1. La kan yue, Yezu wan eŋɛ la bem?

 TO BOI la sansɛka ti yɛla kɔ’ɔn tɛɛra! La kan yue, Yezu wan gãkɛ nɛra woo. Yezu yuun basɛ ti to baŋɛ yelese’a n wan ta ita tingɔŋɔ wa poan ge ti gãkerɛdaarɛ la nyaa paɛ. Yezu yuun yele a podɔleba la “sɛla” n wan pa’alɛ ti a lebe na la “teŋa wa ba’ahegɔ poan.” (Mt. 24:3) Yetɔɣebiŋ’a wa boi la Matu a zuo 24 la 25 ge le bɔna Mark a zuo 13 la Luke a zuo 21.

2. To wan sɔsɛ la bem zaseŋɔ wa poan ge la wan soŋɛ to la wani?

² Yezu yuun bo to la maɣesa atã ti la soŋɛ tɔ ti to ta’an maasum. Maɣesa wa dela ka ka bɔ’ɔra tɔ. Maɣesa wa dela piisi la buusi makerɛ la, pɔɣesa’ara la n tari yɛm la sɛba n de geto makerɛ la, la ligebɔɔresi makerɛ la. Maɣesa wa wan soŋɛ tɔ ti to bɔkɛ ti Yezu wan bisɛ la nɛra itigɔ gãkɛ en. Zaseŋɔ wa poan, to wan sɔsɛ maɣesa ana wa ge bisɛ ton wan ta’an zamesɛ sɛla. Yia la, basɛ ya ti to sɔsɛ piisi la buusi la yele.

 PIISI LA BUUSI

3. Sankani ti Yezu wan gãkɛ nɛreba?

³ Makerɛ wa poan, Yezu yuun yeti a wan bisɛ la nɛreba n nam yelesoma la se’em, la ban soŋɛ loore Kristakɔma la se’em gãkɛ ba. (Mt. 25:​31-46) ‘Mɛlesekãtɛ’ la poan ti Yezu wan yelese piisi la buusi la ge ti Armagedon zaberɛ la nyaa wa’ana. (Mt. 24:21) Wuu dunkeena n ni yelege piisi la buusi se’em la, bala mea nɔɔ ti Yezu me wan yelege sɛba n soŋeri loore Kristakɔma la, la sɛba n ka soŋeri ba la.

4. Wuu Isaiah 11:​3, 4 n pa’alɛ se’em la, beni n sɔi ti to tara suure lua ti Yezu wan gãkɛ nɛreba la tontɔɔ? (Bisɛ foote la.)

⁴ Baabule la yeti, Yezu san soe gãkɛ bo Yehowa, a wan gãkɛ la tontɔɔ. (Kaalɛ Isaiah 11:​3, 4.) Yezu wan bisɛ la ba itigɔ, ba ti’isegɔ la ba yetɔɣum, hali la ban iti loore Kristakɔma la se’em. (Mt. 12:​36, 37; 25:40) Yezu mi sɛba n soŋeri loore Kristakɔma la, la ba tuuma la mɛ. a Sore deyima ti nɛra wan eŋɛ pa’alɛ ti a soŋeri loore Kristakɔma la dela eŋa n wan mɔɔla yelesoma la. Yezu wan gãkɛ ba ti ba dela “tontɔɔdoma” ge ti ba me wan ta vɔna daarewoo. (Mt. 25:46; Lil. 7:​16, 17) Wana wa dela yɔɔrɛ n kãregɛ! Ba san kelum tara yelemɛŋɛrɛ mɛlesekãtɛ la poan ta paɛ ba’asegɔ, ba yu’ura wan kelum bɔna “vom gɔŋɔ” la poan.—Lil. 20:15.

