesɛ yeti: ‘Da tari ya dabeem la nɛrese’em ge me da basɛ ya ti  la daana ya.’ (1 Pe. 3:14) Peter yelesum wa basɛ ti to tara puti’irɛ ti to wan ta’an nyaŋɛ dabeem.

8. Bem n wan ta’an soŋɛ tɔ ti to kan tara dabeem? (1 Peter 3:15)

⁸ Beni n wan ta’an soŋɛ tɔ ti to nyaŋɛ dabeem? Peter yele to yeti: ‘Na’asa ya Krista ti a dɛna ya daana ya sunya poan.’ (Kaalɛ 1 Peter 3:15.) Bala pa’alɛ ti la nari ti to ti’isa taɣesa Yezu n tari paŋa ge dɛna to Daana la to Naba la. Ho san nyɛ yɔ’ɔ ti ho mɔɔlɛ yelesoma la bo nɛreba ti la ana ho wuu dabeem n tari ho la, tɛ̃ra to Naba la yele. Bisɛ nyɛ en ti a dela Naba n boi saazuo sa ti malesi tusetusa bɔna a zɛ’an. Tɛ̃ra ti a tari la ‘saazuo la tingɔŋɔ wa za’a kpe’eŋo.’ Bala la, a wan ‘bɔna la tɔ ta paɛ tingɔŋɔ wa ba’asegɔ.’ (Mt. 28:​18-20) Peter yele to yeti, to kɔ’ɔn ‘maasum ta’an tɔɣɛ po’e’ to sakerɛ la. Hon wan bɔta ti ho mɔɔlɛ bo nɛra tuuma zɛ’an, sukuu poan bi zɛsɛka poan me sa? Ti’isɛ bisɛ sansɛka ti ho wan ta’an mɔɔlɛ bo nɛra ge maasum hon wan tɔɣɛ sɛla la. Zusɛ nyɛ sukpe’ene ge tara puti’irɛ ti Yehowa wan soŋɛ hɔ.—Tm. 4:29.

9. Bɔnkani poan ti Peter yuun eŋɛ pa’alɛ ti a ka tari nɔŋerɛ? (Bisɛ foote la.)

⁹ Peter yuun baŋɛ eŋa n wan eŋɛ se’em tara nɔŋerɛ bɔ’ɔra nɛreba. A yuun boi  bim mɛ se’em ma’a ti Yezu yuun yeti: ‘Mam bo’ori ya la nɔpaalɛ ti ya nɔŋɛ taaba; wuu mam n nɔŋɛ ya se’em la, ya me nɔŋɛ taaba.’ (Yon 13:34) Hali la bala za’a, Peter yuun basɛ ti ba pɛregɛ en mɛ nyaŋɛ ti a zaɣesɛ ti a kan naɛ la satima mabiisi la di. Tuuntuna Paul yuun yeti Peter n yuun eŋɛ sɛla la dela niɣisi tuuma. (Ga. 2:​11-14) Peter yuun sakɛ Paul kã’aŋɔ la. Gɔnɔ toyi la poan, Peter tɔɣɛ pa’alɛ ti la ka nari ti to yeen ti’isa ti to nɔŋɛ mabiisi la ge to eŋɛ pa’alɛ ti to sirum nɔŋɛ ba.

10. To san tara ‘mabinɔŋerɛ ti niɣisi ka bɔna bim’ la vuurɛ? Tɔɣɛ pa’alɛ. (1 Peter 1:22)

¹⁰ Peter yuun yeti to tara ‘mabinɔŋerɛ ti niɣisi da bɔna bim.’ (Kaalɛ 1 Peter 1:22.) To san tara nɔŋerɛ bala, to nani bɔ’ɔra la yelemɛŋɛrɛ la. Yelemɛŋɛrɛ wa dela ton pa’ali ti ‘Naayinɛ ka gãseri’ la. (Tm. 10:​34, 35) To kan ta’an doose Yezu n yeti to tara yelemɛŋɛrɛ se’em la to san nɔŋɛ basɛba tansugere la poan ge basɛ basɛba. La dela yelemɛŋɛrɛ ti to lɛni basɛba gana basɛba wuu Yezu n yuun ani se’em la. (Yon 13:23; 20:2) Ge Peter tiɛ to ti to kɔ’ɔn tiregɛ tara ‘mabiŋɔnerɛ’ bɔ’ɔra to mabiisi la za’a.—1 Pe. 2:17.

