1-2. (a) Kristakɔma la n yuun boi Yudea la bɔŋa yuun ani la wani se’em ma’a ti tuntuna Paul yuun gulesɛ gɔŋɔ ta bo ba la? (b) Gɔŋɔ wa yuun soŋɛ ba la wani?

 YEZU n yuun ki yuun 33 pooren, la yuun kpe’em bo Kristakɔma n yuun kɛ̃’ɛri Yerusalem la Yudea tiŋa poan la mɛ. Ban yuun pɔsɛ Krista tansugere la, la yuun ka yue ti ba pɔsɛ mɛlesera Kristakɔma la. (Tm. 8:1) Nɔŋɔ la kom bɛɣelega me n yuun nyɔkɛ ba. (Tm. 11:​27-30) Ge yaarɛ se’a n wan paɛ ba pooren la gani yaarɛ se’a n puɣum paara Kristakɔma la n yuun boi yuun 61 Y.B. poan la mɛ. Sankaŋa la, Yehowa yuun basɛ ti tuntuna Paul gulesɛ la gɔŋɔ ta bo ba. Gɔŋɔ wa yuun tari la ka’aŋɔ n wan soŋɛ ba ti ba ta’an maasum gura yelese’a n kan yue ge wa’ana la.

² Gɔŋɔ la ti Paul yuun gulesɛ bo Hebrudoma la yuun kɔ’ɔn wa’an la sansɛka n nari poan se’ere n sɔi la, la yuun ka yue ti yaarɛ paɛ ba. Paul yuun bo ba la ka’aŋɔ n wan soŋɛ ba ti ba ta’an ŋmibe mɛlesegɔ seko n wan paɛ ba la. Yezu yuun yeti la kan yue, ba wan sa’am Yerusalem. (Lu. 21:20) Yelemɛŋɛrɛ, Paul bii Kristakɔma la yuun ka mi sansɛka ti sa’aŋɔ la wan wa’ana. Ge Kristakɔma la yuun nari ti ba dekɛ sansɛka n gee la maasum ta’an tara sakerɛ n wan soŋɛ ba ti ba ŋmibe.—Heb. 10:25; 12:​1, 2.

3. Beni n sɔi ti gɔŋɔ la ti ba yuun gulesɛ bo Hebrudoma la me yele pakɛ tɔ?

 ³ La kan yue, mɛlesekãtɛ wan wa’ana ti la gaŋɛ sɛla n yuun paɛ Hebru Kristakɔma la. (Mt. 24:21; Lil. 16:​14, 16) Basɛ ya ti to bisɛ ka’aŋɔ se’a ti Yehowa yuun dekɛ bo Hebru Kristakɔma la, la bala n wan soŋɛ tomam me se’em.

‘ÃREGƐ YAMEA TA BI KÃSEGƐ’

4. Bem daaŋɔ n yuun paɛ Yuda Kristakɔma la? (Bisɛ foote la.)

⁴ Yudadoma la n yuun ta dɛna Kristakɔma la yuun nari ti ba eŋɛ la teere. La me yuun daɣɛ naana bɔ’ɔra ba. Yehowa yuun loe Yudadoma la mɛ ti ba dɛna a nɛreba. Yerusalem yuun dela tuulum tiŋa, se’ere n sɔi la nɛresɛka ti Yehowa yuun loe ti a dɛna naba la yuun ze’ele la tinkaŋa poan. Pu’usegɔ deo la me yuun boi la Yerusalem tiŋa poan. Yudadoma yuun doli la Moses Lɔɔ la, la pu’usegɔ nɛŋadoma la n pa’alɛ ba sɛla. Pa’alegɔ wa yuun dela dia, ŋmaa yɛla, la ban nari ti ba ita nɛresɛba n daɣɛ Yudadoma se’em. Yezu kum pooren la, Yehowa yuun ka le sakɛ ti ba ita kãabegɔ, pu’usegɔ deo la poan. Bala la, la yuun daɣɛ naana bɔ’ɔra Yudadoma n nyaa de Kristakɔma wa ti ba tee dɔla pa’alegɔ wa. (Heb. 10:​1, 4, 10) Hali, la yuun kpe’em bo Kristakɔma basɛba n tari sakerɛ, wuu Peter, ti ba eŋɛ teere. Yudadoma la n yuun doli pa’alegɔ paalega wa la yuun basɛ ti ba bɔna la ba to’ore. (Tm. 10:​9-14; Ga. 2:​11-14) Bala n sɔi ti pu’usegɔ nɛŋadoma la yuun giisa ba la.

