BAABULE KAALEGƆ ZƐ’ƐSI VUURƐ

Isaiah 42:8—“Mam N De DAANA La”

ŊMƐ

“Mam n de Yehowa. N yu’urɛ n bala; Mam kan dekɛ n gilema bo nɛra bii dekɛ n na’asegɔ bo sɛla ti ba yaɣum.”—Isaiah 42:8, New World Translation.

“Mam n de DAANA la: mam yu’urɛ n bala: n me kan dekɛ n gilema bo nɛra bii dekɛ n na’asegɔ bo sɛla ti ba yaɣum.”—Isaiah 42:8, King James Version.

Isaiah 42:8 Vuurɛ

Naayinɛ pa’alɛ to la a yumɛŋɛrɛ ge le yeti, to da pu’usa eŋa ge kaabera baɣa.

Naayinɛ yumɛŋɛrɛ wa, nɛraba zo’e zo’e ni lerege dɛ la “Jehovah” Solemiine poan. a (Yɛhega 3:14, 15) La boi bim ti Naayinɛ yu’urɛ la boi Old Testament (Hebrew-Aramaic Gulesegɔ) la poan paɛ sugumnɔɔrɛ 7000 ge leregeredoma basɛba ni tee dekɛ la na’asegɔ yu’urɛ “DAANA” (kuusi kãra poan) gulesɛ. Makerɛ ayima boi la Yooma 110:1 n de yetɔɣebiŋere n tɔɣeri Yehowa la Yezu yele. King James Version la yeti: “DAANA la [Yehowa] yele mam Daana [Yezu].” (Tooma 2:34-36) New World Translation la dekɛ Naayinɛ yu’urɛ la tum tuuma zɛse’esi n nari, la wan eŋɛ se’em ti to kan bu’ura “Daana” bayi la n de sɛba. La yeti: “Yehowa yele mam Daana la yeti: ‘Zi’ire mam zuɔ nu’o gura se’em ma’a ti n wan dekɛ ho dinedoma eŋɛ ho nu’usin.’”

Gɔnmi’ileba basɛba sakɛ ti Naayinɛ yu’urɛ la vuurɛ dela “Eŋa N Basɛ Ti La Ita.” Yu’urɛ wa dela yelemɛŋɛrɛ Naayinɛ la ma’a denɛ se’ere n sɔi la, eŋa ma’a n wan ta’an basɛ ti amea bii a naaŋɔ lɔɣɔrɔ eŋɛ sɛla n wan basɛ ti a puti’irɛ tum.

Yehowa dela to Naaŋɔdaana eŋa ma’a n de yelemɛŋɛrɛ Naayinɛ nara ti to pu’usa. Nɛra, baɣa bii sɛla wɔsum ka boi nara to pu’usegɔ.—Yɛhega 20:2-6; 34:14; 1 Yon 5:21.

Isaiah 42:8 Yelesum

Isaiah a zuo 42 pɔsega kaalegɔ zɛ’ɛsi la tɔɣɛ la Yehowa n ‘loe mina’ la tuuma yele. Yameŋa wa ti Naayinɛ loe la, “wan tare yelemɛŋɛrɛ wa’an teŋhe poan.” (Isaiah 42:1) Naayinɛ yuun tɔɣɛ pu’ulumbiŋere wa yele ti: ‘Nananawa, n wan le yele sɛla n wan eŋɛ. N wan yele ya ge ti la nan puɣum ka eŋɛ.’ (Isaiah 42:9) Yetɔɣebiŋere la n tɔɣeri ba ‘loe mina’ yele la yuun tum tuuma mɛ yunkɔbesi zo’e zo’e pooren se’em ma’a ti Messiah bii Krista la wa’an teŋgɔŋɔ wa zuo na tum a Na’am tuuma la.—Matu 3:16, 17; 12:15-21.

Baabule Ase’a N Lerege Isaiah 42:8 Se’em

“Mam n de Yehowa. N yu’urɛ n bala; Mam kan dekɛ n gilema bo nɛra bii dekɛ n na’asegɔ bo sɛla ti ba yaɣum.”—The ‘Holy Scriptures,’ by J. N. Darby.

“Mam n de Yehowa. N yu’urɛ n bala; Mam kan dekɛ n gilema bo nɛra bii dekɛ n na’asegɔ bo sɛla ti ba maalɛ.”—A Literal Translation of the Bible.

a Hebru yetɔɣum poan, ba dekɛ la kɔnya’asi anaasi, YHWH gulesɛ Naayinɛ yu’urɛ la Solemiine poan. Leregeredoma basɛba lerege Naayinɛ yu’urɛ la “Yahweh” Solemiine poan.” Ho san bɔta ho nyɛ yɛla zo’e zo’e, bisɛ “The Divine Name in the Hebrew Scriptures” n boi Appendix A4, New World Translation of the Holy Scriptures study edition la poan.