1-2. Beni n sɔi ti Yehowa naam tɔ ti to tara pupeelum to san bɔ’ɔra nɛreba?

 TO SAN soŋera nɛreba, la basɛ ti to tara la pupeelum. Yehowa n naam to se’em n bala. (Tm. 20:35) Bala pa’alɛ ti to kan makɛ tara pupeelum to san tɔ’ɔsa? Aayi. Nɛra san bo to sɛla, to puurɛ ni pee mɛ ge tomam san bo nɛra sɛla, to puurɛ ni pee mɛ gana ton to’e. La ani soŋa mɛ la Yehowa n maalɛ to se’em la. Bem zuo?

² Yehowa n naam to bala la zuo, to ni bisɛ la ton wan ta’an eŋɛ yelese’a tara pupeelum. To san ita som to wan tara pupeelum. Yehowa n naam to se’em la dela yelepakerɛ.—Ym. 139:14.

3. Beni n sɔi ti Baabule la yeti, Yehowa dela “Yenɛ n tare popeelom”?

³ Baabule la yeti to san bɔ’ɔra to tari pupeelum mɛ. Bala to wan bɔkɛ sɛla n sɔi ti Baabule la yeti Naayinɛ dela “Yenɛ n tare popeelom.” (1 Tim. 1:11) Eŋa n deŋɛ nɛŋa eŋɛ som bo to. Nɛra me ka boi n wan nyaŋɛ eŋɛ som gaŋɛ Yehowa. Wuu tuntuna Paul n yele se’em la, Naayinɛ n basɛ ti to “vɔ’ɔha ge ɛɛra ge bɔna.” (Tm. 17:28) Yelemɛŋɛrɛ, Yehowa n bo’ori to “sɛla woo n ane soŋa te to nyɛta la.”—Yam. 1:17.

4. Bem n wan soŋɛ tɔ ti to ta’an tara pupeelum?

⁴ To za’a waabi boti to tara pupeelum mɛ. To san tɔɣesa Yehowa ge ita som, to wan tara pupeelum. (Ep. 5:1) Zaseŋɔ wa poan, to wan sɔsɛ ton wan ta’an tɔɣesa  Yehowa ge ita som se’em. To me wan bisɛ ton wan eŋɛ se’em to san ti’isa ti nɛreba puurɛ ka pee la ton eŋɛ sɛla bo ba la. Yele ana wa wan soŋɛ tɔ ti to kɔ’ɔn bɔ’ɔra nɛreba ge me tara pupeelum.

TƆƔESA YEHOWA GE ITA SOM

5. Bem yɛla ti Yehowa ita bɔ’ɔra tɔ?

⁵ Bem yɛla ti Yehowa ita bɔ’ɔra tɔ? Geele yele ana wa. A bo’ori to la yelese’a n pakɛ tɔ. Yehowa kan bo to yelese’a n wan basɛ ti to vom ana lumta ge a wan bo to yelese’a n pakɛ tɔ. Makerɛ, a bo’ori to dia, lɔɣɔyɛɛtɔ la gã’aregɔ zɛ’an. (Ym. 4:8; Mt. 6:​31-33; 1 Tim. 6:​6-8) La dela Yehowa pɛ̃regerɛ tuunɛ ti a bɔ’ɔra to yelese’a n pakɛ tɔ? Aayi! Ge beni n sɔi ti a ita yele ana bɔ’ɔra tɔ?

6. To zamesɛ la bem Matu 6:​25, 26 la poan?

⁶ Yehowa n nɔŋɛ to la n sɔi ti a bɔ’ɔra to yelese’a n pakɛ tɔ. Basɛ ya ti to geele ya Yezu yetɔɣum la n boi Matu 6:​25, 26. (Kaalɛ.) Yezu dekɛ la naaŋɔ lɔɣɔrɔ eŋɛ makerɛ. Yezu dekɛ la niisi eŋɛ makerɛ yeti: “Ba ka bore, ba me ka kɛ’ɛre sun’unra banya poan, ge te ya Sɔ n boe saazuo ha ugura ba.” Yezu nyaa soke yeti: “Ya ka gane niihe?” Yezu yuun boti a pa’alɛ la bem? Yehowa yamesi dela tuulum bɔ’ɔra en gana dusi. Yehowa san fabela dusi yele, to me tari puti’irɛ ti a wan bo to yelese’a n pakɛ tɔ! Wuu sɔ n biseri a deodoma se’em la, Yehowa me n nɔŋɛ to la zuo, a bo’ori to yelese’a n pakɛ to mɛ.—Ym. 145:16; Mt. 6:32.

