1-2. Beni n sɔi ti Yehowa nɛreba tara pupeelum? (Yames 1:​22-25)

 YEHOWA la a Dayua la boti la to tara pupeelum. Yooma 119:2 yeti: “Na’ayenɛ kan’somɔ boe mɛ la sɛba n nane a kan’aŋɔ la, ge ɛɛra en la ba suunre zan’an la.” Yezu me yuun yeti: “Popeelom ton bɔna la sɛba n kelehere Na’ayenɛ yelehom ge eta n bote ba eta se’em la.”—Lu. 11:28.

² Yehowa nɛreba tari la pupeelum. Beni n sɔi? Yɛla zo’e zo’e n sɔi ge sɛla n gani za’a dela ton kaali Naayinɛ Yelesum la daarewoo ge me tara de tuna tuuma la.—Kaalɛ Yames 1:​22-25.

3. To nyɛti nyuurɔ la wani to san tara Naayinɛ Yelesum la tuna tuuma?

³ To san ‘tara Naayinɛ Yelesum la tuna tuuma’ to nyɛti la nyuurɔ zo’e zo’e. Yehowa puurɛ ni pee mɛ to san tara a Yelesum la tuna tuuma, bala me n ni basɛ ti tomam me tara pupeelum. (Pa. 12:13) To san tara ka’aŋɔ la n boi Baabule la poan tuna tuuma, la ni basɛ ti to tara la bɔnsoŋa la to yidoma la to mabiisi. Wana wa kɔ’ɔn dɛna la yelemɛŋɛrɛ. La ni gu’ura to mɛ ti yeledaaŋɔ se’a  n paari sɛba n ka dole Yehowa pa’alegɔ la ka paara tɔ. Yele wa kɔ’ɔn makɛ mɛ la Naba David n yuun yele sɛla la. Se’em ma’a ti a yuun tɔɣɛ Yehowa lɔɔ, a nɔya, la a tontɔɔ gãkerɛ yele la, a yuun nyaa ki’ilum a yetɔɣum la yeti: “Hom se’em n dole a, ho wan nyɛ yɔɔrɛ se’ere n kanregɛ.”—Ym. 19:​7-11.

4. Beni n sɔi ti la ni daɣena naana ti to kaala Naayinɛ Yelesum la ge tara tuna tuuma?

⁴ La daɣɛ naana ti to kaala Naayinɛ Yelesum la ge tara tuna tuuma. La boi bim ti to ka tari nɛŋa ge la nari ti to ɛ saŋa kaala Baabule la ta’an bɔkera Naayinɛ n boti to ita sɛla. Basɛ ya ti to bisɛ yelese’a n wan soŋɛ tɔ ti to ta’an kaala Baabule la saŋa woo. To wan le bisɛ sɛla n wan soŋɛ tɔ ti to ta’an ti’isa taɣesa ton kaali sɛla la ge me tara de tuna tuuma.

LOE SAŊA TA’AN KAALA BAABULE LA

5. To tari to saŋa la zo’e zo’e ita la bem?

⁵ Yehowa nɛreba zo’e zo’e ka tari nɛŋa. To tari to saŋa la zo’e zo’e tuna la yelese’a n pakɛ. Makerɛ, to tuni mɛ ti to ta’an bisa tomea la to deodoma. (1 Tim. 5:8) To sɛba biseri la bã’adoma la to yidoma sɛba n kuregɛ. La me nari ti to nyɛ saŋa bisera to imma’asum yɛla. To me le tara la tuuma to tansuga la poan. Ninmu’urɛ tuunɛ ayima me dela to mɔɔlɛ yelesoma la bo nɛreba. Ho san bisɛ tuuma wa n zo’e se’em la, ho wan eŋɛ la wani nyɛ saŋa kaala Baabule la daarewoo, ti’isa taɣesa ge me tara de tuna tuuma?

