Ukrainedoma daa bombe la kudɔregɔ n ze’ele Crimea yɛ’ɛsa Russia. Dabesa ayi pooren, Atenidaarɛ, October 10, 2022 bulika ti Russiadoma me bombe Ukraine tisi zo’e zo’e ti ba lerege sanɛ. Nalɛɣerɛdoma basɛba n pɔsɛ tɔɣera ti Armagedon ye me na la, la ka yue ti yele ana wa eŋɛ.

•   “Kɔ’ɔn pɔsɛ [U.S. President John F.] Kennedy la Cuban Missile Crisis saŋa la, nananawa ti Armagedon nyaa kɔ’ɔn pɔ̃ra. . . . Mam ka ti’isɛ ti to wan ta’an dekɛ nuclear zaberɛ lɔɣɔrɔ tum tuuma ti la kan ta’asɛ Armagedon.”​—U.S. President Joe Biden, October 6, 2022.

•   “Mam sakɛ ti Armagedon kɔ’ɔn yɛ’ɛsa me na. Tingole wa za’a kɔ’ɔn bɔna la yele poan.”​—Ukraine President Volodymyr Zelensky n tɔɣɛ sɛla, se’em ma’a ti ba soke en nuclear zaberɛ lɔɣɔrɔ n wan ta’an ta’asɛ yelese’a, BBC News, October 8, 2022.

 Ba san pɔsɛ tara nuclear zaberɛ lɔɣɔrɔ tuna tuuma, bala n wan ta’asɛ Armagedon? Baabule la yeti bem?

 Aayi. Yelebire la n de “Armagedon” boi Baabule la poan la buyina ma’a, Liligere 16:16 poan. La ka tɔɣeri la tisi n wan isige zabera la taaba ge la tɔɣeri la “tinparɛ wa za’a waabi nadoma” n wan ta zabɛ la Naayinɛ. (Liligere 16:14) Armagedon zaberɛ la poan ti Naayinɛ wan sa’am asaala bisega.​—Daniel 2:44.

 Ho san bɔta ti ho zamesɛ baŋɛ Armagedon zaberɛ la n wan basɛ ti tinparɛ wa ana se’em, kaalɛ zaseŋɔ yele la zuo n de Bem N De Armagedon Zaberɛ La?

 Aayi. La boi bim ti asaala bisegadoma ta’an ta dekɛ nuclear zaberɛ lɔɣɔrɔ tum tuuma beere sa’am ge Naayinɛ kan bo yɔ’ɔ ti ba sa’am tinparɛ la. Baabule la yeti:

•   ‘Tinparɛ wa gã la bala yɛ’ɛsa.’​—Pa’ala 1:4.

•   ‘Tontɔɔdoma la n wan sɔna tingɔŋɔ la, ba wan bɔna ka poan daarewoo.’​—Yooma 37:29.

 Ge Baabule yetɔɣebiŋa la yelese’a n iti nananawa pa’alɛ ti la kan yue, asaaleba bɔŋa wan tee paa. (Matu 24:3-7; 2 Timoti 3:1-5) To zaŋa Baabule zamesegɔ la wan soŋɛ hɔ ti ho baŋɛ Baabule la n tɔɣɛ beere sa’am yele se’em.