5. To zamesɛ la bem, piisi la buusi makerɛ la poan ge la wan soŋɛ la bani?

⁵ Tara sakerɛ la yelemɛŋɛrɛ. Yezu makerɛ la poan, piisi la buusi la tɔɣeri la sɛba n tari puti’irɛ ti ba wan ta zi’ire tingɔŋɔ wa zuo la yele. Ba san soŋera loore Kristakɔma la na’am mɔɔlegɔ tuuma la poan ge me nana sakerɛ la yɛm yameŋa la pa’alegɔ, bala pa’alɛ ti ba tari sakerɛ. (Mt. 24:45) Nɛresɛba n tari puti’irɛ ti ba wan keŋɛ saazuo la me nari ti ba kelese piisi la buusi ka ka la. Beni n sɔi? Se’ere n sɔi la Yezu biseri la bamam me itigɔ, ba ti’isegɔ la ba yetɔɣum. Bamam me nari ti ba tara yelemɛŋɛrɛ. Yezu yuun le dekɛ la maɣesa ayi kaɣɛ loore Kristakɔma la. Maɣesa wa boi la Matu a zuo 25. Basɛ ya ti to geele pɔɣesa’ara la n tari yɛm la sɛba n de geto la yele la bisɛ.

PƆƔESA’ARA LA N TARI YƐM LA SƐBA N DE GETO

6. Pɔɣesa’ara banuu la eŋɛ la bem pa’alɛ ti ba tari yɛm? (Matu 25:​6-10)

⁶ Makerɛ la poan, Yezu tɔɣɛ la pɔɣesa’ara pia n dekɛ ba butolela ti ba yese ta tu’usɛ pɔɣedita yele. (Mt. 25:​1-4) Ba za’a waabi yuun tari puti’irɛ ti ba wan doose pɔɣedita la keŋɛ pɔɣedire de’eŋo la poan. Yezu yuun yeti banuu dela “yɛmdoma” ge ti banuu dɛna “geto.” Yɛmdoma banuu wa yuun kɔ’ɔn maasum mɛ ge pigera. Ba yuun kɔ’ɔn maasum mɛ gura pɔɣedita wa, hali a san puɣum wa’an yu’uŋɔ na. Ba yuun tari kaam mɛ ti ba eŋɛ ba butolela la poan ti ba bugum la da kiŋe. Ba yuun lee kaam la basɛba mɛ zãla, la wan eŋɛ se’em ti pɔɣedita la san ka wa’an kalam na, ba bugum la kan kiŋe. Ba yuun kɔ’ɔn maasum mɛ soŋa soŋa ti ba bugum la da kiŋe. (Kaalɛ Matu 25:​6-10.) Pɔɣedita la n yuun paɛ na la,  yɛmdoma banuu wa yuun doose en mɛ keŋɛ pɔɣedire de’eŋo la poan. Bala mea nɔɔ ti Krista san ta lebe na, loore Kristakɔma sɛba n maasum ge tara yelemɛŋɛrɛ la wan nyɛ kã’a. Ba wan ta naɛ la Yezu ti ba di Na’am saazuo. b (Lil. 7:​1-3) Ge pɔɣesa’ara banuu la n de geto la me?

7. Bem n yuun paɛ pɔɣesa’ara banuu la n de geto la ge beni n sɔi?

⁷ Se’em ma’a ti pɔɣedita la yuun wa’ana la, pɔɣesa’ara banuu la n de geto la yuun ka maasum. Ba butolela la yuun kiŋeri mɛ, se’ere n sɔi la ba ka lee kaam zãla. Ban yuun ta baŋɛ ti la kan yue pɔɣedita la wan wa’ana la, ba yuun lebe mɛ ti ba ta da kaam. Ba yuun nan ka lebe na ge ti pɔɣedita la wa’ana. Sankaŋa la, “sɛba n maahom ba’ahɛ la doohe kɛn’ ge te ba yo’ nayaŋa la.” (Mt. 25:10) Pooren ti sɛba n de geto la lebe na ge bɔta ti ba kɛ̃. Pɔɣedita la yele ba ti: “Mam ka mi’ ya.” (Mt. 25:​11, 12) Pɔɣesa’ara wa yuun ka maasum gura pɔɣedita la. Loore Kristakɔma la wan ta’an zamesɛ la bem yele wa poan?

