February 24, 2022 ti Russia dekɛ soogɛpa isige zabera la Ukraine la basɛ ti la wuna la nɛreba ti ba zɔta lɔŋera tisi zaberɛ la zuo. a

 “Bombedoma n daa tãseri zɛ’an woo. La daa ba’ɛ tara la dabeem ti ho kan ta’an tɔɣɛ pa’alɛ la ani se’em. To daa ta wum ti zireŋa n boi vaara nɛreba la, to daa maasum yese mɛ. La daa dela to dekɛ lɔɣɔrɔ fii wa eŋɛ baagi pika poan. To daa yeen dekɛ la to kaara, tiim, ko’om la dikɛ’ɛsi. To daa basɛ sɛla woo mɛ ge keŋɛ zireŋa sitaasin ge ti bombedoma la me kɔ’ɔn sigera bala.”​—Nataliia, n ze’ele Kharkiv, Ukraine.

 “San daɣena dadindaarɛ, tomam daa ka ti’isɛ ti zaberɛ wan bɔna. Mam daa wum la bombedoma tãsega tiŋa la zɛ’ɛsi ase’a poan ti yɛa miina. Mam daa kɔ’ɛ n puti’irɛ mɛ yese ge yeen dekɛ lɔɣɔrɔ fii wa. Bulika karefa anii ti mam yese yire ta zom zireŋa keŋɛ Lviv nyaa ta dekɛ loore keŋɛ Poland.”​—Nadija, n ze’ele Kharkiv, Ukraine.

Zaseŋɔ wa poan

•  Bem n ta’asɛ ti nɛreba zɔta lɔŋera tisi?

•  Sɛba n zɔ loŋe tisi la wan nyɛ beere sa’am puti’irɛ la bɛ?

•  Baabule la wan ta’an soŋɛ sɛba n zɔ loŋe tisi zina beere wa?

 Bem n ta’asɛ ti nɛreba zɔta lɔŋera tisi?

 Russia n dekɛ soogɛpa isige zabera la Ukraine la n sɔi ti nɛreba zɔta lɔŋera tisi. Ge Baabule la pa’alɛ la sɛla wana mɔpi n ta’asɛ ti nɛreba zɔta lɔŋera tisi:

•   Asaala gɔmɛtdoma n boi tingɔŋɔ wa za’a waabi poan la ka ta’an dekɛ sɛla n pakɛ asaaleba bo ba. Sɛba n tari gɔmena kpe’eŋo la tari a mɛlesa la nɛreba.​—Pa’ala 4:1; 8:9.

•   Sitaana, Kolekpabɛ’a la, n “biseri tingɔŋɔ la,” tari la putɛbe’o sa’ana nɛresaaleba ti Baabule la yeti: “Tingɔŋɔ wa za’a boi la be’emdaana la nu’usin.”​—Yon 14:30; 1 Yon 5:19.

•   Hali to san dekɛ yelese’a n daani asaala yuuma zo’e zo’e la biŋe kinkɛleŋa, to nyaa boi la sansɛka poan ti Baabule la yeti: “Ba’asegɔ dabesa la poan la wan ta ana biɣi biɣi.” (2 Timoti 3:1) Sɛla n gani za’a ba’asegɔ dabesa wa poan dela, to wan nyɛta zaberɛ, yeledi’ima, dipɔ’ɔsegɔ la bã’asi​—yele ana n ta’asɛ ti nɛreba zɔta lɔŋera tisi.​—Luke 21:10, 11.

 Sɛba n zɔ loŋe tisi la wan nyɛ beere sa’am puti’irɛ la bɛ?