7. To wan eŋɛ la wani ta’an tɔɣesa Yehowa ge ita som? (Bisɛ foote la.)

⁷ Wuu Yehowa la, tomam me n nɔŋɛ nɛreba la zuo, to wan ta’an bo ba yelese’a n pakɛ ba. Makerɛ, hon mi mabia n eeri dia la lɔɣɔyɛɛtɔ? Yehowa wan ta’an doose ho poan soŋɛ en. Yehowa yamesi ni kɔ’ɔn eŋɛ la kalam soŋɛ nɛreba biɣi biɣi saŋa poan. Makerɛ, COVID-19 bã’a la n yuun wi’iri la, mabiisi yuun dekɛ la dia, lɔɣɔyɛɛtɔ la yɛla ase’a soŋɛ nɛreba. Ba zo’e zo’e me yuun ni dekɛ la ligeri soŋɛ tingɔŋɔ wa za’a waabi na’am tuuma la. Ligeri wa soŋeri mabiisi n boi tingɔŋɔ wa za’a waabi poan ti yeledi’ima paara ba la mɛ. To mabiisi wa dekɛ la yelese’ere n boi Hebru 13:16 la tum tuuma: “De ya sɛba n wan eta yelesoma ge me soŋora taaba. Se’ere n sɔe la, yele ana wa ane  wo kaanbegɔ bo’olom bo Na’ayenɛ te la eŋɛ a suunre nyɛlom la.”

8. Yehowa bo’ori to paŋa ti to ita la bem? (Filipi 2:13)

⁸ Yehowa bo’ori to la paŋa. Yehowa paŋa la ka tari beene. A puurɛ me ni pee mɛ ti a bo a yamesi paŋa. (Kaalɛ Filipi 2:13.) Hon tabelɛ zusɛ Yehowa ti a bo ho paŋa ti ho ta’an ŋmibe yeledaaŋɔ poan? Daanse’ere ho zusɛ la Naayinɛ ti a bo ho paŋa ti ho ta’an tum dabeserɛ la poan tuuma. Naayinɛ san lebese ho zusega wa ge bo ho paŋa, la wan ana ho wuu lan yuun ani tuntuna Paul se’em la. A yuun yeti: “Mam wan ta’an sɛla woo eŋɛ doohe Krista paŋa la poan.”—Filipi 4:13.

9. Sore ani poan ti to wan ta’an tɔɣesa Yehowa ge tara to paŋa la soŋera nɛreba? (Bisɛ foote la.)

⁹ To ka tari paŋa wuu Yehowa n tari paŋa se’em la. To me kan ta’an dekɛ to paŋa la bo nɛreba. Ge to wan ta’an tɔɣesa Yehowa ge dekɛ to paŋa soŋɛ nɛreba. To ta’an keŋɛ ta di da’a bo mabisɛba n kuregɛ ge me soŋɛ ba la ba yire tuuma. To bɔŋa la san wan bo to yɔ’ɔ, to ta’an yese to suuren laɣum soŋɛ maalɛ Na’am Pu’usegɔ Deo. To san tara to paŋa la ita yele ana wa, la wan soŋɛ mabiisi.

10. To yetɔɣum wan ta’an kpemese nɛreba giila la wani?

¹⁰ To tɛ̃ra ti to yetɔɣum ta’an kpemese nɛreba giila. Hon mi nɛra ti ho wan ta’an pɛ̃ɣɛ en la eŋa n iti sɛla? Hon mi nɛra suure n sa’am ti ho wan ta’an buɣelɛ a suure? La san dɛna bala, tiregɛ la ho soŋɛ nɛrekana wa. Ho ta’an keŋɛ ta bisɛ en, yi en fon poan bii ho tɛɣesɛ en. Da ba’ɛ fabela ti ho ka mi hon wan yele sɛla. Daanse’ere hon wan tɔɣɛ sɛla fii la ta’an kpemese ho mabia la giila ti a kelum tara yelemɛŋɛrɛ bii a ta’an ŋmibe a bɔŋa la poan.—Mag. 12:25; Ep. 4:29.