8-9. Loore Kristakɔma la wan ta’an zamesɛ la bem, pɔɣesa’ara la makerɛ la poan? (Bisɛ foote la.)

⁸ Kɔ’ɔn maasum ge pigera. Yezu yuun ka yeti loore Kristakɔma la wan pu la sugumnɔɔrɛ buyi, ti ayima maasum ge ti ayima ka maasum. A yuun pa’alɛ la sɛla n wan paɛ loore Kristakɔma la, ba san ka maasum ge tara yelemɛŋɛrɛ ta paɛ ba’asegɔ. Ba san ka maasum, ba kan nyɛ kã’a la. (Yon 14:​3, 4) Yele wa dela ninmu’urɛ! To ye la saazuo bii to wan bɔna la tingɔŋɔ wa zuo woo, to za’a waabi nari ti to dekɛ ka ka la n boi pɔɣesa’ara la makerɛ la poan tum tuuma. Tomam ayima ayima nari ti to pigera, maasum ge ŋmibera gura ba’asegɔ la.—Mt. 24:13.

 ⁹ Yezu makerɛ wa pa’alɛ ti to kɔ’ɔn maasum ge pigera. Eŋa n yuun bo makerɛ wa ba’asɛ la, a yuun le bo la ligebɔɔresi makerɛ la. Makerɛ eŋa pa’alɛ ti to nari ti to kɔ’ɔn tiregɛ tuna.

LIGEBƆƆRESI LA

10. Yamesi bayi yuun eŋɛ la bem pa’alɛ ti ba tari yelemɛŋɛrɛ? (Matu 25:​19-23)

¹⁰ Makerɛ la poan, Yezu yuun tɔɣɛ la yamesi bayi n tari yelemɛŋɛrɛ ti ayima ka tara yelemɛŋɛrɛ yele. (Mt. 25:​14-18) Yamesi bayi la yuun tum mɛ nyɛ nyuurɔ bo ba kpɛ’ɛma la. Kpɛ’ɛma la n yuun ye sore la, a yuun dekɛ la ligebɔɔresi bo a yamesi. Yamesi bayi wa yuun dekɛ ba ligeri la tum mɛ soŋa soŋa. Ba yuun nyɛ nyuurɔ la wani? Ba kpɛ’ɛma la n yuun lebe na la, ba yuun nyɛ nyuurɔ la sugumnɔɔrɛ buyi. Kpɛ’ɛma la yuun pɛ̃ɣɛ ba mɛ ti ba puurɛ pee. (Kaalɛ Matu 25:​19-23.) Ge yameŋa ayima la n gee la me? A yuun dekɛ ligeri la ti a kpɛ’ɛma la bo en la eŋɛ la bem?

11. Bem n yuun paɛ yameŋa sɛka n de zinnyaka la ge beni n sɔi?

¹¹ Yameŋa ayima la yuun to’e la ligebɔɔrega ayima ge a yuun dela zinnyaka. A kpɛ’ɛma la yuun boti la a dekɛ ligebɔɔrega ayima la tum soŋa ge a yuun tuɣum dekɛ pĩ la tiŋa. Kpɛ’ɛma la n yuun lebe na la, yameŋa wa yuun dekɛ la ligebɔɔrega ayima la ma’a bo en. Yameŋa wa yuun ka tari halesonɛ. Eŋa n wan belum ni a kpɛ’ɛma la, la eŋa n ka nyɛ nyuurɔ la, a tuɣum yeti a kpɛ’ɛma la dela “se’em yɛla n tɔe.” Kpɛ’ɛma la yuun ka pɛ̃ɣɛ yameŋa wa. A yuun to’e ligebɔɔrega la mɛ ge sa’ɛ en a yire la poan.—Mt. 25:​24, 26-30.

