BAABULE KAALEGƆ ZƐ’ƐSI VUURƐ

Yeremia 29:11—“N Mi Putɛse’a Ti N Tara Bɔ’ɔra Ya La Mɛ”

ŊMƐ

“Yehowa a yeti, ‘mam mi putɛse’a ti n tara bɔ’ɔra ya la mɛ. La dela suma’asum puti’irɛ ge daɣɛ sa’aŋɔ, ti n basɛ ti ya tara beere sa’am puti’irɛ.’”—Yeremia 29:11, New World Translation.

“DAANA la yeti, ‘n mi putɛse’a ti n tara bɔ’ɔra ya la mɛ, a dela putɛse’a n wan soŋɛ ya ge daɣɛ putɛse’a n wan sa’am ya, a dela putɛse’a n wan basɛ ti la beere ta ana ya soŋa.’”—Yeremia 29:11, New International Version.

Yeremia 29:11 Vuurɛ

Yehowa Naayinɛ yuun pu’ulumbiŋe ti a wan basɛ ti a nɛreba la tara suma’asum beere sa’am. La boi bim ti ba yuun gulese bo la daami nɛreba ge yelesum wa kelum pa’ali la Naayinɛ n tari putɛse’a zina beere wa. Eŋa n de “Yenɛ se’em n bahere te nɛreba din’inha sunya gura.” (Arom 15:13) Yelemɛŋɛrɛ, a yuun gulese pu’ulumbiŋa wa eŋɛ la Baabule poan la wan eŋɛ se’em “te to din’inha suunre gura” vom somɔ beere sa’am.—Arom 15:4.

Yeremia 29:11 Yelesum

Yelesum wa boi la gɔŋɔ la ti ba yuun gulese bo Israeldoma la ti ba yuun dekɛ ba keŋɛ Babilon yamenɛ poan la. b (Yeremia 29:1) Naayinɛ yuun yele ba ti ba wan yue yamenɛ la poan, bala la ba mɛ ya yia, kɔ vatɔ ge dɔɣɛ kɔma. (Yeremia 29:4-9) Ge Naayinɛ yuun le yeti: “Yuum pihiyopɔe han ta paɛ ya Kaldea poan, n wan wa’an ya zen’en na, tara ya kule [Yerusalem] na, te n nɔɔrɛ la te n pu’ulɛ bo ya la eŋɛ sera.” (Yeremia 29:10) Naayinɛ yuun basɛ ti ba tara sakerɛ ti a kan tamɛ ba yele ge a wan sirum tari ba kule.—Yeremia 31:16, 17.

Naayinɛ yuun tum eŋa n yuun pu’ulum sɛla biŋe Israeldoma la mɛ. Wuu eŋa n yuun yele se’em la, Persia Naba Kirus yuun zabɛ nyaŋɛ Babilon mɛ. (Isaiah 45:1, 2; Yeremia 51:30-32) Bala pooren, Kirus yuun bo yɔ’ɔ ti Yudadoma la lebe kule. Ba yamenɛ la poan yuun 70 pooren la ti ba yuun lebe kule Yerusalem.—2 Yelebiŋ’a 36:20-23; Ezra 3:1.

Pu’ulumbiŋere la n boi Yeremia 29:11 la n yuun tum tuuma la basɛ ti sɛba n dekɛ bamea delum Naayinɛ pu’ulumbiŋa zina beere wa la tara la sakerɛ. Pu’ulumbiŋa wa ayima dela, suma’asum wan ta bɔna teŋgɔŋɔ wa za’a se’em ma’a ti Yezu Krista bisera Naayinɛ Na’am la.—Yooma 37:10, 11, 29; Isaiah 55:11; Matu 6:10.

Nɛreba N Ti’isɛ Se’em La Yeremia 29:11

Nɛreba N Ti’isɛ Se’em: Naayinɛ ‘mi’ sɛla ti a maasum bo nɛra ayima ayima woo mɛ.

Yelemɛŋɛrɛ: Naayinɛ boi nɛra woo la yɔ’ɔ ti ba loe ba wan ita sɛla ba vom poan. A yuun tɔɣɛ yelese’a n boi Yeremia 29:11 la bo la Israeldoma la za’a ge me yuun bɔta ti ba za’a ta tara suma’asum beere sa’am. (Yeremia 29:4) Ge Naayinɛ yuun bo nɛra woo la yɔ’ɔ ti ba loe sɛla ti ba bɔta ta’an nyɛ nyuurɔ a pu’ulumbiŋa la poan. (Tɛɛnhegɔ 30:19, 20; Yeremia 29:32) Nɛresɛba n yuun loe ti ba ɛ Naayinɛ la yuun yese la ba suure za’a zusɛ en.— Yeremia 29:12, 13.

Nɛreba N Ti’isɛ Se’em: Naayinɛ wan soŋɛ a nɛreba ti ba dɛna buntateba.

Yelemɛŋɛrɛ: Hebru yelebire la n boi Yeremia 29:11 poan la ti Baabule ase’a lerege ti “soŋɛ” la vuurɛ dela “suma’asum, imma’asum la pupeelum.” Yelesum la poan, Naayinɛ yuun pu’ulumbiŋe ti a wan basɛ ti Israeldoma la n boi yamenɛ poan la tara suma’asum la vom somɔ ge daɣɛ taresum. Teŋa la wan kelum bɔna ge ti nɛreba la me wan ta lebe kule Yerusalem.—Yeremia 29:4-10.

Kaalɛ Yeremia a zuo 29 teŋanɔɔrɛ yelesum la, la cross-references n boi New World Translation la poan.

a Yehowa dela Naayinɛ yumɛŋɛrɛ.—Yooma 83:18 NWT.

b The Expositor’s Bible Commentary la tɔɣɛ Yeremia 29:11 yele ti: “Yelesum wa dela pu’ulumbiŋere n ka tari makerɛ Baabule la poan n pa’alɛ Yahweh [Yehowa] n yuun zɔ a yamese wa nimbɔ’ɔ se’em ge basɛ ti ba tara beere sa’am puti’irɛ.”—Volume 7, gɔnlaka 360.