5. Bem yɛla ti Kristakɔma yuun nara ti ba bisɛ bamea soŋa de poan?

⁵ Yeledaaŋɔ ayima me n yuun paɛ Yuda Kristakɔma la. Yuda pu’usegɔ nɛŋadoma la yuun ti’isɛ ti Yuda Kristakɔma la dela a yelege n meadoma. Kristakɔma basɛba me n boi tansugere la poan me yeti, ba nari ti ba dɔla Moses Lɔɔ la, la wan eŋɛ se’em ti nɛreba kan giisa ba.  (Ga. 6:12) Bem n yuun wan soŋɛ Kristakɔma wa ti ba kelum tara sakerɛ bɔ’ɔra Yehowa?

6. Paul yuun kpemese a mabiisi la giila ti ba eŋɛ la bem? (Hebru 5:14–6:1)

⁶ Paul n yuun gulesɛ gɔŋɔ ta bo Hebrudoma la, a kpemese ba giila ti ba zamesa Naayinɛ Yelesum la ge ti’isa taɣesa. (Kaalɛ Hebru 5:14–6:1.) Paul yuun dekɛ la Hebru Gulesegɔ la tɔɣɛ pa’alɛ sɛla n sɔi ti Kristakɔma n pu’useri Naayinɛ se’em la nyana Yudadoma n yuun pu’useri Naayinɛ se’em la. a Paul yuun kpemese Kristakɔma la giila ti la nari ti ba kaala ta’an bɔkɛ yelemɛŋɛrɛ la n boi gulesegɔ la poan la, la wan eŋɛ se’em ti ba ta’an zaɣesɛ pumpɔreŋɔ pa’alegɔ.

7. Bem yeledaaŋɔ n paari to zina beere wa?

⁷ Zina beere wa, nɛreba me tɔɣeri la yɛla ase’a ti la ka makɛ la Yehowa pa’alegɔ. Nɛreba basɛba yeti, Yehowa Sɛɛradoma n doli Baabule la n pa’alɛ gã’aregɔ yɛla se’em la ka nari. Nɛresaaleba n ti’iseri se’em la boi la de to’ore la Yehowa n ti’iseri se’em. (Mag. 17:15) Bala la, la yele pakɛ mɛ ti to baŋɛ yelese’a n daɣɛ yelemɛŋɛrɛ ge zaɣesɛ a. La ka nari ti to basɛ ti sɛba n giiseri to la basɛ ti to giila kɔ’ɔsɛ ti to pisegɛ Yehowa pu’usegɔ basɛ.—Heb. 13:9.

8. To wan eŋɛ la wani ta’an nyɛta nɛŋa tɔlega vo’osum poan?

⁸ Paul yuun ka’am Kristakɔma la ti ba ãregɛ bamea ta bi kãsegɛ. La me nari ti tomam me ita bala. Wana wa pa’alɛ ti, la nari ti to zamesɛ Baabule la ta’an baŋɛ Yehowa la a puti’irɛ soŋa soŋa. La nari ti to kɔ’ɔn ita bala, to san puɣum ta muse ko’om ba’asɛ. La ka pakɛ la ton yue yelemɛŋɛrɛ la poan se’em, la nari ti to za’a waabi tiregɛ kelum zamesa Baabule la saŋa woo. (Ym. 1:2) To san ita bala, la wan basɛ ti to sakerɛ kpe’em wuu tuntuna Paul n yuun ka’am Hebru Kristakɔma la se’em la.—Heb. 11:​1, 6. 