11. La vuurɛ dela bem ti to nɔŋɛ nɛreba ‘paa to suuren’?

¹¹ Peter yuun yeti ‘to nɔŋɛ taaba paa yese to suuren.’ Bala pa’alɛ ti to tara nɔŋerɛ bɔ’ɔra nɛra la san puɣum kpe’em bo to ti to nɔŋɛ en. Makerɛ, mabia san eŋɛ to sɛla ti la daam tɔ, to ni kɔ’ɔn bɔta ti to lerege la sanɛ ge daɣɛ nɔŋerɛ. Ge Peter n yuun zamesɛ sɛla Yezu zɛ’an la dela, Naayinɛ ka boti to lerege sanɛ. (Yon 18:​10, 11) Peter yuun gulesɛ yeti: ‘Se’em san eŋɛ ya be’em, me da eŋɛ ya en be’em. Ge tuɣum kã ya bo en.’ (1 Pe. 3:9) Ho san tara nɔŋerɛ paa la wan soŋɛ hɔ ti ho tara itisoŋɔ bɔ’ɔra nɛreba ge me zu’usɛ ba hali ba san eŋɛ la sɛla ti la daana tɔ.

12. (a) Ho san tara nɔŋerɛ paa, la wan basɛ ti ho eŋɛ la bem? (b) Wuu vidiyo la zuo n de Preserve the Precious Gift of Unity n pa’alɛ se’em la, hon boti ho tiregɛ eŋɛ la bem?

¹² Peter gɔnseko n deŋɛ nɛŋa la, a dekɛ la yelesum la n de ‘nɔŋɛ taaba paa’ la tum tuuma. Nɔŋerɛ dinɛ wan soŋɛ tɔ ti to dita sugeri ‘yɛla zo’e zo’e poan’ ge daɣɛ yɛla fii poan. (1 Pe. 4:8) Daanse’ere Peter yuun tiɛ la Yezu n yuun pa’alɛ en eŋa n nari ti a dita sugeri se’em yuuma fii pooren la. Sankaŋa la Peter yuun ti’isɛ ti eŋa iti la som la eŋa n yuun ti’isɛ ti la nari ti a di sugeri bo a tadaana ‘ta paɛ sugumnɔɔrɛ buyopɔi’ la. Ge Yezu yuun pa’alɛ eŋa la tomam ti to dita sugeri ‘ta paɛ saŋa sugumnɔɔrɛ pisiyopɔi la ayopɔi.’ Bala pa’alɛ ti la ka tari tɛka. (Mt. 18:​21, 22) La san kpe’em bo ho ti ho dekɛ kã’aŋɔ wa tum tuuma, da basɛ ti ho giila kɔ’ɔsɛ. Saŋa ase’a, la ni kpe’em bo Yehowa yamesi za’a n ka di mi’a la ti ba dita sugeri. Sɛla n pakɛ nananawa dela ho tiregɛ la ho paŋa za’a di sugeri bo ho mabia ge tara suma’asum la en. c

13. Beni n wan ta’an basɛ ti la kpe’em bo keendoma ti ba bisera mabiisi la?

¹³ Peter yuun ka makɛ tamɛ Yezu n yuun isige a kum poan ge yele en yeti, ‘Gura n piisi wa’ la. (Yon 21:16) Ho san dɛna keema, ho mi ti a tɔɣeri bɔ’ɔra la hon me. La ta’an kpe’em bo keema mɛ ti a nyɛ nɛŋa tuna ninmɔ’ɔrɛ tuunɛ wa. Keendoma dela ba deŋɛ nɛŋa bisera bamea deodoma innaanɛ poan, tara nɔŋerɛ bɔ’ɔra ba ge soŋera ba ti ba bi vo’osum  poan. Ba me mu’ɛ la nini na’am mɔɔlegɔ tuuma la poan ge bɔ’ɔra yetɔɣum zamesegɔ la laɣesegɔ poan. Basɛba me soŋeri la Imma’asum Yɛla Bisegadoma tuuma ti basɛba me soŋera Mɛa Tuuma Wele. Yelemɛŋɛrɛ, keendoma kɔ’ɔn tara la tuuma zo’e zo’e!

14. Beni n wan ta’an soŋɛ keendoma ti ba bisera piisi la? (1 Peter 5:​1-4)

¹⁴ Peter yuun yele a keendoma tadaandoma la yeti, ba ‘bisera Naayinɛ piisi la.’ (Kaalɛ 1 Peter 5:​1-4.) Ho san dɛna keema, to mi ti ho nɔŋɛ ho mabiisi la mɛ ge bɔta ti ho bisera ba. Ge saŋa ase’a, la ta’an ana ho wuu tuuma la zo’e mɛ bii ho taregɛ mɛ kan le ta’an tuna ho tuuma la soŋa. Ho wan ta’an eŋɛ la bem? Yele Yehowa lan ani hon se’em. Peter yuun yeti: ‘Hon se’em me n ta’an soŋera sontii ho tara pansɛka ti Naayinɛ bo ho la soŋera nɛreba.’ (1 Pe. 4:11) Daanse’ere yelese’a n paari ho mabiisi la dela yelese’a ti ho kan ta’an maalɛ a tingɔnbe’o wa poan. Ge tɛ̃ra ti ‘dunkeema nɛŋadaana la,’ Yezu Krista ta’an soŋɛ ba gana hon wan ta’an eŋɛ sɛla la. A wan ta’an eŋɛ bala zina beere wa la tinpaalega la poan. Naayinɛ yele keendoma ti ba tara nɔŋerɛ bɔ’ɔra to mabiisi la, ba bisera ba ge me dɛna ‘makesonɛ bɔ’ɔra ba.’

