BAABULE KAALEGƆ ZƐ’ƐSI VUURƐ

Arom 10:13—“Yi’ira Daana La Yu’urɛ”

ŊMƐ

“Se’em woo n yi’iri Yehowa yu’urɛ la wan nyɛ fãarɛ.”—Arom 10:13, New World Translation.

“Se’em woo n wan yi’ira Daana la yu’urɛ la wan nyɛ fãarɛ.”—Arom 10:13, King James Version.

Arom 10:13 Vuurɛ

Naayinɛ ka gãseri nɛreba. A bo nɛra woo la yɔ’ɔ ti a nyɛ fãarɛ la daarewoo nyɔvore la ka pakɛ la eŋa n ze’ele teŋsɛka, buuri sɛka bii eŋa n de nɛresɛka taaba. To san wan nyɛ nyuurɔ, la nari ti to yi’ira Gaŋɛ Za’a Naayinɛ yumɛŋɛrɛ la n de Yehowa la. a—Yooma 83:18.

Baabule la poan, to ‘yi’iri Yehowa yu’urɛ la’ vuurɛ yeen daɣena la to mina Naayinɛ yu’urɛ ge to tari dɛ tuna tuuma to pu’usegɔ poan. (Yooma 116:12-14) La pa’alɛ ti to tari la sakerɛ Naayinɛ poan ge dekɛ tomea delum en ti a soŋɛ to.—Yooma 20:7; 99:6.

Naayinɛ yu’urɛ la yele yuun pakɛ Yezu Krista mɛ. Yezu n yuun yeti a pa’alɛ a podɔleba la zusega la, a yuun pɔsɛ mɛ yeti: “To Sɔ n boe saazuo ha, ho yu’urɛ nara pɛnka” bii ana zilam. (Matu 6:9) Yezu yuun le pa’alɛ ti to san wan nyɛ daarewoo nyɔvore, la nari ti to mina Yehowa, nana ge me nɔŋɛ en.—Yon 17:3, 6, 26.

Beni n sɔi ti to wan ta’an yeti “Daana la” ti ba tɔɣɛ a yele Arom 10:13 King James Version la poan la dela Yehowa? Se’ere n sɔi la kaalegɔ zɛ’an wa ze’ele la Yoel 2:32 poan, bilam Naayinɛ yu’urɛ la n boi Hebrew gulesegɔ b la poan ge daɣɛ a na’asegɔ yu’urɛ n de “Daana” la.

Arom 10:13 Yelesum

Arom azuo 10 la poan, Baabule la pa’alɛ ti la nari ti to tara sakerɛ Yezu Krista poan ta’an tara bɔnsoŋa la Naayinɛ. (Arom 10:9) Putɛdena wa mea nɔɔ n boi Old Testament la gulesegɔ zo’e zo’e poan. Nɛra n tari sakerɛ ni “tɔgɛ” bii mɔɔlɛ fãarɛ yelesoma la bo sɛba n ka tari sakerɛ la mɛ. Bala wan bo nɛreba yɔ’ɔ ti ba me tara sakerɛ n wan basɛ ti ba nyɛ vom.—Arom 10:10, 14, 15, 17.

Kaalɛ Arom a zuo 10 teŋanɔɔrɛ yelesum la, la cross-references n boi New World Translation la poan.

a Naayinɛ yu’urɛ la boi diimi Baabule gɔnɔ poan la sugumnɔɔre 7,000. Hebrew yetɔɣum poan, Naayinɛ yu’urɛ tari la kuusi banaasi ti ba yi’ira Tetragrammaton. Saŋa zo’e zo’e ba ni lerege yu’urɛ wa la “Jehovah” Solemiine poan ge gɔnmi’ileba basɛba lerege dɛ la “Yahweh.”

b La ta’an dɛna ti Kristakɔma sɛba n gulesɛ Baabule la yuun ni dekɛ Naayinɛ yu’urɛ la tum tuuma mɛ ba san gulesa yɛla n boi “Old Testament” la ti yu’urɛ la bɔna bim la. The Anchor Bible Dictionary la yeti: “Yɛla ase’a pa’alɛ ti, se’em ma’a ti ba yuun gulesa NT la, O[ld] T[estament] gulesegɔ se’a n boi N[ew] T[estament] la poan la za’a bii basɛba yuun tari Tetragrammaton la n de Naayinɛ yu’urɛ Yahweh la mɛ.” (Volume 6, gɔnlaka 392) Ho san bɔta ho baŋɛ yɛla pa’asɛ, bisɛ “The Divine Name in the Christian Greek Scriptures” n boi New World Translation of the Holy Scriptures study edition Appendix A5 la poan. Appendix C2 la pa’alɛ la Baabule se’a ti Naayinɛ yu’urɛ bɔna Arom 10:13 poan.