Imma’asum yeledaaŋɔ boi la to’ore to’ore.

•   Nɛreba basɛba boi mɛ ti ho nyɛta ba bã’a la ge basɛba boi mɛ ti ho ka nyɛta.

•   Bã’asi ase’a ni nyɔkɛ ho mɛ saŋa la saŋa poan ge bã’asi ase’a me ni kɔ’ɔn tara ho la bala, ka malum basera.

•   Bã’asi ase’a tari tibegɔ bii ta’an sɔna bɛ’ɛna ge basɛba dela bãyaleŋa, hali ta’an ta ku ho.

 Imma’asum yeledaaŋɔ to’ore to’ore ti to tɔɣɛ de yele la paari bunbilipaalesi mɛ. Zaseŋɔ yele wa poan, to wan tɔɣɛ ba poan banaasi n tari yeledaaŋɔ ana wa ase’a. Imma’asum yɛla san daana hɔ, ba yele la wan ta’an kpemese ho giila.

•  GUÉNAELLE

•  ZACHARY

•  ANAÏS

•  JULIANA

 Sɛla n kpe’em bo mam n vom poan dela, mam zuni se’em wa ge ka ta’an tuna lan nari se’em la. Mam boti n eŋɛ yɛla zo’e zo’e ge daarewoo, mam bã’a wa kɔ’ɔn gu’ura mam mɛ.

 Mam tari la zuo bã’a yu’urɛ n de motor-neuromuscular disorder. Bã’a wa basɛ ti mam zuputo la ka ta’an tuna lan nari se’em. Saŋa ase’a, kɔ’ɔn ze’ele mam zuo ta paɛ n natala, bɔba ase’a ni ka tuna. La kpe’em bo mam mɛ ti n ita yɛla ase’a n de wuu n kena, n kaala, n tɔɣera, n gulesera bii n bɔkɛ nɛreba n tɔɣeri se’em. La san ni kpe’em bo mam, mam tansugere keendoma ni wa’ana zusɛ mɛ la mam. Bala ni basɛ ti la ana mam la mama.

 Gurebisɛ woo n paari mam la, mam mi ti Yehowa Naayinɛ boi n wan soŋɛ mam. Mam ka boti n bã’a la gu mam ti n kan ta’an pu’usa Yehowa soŋa. Mam lu n suure mɛ ti n soŋɛ nɛreba ti ba zamesɛ baŋɛ Baabule pu’ulumbiŋere la n yeti, la kan yue Yehowa Naayinɛ wan basɛ ti tingɔŋɔ wa lebege paradiisi ti namesegɔ kan le bɔna.​​—Liligere 21:1-4.

 Ti’isɛ yele wa bisɛ: Sodeni poan ti ho wan ta’an tara giile bɔ’ɔra nɛreba wuu Guénaelle la?​​—1 Korint 10:24.

 Mam yuun de yuun 16 la, ba yuun bisɛ mam baŋɛ ti mam tari la ɔberega bã’a n zuputo poan. Dɔgetadoma la yuun yeti, ŋmaresi sinii poan mam wan ki. Vom daɣɛ naana bɔ’ɔra mam kɔ’ɔn pɔsɛ sankaŋa.

 Mam bã’a la n boi zɛ’an la zuo, mam zuɔ bɔba za’a ka le tuna. Mam ka ta’an le kena la zuo, saŋa woo, la nari ti nɛra bɔna yire soŋera mam.

 Bã’a la n malum kãregera pa’asa la zuo, mam ka ta’an tɔɣera soŋa soŋa. Mam daa tari paŋa mɛ zɔta dɛ’ɛna, ŋmɛ’ɛra basketball la volleyball soŋa soŋa. Mam n de Yehowa Sɛɛradaana la zuo, mam daa kelum ŋmibe mɛ mɔɔla yelesoma la. Mam mi ti nɛreba zo’e zo’e kan bɔkɛ ho san ka ta’an ita yelese’a ti ho nɔŋɛ la.

 Yelese’a n boi Isaiah 57:15 kpemeseri mam giila mɛ paa. Bilam bo’ori mam suure lua ti Yehowa Naayinɛ boi mɛ la sɛba ‘suure n sa’am’ la. Bala la, a fabeli mam yele mɛ. Leyɛ’ɛsa Isaiah 35:6 pa’alɛ Yehowa n pu’ulumbiŋe ti, n wan le nyɛ imma’asum ta’an pu’usa en soŋa soŋa.

 La boi bim ti saŋa ase’a mam bã’a la ni basɛ ti la kpe’em bo mam mɛ paa. Ge mam tari suure lua ti Yehowa boi mɛ la mam. Mam giila san kɔ’ɔsɛ bii dabeem san tara mam ti n wan ki, mam tari mina ti n wan tɔɣera bɔ’ɔra en zusega poan. Sɛla ka boi n wan basɛ ti Yehowa kan nɔŋɛ mam.​​—Arom 8:39.

 Ton daa sɔsɛ la Zachary la, ŋmaresi siyi pooren ti a ki. A yuun dela yuun pia la anii. A sakerɛ yuun kpe’em mɛ Naayinɛ pu’ulumbiŋa poan ti sɛba n ki la wan isige paradiisi poan.

