“To puurɛ pee mɛ ti to yele ya yeti, Tigere Zuo Bisegadoma la sakɛ ti, ya tiŋa gɔmɛt la san bo yɔ’ɔ, kɔ’ɔn pɔsɛ April 1, tansuga za’a wan pɔsɛ ita zamesegɔ Na’am Pu’usegɔ Deto poan.” Ban yuun bo lasebaarɛ wa jw.org poan March 2022 la, la yuun basɛ ti Yehowa Sɛɛradoma n boi tingole wa za’a poan puurɛ pee mɛ. Ge COVID-19 bã’a la daa nan ka tole. a Bem teere ti la yuun nara ti to eŋɛ la lɔɣɔtuni n yuun nari ti to tara la wan eŋɛ se’em ti la ta’an gu sɛba n wan keŋɛ zamesegɔ la, bã’a wa poan? Yuuma ayi ti to ka laɣesɛ taaba eŋɛ zamesegɔ. Bala la, to Na’am Pu’usegɔ Deto la wan ana soŋa?

 To mabiisi la yuun dekɛ la ŋmaresi zo’e zo’e eŋɛ maaseŋɔ la wan eŋɛ se’em ti to ta’an le kena Na’am Pu’usegɔ Deto poan.

 Ton daa ka le ita zamesegɔ Na’am Pu’usegɔ Deto poan yuun 2020 la, ŋmarega pooren ti Worldwide Design/Construction Department (WDC) n boi Warwick, New York tiŋa la, yuun pɔsɛ geele COVID-19 bã’a la n wan basɛ ti to Na’am Pu’usegɔ Deto la ana se’em la ton nari ti to eŋɛ se’em ti la ta’an gu mabiisi la.

 Yelese’a n wan soŋɛ tiŋa kayima la yuun boi la de to’ore la yelese’a n wan soŋɛ tiŋa kayima me. Matthew De Sanctis n tuni WDC tɔɣɛ pa’alɛ ti: “Tisi basɛba poan, yeledaaŋɔ la dela ban wan pɛɛra ba nu’usi zɛ’an. Na’am Pu’usegɔ Deto la san ka tara ko’om, ba ni ta da mɛ bii ba ta ãkɛ lua bii kulega poan. Tisi basɛba poan, gɔmɛt kpɛ’ɛndoma yuun eŋɛ teere mɛ la ban wan tara air-condition tuna tuuma se’em ge le gulesɛ sɛla labelɛ zɛ’ɛsi to’ore to’ore n pa’alɛ ban wan bisa ba imma’asum yɛla ge bɛ̃ɣesa bamesi se’em.”

 Mabiisi la yuun eŋɛ la wani ta’an doose pa’alegɔ ana wa? Matthew yeti, ba yuun baŋɛ ti ba wan ta’an nyɛ “lɔɣɔrɔ n ka ba’ɛ eŋɛ ligeri ge ana soŋa” bo na’am Pu’usegɔ Deto zo’e zo’e. Ho san keŋɛ Papua New Guinea tiŋa, mabiisi yuun dekɛ la galon kãra n tari pipe ze’ele Na’am Pu’usegɔ Deto la poan ti ba tara pɛɛra ba nu’usi. Mabiisi la yuun dekɛ la Amerika dɔla 40 ma’a da lɔɣɔse’a ti ba tara pɛɛra nu’usi bo Na’am Pu’usegɔ Deto n boi tinkpɛŋa poan la. Mabiisi daa nyaŋɛ da nu’usi peere lɔɣɔrɔ n gaŋɛ 6,000 ze’ele Asia ta bo mabiisi n boi Afrika ti ba dekɛ keŋɛ ba Na’am Pu’usegɔ Deto poan.

 Teere ase’a ti ba yuun eŋɛ dela, ba yuun kĩ’isɛ la fan la air-condition bunpaala ge tee sɛba n ka ba’ɛ tuna soŋa soŋa la, la wan eŋɛ se’em ti Na’am Pu’usegɔ Deo la poan ta’an ma’ara soŋa soŋa. La wan eŋɛ se’em ti mabiisi la kan guta microphone la zuo, tansuga zo’e zo’e daa da la boom pole ti ba ni dekɛ microphone la kɛ̃’ɛsɛ bim ta dɔla mabiisi nɛŋa ti ba bɔ’ɔra lebesego. Mabiisi yuun tiregɛ mɛ ti ba kan guta kuleŋa nu’o la pipe la ge me tara tiim duusa ba la wan eŋɛ se’em ti bã’a la kan wi’ira. Tansuga ase’a me yuun da la pipe n ni yu’ɛ kamea ge ta’an yu’ura kamea kɛ̃’ɛsɛ ban dɔbelɛ nama zɛ’ɛsi la. Chile tiŋa poan, teere wa yuun basɛ ti ba sa’am ligeri paɛ Amerika dɔla 1,400 Na’am Pu’usegɔ Deo woo poan.