6. Ho wan eŋɛ la wani ta’an kaala Baabule la daarewoo? (Bisɛ foote la.)

⁶ Baabule kaalegɔ dela “sɛla n de ma’an” ti la nara ti Kristakɔma za’a waabi ita. (Flp. 1:10) Yuumadaana la yuun tɔɣɛ nɛresɛka n tari pupeelum la yele ti: “A nini tegɛ la Na’ayenɛ pa’alegɔ ge te a tɛnra pa’alegɔ la bolika la yu’uŋɔ.” (Ym. 1:​1, 2) Bala pa’alɛ ti la nari ti to ɛ saŋa kaala Baabule la. Sankani n nari ti ho kaala Baabule la? Nɛra woo ta’an  loe sansɛka n makɛ bo en. La nari ti to loe sansɛka n wan basɛ ti to ta’an kaala Baabule la daarewoo. Mabia ayima yu’urɛ n de Victor yeti: “Mam nɔŋɛ la n ni kaala Baabule la bulika. La boi bim ti mam ka nɔŋɛ n isigera kalam ge sankaŋa la, sɛla woo ni ana la siim ti mam san kaala, n wan ta’an bɔkɛ.” Daanse’ere la me ani hon la bala. Soke homea yeti, ‘Sankani n makɛ bo mam ti n kaala Baabule la?’

NI TI’ISƐ TAƔESƐ HON KAALI SƐLA LA

7-8. Bem n wan ta’an basɛ ti to kan nyɛ nyuurɔ zo’e zo’e to Baabule kaalegɔ poan? Bo makerɛ.

⁷ Ho san loe saŋa ti ho kaala Baabule la, la nari ti ho bisɛ homea soŋa yele deyima poan. Hon tabelɛ kaalɛ sɛla ti la ka yue ti ho tamɛ? Yele ana paari to za’a mɛ. La me ta’an ana to bala to Baabule kaalegɔ poan. Daanse’ere ho ta’an loe ti ho kaalɛ Baabule la bɔba ase’a dabeserɛ la poan. Bala ani soŋa. La nari ti to ni kɔ’ɛ to puti’irɛ ge tum doose bala. (1 Ko. 9:26) Ge to san bɔta ti to nyɛ nyuurɔ zo’e zo’e Baabule la poan, la ka nari ti to yeen kaala.

⁸ Geele makerɛ wa bisɛ: Saa ko’om n ni basɛ ti bunbula zɔ’ɔra. Ge saa la san ba’ɛ niira zɔ’ɔra, dia la ka maali. La san niira fii fii, la ni basɛ ti ko’om la sigera tiŋa mɛ ti bunbula la ta’an zɔ’ɔra. Bala la, la ka nari ti to kaala Baabule la kalam kalam ge to tuɣum ma’ɛ tomea ti’isa taɣesa ton kaali sɛla la, la wan eŋɛ se’em ti to ta’an tɛ̃ra.—Yam. 1:24.

9. Ho wan eŋɛ la wani, ho san baŋɛ ti ho ba’ɛ kaala Baabule la kãbela mɛ?

⁹ Saŋa ase’a hon ni kaala Baabule la kãbela mɛ? La san dɛna bala, ho wan eŋɛ la wani? Ni ma’ɛ homea kaala ta’an ti’isa taɣesa hon kaali sɛla la. Bii ho san kaalɛ ba’asɛ, ni su’use ta’an ti’isɛ taɣesɛ hon kaali sɛla la. La ka nari ti ho bisɛ ti la kpe’em mɛ. Ho ta’an dekɛ saŋa zo’e zo’e zamesa, la wan eŋɛ se’em ti ho ta’an ti’isɛ taɣesɛ hon kaali sɛla la. Ho  me ta’an kaalɛ kaalegɔ zɛ’ɛsi fii ge dekɛ saŋa la n gee la ti’isɛ taɣesɛ. Victor ti to puɣum tɔɣɛ a yele la yeti: “Mam ni kaalɛ la Baabule la zuo buyina ma’a. Mam n ni kaalɛ bulika la zuo, mam ni dekɛ dabeserɛ la za’a ti’isɛ taɣesɛ la mam n kaalɛ sɛla la.” Ho ta’an loe hon boti ho kaalɛ zo’e se’em ge la yele pakɛ mɛ ti ho ni ma’ɛ homea ta’an ti’isɛ taɣesɛ hon kaali sɛla la.—Ym. 119:97; bisɛ daka la zuo n de “ Ti’isɛ Soke Ana Wa Yele.”