11. Yehowa tari a yɛm la ita la bem?

¹¹ Yehowa n bo’ori to yɛm. Tuntuna Yames yuun yeti: “Ya se’em n ka mi sɛla n de som bii be’em sohɛ ya Na’ayenɛ, gee a wan pee poorɛ bo ya. Se’ere n sɔe la, enŋa n bo’ore nɛra woo gee ka ganhera.” (Yam. 1:5.) Bala pa’alɛ ti Yehowa ka boti a tara a yɛm la a ma’a. A tari a yɛm la bɔ’ɔra la yɛri yɛri. Tɛ̃ra ti Yehowa san bɔ’ɔra nɛreba yɛm a “ka ganhera.” To ta’an zusɛ Yehowa ti a bo to yɛm ge ti dabeem ka tara tɔ. Yelemɛŋɛrɛ, eŋa mea n yele to ti to zusa en.—Mag. 2:​1-6.

12. To wan ta’an tara to yɛm la ita la bem?

¹² Tomam me wan ta’an tɔɣesa Yehowa  ge tara to yɛm la ita la bem? (Ym. 32:8) Yehowa nɛreba tari yɔ’ɔ zo’e zo’e mɛ ti ba tara ban zamesɛ sɛla la pa’ala nɛreba. Makerɛ, to wan ta’an kumesɛ sɛba n nan pɔsɛ na’am mɔɔlegɔ la ti ba mɔɔla. Keendoma me soŋeri keendoma soŋeredoma mɛ la mabiburaasi n muse ko’om ti ba ta’an tuna tansugere la tuuma. Mabisɛba n mi mɛa tuuma la me soŋeri mabiisi basɛba mɛ ti ba ta’an tuna tiokrasi mɛa tuuma.

13. To san kumesa nɛreba, to wan eŋɛ la wani ta’an tɔɣesa Yehowa?

¹³ Tɔɣesa Yehowa ho san kumesa nɛreba. Tɛ̃ra ti Yehowa tari a yɛm la bɔ’ɔra la yɛri yɛri. Bala la, tomam me wan pa’ala nɛreba ton mi ge tana ita yelese’a. To kan ti’isa ti to san pa’alɛ mabiisi la ton mi sɛla, ba wan tee soe tuunɛ la ti to ze’a nubeele. To me kan malum ti’isa ti: ‘Nɛra ka kumesɛ mam! Bala la, mam ka nari ti n kumesɛ nɛra.’ Yehowa yamesi ka tari putɛ-ana wa. To tuɣum bɔta la to kumesɛ nɛreba ti ba tana ita ton tã ita yelese’a la. Hali to “lagom maahom mɛ te to dekɛ to vom tehɛ” nɛresɛba ti to kumesa ba la zuo. (1 Tes. 2:8) To san ita bala, to tari puti’irɛ ti, “bama me wan pa’alɛ sɛba me.” (2 Tim. 2:​1, 2) To san yese to suuren pa’ala nɛreba, tomam la bamam za’a wan tara yɛm la pupeelum.

LA SAN TA ANA WUU NƐREBA PUURƐ KA PEE LA TON BO’ORI LA

14. Nɛreba zo’e zo’e ni eŋɛ la bem to san eŋɛ som bo ba?

¹⁴ To san ita som bɔ’ɔra nɛreba yele yele wuu to mabiisi la, ba puurɛ ni pee mɛ ti ba pɛ̃ɣɛ tɔ. Ba ta’an gulesɛ gɔŋɔ pa’alɛ ba puurɛ n pee se’em bii ba eŋɛ sɛla n boi de to’ore bo to. (Kol. 3:15) Ba san ni eŋɛ pa’alɛ ti ba puurɛ pee ya, tomam me puurɛ ni pee mɛ.