 Ti’isɛ yele wa bisɛ: Zusega wan soŋɛ ho la wani ti ho kɔ’ɔn nɔŋɛ Naayinɛ wuu Zachary?

 Mam yuun de bia la, mam yuun tari la zuputo bã’a n de brain hemorrhage. Bã’a wa basɛ ti mam inya za’a ni kɔ’ɔn duna mɛ yele yele woo mam nama.

 Zina, mam tari la bã’adoma doore kena fii fii. Ge saŋa zo’e zo’e la, mam ni bã’ara la kɔɔreŋɔ keekee. Mam inya me n ni kɔ’ɔn gɔɣera, nyaa ni basɛ ti la kpe’em bo mam ti n ita yɛla soŋa, maɣesɛ wuu n gulesɛ.

 Daɣɛ mam bã’a wa ma’a n basɛ ti la wuna mam ge ban tiberi mam se’em la me dela daaŋɔ. Mam ni kena la inya kpemesegodoma zɛ’an tibera. Mam ni keŋɛ bim paɛ la sugumnɔɔrɛ zo’e zo’e bakwai ayima poan, ti mam puɣum kan nyaŋɛ tɛ̃ra. Mam yuun de yuuma anuu la ti ba yuun eŋɛ mam ɔperesa ge ti bilam pooren ba le eŋɛ mam ɔperesa sugumnɔɔrɛ butã pa’asɛ. Pooren ɔperesa bayi la yuun kpe’em bo mam mɛ se’ere n sɔi la mam yuun ka boi yire ŋmaresi sitã ban yuun tiberi mam ti n le nyɛ paŋa la.

 Mam deodoma soŋɛ mam mɛ paa. Ton ni laɣum la’ara la, ni kpemese mam giila mɛ. Mam ma la mam suurɔ ni soŋɛ mam mɛ ti n maasum n mea se’ere n sɔi la mam ma’a kan ta’an eŋɛ bala. La daani mam mɛ la mam n kan ta’an pire taɣera n wɔɣɛ la. Mam tɛ̃ri ti mam n yuun de bia la, mam yuun ni dekɛ la mam nu’usi kɛ̃’ɛsɛ taɣera poan tara vuura, ti to za’a waabi ni la’ara!

 Mam basɛ ti mam puti’irɛ bɔna la yelese’a ti mam wan ta’an tum la poan gana yelese’a ti mam kan ta’an tum la. Mam zameseri la yetɔɣum ase’a. Mam ta’an buna ko’om mɛ la boi bim ti mam kan ta’an bum wuu mam boti ni se’em la ge mam puurɛ ni pee mɛ. Mam n de Yehowa Sɛɛradaana la zuo, mam nɔŋɛ n kena na’am mɔɔlegɔ ge tɔɣera n sakerɛ yɛla bɔ’ɔra nɛreba. La ani wuu nɛreba ni kɛlesa mam mɛ paa mam san tɔɣera bɔ’ɔra ba.

 Mam dɔɣereba yuun pa’alɛ mam ti la kan yue mam bã’a la kan le bɔna. Ta paɛ zina, mam tari sakerɛ Yehowa la a pu’ulumbiŋa la poan ti a wan yese namesegɔ za’a basɛ, hali la mam bã’a la me. Wana n bo’ori mam paŋa ti n ta’an ŋmibera.​​—Liligere 21:3, 4.

 Ti’isɛ yele wa bisɛ: Wuu Anaïs la, ho wan eŋɛ la wani kan basɛ ti ho puti’irɛ bɔna ho bã’a la poan?

 Mam tari la bã’a n de autoimmune disorder. Bã’a wa ta’an daam ho suure, ho safulufuto la ho ziim. La puɣum pɔsɛ daana mam sɛyiba mɛ.

 Mam yuun dela yuun pia ti dɔgeta bisɛ baŋɛ ti mam tari la lupus bã’a, bãsɛka n basɛ ti ho inya duna, ho taregera ge ti ho inya ka yɛɛra. Saŋa ase’a la ni ani mam wuu mam vom ka tari vuurɛ.

 Mam yuun de yuun pia la atã la, Yehowa Sɛɛradaana n yuun wa’an to yire. A yuun kaalɛ la Isaiah 41:10 pa’alɛ mam. Bilam ti Yehowa yeti: ‘Da zɔta dabeem ge mam boi mɛ la hɔ. N wan gurɛ hɔ la n tontɔɔ zuɔ nu’o.’ Sankaŋa la ti mam pɔsɛ zamesa Baabule la, la Yehowa Sɛɛradoma. Yuuma anii n wana ti mam pu’usa Naayinɛ la n suure za’a. Mam lu n suure ti n kan basɛ ti n puti’irɛ bɔna n bã’a la poan. Mam bisɛ ti Yehowa bo mam la ‘pansɛka n gani asaala paŋa,’ la wan eŋɛ se’em ti n tara putɛsonɛ.​​—2 Korint 4:7.

 Ti’isɛ yele wa bisɛ: Isaiah 41:10 wan ta’an soŋɛ hɔ la wani ti ho tara putɛsonɛ wuu la yuun soŋɛ Juliana se’em la?