10. Bo makerɛ pa’alɛ hon wan eŋɛ se’em ta’an dekɛ hon zamesɛ sɛla la tum tuuma. (1 Tesalonika 5:​17, 18)

¹⁰ La ka pakɛ la hon loe sansɛka bii hon tari saŋa se’em kaala Baabule la, ni ti’isɛ bisɛ hon wan ta’an dekɛ hon kaalɛ sɛla la tum tuuma se’em. Ho san kaala Baabule la, ni sokɛ homea yeti, ‘Mam wan eŋɛ la wani ta’an dekɛ yele wa tum tuuma nananawa bii beere sa’am?’ Makerɛ, to yeti ho kaalɛ la 1 Tesalonika 5:​17, 18. (Kaalɛ.) Ho san kaalɛ kaalegɔ zɛ’an wa ba’asɛ, ho ta’an su’use ge soke homea yeti, ‘Mam ni zusɛ la sugumnɔɔrɛ bulɛ dabeserɛ la poan ge n zusega la ni ana la wani? Ho ta’an ti’isɛ taɣesɛ Yehowa n eŋɛ sɛla bo ho ti ho puurɛ pee. Ho ta’an le ti’isɛ bisɛ yɛla atã ti Yehowa eŋɛ bo ho dabeserɛ la poan ge pu’usɛ en. Hali to san nyɛ saŋa fii ti’isɛ taɣesɛ ton zamesɛ sɛla Baabule la poan la, la wan soŋɛ tɔ ti to bɔkɛ Naayinɛ Yelesum la ge me dekɛ de tum tuuma. Ho san tara hon zamesɛ sɛla la tuna tuuma daarewoo, ho wan ta’an pu’usa Naayinɛ soŋa! Ge ho wan eŋɛ la wani, ho san bisɛ ti hon nari ti ho dekɛ yelese’a tum tuuma la ba’ɛ zo’e mɛ?

MINA HO TƆREGƆ BEENE

11. Beni n sɔi ti saŋa ase’a to giila ni kɔ’ɔsɛ? Bo makerɛ.

¹¹ Ho san kaala Baabule la ge baŋɛ ti la nari ti ho eŋɛ teere zo’e zo’e, bala ta’an basɛ ti ho giila kɔ’ɔsɛ. Makerɛ: Ho kaalɛ la Baabule la zina ti la ka’am hɔ ti ho da wɛlesa. (Yam. 2:​1-8) Ti ho nyaa baŋɛ ti la nari ti ho eŋɛ teere la hon geele nɛreba se’em la. Bala dela yelesonɛ! Yimbeere ti ho le kaalɛ zɛ’an kayima ti la pa’alɛ hɔ, hon nari ti ho bisera ho yetɔɣum se’em. (Yam. 3:​1-12) Ho baŋɛ ti saŋa ase’a ho yetɔɣum ni ka kpɛmesa giila. Ti ho nyaa kɔ’ɛ ho puti’irɛ ti ho wan basɛ ti ho yetɔɣum kpɛmesa giila. Daarɛ deyima ti ho kaalɛ Baabule la ti la  ka’am hɔ ti la ka nari ti ho nɔŋɛ tingɔŋɔ wa yɛla. (Yam. 4:​4-12) Ho nyaa baŋɛ ti la nari ti ho bisɛ homea soŋa la hon loore de’eŋo seto. Ta paɛ kalam, ho ta’an ti’isa ti la kpe’em mɛ ti ho dekɛ yele ana za’a tum tuuma.