“DƐNA LA SƐBA N SAKƐ GE WAN NYƐ FAANRƐ”

9. Beni n sɔi ti Kristakɔma la yuun nara ti ba tara sakerɛ n kpe’em?

⁹ Kristakɔma la yuun nari ti ba tara sakerɛ n kpe’em sɛla n sɔi la, bala n wan soŋɛ ba ti ba ta’an nyɛ fãarɛ mɛlesegɔ poan. (Heb. 10:​37-39) Yezu yuun ka’am a podɔleba la ti ba san ta nyɛ ti lengima la kaɛ Yerusalem mum, ba zɔ keŋɛ zɔya la zuto. Kristakɔma sɛba n yuun boi Yerusalem, la sɛba n boi yiŋa la yuun nari ti ba dekɛ ka’aŋɔ wa tum tuuma. (Lu. 21:​20-24) Dindoma la yuun ni san yeti ba daam nɛreba, la nari ti sɛba n boi yiŋa la zɔ kɛ̃ Yerusalem. Bilam ti ba wan nyɛ gu’a. Yezu n yuun yeti ba zɔ keŋɛ zɔya la zuto la yuun ta’an basɛ ti ba ti’isa ti yɛm ka boi bim. Ge ba yuun san eŋɛ bala, la pa’alɛ ti ba tari la sakerɛ.

10. Kristakɔma san tara sakerɛ, la wan soŋɛ ba ti ba eŋɛ la bem? (Hebru 13:17)

¹⁰ Hebru Kristakɔma la yuun nari ti ba dekɛ bamea delum sɛba ti Yezu yuun dɔla ba poan bɔ’ɔra ba pa’alegɔ tansugere la poan la. Keendoma la n boi tansugere la poan la yuun bo ba la ka’aŋɔ n wan soŋɛ ti ba mina ba wan eŋɛ se’em  ta’an yese tiŋa la poan. (Kaalɛ Hebru 13:17.) Greek yelebire la n boi Hebru 13:17 la n yeti “nana” la, pa’alɛ ti to nana sɛba n bo’ori to pa’alegɔ la. Tuntuna Paul yuun ka’am mabiisi la ti, ba nana keendoma la n boi ba nɛŋa la. Bala ka pa’alɛ ti ba yeen nana ba ge ba dekɛ bamea delum keendoma la. Ba yuun nari ti ba dɔla keendoma la pa’alegɔ ge ti daaŋɔ la nyaa paɛ. Kristakɔma san nana keendoma la sansɛka ti suma’asum bɔna, la kan kpe’em ti ba nana ba biɣi biɣi saŋa.

11. Beni n sɔi ti la yele pakɛ ti Kristakɔma tara sakerɛ n kpe’em zina beere wa?

¹¹ Wuu Hebru Kristakɔma la, tomam me nari ti to tara sakerɛ. Nɛreba zo’e zo’e ka sakɛ ti tingɔŋɔ wa ye la ka ba’asegɔ n bala ge me zɛregera tɔ la ton sakɛ bala la. (2 Pe. 3:​3, 4) Baabule la basɛ ti to baŋɛ yelese’a n wan eŋɛ mɛlesekãtɛ la poan. To ka mi yɛla la za’a ge la nari ti to tara sakerɛ ti Yehowa mi sansɛka ti ba’asegɔ la wan wa’ana. To me nari ti to tara sakerɛ ti a wan soŋɛ tɔ sankaŋa.—Hab. 2:3.

12. Bem n wan soŋɛ tɔ ti to ta’an nyɛ fãarɛ mɛlesekãtɛ la poan?

¹² La nari ti to tara sakerɛ la Yehowa n doli sarɔseko poan bɔ’ɔra to pa’alegɔ la. A doli la ‘sakerɛ la yɛm yameŋa’ la poan bɔ’ɔra to pa’alegɔ zina beere wa. (Mt. 24:45) Mɛlesekãtɛ la san ta pɔsɛ, keendoma la wan bo to pa’alegɔ n wan faaɛ to basɛ wuu ban yuun dekɛ pa’alegɔ bo Hebru Kristakɔma la se’em la. La yele pakɛ mɛ ti to nana sɛba n boi to nɛŋa Yehowa tigere la poan la. To san ka nana ba nananawa, la wan kpe’em bo to ti to nana ba mɛlesekãtɛ la poan.