12. Zina beere wa, yamesi bayi la n tari yelemɛŋɛrɛ la ze’ele bo la bani?

¹² Yamesi bayi la n tari yelemɛŋɛrɛ la ze’ele bo la loore Kristakɔma sɛba n tari yelemɛŋɛrɛ la. Yezu n de kpɛ’ɛma la, beem ba mɛ ti ba wa’ana to’e ba yɔɔrɛ. Dena n de kum isigeri n deŋɛ nɛŋa la. (Mt. 25:​21, 23; Lil. 20:5b) Yameŋa la  n de zinnyaka la makerɛ la dela ka ka bɔ’ɔra loore Kristakɔma la. Wani Wani?

13-14. Loore Kristakɔma la wan ta’an zamesɛ la bem ligebɔɔresi makerɛ la poan? (Bisɛ foote la.)

¹³ Kɔ’ɔn tiregɛ tuna. Ligebɔɔresi, la pɔɣesa’ara la makerɛ la poan, Yezu yuun ka boti a pa’alɛ ti loore Kristakɔma la wan dɛna la zinnyaɣesi. Ge a yuun boti ba baŋɛ sɛla n wan paɛ ba, ba san ka tiregera. Ba san ka tiregera, ba kan ta’an kɛ̃ saazuo Na’am la poan ta naɛ la en di na’am.—2 Pe. 1:10.

¹⁴ Pɔɣesa’ara, la ligebɔɔresi makerɛ la pa’alɛ ti loore Kristakɔma la nari ti ba maasum, pigera ge me kɔ’ɔn tiregɛ tuna. Ge yezu yuun le yele sɛla mɛ dekɛ ka’am loore Kristakɔma la? Ɛɛ! Ka’aŋɔ wa boi la Matu 24:​40, 41.

BANI TI BA WAN “DEKƐ” KEŊƐ?

15-16. Wuu Matu 24:​40, 41 n pa’alɛ se’em la, sodeni poan ti loore Kristakɔma la nara ti ba pigera?

¹⁵ Ge ti Yezu yuun nyaa bo maɣesa atã la, a yuun tɔɣɛ pa’alɛ ki’i gãkerɛ la n wan basɛ ti nɛreba baŋɛ loore Kristakɔma sɛba ti eŋa nam bo ba la. A yuun tɔɣɛ pa’alɛ la buraasi bayi n boi va’amen ti pɔɣesi bayi me bɔna nɛɛren. Buraasi bayi la laɣum tuna la tuunyinɛ ti pɔɣesi bayi la me laɣum tuna tuunyinɛ ge Yezu yeti, “ba wa’ana dekɛ ayema ge ayema bahɛ.” (Kaalɛ Matu 24:​40, 41.) A yuun ka’am a podɔleba la yeti: “Bala zuo, gure ya soŋa soŋa. Se’ere n sɔe, ya ka mi’ se’em ma’an te ya Daana la wan wa’ana.” (Mt. 24:42) Yezu yuun le tɔɣɛ la bala mea nɔɔ se’em ma’a ti a yuun bo pɔɣesa’ara la makerɛ la. (Mt. 25:13) Yele ana wa makɛ taaba? La ta’an dɛna bala. Yezu wan dekɛ sɛba ti ba sirum loe ba ti ba tari yelemɛŋɛrɛ la keŋɛ a saazuo Na’am la poan.—Yon 14:3.

¹⁶ Kɔ’ɔn pigeri ya. Loore Kristakɔma sɛba n ka pigeri la kan pa’asɛ “sɛba te a loe la” poan. (Mt. 24:31) Sɛba n tari puti’irɛ ti ba wan zi’ire tiŋa wa zuo la me nari ti ba pigera ge me tara yelemɛŋɛrɛ.