12. Beni n sɔi ti la ka nara ti ho giila kɔ’ɔsɛ, ho san baŋɛ ti la nari ti ho eŋɛ teere? (Bisɛ tiŋanɔɔrɛ yelesum la.)

¹² La san nara ti ho eŋɛ teere zo’e zo’e, da basɛ ti ho giila kɔ’ɔsɛ. Bala pa’alɛ ti ho sirege la homea ge me tara putɛsonɛ. Nɛra sɛka n siregeri amea ni kaalɛ Baabule la mɛ ge bisɛ yelese’a n nari ti a eŋɛ teere de poan. a Tɛ̃ra ti, to san wan dekɛ ‘halɛ paalega la’ yɛ, la daɣɛ daayinɛ tuunɛ. (Kol. 3:10; dekɛ makɛ “is being made new” zaseŋɔ yelesum la.) Bem n wan soŋɛ hɔ ti ho tara Naayinɛ Yelesum la tuna tuuma?

13. Ho wan eŋɛ la wani dekɛ hon zamesɛ sɛla la tum tuuma? (Bisɛ foote la.)

¹³ Hon wan tuɣum dekɛ ni hon zamesɛ sɛla la za’a tum tuuma la, ho ta’an loe ayima dekɛ tum tuuma. (Mag. 11:2) Ho ta’an dãalɛ yelese’a ti ho bɔta ti ho dekɛ tum tuuma la basɛ. Nyaa loe ba poan ayima bii bayi dekɛ tum tuuma ge ti pooren, ho nyaa tum sɛla n gee la. Ho wan ta’an loe la bem tum tuuma yia?

14. Ho wan ta’an loe la bem tuunɛ tum yia?

¹⁴ Ho ta’an bisɛ yelese’ere n ka ba’ɛ kpe’em dekɛ tum tuuma yia. Bii ho loe yelese’ere n pakɛ hɔ dekɛ tum tuuma yia. Ho san loe ti ho eŋɛ bala, ho ta’an dekɛ Watch Tower Publications Index bii Yehowa Sɛɛradoma Viisegɔ Gɔŋɔ  eŋɛ viisegɔ. Zusɛ Yehowa ti a soŋɛ hɔ “te ho bɔta la ho ta’an nana n bote se’em la” ge nyaa dekɛ hon zamesɛ sɛla la tum tuuma. (Flp. 2:13) Ho san ta’an dekɛ hon zamesɛ sɛla la tum tuuma, bala wan kpemese ho giila ti ho dekɛ sɛla n gee la me tum tuuma.

BASƐ TI NAAYINƐ YELESUM LA “TUNA TUUMA HO POAN”

15. Beni n sɔi ti Yehowa nɛreba bɔna ba to’ore la nɛresɛba n yeti bamam kaali Baabule la mɛ la? (1 Tesalonika 2:13)

¹⁵ Nɛreba basɛba yeti bamam kaalɛ Baabule la mɛ sugumnɔɔrɛ zo’e zo’e ge ba sakɛ bo sɛla ti Baabule la yɛta la? Ba tiregeri ti ba tara Baabule la n yele sɛla la tuna tuuma? Lebesego la dela aayi. Ge Yehowa nɛreba ka ani bala! Wuu yuun kɔbega sɛka n deŋɛ nɛŋa Kristakɔma la, to sakɛ ti Baabule la “seren kɔ’ɔn dɛna la Yenɛ yelehom.” To me tiregeri mɛ ti to dekɛ ka’aŋɔ la n boi Baabule la poan la tuna tuuma.—Kaalɛ 1 Tesalonika 2:13.

16. Bem n wan soŋɛ tɔ ti to ta’an tara Naayinɛ Yelesum la tuna tuuma?

¹⁶ La daɣɛ naana ti to kaala Baabule la ge tara de tuna tuuma. La ta’an kpe’em bo to ti to nyɛ saŋa kaala Baabule la. To me ta’an yeen kaala Baabule la ge ka ti’isa taɣesa, bii to ta’an ti’isa ti ton nari ti to eŋɛ teere se’a la ba’ɛ zo’e mɛ. Lan yeen dɛna se’em, Yehowa wan soŋɛ tɔ. Basɛ ya ti to lu to suure ti to wan tara Naayinɛ Yelesum la tuna tuuma. Nɔkpe’ene kai ti to san tara Naayinɛ Yelesum la tuna tuuma, to wan tara pupeelum.—Yam. 1:25.