15. La nari ti to tɛ̃ra la bem nɛreba san puɣum ka eŋɛ pa’alɛ ti ba puurɛ pee ya la ton iti sɛla la?

¹⁵ Yelemɛŋɛrɛ la dela, saŋa ase’a to san ni eŋɛ som bo nɛreba ba ni ka yeti ba pu’usɛ ya. To san dekɛ to saŋa, to paŋa la to nutatum soŋɛ nɛreba, la ta’an ana to wuu ba puurɛ ka pee la ton eŋɛ sɛla bo ba la. La san ana to bala, to wan eŋɛ la wani tara pupeelum ge ti to sunsɔa kan nyie? Tɛ̃ra sɛla n boi Tooma 20:35 la. La ka pakɛ la nɛreba n iti se’em, to wan kelum tara pupeelum. Hali nɛreba san puɣum ka yeti ba pu’usɛ ya, to ta’an kelum yese to suuren bɔ’ɔra yɛri yɛri. Wani wani? To geele ya sarɔtɔ se’a ti to wan ta’an eŋɛ bala.

16. Bem n wan soŋɛ tɔ ti to yese to suuren bɔ’ɔra?

¹⁶ Tɛ̃ra ti ho san bɔ’ɔra ho tɔɣeseri la Yehowa. La ka pakɛ la to eŋɛ pa’alɛ ti to puurɛ pee ya bii to ka eŋɛ pa’alɛ, Yehowa bo’ori to yelesoma mɛ. (Mt. 5:​43-48) Yehowa pu’ulum biŋe ti to san bɔ’ɔra ge “da gure ya te ba lebehe bo, Na’ayenɛ wan yɔ tɔ.” (Lu. 6:35). Bala la, da basɛ ti ho giila kɔ’ɔsɛ nɛreba san puɣum ka yeti ba pu’usɛ ya.Tɛ̃ra ti Yehowa wan kã bo ho la hon soŋeri nɛreba la, se’ere n sɔi la ‘ho yese la ho suuren bɔ’ɔra.’—Mag. 19:17; 2 Ko. 9:7.

17. Beni n sɔi ti to bɔta ti to ita som? (Luke 14:​12-14)

¹⁷ To san bɔ’ɔra, sore kuyima ti to wan ta’an tɔɣesa Yehowa dela, to dekɛ sɛla n boi Luke 14:​12-14 la tum tuuma. (Kaalɛ.) Yelemɛŋɛrɛ, la daɣɛ be’em ti to ita som bɔ’ɔra buntateba bii to beem ba ti ba wa’an to yire na di. Ge to wan eŋɛ la wani to san baŋɛ ti to soŋeri la nɛresɛba  ti to ti’isa ti ba beere sa’am me wan soŋɛ to la ma’a? La nari ti to tiregɛ dekɛ sɛla ti Yezu yele la tum tuuma. To ta’an ita som bɔ’ɔra nasedoma ge me ni beem ba ti ba wa’an to yire na di. To san ita bala, to puurɛ wan pee se’ere n sɔi la to tɔɣeseri la Yehowa. Putɛdena wa wan soŋɛ tɔ ti to tara pupeelum, hali nɛreba san puɣum ka yeti ba pu’usɛ ya la ton iti sɛla la.

18. To ka nari ti to ita la bem ge beni n sɔi?

¹⁸ Da ti’isɛ ti nɛreba puurɛ ka pee la hon iti sɛla la. (1 Korint 13:7) To san eŋɛ sɛla bo nɛreba ti ba ka yeti ba pu’usɛ ya, to ta’an soke tomea yeti: ‘La dela sira ti ba puurɛ ka pee bii ba yeen tamɛ mɛ?’ Daanse’ere yɛla ase’a n sɔi ti ba ka yeti ba pu’usɛ ya. Nɛreba basɛba puurɛ ta’an pee la ton eŋɛ sɛla bo ba la ge la ni kpe’em bo ba mɛ ti ba yeti ba pu’usɛ ya. Daanse’ere valum ta’an tara ba ti ba basɛ ti nɛra soŋɛ ba, se’ere n sɔi la bamam n yuun tuɣum soŋera nɛreba. Lan yeen dɛna se’em, ton nɔŋɛ to mabiisi la zuo, to wan tara putɛsonɛ la ba ge me kelum tara pupeelum ta’an ita som.—Ep. 4:2.