13. Beni n sɔi ti ka’aŋɔ la n boi Hebru 13:5 la yele yuun pakɛ?

¹³ Kristakɔma la n yuun guri ti ba zɔ yese Yerusalem la, la yuun nari ti ba basɛ ti ba vom ana naana ge “da ba’ kɔ’ɔn tɛn’ɛhe ya la ligiri ma’an yele.” (Kaalɛ Hebru 13:5.) Basɛba yuun naseri mɛ ge ti kom me bɔna. (Heb. 10:​32-34) Yelesoma la yuun soŋɛ ba mɛ ti ba ta’an ŋmibera. La bala za’a la, basɛba yuun pɔsɛ bɔta la ligeri ti la ta’an gu ba nɔŋɔ la daaŋɔ poan. Ge laɣehɔ me yuun kan ta’an faaɛ ba Yerusalem sa’aŋɔ la poan. (Yam. 5:3) Yelemɛŋɛrɛ la dela, la yuun wan kpe’em bo sɛba n nɔŋɛ lɔɣɔbɔrɛ ti ba basɛ ba lɔɣɔrɔ, la ba yea ge zɔ yese Yerusalem.

14. Sakerɛ wan soŋɛ to la wani ti to ta’an gu tomea lɔɣɔbɔrɛ poan?

¹⁴ To san tara sakerɛ ti la kan yue Yehowa wan sa’am tingɔŋɔ be’o wa, to kan basɛ ti lɔɣɔbɔrɛ yele pakɛ tɔ. Mɛlesekãtɛ la poan, ligeri kan tara vuurɛ. Baabule la yeti, nɛreba wan “va ba ligiri la lobe bahɛ sore zuo” se’ere n sɔi la “ba ligiri la ba sanlema la kan nyaŋɛ fan ba bahɛ Na’ayenɛ sunsunyiim dabeherɛ la poan.” (Eze. 7:19) Ton wan tuɣum bɔta ligeri zo’e zo’e la, la nari ti to basɛ ti to vom ana naana. To loe ton wan eŋɛ se’em ta’an bisa tomea la to deodoma la wan eŋɛ se’em ti to ta’an pu’usa Yehowa. Yɛm kan bɔna bim ti to dɔla dita sanyooro bii to tara to saŋa la zo’e zo’e bɔta lɔɣɔrɔ. La nari ti to bisɛ tomea soŋa ge da basɛ ti ton tari lɔɣɔse’a la yele ba’ɛ pakɛ tɔ. (Mt. 6:​19, 24) Tingɔŋɔ wa kɔ’ɔn yɛ’a la ba’asegɔ n bala. Bala, la nari ti to loe nyaa to dekɛ tomea delum Yehowa bii to lɔɣɔrɔ.

 “YA DIN’INHE SUUNRE”

15. Beni n sɔi ti la yele yuun pakɛ ti Hebru Kristakɔma la ŋmibera?

¹⁵ Kristakɔma n yuun boi Yuda tiŋa la nari ti ba ŋmibera ta’an pu’usa Naayinɛ, se’ere n sɔi la yeledaaŋɔ n boi nɛŋa kena na. (Heb. 10:36) La boi bim ti ba yuun giisɛ Yudadoma basɛba mɛ ge la yuun daɣɛ ba za’a. Paul yuun tiɛ ba ti yaarɛ n boi sore. Bala ba maasum soŋa soŋa ta’an ŋmibe ta paɛ ba kum wuu Yezu la. (Heb. 12:4) Yudadoma zo’e zo’e n yuun ta dɛna Kristakɔma la, ba dindoma la sunsɔa yuun nyie mɛ. La yuun ka yue ti nɛreba yuun daana Paul, eŋa n yuun boi Yerusalem mɔɔla yelesoma la. Nɛreba 40 n yuun “pɔ’ pɔtɛ te ba mina mina da di dia bii nyu sɛsɛla, han dagana ba nyaŋɛ ko la Paul.” (Tm. 22:22; 23:​12-14) La boi bim ti ba yuun yaɛ Kristakɔma mɛ ge la yuun nari ti ba kelum laɣesa taaba pu’usa, mɔɔla yelesoma la ge me basɛ ti ba sakerɛ kpe’em.

