Yehowa Sɛɛradoma nyɛti la vo’osum dia elektronik poan ti la ka tara makerɛ. Ge tisi zo’e zo’e poan, to mabiisi la kan ta’an da Intanɛt. Basɛba me kɛ̃’ɛri la tinse’a ti ba kemesa bugum saŋa woo, ti Intanɛt la me ka tuna soŋa bii ka bɔna.

 Ge la bala za’a, to mabiisi zo’e zo’e nyaa wan ta’an ve’e elektronik gɔnɔ hali ba san puɣum ka tara Intanɛt! La wan ta’an eŋɛ?

 JW Box dela daka pika ti ba dekɛ bo tansuga se’a n ka tari Intanɛt la. Ku tari la router ti ba da company ayima zɛ’an ti Betel Kompiita Wele maalɛ software sɛka ti ba wan ta’an tara vɛ’ɛra elektronik gɔnɔ la vidiyodoma n boi jw.org. Ayima woo laɣehɔ paɛ wuu $75 U.S.

 Na’am Pu’usegɔ Deo poan, mabiisi wan ta’an dekɛ ba fon kɔnɛktɛ JW Box la ve’e elektronik gɔnɔ la vidiyodoma. Hali sɛba n tari fon kɛka bii fon sɛka n ka eŋɛ laɣehɔ wan ta’an kɔnɛktɛ. Ge tansugere san ka tara Intanɛt, ba wan eŋɛ la wani nyɛta lɔɣepaala JW Box wa poan? Ŋmarega woo, tigere yile la ni ve’e la lɔɣepaala se’a n boi jw.org la eŋɛ Pendrive poan ti ayima woo laɣehɔ paɛ wuu $4 U.S. ti mabiisi la me ta’an ve’e JW Box la poan.

 JW Box soŋɛ to mabiisi la wani? Mabia ayima yu’urɛ n de Nathan Adruandra, n boi Democratic Republic of Congo, yeti: “Mam daa ni kɔ’ɔn tiregera mɛ ti n ta’an ve’e ‘Oo Yehowa, . . . Mam Dekɛ N Mɛŋa Delum La Hon’ la Tɛra Lɔt Pɔɣa La Yele Baabule de’eŋo la ge koŋe. Bala daa basɛ ti mam giila kɔ’ɔsɛ mɛ. Nananawa, mam wan ta’an ve’e vidiyodoma wa n fon poan, wana me soŋɛ tomam dɔɣereba mɛ ti to ta’an pa’ala to kɔma soŋa.”

 Mabia ayima n soŋeri tansuga se’a n boi Nigeria ti ba tara JW Box la tuna tuuma yeti: “Mabiisi bisɛ ti JW Box dela bo’olum ti Yehowa dekɛ bo ba. Ba puurɛ pee mɛ la bu de naana bɔ’ɔra ba ti ba wan ta’an ve’e vidiyodoma la gɔnseto n boi Pa’alegɔ Lɔɣɔrɔ Daka la poan la.”

 JW Box n gaŋɛ 1,700 ti ba dekɛ bo to mabiisi n boi Africa, Oceania la South America ge le maasena ti ba tari basɛba ta bo tansuga zo’e zo’e. To nyɛti ligeri la bɛ da’ara lɔɣɔrɔ ana wa za’a? To tari la bo’olum la ti ba tara soŋera tingɔŋɔ wa za’a waabi na’am tuuma la ita bala, nɛreba zo’e zo’e me ni doose la donate.pr418.com bo ba bo’olum. To pu’usɛ ho zo’e zo’e la hon bo’ori yɛri yɛri se’em la.