May 23, 2023, ti imma’asum tuuntuneba kpɛ’ɛma ayima n boi America tiŋa poan tɔɣɛ pa’alɛ socia media n daani bunbilipaalesi zo’e zo’e se’em.

•   Social Media and Youth Mental Health: The U.S. Surgeon General’s Advisory gɔŋɔ la ti ba gulesɛ dɛ 2023 poan la yeti: “La boi bim ti social media soŋeri kɔma, la bunbilipaalesi mɛ ge yɛla zo’e zo’e pa’alɛ ti social media ta’an daam ba mɛ, ti ba tara puti’ira bã’a.”

 Gɔŋɔ la pa’alɛ la yelese’a n iti ti la dɛna palen-ɛ̃ka.

•   Bunbilipaalesi n de yuuma 12 ta paɛ 15 “san tara social media tuna tuuma paɛ awa 3 dabeserɛ la poan, la wan basɛ ti ba tara puti’ira bã’a la putɛyiila zo’e zo’e.”

•   Bunbilepaalesi n de yuuma 14 “san tara social media tuna tuuma, la ni basɛ ti ba ka ta’an gĩsera soŋa ge ti nɛreba me daana ba intanɛt poan. Wana wa me ni basɛ ti ba ni ka le bisɛ nam bamesi, ti la ana ba bura. Yele yele wuu pugeto ti yele wa paara ba paa.”

 Dɔɣereba wan eŋɛ la wani ta’an gu ba kɔma yele ana wa poan? Baabule la ka’aŋɔ wan soŋɛ ba.

 Mina yelese’a n iti. Ho san dɛna dɔɣera, ti’isɛ bisɛ yeledaaŋɔ se’a n wan ta’an paɛ ho bia la, a san tara social media tuna tuuma ge bisɛ nyaa ho wan bo en yɔ’ɔ ti a tara de tuna tuuma.

•   Baabule naresum yele: ‘Pa’alɛ bia sarɔɔ sɛka n ani soŋa.’​—Magaha 22:6.

•   Ho san bɔta ti ho zamesɛ yɛla pa’asɛ, kaalɛ zaseŋɔ yele la zuo n de “Should My Child Use Social Media?” (N Kɔma Nari Ti Ba Tara Social Media Tuna Tuuma?)

 Ho san bo yɔ’ɔ ti ho bia tara social media tuna tuuma, mina bala n wan ta’an ta’asɛ yeledaaŋɔ se’a. Ni kɔ’ɔn mina yelese’a ti ho bia la ita social media poan. Ho wan eŋɛ la wani ta’an eŋɛ bala?

 Gu ho bia la yeledaaŋɔ se’a n wan ta’an paɛ en la poan. Pa’alɛ ho bia la ti a mina yeledaaŋɔ se’a n boi bim, la eŋa n wan eŋɛ se’em ta’an gu amea.

•   Baabule naresum yele: ‘Da basɛ ya ti yalumtuuma bii yelese’a woo n de dɛɣerɔ la nyika puɣum puta ya poan. La me ka nari ti zufaɣum tuuma bii yetɔɣum n ka tari vuurɛ bii yetɔɣɔyaalesi n de yelese’a n ka nari woo bɔna ya poan.’​—Epesus 5:3, 4.

•   Ho san bɔta ti ho baŋɛ sɛla n wan soŋɛ hɔ, kaalɛ zaseŋɔ yele la zuo n de “Teaching Your Teenager Social Media Safety” (Hon Wan Eŋɛ Se’em Ta’an Pa’alɛ Ho Kɔma Ti Ba Tara Bamea Soŋa Social Media Poan.)

 Basɛ ti ho bia la mina a beene. Makerɛ, pa’alɛ ho bia la sansɛka ti a wan ta’an dekɛ social media tum tuuma, la eŋa n wan dekɛ tum yue se’em.

•   Baabule naresum yele: ‘Kɔ’ɔn bisera yamea soŋa ti ya kena wuu yɛmdoma la. Tara ya saŋa la tuna soŋa soŋa.’​—Epesus 5:15, 16.

•   Basɛ ti ho bia la bisɛ guleŋɔ vidiyo la zuo n de Mina Hon Wan Lɔɣesa Homea Se’em Intanɛt Tuuma Ze’an ti la soŋɛ en ti a mina sɛla n sɔi ti la nara ti a mina a beene.