“Da fabeli ya sɛsɛla ge sɛla woo poan zusa, bɛlena ge ŋmɛ’ɛra nupu’ɔ ge basɛ ti Naayinɛ baŋɛ ya suure yele ti Naayinɛ suma’asum la n gani asaala bɔkerɛ la wan gu ya suure ti ya tara putɛsonɛ Krista Yezu poan.”​—Filipi 4:6, 7, New World Translation.

 “Da fabeli ya sɛsɛla ge ya bɔŋa woo poan zusa, bɛlena ge ŋmɛ’ɛra nupu’ɔ ge yele Naayinɛ sɛla n pakɛ ya. Ge Naayinɛ suma’asum la n gani asaala bɔkerɛ la wan gu ya suure ti ya tara puti’irɛ Krista Yezu poan.”​—Filipi 4:6, 7, New International Version.

 Yɛla san paara Naayinɛ yamesi ti la daana ba, ba pu’usɛ bo en ti a soŋɛ ba. Naayinɛ yeti a wan basɛ ti ba tara suma’asum, ti la soŋɛ ba ti ba tara putɛsonɛ ta’an ŋmibe yele la poan ge me tara bamea soŋa. Kaalegɔ zɛ’an 6 pa’alɛ ba wan zusɛ se’em ta’an nyɛ suma’asum.

 Beleŋo dela zusega ti nɛra tɔɣera bɛlena. Nɛra ta’an bɛlena Naayinɛ a san bɔna wuŋerɛ bii daaŋɔ poan wuu la yuun ani Yezu se’em la. (Hebru 5:7) Ba ni kɔ’ɔn taɣesa zusega kana taaba wa mɛ.

 Suure yɛla dela sɛla wana mɔpi ti to ɛɛra Naayinɛ zɛ’an. Naayinɛ yamesi wan ta’an ɛɛra ba suure yɛla “sɛla woo poan,” bii “bɔŋa woo poan.” Ge zusega ana wa nari ti la makɛ la Naayinɛ puti’irɛ n boti sɛla Baabule la poan.​—1 Yon 5:14.

 Nupu’ɔ zusega dela sɛla ti to ita pa’ala ti to puurɛ pee ya la sɛla ti Naayinɛ eŋɛ bo to ge wan le eŋɛ pa’asɛ la. To san ti’isa sɛla n sɔi ti la nara ti to ŋmɛ nupu’ɔ bo Naayinɛ, bala wan basɛ ti to tara pupeelum daarewoo.​—1 Tesalonika 5:16-18.

 Naayinɛ ni bo a nɛreba la suma’asum ti la pa’alɛ ti a kelese ba zusega la. “Naayinɛ suma’asum la” pa’alɛ la to suure n gã ma’asum la to ani tapilapi la en la. (Arom 15:13; Filipi 4:9) Suma’asum buna wa “gani asaala bɔkerɛ” mɛ, se’ere n sɔi la bu ze’ele la Naayinɛ zɛ’an ge me wan soŋɛ tɔ gana to ti’iseri se’em.

 Kaalegɔ zɛ’an wa yeti Naayinɛ suma’asum la wan gu to sunya. Greek yelebire la ti ba lerege ti “gu” la pa’alɛ la sogɛpa n ni tigese bamea gu teŋa se’em la. Bala mea nɔɔ ti Naayinɛ suma’asum la gu’ura nɛra suure la a puti’irɛ. La soŋeri en mɛ ti a kan ba’ɛ fabela yeledaaŋɔ san paɛ en.

 Naayinɛ suma’asum la gu’uri to mɛ “Krista Yezu poan” se’ere n sɔi la, Yezu poan ti to wan ta’an tara bɔnsoŋa la Naayinɛ. Yezu yuun ki mɛ faaɛ nɛreba be’em poan basɛ. To san tara sakerɛ a poan, Naayinɛ wan kã bo to. (Hebru 11:6) To wan ta’an doose la Yezu poan paɛ Naayinɛ. Yezu yuun yeti: “Nɛra ka boe n wan ta’an keŋɛ mam Sɔ la zen’en, han dagana, a doohe la mam zen’en keŋɛ bini.”​—Yon 14:6; 16:23.

 Tuntuna Paul n yuun gulese Filipi gɔŋɔ wa bo Kristakɔma sɛba n boi Filipi teŋa la poan. a Gɔŋɔ wa zuo 4 poan Paul kpemese mabiisi la giile ti ba tara pupeelum ge me pɛ̃ɣɛ ba la ba yɛri yɛri bɔ’a la n bo’ori en pupeelum la. (Filipi 4:4, 10, 18) A pa’alɛ la zusega n wan basɛ ti to tara Naayinɛ suma’asum la se’em ge me pa’alɛ to puti’irɛ la to itigɔ n nari la ana se’em ti “Yenɛ se’em n bahere te to tara sunma’ahom la” soŋɛ tɔ.​—Filipi 4:8, 9.