15. Keema ayima kaari piisi la bisa la wani? (Bisɛ foote la.)

¹⁵ Yuuma zo’e zo’e n wana ti William dɛna keema. A bɔkɛ ti la yele pakɛ mɛ ti a kaara mabiisi la bisa. COVID-19 bã’a la n yuun pɔsɛ la, eŋa la a keendoma tadaandoma yuun basɛ ti la dɛna la ninmɔ’ɔrɛ bɔ’ɔra ba ti ba kaara mabiisi n boi ba gurupdoma la woo poan la bisera ba bakwai woo. A tɔɣɛ pa’alɛ sɛla n sɔi: “Mabiisi la zo’e zo’e ma’a n boi ba yɛa poan, bala ba ta’an ti’isa putɛbe’ero mɛ.” Yele san paɛ mabia, William ni ma’ɛ la amea kɛlesa en ge bisɛ sɛla n pakɛ en. A ni tiregɛ bisɛ la gɔnɔ bii vidiyodoma n boi to intanɛt tuuma zɛ’an la dekɛ kpemese mabia la giila. A yeti: “Nananawa ti la yele pakɛ paa ti to kaara to mabiisi la bisa. To kɔ’ɔn tiregera la to soŋɛ nɛreba ti ba zamesɛ baŋɛ Yehowa. Bala mea nɔɔ ti la nara ti to tiregɛ kaara to mabiisi la bisera ge soŋera ba ti ba kelum bɔna yelemɛŋɛrɛ la poan.”

16. Sarɔtuni ti to wan ta’an dekɛ yelese’a n boi Peter gɔnɔ la poan la tum tuuma?

¹⁶ To sɔsɛ la yɛla fii Peter gɔnɔ toyi la poan. Ho ta’an nyɛ sɛla bɔta ti ho dekɛ kumesɛ homea. Makerɛ, ho wan bɔta ti ho ti’isɛ taɣesɛ bisɛ kãsɛka ti to wan nyɛ tinpaalega la poan? Hon boti ho mɔɔla tuuma zɛ’an, sukuu poan la zɛsɛka poan me? Hon baŋɛ hon wan eŋɛ se’em ta’an tara nɔŋerɛ paa bɔ’ɔra ho mabiisi? Keendoma, ya kɔ’ɔn lu ya suure ti ya pee puurɛ bisɛ Yehowa piisi la? Ya san viisɛ yamea soŋa soŋa bisɛ, ya wan baŋɛ ya tɔregɔ n boi zɛ’an ge da basɛ ti ya giila kɔ’ɔsɛ. ‘To Daana la tari la itisoŋɔ,’ a me wan soŋɛ ya ti ya nyɛ nɛŋa tɔlega. (1 Pe. 2:3) Peter basɛ ti to baŋɛ ti: ‘Naayinɛ . . . mea n wan kumesɛ ya ba’asɛ. A wan basɛ ti ya kpe’em, a wan bo ya paŋa, a wan basɛ ti ya ze’a kankaŋi.’—1 Pe. 5:10.

17. To wan nyɛ nyuurɔ la wani to san tiregera ge bo yɔ’ɔ ti Yehowa kumesɛ tɔ?

¹⁷ Yia la, Peter yuun bisɛ ti la ka nari ti a zɛ’a Naayinɛ Dayɔa la nɛŋan. (Luke 5:8) Ge Yehowa la Yezu n yuun soŋɛ Peter ti a tiregɛ dɛna Krista podɔla. Peter yuun nyaa nyɛ la yɔ’ɔ ti a ta bɔna ‘to Daana la to Faara Yezu Krista na’am la poan wuusa.’ (2 Pe. 1:11) Bisɛ lan de kã’a se’em! Ho me san tiregera wuu Peter n yuun tiregeri se’em la ge bo yɔ’ɔ ti Yehowa kumesɛ hɔ, ho me wan nyɛ kã’a ta’an ta vɔna daarewoo. ‘Ya sakerɛ la wan basɛ ti ya nyɛ faarɛ wuu yan boti se’em la.’—1 Pe. 1:9.