La ka nari ti to ti’isa ti, Yezu podɔleba 70 la n yuun ka boi Daana Zaanɔɔrɛ Dia la poan la pa’alɛ ti Yezu yuun dekɛ ba basɛ mɛ bii ba yuun zaɣesɛ en mɛ. Yezu yuun boti la a naɛ la tuntuneba la ma’a sankaŋa.

Nɛreba 12 la, la 70 la za’a yuun dela Yezu podɔleba. Ge a yuun loe la 12 la ma’a ti ba dɛna a tuntuneba. (Lu. 6:​12-16) Yezu yuun boi la Galilee ge “yi a dɔlɔba pia la bayi la” ge “tom ba te ba yehe la ba ta mɔɔla yɛhera Na’ayenɛ Sɔ’ɔlom la ge la ba tebera nɛreba.” (Lu. 6:​1-6) Pooren, Yezu n yuun boi Yudea la, a yuun “loe la nɛreba pihiyopɔe. A loe ba bala tom ba la bayi’ bayi’.” (Lu. 9:51; 10:1) Bala la, Yezu podɔleba yuun boi la tisi zo’e zo’e mɔɔla a yɛla.

Yuunɛ woo poan, Yudadoma la n de Yezu podɔleba la yuun ni naɛ la ba yidoma di Azɔɔtole De’eŋo la. (Yɛh. 12:​6-11, 17-20) Ge ti Yezu nyaa ki la, eŋa la a tuntuneba la yuun keŋɛ la Yerusalem. Yezu yuun ka yi a podɔleba la za’a n boi Yudea, Galilee la Perea la ti ba laɣum wa’ana di Azɔɔtole De’eŋo la. Yezu yuun boti la a naɛ la tuntuneba la ma’a sankaŋa. Yezu yuun yele ba ti: “La daa boe n suunre poan te n lagom di la ya dikana wa ge baŋɛ nyɛ n namehegɔ.”—Lu. 22:15.

Yezu yuun mi sɛla n sɔi ti a eŋɛ bala. Yezu n de “Yenɛ Pebila la n wa’ana te a dekɛ teŋa wa zuo be’em bahɛ.” (Yon 1:29) A yuun ki la Yerusalem, bilam ti ba yuun ni ta ita kaabegɔ bɔ’ɔra Naayinɛ. Azɔɔtole pebila la yuun tiɛ Yudadoma la ti Yehowa n yuun faaɛ ba yese Egypt. (1 Ko. 5:​7, 8) Ge Yezu kum la n wan faaɛ nɛresaaleba za’a yese be’em la kum poan basɛ. Yezu kum la n wan basɛ ti tuntuneba 12 la dɛna ɛ̃berɛ Krista tansugere la poan. (Ep. 2:​20-22) Yerusalem n de zilam tiŋa la tari la “kuga pia la bayi” ti ba gulesɛ “Pebila la tontoneba pia la bayi la yu’ura eŋɛ kuga wa zuto.” (Lil. 21:​10-14) Bala la, tuntuneba pia la bayi wa yuun tari la ninmu’urɛ tuunɛ n de ba basɛ ti Naayinɛ puti’irɛ tum tuuma. Bala basɛ ti to bɔkɛ sɛla n sɔi ti Yezu yuun bɔta ti a tuntuneba la ma’a naɛ la en ti ba di ki’i Azɔɔtole Dia la, la Daana Zaanɔɔrɛ Dia la.

Podɔleba 70 la, la sɛba n gee la yuun ka laɣum di Daana Zaanɔɔrɛ Dia la. Ge podɔleba sɛba n yuun tari sakerɛ la wan nyɛ nyuurɔ Daana Zaanɔɔrɛ Dia la poan. Nasebo ti Yezu yuun tɔɣɛ de yele sankaŋa la, podɔleba sɛba n wan ta pa’asɛ loore Kristakɔma la poan la n wan naɛ la Yezu ti ba di nabumɔ.—Lu. 22:​29, 30.