 Baabule la pa’alɛ ti to Naaŋɔdaana, Yehowa b dela Naayinɛ se’em n nɔŋɛ ge me tara nimbɔ̃’ɔ bɔ’ɔra sɛba n zɔ loŋe tisi bii basɛ la ba yɛa ge zɔ ta kɛ̃’ɛra zɛ’an. (Tɛɛnhegɔ 10:18) A pu’ulumbiŋe ti a wan dekɛ a saazuo gɔmɛt la n de Naayinɛ Na’am la tee soe asaala gɔmɛt, nyaa maalɛ sɛba n zɔ loŋe tisi la yɛla. (Daniel 2:44; Matu 6:10) Yehowa wan dekɛ la a Na’am wa sa’am Sitaana Kolekpabɛ’a la. (Arom 16:20) Na’am wa n wan bisera tiŋa wa zuo za’a la, wan yese nɛreba n weleseri taaba se’em la basɛ. Asaaleba woo wan laɣum tara nɔyinɛ dɛna deodoma ayima tingɔŋɔ wa zuo za’a. Nɛra kanle zɔ loŋe tiŋa se’ere n sɔi la, Baabule la pu’ulumbiŋe ti: “Nɛra woo wan zĩ’a a daam tia la a kinkaŋa tia tiŋa fai, ti se’em ka bɔna n wan vuuse ba, se’ere n sɔi la Pɛɛntɛɛreba Yehowa n yele se’em n bala.”​—Mika 4:4.

 Naayinɛ Na’am la ma’a n wan ta’an maalɛ yelese’a n ta’asɛ ti nɛreba zɔta lɔŋera tisi zina beere wa la. Yehowa wan dekɛ a Na’am la yese yelese’a n ni pɛregɛ nɛreba ti ba zɔ loŋe tisi la basɛ. Geele yele ana wa bisɛ:

•   Zaberɛ. “[Yehowa] wan yese zaberɛ basɛ.” (Yooma 46:9) Ho san bɔta ti ho baŋɛ Naayinɛ n wan eŋɛ se’em basɛ ti zaberɛ kanle bɔna, kaalɛ zaseŋɔ yele wa zuo n de “La Wan Eŋɛ La Wani Ti Suma’asum Ta Bɔna Tingɔŋɔ Wa Zuo?”

•   Namesegɔ la gbiregere tuuma. “A wan faɛ ba namesegɔ la gbiregere tuuma poan basɛ.” (Yooma 72:14) Ho san bɔta ti ho baŋɛ nɛreba n eŋɛ se’em ta’an basɛ halese’a n nyɛ nyɛɣa, kaalɛ zaseŋɔ yɛla wa zuo n de “To Wan Ta’an Nyaŋɛ Yaarɛ.”

•   Nɔŋɔ. “[Yehowa] wan faɛ sɛba n naseri ge kaasa ɛɛra soŋerɛ la basɛ.” (Yooma 72:12) Ho san bɔta ti ho baŋɛ Naayinɛ n wan yese nɔŋɔ basɛ se’em, kaalɛ zaseŋɔ yele wa zuo n de “La Wan Ta’an Eŋɛ Ti Nasedoma La Buntateba Dɛna Buyina?”

•   Dipɔ’ɔsegɔ. “Dia wan ta buge tingɔŋɔ wa zuo.” (Yooma 72:16) Ho san bɔta ti ho baŋɛ Naayinɛ n wan eŋɛ se’em basɛ ti kom kanle bɔna, kaalɛ zaseŋɔ yele wa zuo n de “Kom Kanle Bɔna Tiŋa Wa Zuo?”

 Baabule la wan ta’an soŋɛ sɛba n zɔ loŋe tisi zina beere wa?

 Ɛɛ. To san dekɛ sɛba n zɔ loŋe tisi la ti Baabule la yeti ba wan tara beere sa’am puti’irɛ la biŋe kinkɛleŋa, Baabule la wan ta’an soŋɛ ba ti ba maala ba yɛla nananawa.

 Baabule naresum yele: “Da fabeli ya sɛsɛla yele ge sɛla woo poan doose ya zusega la beleŋo la pɛ̃ka poan ta’an basɛ ti Naayinɛ baŋɛ ya boti sɛla; ti Naayinɛ suma’asum la n gani asaala woo bɔkera la wan gu ya suya la ya puti’irɛ doose Krista Yezu poan.”​—Filipi 4:6, 7.

 La vuurɛ: Zusɛ Naayinɛ ti a bo ho putɛsonɛ ti ho suure gã’a ma’asum ho yeledaaŋɔ woo poan. Bisɛ zaseŋɔ yele wa zuo n de “Filipi 4:6, 7​—‘Da Fabeli Ya Sɛsɛla.’”