Dabesa ana wa, hon bisɛ ti la kpe’em mɛ ti ho baŋɛ yelemɛŋɛrɛ la pumpɔreŋɔ n boi to’ore to’ore se’em? Nɛreba san wan sakɛ bo sɛla, ba ni bisɛ la lan ani ba se’em bii bamam mea n ti’iseri se’em yele la poan. Ba ni ka bisɛ ti yele la dela yelemɛŋɛrɛ bii pumpɔreŋɔ. Tingɔŋɔ wa za’a poan, nɛreba zo’e zo’e ti’isɛ ti yelemɛŋɛrɛ ka le bɔna.

 Daɣɛ zina beere wa ti nɛreba pɔsɛ ti’isa bala. Yuun 2,000 n tole la, Arom Gɔmena Pontius Pilate yuun soke Yezu la sɛla ti la pa’alɛ ti a ka sakɛ bo en. A yuun soke Yezu yeti: ‘Beni n de yelemɛŋɛrɛ?’ (Yon 18:38) La boi bim ti Pilate yuun ka guri ti Yezu lebese en ge a sokere la yele yuun ka pakɛ. Baabule la bo yele aŋa lebesego mɛ ge me wan soŋɛ hɔ ti ho baŋɛ sɛla n de yelemɛŋɛrɛ la pumpɔreŋɔ tingɔŋɔ wa poan.

Yelemɛŋɛrɛ boi?

 Ɛɛ. Baabule la dekɛ yelebire la n de “yelemɛŋɛrɛ” tɔɣɛ pa’alɛ la sɛla n sirum boi, la me pa’alɛ la sarensoŋɔ bii sɛla n ani soŋa. La basɛ ti to baŋɛ ti yelemɛŋɛrɛ ze’ele la Yehowa a Naayinɛ zɛ’an na. La yeti a dela ‘yelemɛŋɛrɛ Naayinɛ la.’ (Yooma 31:5) Baabule la basɛ ti to baŋɛ ti yelemɛŋɛrɛ ze’ele la Naayinɛ zɛ’an na ge dekɛ yelemɛŋɛrɛ makɛ la nɛɛsum sɛla n sɔi la, la wan ta’an pa’alɛ tɔ sarɔɔ tingɔŋɔ be’o wa poan.​—Yooma 43:3; Yon 17:17.

Ho wan eŋɛ la wani baŋɛ yelemɛŋɛrɛ la?

 Naayinɛ ka boti to yeen sakɛ Baabule yelemɛŋɛrɛ yɛla la. A ka boti to bisɛ lan ani to se’em ma’a sakɛ Baabule yelemɛŋɛrɛ la. Ge a tuɣum bɔta la to viisɛ yɛla la soŋa doose la ton wan ti’isa taɣesa a poan. (Arom 12:1) A boti la to baŋɛ ge nɔŋɛ en la to ‘puti’irɛ za’a’ ge sirum sakɛ ti ton zameseri sɛla Baabule la poan la dela yelemɛŋɛrɛ.​—Matu 22:37, 38; Tooma 17:11.

Pumpɔreŋɔ ze’ele la bɛ na?

 Baabule la yeti pumpɔreŋɔ ze’ele la Naayinɛ dima, Sitaana Kolekpabɛ’a la zɛ’an. La yeti a dela ‘pumpɔreŋɔ la sɔ.’ (John 8:44) A yuun tɔɣɛ Yehowa yele n daɣɛ yelemɛŋɛrɛ bo la Adam la Hawa. (Pin’ileŋɔ 3:1-6, 13, 17-19; 5:5) Kɔ’ɔn pɔsɛ sankaŋa ta paɛ zina beere wa, Sitaana kelum basɛ ti pumpɔreŋɔ wi’ira mɛ ge ka basɛ ti nɛreba baŋera Naayinɛ yelemɛŋɛrɛ la.​—Liligere 12:9.

Beni n sɔi pumpɔreŋɔ kɔ’ɔn bɔna bala?

 Tomam saŋa wa n de ‘ba’asegɔ dabesa la’ poan, Sitaana nyaŋɛ pã’asɛ nɛreba zo’e zo’e mɛ. Saŋa zo’e zo’e, nɛreba ni pã’asa la ba tadaandoma ti ba ta’an fã ba. (2 Timoti 3:1, 13) Pumpɔreŋɔ me kɔ’ɔn bɔna pu’usegɔ zo’e zo’e poan mɛ zina beere wa. Wuu Baabule la n tɔɣɛ tomam saŋa wa yele se’em biŋe la, nɛreba boi mɛ la ‘sɛba n wan pa’alɛ ba sɛla ti bamea bɔta ti ba kelese’ ge ‘ka bɔta ti ba kɛlesa sɛla n de yelemɛŋɛrɛ la.’​—2 Timoti 4:3, 4.

Bem zuo ti yelemɛŋɛrɛ yele pakɛ?

 Yelemɛŋɛrɛ n ni basɛ ti nɛreba tɔresɛ taaba. Nɛreba san ka tɔresɛ taaba, ba zɔtɔ nyɔka ni sa’am mɛ ge ti tinmaalegɔ me ka bɔna. Baabule la yeti Naayinɛ boti la to tara yelemɛŋɛrɛ pu’usa en. La yeti: ‘Sɛba n pu’useri Naayinɛ la nari ti ba pu’usera en vo’osum la yelemɛŋɛrɛ poan.’ (Yon 4:24) Ho san bɔta ti ho zamesɛ baŋɛ Baabule yelemɛŋɛrɛ la n wan ta’an soŋɛ ho se’em ti ho baŋɛ pumpɔreŋɔ pu’usegɔ ge yese homea bim, kaalɛ zaseŋɔ yɛla la zuo n de “Lies That Make God Seem Unlovable” (Pumpɔreŋɔ Yɛla N Basɛ Ti Nɛreba Ti’isa Ti Naayinɛ Ka Nɔŋɛ Ba)

Bem zuo ti Naayinɛ bɔta ti ho baŋɛ yelemɛŋɛrɛ la?

 Naayinɛ boti la ho vɔna daarewoo, la me nari ti ho zamesɛ a yelemɛŋɛrɛ yɛla la ta’an nyɛ dɛ. (1 Timoti 2:4) Ho san zamesɛ baŋɛ Yehowa n geele som la be’em yele se’em la, la wan basɛ ti hon la eŋa zɔtɔ nyɔka la kpe’em. (Yooma 15:1, 2) Naayinɛ yuun tum la Yezu tingɔŋɔ wa zuo ti a soŋɛ nɛreba ti ba baŋɛ yelemɛŋɛrɛ la. Naayinɛ boti la to kɛlesa Yezu pa’alegɔ.​—Matu 17:5; Yon 18:37.

Naayinɛ wan yese pumpɔreŋɔ basɛ?

 Ɛɛ. Naayinɛ yaɛ nɛra n doli pumpɔreŋɔ sore poan fãara a tadaana mɛ. A pu’ulum biŋe ti a wan sa’am sɛba n kɔ’ɔn parena la za’a tinparɛ wa zuo. (Yooma 5:6) Naayinɛ san eŋɛ wana ba’asɛ, a pu’ulumbiŋere la n yeti ‘sɛba n tɔɣeri yelemɛŋɛrɛ la wan bɔna wuusa’ la wan tum tuuma.​—Magaha 12:19.