16. Yaarɛ san paara tɔ, gɔŋɔ la ti Paul yuun gulesɛ bo Hebru Kristakɔma la wan soŋɛ to la wani ti to tara putɛsonɛ? (Hebru 12:7)

¹⁶ Bem n yuun soŋɛ Hebru Kristakɔma la ti ba ta’an ŋmibe giisegɔ se’a n paɛ ba la poan? Paul yuun boti a soŋɛ Kristakɔma wa mɛ ti ba baŋɛ ti ba san nyaŋɛ ŋmibe, ba wan nyɛ nyuurɔ. Paul yuun basɛ ti ba baŋɛ ti ba san nyaŋɛ ŋmibe yeledaaŋɔ la poan, bala wan kumesɛ ba. (Kaalɛ Hebru 12:7.) La wan basɛ ti ba tara halese’a n wan pee Yehowa puurɛ. Ba san baŋɛ ban wan nyɛ nyuurɔ se’em, bala wan soŋɛ ba ti ba ta’an ŋmibe.—Heb. 12:11.

17. Paul yuun mi ŋmibega yele la wani?

¹⁷ Paul yuun kpemese Hebru Kristakɔma la giila ti ba tara sukpe’ene ta’an ŋmibe yaarɛ poan. Yelese’a n yuun paɛ Paul la n yuun basɛ ti a ta’an ka’am  Kristakɔma la bala. Amea yuun giisɛ Kristakɔma wa mɛ ge nyɛ ban yuun ŋmibe se’em. Leyɛ’ɛsa, amea yuun ŋmibe mɛ giisegɔ poan. (2 Ko. 11:​23-25) Bala la, Paul yuun mi ŋmibega n ani se’em mɛ. A yuun yele ba ti daaŋɔ san paara ba, ba dekɛ bamea delum Yehowa ti a soŋɛ ba. Paul yuun yeti: “Na’ayenɛ n soŋore mam, mam kan zɔta dabeem.”—Heb. 13:6.

18. Bem yele n wan soŋɛ tɔ ti to ta’an ŋmibe yaarɛ poan?

¹⁸ To mabiisi basɛba kelum ŋmibera mɛ yaarɛ poan. Bala, la nari ti to zusera bɔ’ɔra ba ge soŋera ba la yelese’a n pakɛ ba. (Heb. 10:33) Baabule la yeti, “sɛba woo n bote ba bɔna wo Yenɛ n bote ba bɔna se’em, ban bo la Krista Yesu la zuo la, ba nameherɛ ba mɛ.” (2 Tim. 3:12) Bala la, to za’a waabi nari ti to maasum gura yelese’a n keni na la. Basɛ ya ti to dekɛ tomea delum Yehowa ge tara suure lua ti a wan soŋɛ tɔ ti to ta’an ŋmibe yelese’ere woo poan. La kan yue a wan faaɛ nɛresɛba woo n tari yelemɛŋɛrɛ bɔ’ɔra en la basɛ.—2 Tes. 1:​7, 8.

19. To wan eŋɛ la wani ta’an maasum gura mɛlesekãtɛ la? (Bisɛ foote la.)

¹⁹ Nɔkpe’ene kai ti gɔnseko ti Paul yuun gulesɛ bo diimi Hebru Kristakɔma la yuun soŋɛ ba mɛ ti ba ta’an maasum gura yelese’a n wan paɛ ba la. Paul yuun ka’am ba ti ba kaala Naayinɛ Yelesum la ta’an bɔkɛ de soŋa. Bala wan basɛ ti ba baŋɛ yelese’a n daɣɛ yelemɛŋɛrɛ ge zaɣesɛ a. A yuun le ka’am ba ti ba tara sakerɛ, la wan eŋɛ se’em ti ba ta’an dɔla Yezu la keendoma la n pa’ali ba se’em tansugere la poan. A yuun kpemese Kristakɔma wa giila ti ba ŋmibera yelese’a n paari ba la poan ge me le basɛ ti ba baŋɛ ti yelese’a n paari ba la wan kumesɛ ba. Tomam me nari ti to dekɛ ka’aŋɔ wa tum tuuma. To san eŋɛ bala, to wan nyaŋɛ ŋmibe ta paɛ ba’asegɔ.—Heb. 3:14.