Yuun 2023 n pɔsɛ la, to za’a waabi tari puti’irɛ ti yɛla wan ana soŋa bɔ’ɔra tomam la to deodoma. Beni n sɔi ti to wan ta’an tara puti’irɛ bala?

 Baabule la pa’alɛ to ti la kan yue yeledaaŋɔ se’a n paari to zina beere wa la wan tole. Yelemɛŋɛrɛ, ‘ba gulesɛ Baabule la ti la dɛna la pa’alegɔ bɔ’ɔra tomam, la wan eŋɛ se’em ti doose la subuɣelegɔ la n boi Gulesegɔ la poan la, to wan tara beere sa’am puti’irɛ.’​—Arom 15:4.

•   Ho san bɔta ti ho zamesɛ baŋɛ Baabule la n pu’ulum yelese’a biŋe, kaalɛ zaseŋɔ yele la zuo n de “A Real Hope for a Better Tomorrow” (Tara Puti’irɛ Ti Beere Sa’am Wan Ta Ana Soŋa).

 To beere sa’am puti’irɛ la ani wuu ‘ba’arɛ n bo’ori to vom.’ (Hebru 6:19) To beere sa’am puti’irɛ la wan ta’an soŋɛ tɔ ti to ŋmibe yeledaaŋɔ poan, tara putɛsonɛ ge me tara pupeelum n wan bɔna wuusa. Makerɛ:

•   Baabule beere sa’am puti’irɛ la yuun soŋɛ buraa ayima mɛ ti a ka le nyuura daam zɔ’ɔra. Bisɛ vidiyo la zuo n de Mam Yɛm Daa Yese N Mea Mɛ.

•   Baabule beere sa’am puti’irɛ la wan ta’an soŋɛ tɔ to nɛra san ki. Bisɛ vidiyo la zuo n de Subuɣelegɔ Yele Bɔ’ɔra Sɛba Nɛreba N Ki.

 Nɛreba zo’e zo’e tari puti’irɛ gura la yelesoma ge ba ka tari sakerɛ ti la wan sirum tum tuuma. Sɛla ti Baabule la pu’ulumbiŋe la boi la de to’ore. Beni n sɔi? Se’ere n sɔi la, Baabule pu’ulumbiŋ’a la ze’ele la Yehowa a, se’em n ‘daɣɛ pumpɔrema’ la zɛ’an na. (Titus 1:2) Yehowa ma’a n tari paŋa n wan ta’an basɛ ti a pu’ulumbiŋ’a la za’a tum tuuma; a wan ta’an tum sɛla woo ‘n tiɣɛ a nini.’​—Yooma 135:5, 6.

 Soso, basɛ ti Baabule beere sa’am puti’irɛ la soŋɛ hɔ. Ho wan ta’an sakɛ Baabule la n yele sɛla la ho san ‘viisa gulesegɔ la soŋa soŋa.’ (Tooma 17:11) Ho san bɔta, to wan soŋɛ hɔ ti ho zamesɛ Baabule la zaŋa. Tara puti’irɛ yuun 2023 wa poan ti beere sa’am wan ta ana soŋa!