17. Beni n sɔi ti la ka nara ti to fabela la Yehowa n loori nɛresɛba zina beere wa la?

¹⁷ To mi soŋa soŋa ti Yehowa gãkerɛ dela tontɔɔ. La ka nari ti to fabela la Yehowa n loori nɛresɛba zina beere wa la. c To tɛ̃ri Yezu n yuun tɔɣɛ sɛla doose la kpɛ’ɛma la n tari nɛresɛba wa’an a va’amen zaanɔɔrɛ la. (Mt. 20:​1-16) Bamam la sɛba n pɔsɛ bulika la yɔɔrɛ yuun zuni mɛ. La ka pakɛ la se’em ma’a ti ba loe loore Kristakɔma la, ba za’a waabi san tara sakerɛ la yelemɛŋɛrɛ, ba wan nyɛ yɔɔrɛ yinɛ.

KƐLESA KA KA LA

18-19. To zamesɛ la bem maɣesa wa poan?

¹⁸ To sɔsɛ la bem? Piisi la buusi makerɛ la pa’alɛ ti sɛba n tari puti’irɛ ti ba wan zi’ire tingɔŋɔ wa zuo la nari ti ba tara sakerɛ la yelemɛŋɛrɛ bɔ’ɔra Yehowa nananawa, la mɛlesekãtɛ la poan. Yezu wan gãkɛ nɛrebana wa ti ba nari mɛ ti ba tara “vom sebo n ka ba’ahɛ.”—Mt. 25:46.

¹⁹ To me le nyɛ la maɣesa ayi n tɔɣeri loore Kristakɔma la yele. Pɔɣesa’ara la n tari yɛm ge ti sɛba dɛna geto la poan, banuu dela yɛmdoma. Ba yuun kɔ’ɔn maasum mɛ ge pigera gura pɔɣedita la, hali eŋa n yuun yue la. Ge pɔɣesa’ara la  n de geto la yuun ka maasum. Bala la, pɔɣedita la yuun ka basɛ ti ba kɛ̃ pɔɣedire de’eŋo la poan. La san puɣum yue la se’em me, tomam me nari ti to maasum gura se’em ma’a ti Yezu wan tara yɛla la woo wa’an ba’asegɔ la. Leyɛ’ɛsa, ligebɔɔresi makerɛ la poan, to nyɛ yamesi bayi la n tari yelemɛŋɛrɛ la n yuun kɔ’ɔn tiregɛ tuna se’em la mɛ. Ba kɔ’ɔn tiregɛ mɛ tum ti kpɛ’ɛma la puurɛ pee. Ge a yuun zaɣesɛ yameŋa sɛka n de zinnyaka la mɛ. Wana wa pa’alɛ to la bem? La pa’alɛ ti la nari ti to kɔ’ɔn tiregera Yehowa pu’usegɔ poan ta paɛ ba’asegɔ. To le baŋɛ ti loore Kristakɔma la me nari ti ba kɔ’ɔn pigera la wan eŋɛ se’em ti Yezu “dekɛ” ba keŋɛ a na’am la poan. Ba kɔ’ɔn ana la lɛɛ gura se’em ma’a ti ba wan ta naɛ la Yezu bɔna saazuo. Armagedon pooren, ba nyaa wan naɛ la Yezu bɔna.—2 Tes. 2:1; Lil. 19:9.

20. Yehowa wan eŋɛ la bem bo sɛba n keleseri a ka ka la?

²⁰ La kan yue, Yezu wan gãkɛ nɛreba ge la ka nari ti to basɛ ti dabeem tara tɔ. To san tara yelemɛŋɛrɛ ta paɛ ba’asegɔ, to saazuo Sɔ la wan bo to “paŋa la n gane zan’an” ti to “ta’an ze’ele Asaala Dayɔa nɛŋa te a gankɛ.” (2 Ko. 4:7; Lu. 21:36) To ye la saazuo bii to wan bɔna la tingɔŋɔ wa zuo woo, to san kelese ka ka la n boi Yezu makerɛ la poan la, la wan basɛ ti to saazuo Sɔ la puurɛ pee. Yehowa n tari itisoŋɔ la zuo, a wan ‘gulesɛ to yu’ura eŋɛ vom gɔŋɔ la poan.’—Da. 12:1; Lil. 3:5.