19-20. Bem n wan le soŋɛ tɔ ti to ta’an tara pupeelum ita som? (Bisɛ foote la.)

¹⁹ Di’isa suure. Naba Solomon n de yɛmdaana la yuun tɔɣɛ ton wan ita som yele yeti: “Lobe ho dia bahɛ ko’om poan, la han eŋɛ dabeha ayi, ho wan le nyɛ ka.” (Pa. 11:1) Gulesegɔ wa pa’alɛ ti ‘la san puɣum yue la se’em me,’ daanse’ere basɛba wan kelum yele to yeti ba pu’usɛ ya la ton eŋɛ som bo ba la. To mabipɔka ayima yuun nyɛ yele wa n de yelemɛŋɛrɛ se’em mɛ.

²⁰ Yuuma zo’e zo’e n tole ti kaarɛ bisegadaana pɔɣa gulesɛ gɔŋɔ kpemese mabipɔka ayima n nan muse ko’om giila. A gɔŋɔ la poan, a yuun pa’alɛ la yele n pakɛ se’em ti a kelum tara yelemɛŋɛrɛ bɔ’ɔra Yehowa. Yuuma anii pooren ti mabipɔka wa gulesɛ gɔŋɔ bo kaarɛdaana pɔɣa la  yeti: “Mam mi ti ho ka mi yele dena wa ge mam boti n basɛ ti ho baŋɛ ti ho soŋɛ mam mɛ yuuma zo’e zo’e poan.” A le yeti: “[Yelese’a ti ho yuun gulesɛ la] kpemese mam giila mɛ. Mam kelum tɛ̃ra gulesegɔ sɛka ti ho yuun tɔɣɛ de yele la mɛ.” a A yuun tɔɣɛ pa’alɛ yeledaaŋɔ se’a n paɛ en la ge yeti: “Saŋa ase’a, mam ni kɔ’ɔn bɔta la n basɛ yelemɛŋɛrɛ la ge da le pu’usa Yehowa. Ge gulesegɔ la ti ho yuun tɔɣɛ de yele la yuun kpemese mam giila mɛ ti mam kelum pu’usa Yehowa. Yuun aŋa poan la, sɛla ka boi n kpemese mam giila gana gɔŋɔ la ti ho yuun gulesɛ bo mam la.” Bisɛ kaarɛ bisegadaana pɔɣa wa puurɛ n wan pee se’em la eŋa n yuun to’e gɔŋɔ wa ‘yuuma zo’e zo’e pooren’ la! Tomam me ta’an eŋɛ sɛla bo nɛra ta paɛ yuuma zo’e zo’e ge ti a nyaa yeti a pu’usɛ ya.

21. Beni n sɔi ti hon lu ho suure ti ho wan kɔ’ɔn tɔɣesa Yehowa n bo’ori yɛri yɛri la?

²¹ Wuu ton puɣum baŋɛ sɛla la, Yehowa naam tɔ ti to bɔna la to to’ore. La boi bim ti to san ni to’e sɛla, to puurɛ ni pee mɛ ge to puurɛ ni ba’ɛ pee me gaŋɛ to san dekɛ sɛla bo nɛra. La ni ana to la ma ma to san dekɛ sɛla bo to mabiisi. To puurɛ me ni pee mɛ ba san yele to yeti, ba pu’usɛ ya. Ge nɛra san yele to yeti a pu’usɛ ya bii a ka yele to, to puurɛ wan kelum pee se’ere n sɔi la to mi ti to eŋɛ la som. Tɛ̃ra ti, “Na’ayenɛ tare gaŋɛ, a wan bo ho gana bana.” (2 Yel. 25:9) To kan ta’an bo nɛreba gaŋɛ Yehowa n wan bo to se’em la! Pupeelum ka boi gana Yehowa n wan yɔ ho sɛla la. Bala la, basɛ ya ti to kɔ’ɔn lu to suure ti to wan tɔɣesa to saazuo Sɔ la n bo’ori yɛri yɛri la.