“Na’asa ho sɔ la ho ma la wan eŋɛ se’em ti ho vɔna yue teŋsɛka ti Yehowa ya Naayinɛ la wan dekɛ bo ya la poan.”​—Yɛhega 20:12, New World Translation.

 “Na’asa ho sɔ la ho ma: bala ti ho wan tara vom woko teŋsɛka ti ya DAANA ya Naayinɛ la dekera bɔ’ɔra ya la poan.”—Yɛhega 20:12, King James Version.

 Naayinɛ yuun bo daami Israeldoma la nɔɔrɛ ti ba na’asa ba dɔɣereba. Eŋa n yuun dekɛ pu’ulumbiŋere pa’asɛ nɔɔrɛ wa poan la yuun le pa’alɛ ba la se’ere n sɔi ti la nara ti ba nam dɛ. La boi bim ti Kristakɔma ka doli Moses Lɔɔ la ti Naayinɛ yuun dekɛ bo Israeldoma la ge Naayinɛ pa’alegɔ la ka tee. Naayinɛ Lɔɔ la naresum yɛla la kelum tuna tuuma mɛ ge me dɛna ninmɔ’ɔrɛ bɔ’ɔra Kristakɔma.​—Kolose 3:20.

 Bunbilipaalesi la bunkureba na’asera ba dɔɣereba mɛ ba san nana ba ge bɔ’ɔra ba gilema. (Malema 19:3; Magaha 1:8) Hali kɔma san ta zo’e kutɛ ge nyaa tara bamea yɛa, ba ni kelum nɔŋɛ ge soŋera ba dɔɣereba mɛ. Makerɛ, ba ni kelum bisera ba dɔɣereba mɛ ba san kuregɛ hali soŋera ba ligeri yɛla poan.​—Matu 15:4-6; 1 Timoti 5:4, 8.

 Daalɛ basɛ ti, Israeldoma kɔma yuun nari ti ba na’asa ba sɔ la ba ma ti la pa’alɛ ti ba nam ba ma la pɛregerɛ tuunɛ deo la poan. (Magaha 6:20; 19:26) Kɔma nari ti ba ita bala mea nɔɔ zina beere wa.

 Nɔɔrɛ la n de kɔma na’asa ba dɔɣereba la kɔ’ɔn tara beene mɛ. Israeldoma kɔma yuun ka nari ti ba nam ba dɔɣereba bii nɛra se’em nɔɔrɛ bala san wan basɛ ti ba zaɣesɛ Naayinɛ nɔɔrɛ. (Tɛɛnhegɔ 13:6-8) Bala mea nɔɔ, ti zina beere wa Kristakɔma ni “nam la Yenɛ nɔɔrɛ ge dagɛ la nɛreba nɔya.”​—Tooma 5:29.

 Naayinɛ Lɔɔ la ti a yuun dekɛ bo Israeldoma la poan, a yuun pu’ulumbiŋe ti kɔmsɛba n na’aseri ba dɔɣereba wan “tara vom woko . . . te sɛla woo ana soŋa bo” ba teŋsɛka ti Naayinɛ dekɛ bo ba la poan. (Tɛɛnhegɔ 5:16) Tubedɔlegerɛ seko n wan paɛ kɔmsɛba n zaɣesɛ Naayinɛ lɔɔ ge ita kpenkpasi la ba dɔɣereba la kan paɛ bamam. (Tɛɛnhegɔ 21:18-21) Lɔɔ la naresum yɛla la ka tee. (Epesus 6:1-3) To de bunbilipaalesi bii bunkureba woo, to wan eŋɛ kãlɛ bo to Naaŋɔdaana la. Kɔmsɛba n nani ba dɔɣereba la Naayinɛ wan tara vom woko wuu eŋa n pu’ulumbiŋe se’em la. Yelemɛŋɛrɛ, ba tari puti’irɛ ti ba wan ta vɔna daarewoo.​—1 Timoti 4:8; 6:18, 19.

 Nɔɔrɛ yelesum la n boi Yɛhega 20:12 la ti ba gulesɛ ku zɛ’an Nɔya Pia bii Yetɔɣum Pia la poan la pa’alɛ la ninmɔ’ɔrɛ yele. (Yɛhega 20:1-17) Nɔse’a n boi ku nɛŋa la, pa’alɛ la Israeldoma la n nari ti ba ita sɛla bɔ’ɔra Naayinɛ n de wuu ba pu’usa eŋa ma’a la. Nɔse’a n taɣelɛ ku la pa’alɛ la bamam la nɛreba teŋasuka n nari ti la ani se’em n de wuu ba tara yelemɛŋɛrɛ pɔɣedire poan ge me da zuura. Bala la, nɔɔrɛ la n de “na’asa ho sɔ la ho ma” la basɛ ti nɔya bayi la naɛ mɛ la taaba.