 La boi bim ti sɛla n yuun pakɛ mabiisi la dela ba eŋɛ maaseŋɔ ti bã’a la kan wi’ira ge ba yuun le bisɛ ti ba kan sa’am mabiisi bo’olum la. Tisi basɛba poan, ho san ni da’ara lɔɣɔrɔ ba ni ka to’e lampo bala la, mabiisi la daa dekɛ yɔ’ɔ la mɛ da nu’usi peere lɔɣɔrɔ la boom poles. Tigere Yila ase’a yuun naɛ taaba mɛ ta da lɔɣɔrɔ wa zo’e zo’e la wan eŋɛ se’em ti ba yese ba ligeri basɛ. Tigere Yila la Global Purchasing Department la daa eŋɛ la maaseŋɔ da lɔɣɔrɔ la, sɛba n maalɛ ku la zɛ’an. Bala yuun basɛ ti ba ka eŋɛ sanɛ ge me basɛ ti ba nu’o gurɛ lɔɣɔrɔ la kalam.

 Maaseŋɔ se’a ti ba daa eŋɛ Na’am Pu’usegɔ Deto poan ti bã’a la kan wi’ira la yuun dela te’elego bɔ’ɔra sɛba n yuun keni zamesegɔ la. Mabipɔka Dulcine n boi Peru yeti, eŋa n daa wum ti to wan le lebe Na’am Pu’usegɔ Deo poan ta ita zamesegɔ la, “dabeem” n daa tari en. A yeti, “COVID-19 bã’a la n daa pɔsɛ la, la daa ka yue ti la nyɔkɛ mam. Bala la, mam yuun zoti la dabeem ti n keŋɛ Na’am Pu’usegɔ Deo poan se’ere n sɔi la, mam daa mi ti n ta’an le ta nyɛ bã’a la. Ge mam n daa paɛ Na’am Pu’usegɔ Deo poan la, mam daa baŋɛ ti keendoma la eŋɛ la maaseŋɔ zo’e zo’e n wan gu to. Basɛba dela nu’usi peere zɛ’an la microphone boom poles. Ba yuun le maasum ti ba wan duuse zɛ’an la za’a ge ti zamesegɔ nyaa pɔsɛ. Wana za’a daa basɛ ti mam paleŋa daa ka le ɛɣera ti bã’a la wan nyɔkɛ mam.” b

 Sara dela mabipɔka n boi Zambia. Eŋa me yele la daa boi la de to’ore. A yeti: “Ŋmaresi fii n wana ti COVID-19 bã’a la ku mam sira. Sɛla n daa daani mam dela mam ma’a keŋɛ Na’am Pu’usegɔ Deo poan ti mam sira ka pa’asɛ.” La nyaa ani en la wani eŋa n daa keŋɛ Na’am Pu’usegɔ Deo poan la? A tɔkɛ yeti: “Ton laɣeseri Na’am Pu’usegɔ Deo poan la basɛ ti mam baŋɛ ti Yehowa boi mɛ la tɔ ba’asegɔ dabesa wa poan. Nananawa mabiisi la keendoma la soŋeri ge kpɛmesa mam giila mɛ. Ba sirum pa’alɛ ti ba nɔŋɛ mam mɛ.”

 Mabiisi n boi tingole wa za’a puurɛ pee mɛ la ton le lebe Na’am Pu’usegɔ Deto poan la. To pu’usɛ ya la ya bo’olum la. Ya zo’e zo’e daa dekɛ doose la donate.pr418.com poan. Ya bo’olum wa daa soŋɛ mɛ ti to maasum ton laɣeseri zɛ’an pu’usa Yehowa la ti la ana soŋa soŋa ge dɛna zɛ’an ti gu’a bɔna.