“Sɛba n dekɛ bamesi delum Yehowa la wan le tara paŋa. Ba wan ɛ̃ɣera kuresa wuu tuguro. Ba wan zɔta ge kan bãlɛ; ba wan kena ge kan taregɛ.”​—Isaiah 40:31, New World Translation.

 “Sɛba n dekɛ bamesi delum DAANA la wan le tara paŋa. Ba wan ɛ̃ɣera kuresa wuu tuguro. Ba wan zɔta ge kan bãlɛ; ba wan kena ge kan malum taregɛ.”​—Isaiah 40:31, New King James Version.

 Yehowa a Naayinɛ basɛ ti a nɛreba baŋɛ ti eŋa wan bo ba paŋa ti ba ta’an ŋmibe yelese’ere woo n wan paɛ ba poan.

 “Sɛba n dekɛ bamesi delum Yehowa la wan le tara paŋa.” Sɛba n dekɛ bamesi delum Naayinɛ nari ti ba mina ti a wan sirum soŋɛ ba. (Magaha 3:5, 6) Sore deyima poan ti Naayinɛ wan ta’an bo sɛba n pu’useri en la paŋa dela eŋa n tari a zilam vo’osum la bɔ’ɔra ba.​—Luke 11:13.

 “Ba wan ɛɣera kuresa wuu tuguro.” Makerɛ wa pa’alɛ la Naayinɛ paŋa la n wan ta’an tum nɛra poan se’em. Tuguho ni bɔta la a ɛ̃ɣera kusebetuulega n boi zɛ’an ti ba yi’ira ti thermals la. Bilam ti a ni ta’an yɛregɛ a kelumpaɣesi la. Tuguho san ta bɔna thermal zɛ’an, a ni yɛregɛ a kelumpaɣesi la mɛ ge ɛ̃ɣera kaara thermal la nyaa ni ɛ̃ɣera bala zɔna saazuo. Tuguro san bɔna thermal ayima poan ta loŋe ayima, ba ta’an ni dekɛ awa zo’e zo’e bɔna saazuo, ɛ̃ɣera bala ge ka taregera, ta’an ta paɛ zɛ’an ti ba yɛ’ɛsa la.

 “Ba wan zɔta ge kan bãlɛ.” Vom poan yɛla ta’an basɛ ti to giila kɔ’ɔsɛ ti to suure sa’am ge Naayinɛ n bo’ori to paŋa la, to wan ta’an ŋmibera. Naayinɛ vo’osum la wan ta’an bo to paŋa ti to eŋɛ sɛla n nari, hali la san puɣum ana biɣi biɣi la se’em me. Tuuntuna Paul n ŋmibe gurebisɛ poan paa la, gulesɛ yeti: “Sɛla woo poan mam tari paŋa mɛ doose la se’emdaana n bo’ori mam paŋa la zuo.”​—Filipi 4:13.

 Naayinɛ n basɛ ti nɔdɛ’ɛsa Isaiah gulesɛ yele ana wa yuun kɔbesɛka n pa’asɛ bunii G.Y.B. poan. La boi bim ti Yehowa yuun dekɛ yele ana kpemese la Yudadoma la ti ba yuun dekɛ ba keŋɛ Babilon ti ba ta bɔna yuun 70 la giila ge la me kpemeseri la Yehowa yamesi woo giila. Yudadoma la n yuun ta ze’ele yamenɛ poan tulege lebe bamea tiŋa la, ba yuun nyɛ Naayinɛ yetɔɣum wa n tum tuuma se’em mɛ. (Isaiah 40:1-3) Naayinɛ n yuun bo ba paŋa ti ba ta’an keŋɛ sarɔwoko ze’ele b Babilon paɛ Yerusalem yuun 537 G.Y.B.​—Isaiah 40:29.