“O asaala, A yele ho sɛla n ani soŋa. Ge Yehowa eeri la bem ho zɛ’an? Ho tuna tontɔɔ, ho nɔŋɛ yelemɛŋɛrɛ ge sirege homea dɔla ho Naayinɛ!”​—Mika 6:8, New World Translation.

 “O asaala, A pa’alɛ ho sɛla n ani soŋa. To DAANA la eeri la bem ho zɛ’an? Ho tuna tontɔɔ ge nɔŋɛ nimbɔ̃zore ge sirege homea dɔla ho Naayinɛ.”​—Mika 6:8, The Holy Bible​—New International Version.

 Nɔdɛ’ɛsa Mika tɔɣɛ pa’alɛ ti asaaleba wan ta’an tum ti Yehowa a Naayinɛ puurɛ pee. (1 Yon 5:3) Naayinɛ n boti to eŋɛ sɛla n bala ti ba pa’alɛ de vuurɛ gi’a gi’a kaalegɔ zɛ’an wa poan la. Yɛla ayi n deŋɛ nɛŋa la pa’alɛ la nɛra n wan bɔna la a tadaana se’em ge ti sɛla n pa’asɛ butã la pa’alɛ la nɛra la Naayinɛ bɔŋa n wan ana se’em.

 “Tuna tontɔɔ.” Naayinɛ yele a nɛreba ti ba tuna sɛla n de tontɔɔ ge ana soŋa. Wana wa pa’alɛ ti ba wan ti’isera ge tuna ti la makɛ la Naayinɛ pa’alegɔ n de se’em. (Tɛɛnhegɔ 32:4) Makerɛ, sɛba n doli Naayinɛ pa’alegɔ tiregeri mɛ ti ba wan tara yelemɛŋɛrɛ bɔ’ɔra nɛra woo ge ka gãsera, la ka pakɛ la ban ze’ele zɛ’an, ban ze’ele tinsɛka bii ba bɔŋa n ani se’em.​—Malema 19:15; Isaiah 1:17; Hebru 13:18.

 “Nɔŋɛ yelemɛŋɛrɛ.” Ho ta’an le tɔɣɛ yetɔɣebuna ti ‘nɔŋɛ suure poan nɔŋerɛ.’ (Mika 6:8) Hebru poan, yelebire la n de ‘yelemɛŋɛrɛ’ la pa’alɛ ti to yeen da tara yelemɛŋɛrɛ bɔ’ɔra nɛra ma’a ge to tara itisoŋɔ la nimbɔ̃zore. To wan tuna bɔ’ɔra en gana ton nari ti to tum se’em. Naayinɛ yele sɛba n boti ba tum ti a puurɛ pɛɛra la ti, la daɣɛ ba tara itisoŋɔ la nimbɔ̃zore ma’a ge ba nɔŋɛ halɛ ana wa. Wana wa pa’alɛ ti sɛba n pu’useri en la nari ti ba puurɛ pee ti ba soŋera basɛba, yele yele wuu sɛba ti yele paɛ ba. Ton bo’ori la basɛ ti to tara la pupeelum.​—Tooma 20:35.

 “Sirege homea dɔla ho Naayinɛ.” Baabule la poan, yelebire la n de ‘dɔla’ vuurɛ ta’an dɛna ‘ho dɔla ban pa’alɛ se’em la.’ Nɛra ni dɔla la Naayinɛ a san vɔna a vom sore sɛka poan n peeri A puurɛ. Noah yuun eŋɛ la makesonɛ. A yuun ‘keni mɛ la yelemɛŋɛrɛ Naayinɛ la’ se’ere n sɔi la Naayinɛ yuun geele en ti a dela tontɔɔ nɛra ge ‘ka tara gbelegere a nɛreba tiŋasuka.’ (Pin’ileŋɔ 6:9) Zina, to keni la Naayinɛ doose la ton wan dɔla a pa’alegɔ n boi a Yelesum, Baabule la poan la. To san wan nyaŋɛ eŋɛ bala, la nari ti to siregera tomea ti la pa’alɛ ti to wan mina to tɔregɔ beene ge me dekɛ tomea delum Naayinɛ ti a bo to sɛla woo.​—Yon 17:3; Tooma 17:28; Liligere 4:11.

 Mika yuun dela nɔdɛ’ɛsa diimi Israel tiŋa poan yuun kɔbesɛka n pa’asɛ bunii G.Y.B. Sankaŋa la, tiŋa la nɛreba yuun kɔ’ɔn kaabera la baɣa, faara nɛreba ge me mɛlesa ba. (Mika 1:7; 3:1-3, 9-11; 6:10-12) Israeldoma zo’e zo’e yuun zaɣesɛ Naayinɛ pa’alegɔ n boi Lɔɔ seko ti a yuun dekɛ bo Moses ti ba yi’ira Moses Lɔɔ la mɛ. Sankaŋa mea nɔɔ poan, ba zo’e zo’e yuun pã’aseri la bamea ge yeti ba san yeen dekɛ bamea pa’asɛ pu’usegɔ malema poan ge ita kaabegɔ, Naayinɛ puurɛ wan pee.​—Magaha 21:3; Hosea 6:6; Mika 6:6, 7.

 Mika saŋa la yuun kɔbesi pooren ti Yezu yuun tɔɣɛ ti, a Sɔ la puurɛ ni pee mɛ la sɛba n tari nɔŋerɛ, tontɔɔ tuuma la nimbɔ̃zore ge A puurɛ ka pee la sɛba n yeen ita sɛla ti ba basɛ ti nɛreba baŋɛ ti bamam pu’useri la Naayinɛ. (Matu 9:13; 22:37-39; 23:23) Yezu yetɔɣum la soŋɛ to mɛ ti to baŋɛ Naayinɛ n boti a nɛreba ita sɛla zina beere wa.

 Bisɛ vidiyo gi’a wa nyɛ Mika gɔŋɔ la yelekpina.